.

صوتو ⭐⭐⭐⭐

علقو .....

قصة

اجتياح

الفصل : ٢٤

الكاتبة ندى البياتي

عزيز

كدرت اقنع  همام يرجع وياي علمود جدي باقي وحده هناك بين الخياة والموت  جنت اكدر ارجع وحدي بس اني وحدي ما اكدر اسوي شي همام عنده خبرة ويكدر يدافع عني و زيد  الله اعلم وين متواجد  وهم اذا عرف بية راجع ما راح يقبل

اول ما وصلنا بغداد ولأول مرة حسيت اني ما انتمي الها يمكن جنت خايف لا انقتل واني وعدت سيري ارجع الها   

جنا متنكرين بزي كردي ولافين الشماغ على راسنا  حتى نخفي هويتنا  ماجنت اعرف اذا راح تمشي عليهم لو لا بس اكيد ما راح يخطر على بالهم راح نرحع بصفتنا كراد  وفوكاه مانعرف ولاطگة كردي  بس كاكا عزيز ،  و سر چاو  نزلت على العكازة امشي عوج  وحاني ضهري  نتر علي همام وهو يعدل بشماغه الي لافه على راسه

همام :  ومو احسك جاي تبالغ  وتمثيلك اوفر  وتخلي  المايدري هم يدري

عزيز :   احسن حتى لاننكشف اكيد المستشفى مراقبة ... مشينا وهمام يتأفأف مني  مدري يستنكف مني

دخلنا  لغرفة جدي  جان وحده  ومبين عليه ذبلان والمرض ماخذ كل حيله  من شافنا   استغرب  منا بس خلا نظراته ثابتة مابين فضوله حجى بدون خلگ

اصلان :  لا تحاولون  جيتكم مثل سابقتها ما راح تحصلون شي

عزيز

الي فهمته من كلامه   جاين يدورون علينا هنا بس ممحصلين خبر  شوفت جدي بهذا الحال خلتني ابلع ريجي واتغاضة عن كل سيأته عكس همام الي جانت نظراته  مابيها اي محنة اله  ومحمله مسؤلية كل الصار 

اتقربت منه  وتلمست جف ايده بطريقة بس هو يعرفها 

فتح عيونه على وسعهن ولمعت عيونه   اخذ نفس عميق  وهمس بصوت مرتجف  مثل الخايف لا احد يسمعه 

اصلان : عزيز گلبي

عزيز

حركت راسي بـ أي   باوع لهمام وهمس بنفس اللهفة امين   انتو بخير وما صايبكم اذى

عزيز : لاتخاف علينا احنى كدها... شديت على قبضته حتى اطمنه

اصلان : عبالي  اخذوكم مني اجو اكثر من مرة يسألون عليكم جانو ناوين يكسروني  بيكم

همام : لعد شتريد ماضيك كله مسجل محد ناسيه 

اصلان : صحيح كلامك بس ما اريد يأذونكم بسببي خل يأذوني الي خل ياخذون روحي بس مايتقربون عليكم  ما اريد اشوفكم متوفين گبلي  هذا الشي راح يكسرني للموت

عزيز : يلا جدي گوم خل ناخذك ويانا  ونروح

همام : خوما بكيفك تاخذه غير الطبيب يسمحله ماتشوفه صاير سكراب 

عزيز: لا تخاف عليه ادري بيه يمثل لگى راحة هنا ما  لاگيها بالقرية بكل حياته

اصلان : عوفو الطلعة مالتي   وتعالو اگعدو اريد اسولف وياكم اخاف اموت  وتضيع عنكم الحقيقة

عزيز : يا حقيقة

اصلان : حقيقة امكم  لحد ذاك اليوم واني جنت اضن امكم خاينة وماتستحق تكون زوجة لأبني ولا جنت قابل على زواجهم لأنها من ام شاردة من اهلها وعايشة وحدهة 

وادري بأبني مثل عزيز گلبه طيب بساع اتعاطف وياها  بدون ما يسأل عنها او يمكن سائل عنها بس متغاضي عن كلشي يخصها وتزوجها   

قاطعه همام : اذا تريدنا نعيش سوى لاتفتح هذا الموضوع مرة ثانية  وخليه مغلق  لأن كل واحد يريد يبرأ نفسه على حساب الثاني

تجاهله واسترسل بكلامه  : بس امكم طلعت بريئة

ومو مثل ماجنت متوقعهة   المرة الي شفتها ويا شخص اخر غير ابوكم هي وحدة ثانية

وهي نفسهة الي المرة تشبه امك

عزيز : قصدك ام سليم !!

اصلان : اي هي  ماجنت اعرف اكو وحدة تشبهة وظلمتهة  طعنت بيهة جدام ابوكم  والحقد غلب علينا اثنينا بذيج السنين  والضحية الي راحت بيها هي امكم.

ما اكول الكم اني بريئ وغلطت بحقها

بس اي شخص يشوف هذا الشي يفكر نفس تفكيري ابني المدلل الي انطيه عمري وروحي ولا اشوفه متأذي هاي المرة تكسر بيه بعدما وثق بيها وستر عليها رغم اعتراضاتي

همام : ليش بس هي  الك ايد بموتهة  !!!

والمئات مدري الألافات الي خسرو حياتهم وتركو وراهم ايتام وناس مقهورة بسببك ذولا  مايهمونك !؟ وماتريد تبرأ نفسك جدامهم

اصلان : صعب اشرحلك هذا الموضوع لأنه بيني وبين ربي ان شاء يسامحني وان شاء يعاقبني

بس لأن اريد ابري نفسي يمكم حتى لا تظلموني انتم هم بموت اهلكم

عزيز :  يعني امي جانت  بريئة !!

اصلان : بريئة ومظلومة واثنينا  شلنا ذنبها اني وابوك 

همام : وشنو فايدة هسة تحجيلنا  كلامك ماراح يرجعهم ولا يرجع عمرنا الراح

اصلان: صح ما راح يرجع شي بس على الاقل لاتظلمون امكم وهي بگبرها  كافي اني ظلمتها وراح اشيل ذنبها لباقي حياتي

همام :  سد الموضوع لأنه يأذيني  على طول جنت حاقد عليهم لأن ذابيني وخلوني اعيش بذل ومهانة بهالدنيا سويت اشياء ماجنت رايد اسويها بس جنت حياة هادئة  حياة بعيدة عن الاذى  جنت كل ما اتذكر شلون عشت  حياتي  اتمنى الهم  الجحيم ويتعذبون مثل ما اني اتعذبت وشفت الويل  لا تصدك  بالشكل الخارجي مالي اني من جوة خراب  كلشي بية متحطم وضعيف  لدرجة اخاف ابقى وحدي  بمكان  كل هذا منو المسؤول عنه انت لو ابوي لو منو

اصلان : تمام راح اسده نحجي  بعدين بس  روحو هسة ذولا مراقبين المكان ما اريد يشوكون بيكم

عزيز : وانت منو يبقى يمك

اصلان : اني ما علي شي مادام شفتكم سالمين  روحو لاتجون بعد

عزيز

سمعنا كلام جدي  وطلعنا من   الغرفة  بالممر  شفنا عامل النضافة قريب جدا من باب غرفة جدي   وضعه مشبوه مو مريح  مركز علينا وعايف الشغل

من عبرنه  عاف الماسحة وخلا ايده بجيبه اثنينا انتبهنا  عليه  اكيد هذا مخلينه يراقب جدي

همس لي همام :  احسب للثلاثة  وبعدها اشكد مابيك حيل اركض ولاتخليهم يلزمونك 

عزيز : ما اكو خطة بديلة

همام :  هسة ما اكو اذا ماتريد يلزمونك اركض  واحد اثنين ثلاثة

عزيز

من وصل لرقم ثلاثة جريناهة بركضة قوية   بس حضنا الأغبر  الطريق الي رحنة منه كلهم تلگونة بيه غيرنا مسارنا  يمكن ركضنا بكل ردهات المستشفى حسيت عمليتي انشگت بعد مابية حيل اركض  وگفت  اخذ نفس  دفعني همام  بدون  تفكير بوحدة من الصالات  وهو ما ادري وين راح   و اول  ما اندار وجان اشوف النسوان  كلها تتولد  وياهن ممرضات ودكتورات ونسوان واكفات  يمهن انتبهت هاي صالة ولادة  بعدني ما حاجي جان  تگب العيطة مالتهن من فشلتي رأسًا خليت ايدي على عيوني  الدكتورات يرزلن ويطردن  بية  

_ اطلع برى وين داخل هنا  ماتستحي

عزيز

وگعنلي ذاك الغلط الي يخلي الواحد يدفن نفسه وهو حي  ماعافني گامن يدفعن لأن اني واكف ما اتحرك والخلگ كلها مجطلة وتتولد

خفت اطلع ويلزموني  حاجيت الدكتورات واني  مغمض  عيوني   كتلهن اكو جماعة يركضون وراي ويريدون يقتلوني  اشرت على مكان اصابتي نازفة يلا شوي  اتساهلن وياي  طلعت وحدة منهن وشافت الردهة ما اكو احد  صاحت علي اطلع 

ماكدرت وحدة من الوجودات حجت ماعرفتها مني لأن مغمض عيوني 

_  خايبات انطنه عبا خل يطلع محد راح يعرفه وتكشف على اعراضنا  وشاف المستور

عزيزة : اي والله خالة خلف الله عليج   بلجي كون تجبين توم ولد  بلجي شي اضم روحي بيه

_  وليييييييي ولك اني حتى كرهت الخلفة   من ورة  جنتي صار الها عشر ساعات تطلك  تتولد وترست الدنيا عياط عبالك بس هي تولد  هي مال خلفة هي بصخلتين ما اسرح بيها بس شسوي لأبني الاغبر الا يريد مرة لو يحرگ روحه ويخلينا

عزيز

ردت عليها جنتها بصوت مبحوح من الوجع والصياح : عمة لو مخليته يحرگ روحه ولا جاي خاطبني  وشايفة هذا اليوم  .. كرصتهة عمتها من زندها وگالت

_ دشوف اللواتة لو حارك روحه ولا محبلج من تنامين وياه ماتكولين هيج هسة كمتي تريدين يحرك روحه علمود حضرة جنابج  ما تتولدين جان اخذتي مانع صخام

_والله عمة بالغلط صار هذا

_ يا غلط ولج هذا ثالث واحد وتكولين بالغلط  بس اني الج  منا وغاد راح احد حب المانع بتانكي المي اريد اشوف شلون تغلطون بعد

عزيز : خالة ولو اقاطعجن بس انطني العبا خل اطلع

_هاك يمة هاك 

عزيز_: مشكورة خالة 

نزعت اليشماغ وانطيته للمرة   و لفيت العبا على راسي وطلعت بس عيوني  حتى اشوف جدامي 

لحد ما طلعت من المستشفى كلها  واتوجهت للمكان الصفينا بيه السيارة صعدت  وقفلت البوب من الداخل و اخذت نفس عميق  عبالك طلعت من گبر  وما حسيت الا همام طلع لي من كرسي الورة هو هم جان ام مختل بيه

دخل زيد بالبداية استغرب منو ذولا بعدين عرفهم

زيد : صايرين ولد عشاير وكذا

اصلان : لمعلوماتك عشيرتنا جانت من اعرق العشاير بالعراق

همام : وانت اجيت ما خليت الهم هيبة حولتهم لناس مجرمين

اتصافحو ثلاثتهم  لما رجع زيد للعراق انشغل بجوازات سفر احفاده وبنته وبنفس الوقت خايف لا احد يتربص بيه ويقتلونه قبل لا يخلص الجوازات ويرجع الهن

بعد ما خلصن اخذهن بيده قرر يزور اصلان لأخر مرة ويطمن على  صحته  بس من حظه جانو عزيز وهمام هم موجودين  سأل  عزيز بستنكار لما شاف جنطته

عزيز : وين رايح 

زيد :  اجيت اودع جدكم لأن اليوم طيارتي

عزيز :: وين مسافر

زيد : اريد اخذ اجازة طويلة اني وبنتي واحفادي 

عزيز : احسن خوما تضل طول عمرك تصيد ارواح

زيد :  الأراوح الي صدتها بحياتي اكيد ما راح تتركني بحالي بس على الأقل  أأمن على حياة بنتي واولادهة بعدها خل يجون ياخذوني صحيح قبل لا اروح ابريني الذمة وحاللني واهبني

سألت بستنكار مايعرف شقصده : على شنو

زيد : سحبت فلوسك من البنك  واتصرفت بيهن

عزيز : يافلوس ؟؟

زيد : شبيك الـ ١٠٠٠ دولار الي اخذتهم اول ما اتشاوفنا

عزيز : حتى ناسيهن  اني هذني صارن لي لعنة يا ريتني ماشفتك وما شفتهن  اخذهن ما اريدهن تگشر بيهن

ضحك و ضربه على راسه : هسة صرت ما تريدهن من كتل روحه عليهن بالبداية

عزيز : جنت طمعان عبالي دور  وفضت راحت  اشعرفني تطلع من وراهن بلاوي 

باوع لساعته وگال : ديلا  ديرو بالكم على جدكم وعلى نفسكم  لاتضلون تترددون على بغداد هواي الأفضل تكطعون رجلكم منها لأن اذا احد لمحكم من جماعة ادريس  راح تروحون بيها 

عزيز : من ناخذ جدي ويانا بعد ما نجي

زيد : عفية

ودعهم وراح بقو عزيز وهمام

يترددون على جدهم كل جم يوم بشخصية شكل  لحد ما بالأخير سوو نفسهم

عدهم دار للمسنين وهدفهم هو رعاية كبار السن الي ماعدهم مأوى خرجوه بأمر  الطبيب  حتى ياخذونه وياهم للدار حسب ما قنعو الطبيب  لأنه ما عنده احد يعتني بيه و اولاده ذابينه بالشارع  ومحد يسأل عليه 

حجزو له اسعاف خاصة تاخذه حتى لايتعب بالطريق  واخذو وياهم علاجات اصافية لحالته لأنه صعب تتواجد بالقرية

قبل لا يصعد  بالأسعاف  گال الهم

اصلان : رجعوني القرية اريد اموت هناك 

همام : زحمة تموت اذا ما تموتنا كلنا  قبلك وتركص على گبورنا كلنا فرحًا

اصلان : اذا متو قبلي هذا راح يكون اقسى عقاب اتعاقبه عليه  واعرف بعدها الله مستحيل يغفر لي ذنوبي 

همام  : شيغفر ذنب ذنبين

اصلان : الله يغفر الذنوب جميعًا و ان شاء الله يغفر لي ذنوبي 

لما وصل للقرية  رجعت له الحياة  وانفرجت اساريره بشوفت حفيداته وعائلة ابو محمود 

نجوى

فرحتي جانت  اكثر من كلهم  لأنه كلشي بالنسبة لي  هو ابوي وامي واخواني الما شفتهم ولا عرفتهم  وخسارته تعني خسارة كل اهلي وناسي 

من نزل من السيارة  حظنته وكمت ابجي بشهگات ممصدگة رجع  بخير وسلامة  ما جنت اريد اعوف حظنه اريد اجلب بيه لأخر عمري 

لكن بعدوني عنه بحجة خل يرتاح بعدهة اجت سيري الي من بعد موت ابوهة ذبلت وما عادت نفس شكلهة القديم ومامتعلمة على حياة القرية  وخصوصًا عزيز وهمام عافونة هنا وهمة رجعو وحدهم

شكد ردنا نطلعهة من حالة الكآبة ما گدرنا قافلة على نفسهة  تبين النا هي بخير بس كلشي بيهة عكس الي تگوله

اصلان : البقية بحياتج بنتي رغم كلشي سواه يبقى ابني  وخسارته توجع گلبي

سيري : اصلًا كله سببك  ما عرفت تنطيه حب واهتمام

ما عرفت تسال شنو يحب وشنو  يريد بعمرك ماحسسته انه ابنك  ولازم تحبه وتعامله بحب وحنان ،

لا جنت حاسبه  مجرد خادم يمك ومستفاد منه بلاش

عزيز : سيري هسة مو وقتها

سكتت وراحت يم عزيز الي حاوطهة بأديه بكل حنان حتى يخفف عنها حزنهة

بعدين  ابو محمود من شاف الجو متوتر اقترح  ندخله جوة  حتى يرتاح الوگفة ماتفيده

دخلناه وگعدت يمه لازمة اديه  وكلي سرور هسة البيت صار له حياة برجعة جدي  وهمام  وعزيز حسيت بهاي الدقايق من اجمل ايام عمري  وما اريدهن يخلصن ويبقن طول العمر  

لليل اختفو عزيز وهمام واني واميرة وامهة و سيري واگفة ويانة نسوي عشة بمناسبة رجعة جدي صبينا عشى وگعدنا احنى  وبيت ابو محمود عائلة وحدة  وبعدهم ما راجعين ضل بالي عليهم.

همست لسيري : ماتعرفين وين راحو عزيز وهمام

سيري : لا 

نجوى : وين اختفو فجأة

سيري : مو جانو هنا  قبل ساعتين

نجوى : اي بس مدري وين راحو   دورت عليهم ما اكو

اتلفتت سيري حواليها : حتى اميرة ما اكو

صوتو ⭐⭐⭐⭐

علقو .....

قصة

عالم العصابات

الفصل : النهاية

الكاتبة ندى البياتي

حساب الأنستا ls6911nana

..........

نجوى : اميرة شعليهة

سيري : هاي الحقيرة اليوم اگلب الدنيا على راسهة اذا لگيتهة يم عزيز وتتمايع

گامت من مكانهة تدور عليهم وبالهة يم اميرة لأن على طول جانت تتغزل بيهم جدامهة.

وسيري من كل عقلها تغار ومخلية اميرة براسهة

ما تعرف اميرة حتى جدام ابوهة تتغزل بيهم وما تخاف واهلها ماخذين الأمر على انه بس تهذي كل مرة يرزلونه ويگولون الهة كبرتي عيب بس مايفيد الي يعجبها عادي تتغزل بيه جدام الكل بدون ماتضم شي

سيري : خالة وين بنتج

نشمية : اميرة راحت تجيب اللبن من بيتنا اني دزيتهة هسة على جية

دخلت اميرة بيدهة دولكة اللبن تفر بعيونهة من عصبية سيري بعدين عبرت من يمهة وخلت الدولكة يم الأكل وكعدت يم امهة

حاولت سيري تهدا اعصابهة وتسوي نفسها طبيعية بعدها ما راجعة لمكانهة دخلو اثنينهم والمشكلة صابرين نسخة وحدة ماينعرفون نفس الملابس نفس الشعر نفس الوگفة

سيري داخت ماتعرف اي واحد بيهم عزيز وكذلك كلهم نفس حالة سيري ما كدرو يعرفون منو بيهم عزيز ومنو بيهم همام

ضليت ادور فد علامة اكدر اعرفهم من خلالهة عجزت مامخلين اي اثر يفصلهم عن الشبه

بعد ما يأسو الكل من معرفتهم

سيري : عزيز لاتسوي هيج ترى هسة انزعكم ملابسكم واعرفك من الأصابة

كل الگاعدين ضحكو عليها بنظرها جان هذا اقرب حل حتى ينعرفون لكن جدي خفف عنها الوضع و حجة بضحكة

اصلان : على كيفج بنتي ترى هم معروفين ما يحتاج تنزعينهم ملابسهم جدام الأوادم تعالي يمي اني اگولج

الي عاليمين همام والي عاليسار عزيز

صفنت سيري شوي واتقربت على جهة الي اشار بيهة لعزيز وحاجته بصيغة امر صاكةعلى سنونهة : ارفع بلوزتك خل نشوف

ضحك على عقلها ورفعها وفعلا جان هو عزيز لأن الصابة صايرة جوة صدرة عكس همام الي اصابته بخاصرته

سألته سيري بدهشة : هاي شلون گدرت تفرق بينهم بسهولة

اصلان : اصلاً الفرق واضح وضوح الشمس بينهم ،

لو شكد ما جان عزيز ممثل ويكدر يتقمص شخصية اخوه ويصير مثله حتى يخلونه نخربط بيناتهم

لكن مايعرف انه يشبه ابوه و عنده نفس الأعاقة الي يمكن محد منتبه الها وهي ان رجله اليمنى تتقدم على رجله اليسرى من يوكف مايصيرن بمستوى واحد بينما رجلين همام مابيهن شي بمستوة واحد

باوعنا كلنا لرجليه وفعلا جانت رجله اليمنى تتقدم عن رجله اليسرى بشي بسيط بالكاد يبين

من شافهة گبل قدمها بنفس مستوى رجله الثانية عود يدارك الوضع : حتى هاي لگفتها خربت علينا المفاجأة عود ردنا نشوفكم تعرفون تفرقون بينا لو لا

سيري : انا جنت راح استخدم طريقتي اخليكم تنزعون ملابسكم واعرفكم

عزيز : همزين اصاباتنة صايرة فوك جان انفضحنا ويا سيري تخلينا ننزع غصبًا علينا كل ماتشوفنا سوى ههههههه

لكزته على جتفه

عزيز : هاي عرفتي نقطة اختلافنا باوعي لرجلينا وعوفي نزع الملابس

همام : غير اذا فكرت بهالشي بس مجرد تفكير اصفعهة كف اخليها من بعد ميل تفرق بينا

ضحك عزيز على كلام همام لكن خزرة سيري خلته يسكت حضن ايدهة واجو كعدو بمكاني

عزيز : گومي منا نجوى شنو ماخذة المكان خاوة

گومني وگعد هو و سيري على يمينه

برطمت وحجيت بزعل : شكد نحيس كل هالأماكن تكومني من يم جدي ما تدري شكد مشتاقتله وجنت احسب دقيقة دقيقة لرجعته

عزيز : قابل هو بس جدج ترى كلنا عدنا حصة بيه واذا جنتي تحسبين الدقايق

كعدت من الجهة الاخرى مبوزة بوجه عزيز. اخذني جدي لحظنه ومسح على شعري

اصلان : لا عليج بيه يغار منج لأن محبتج بگلبي اكبر منه بسته من راسه وابتسامة رضى

بعدين اشر لهمام يجي يكعد يمي

اجى وكعد ما عاجبه الوضع يمكن هو هم يغار مني لأن جدي يعاملني بحينة اكثر منهم

اصلان : اتمنى تبقى لمتنا هيج حلوة طول العمر ومايفرقنا شي

واعوضكم عن كل الي خسرتوه بحياتكم

قاطعتنا سيري : جدي اني اقترح لو نبني بيت غير هذا لأن ما يكفي وانجيب اثاث و كهرباء او نرجع للمدينة

عزيز : على اساس كلتي تروحين وياي لأخر الدنيا ومايهمج شي،

سيري : وبعدني على رأيي بس الواحد ما يهلك نفسه بنفسه

انت شايف هذا البيت شكدوته اشلون نعيش بيه

همام : على كيفج يالصفرا ترى ندري انتي من نعومة اضافرج عايشة بفيلا وخدم وحشم وناس تسهر على راحتج بس هسة اتغير الوضع يعني حالج حالنا وان ما عجبج ارجعي لبغداد هناك عيشي براحتج

صكت على سنونهة بغيظ : عزيز احجي وياه هو شعليه يجاوب من مكانه

عزيز : ماتحجين انتي وياه عود من يحجي وياي اجاوبه

نفخت و دارت وجهة بزعل وكتفت اديهة

اصلان : همام لاتحجي عليهة هي متعلمة على عيشة الترف وحقهة تگول هيج بنتي سوي الي تريدينه وابني البيت الي تحلمين بيه هنا

قاطعه همام مرة ثانية : وجفينا شرج

ضحكت لاحظت همام يحب يستفزهة بالكلام وهي بساع تتحسس منه مدري هي حساسة وماتتحمل الكلام

ابو محمود : صدك ابو تميم هذا البيت ما عاد يكفيكم لازم تكبرونه هاي احفادك كثيرو ولازم تأمن مستقبلهم باجر عگبة يتزوجون

محمود : لا تخاف عليهم اني راح اطلعهم للسراحة وياي من باجر اريدكم تكونون نشطين ترى وقت الشغل لا لخاطر عمك ولا لخاطر خالك الي يتهاون گبل اعاقبه

همام : ديلا اشلون ذلة انوب محمود صار يتامر بينا ويمننا بالشغل يمه

محمود : غير اريد مصلحتكم لازم تدبرون عيشتكم حتى تكونون نفسكم و تتزوجون خوما تبقون عالة على گلب جدكم هو يشتغل ويوكلكم

عزيز : هو اذا انت صاحب الشغل وصارلك عمر لا مكون نفسك ولا متزوج تريد احنى نشتغل يمك حتى نكون نفسنا ونتزوج

محمود : اذا جنت مگابل بومة مثلك اربع وعشرين ساعة طبعًا لا اكون نفسي ولا اتزوج

همام : انت معليك بعيشتنة ولا احد يتدخل بية ترى بعدني اكفخ لا عبالكم بطلت وصرت حباب

مسلم : غير محمود بالبداية عباله انت ملبوس و الجن المتلبس بيك يمشي ويكفخ بالأوادم هههههه

محمود : والله شكله جان يوحي انهُ ملبوس واللابسه جن من الجنون الخطيرة قابل چاذب اني ماشفتوه شلون جان يتصرف

عزيز : يبين فـايتني جثير مستجدات بغيابي احجو لي و اصدموني لا تضمون علي

اميرة : اني احجي لك من اول ما اجى اخوك لحد ماراح

عزيز : اي والله اريد اعرف شسوى من. وراي كاتل ناهب متحرش ترى جان متقمص شخصيتي يعني اني الي يطيح حظي

اميرة : لا وين رحت بس من گعد حالته مگلوبة ومسوي نفسه شقاوة ياهو يعبر من جدامه ياخذ له كف ودفرة ويعبر بسبب وبدون سبب

سيري : خلونا ناكل الاكل برد مو طيب اذا يبرد

حجتهة خازرة عزيز بنظراتهة

هو هم سكت وتعشينا باوعت لهمام ياكل بشهية عكس قبل جان يريد احد يصيحه لو ما ياكل الا يجوع فد مرة

انطيته صحني اني بمجرد شوفتهم كلهم سوة شبعتي

همام : و انت ؟

نجوى : اني شبعت

عزيز : اشو قبل جنتي ماتخلين شي ما تاكلينه لو هذا حظي الأغبر

نجوى : شوف من يحجي هو انت جنت ماتخلي شي ماتاكله

سيري : تحجون صدگ ! ماتخلون شي ماتاكلونه مو شي غريب

عزيز : شنو الغريب بالموضوع

سيري : ليش هو شكو بالبيت حتى تاكلوه اشو شكله فارغ و حتى ثلاجة ماعدكم !!

بقو صافنين عليها ماعدهم جواب الهة

عزيز : هسة شحجاج طيرتي جبهاتنة

سيري : قابل شكلت اني

عزيز : لا گلتي شي

مرت الأيام بينا هادية و حلوة منشغلين برعاية جدي وعلاجه

مانريده يتعب

بس كل ماننجمع عالأكل يبدي ملاسن همام وسيري الي ماتتحمل كلمة منه وتخلصهة عليه

عزيز احجي وياه

عزيز خليه يسكت

عزيز ليش ساكت ما تدافع عني

وهو يرد عليهة : مو عزيز ما عنده شغل وعمل يضل بس يودي ويجيب حجي بينكم وتالي اطلع اني النمام والموخوش ادمي الي اخرب بينكم وانتو الزنينين، تتعاركون اتعاركو بينكم والسبع يطلع الدم

سيري : ها هيج صارت متدافع لي

اصلان : همام عوف بت عمك وركز بحياتك

همام : مركز بحياتي بس كلامهة يغث كوة يخليني احجي

بعد فترى وتفاديا لجدالاتهم قرر جدي يزوج عزيز وسيري ويبني الهم بيت خاص وطبعًا مو مثل ما جانت تحلم سيري

البيت جان بسيط من بلوك بس بخريطة مرتبة مو مثل باقي البيوت القديمة ساعدوه الناس الطيبة بالقرية بالبناء لحد ما كمل

سيري :يعني هذا راح يكون بيت احلامنا

عزيز : امممم

سيري : بس مابيه شي فارغ شلون نعيش بيه

عزيز : المهم بيه اني وانتي وحبنا وشوي شوي نترسه اثاث واطفال

سيري : ان شاء الله بس اني اختار الأثاث الي راح نشتريه

عزيز : اكيد انتي تختارينه شو في اكو هنا على بعد مسافة قريبة شركة مالت اثاث منزلي كله ماركة اجنبية شنو رأيج نشتري منهم

سيري: صدگ والله !! امشي خل انروح نشوف

باوعت الصفح مشت عليهة الجذبة وفوگاهة تريد تروح تشتري. شوي و حست بالمقلب ضربتني على جتفي

سيري : هاا ناصب علي حظرتك وماخذني على كد عقلي

عزيز : ليش انتي ما شفتي القرية طايح حظها كل الي بيها مجبورين يسكنون بيها وين اكو اثاث فاخر حبيبتي لازم تتعودين عالعيشة هنا

سيري : والله دا احاول مرات اصمد ومرات أيأس لأن فوگ طاقتي

عزيز : لاتنسين انتي الي اقترحتي لو بآخر الدنيا تجين وياي ومايهمج شي

سيري : يبوو ذليتني بهالكلمة. وبعدين ترى انا كتلك اروح وياك بس ما گلت اعيش عالحجار توقعت راح تاخذني نعيش بالخارج مو هنا

حظنتهة بحنان امسح على ضهرهة : تحملي كلشي يهون بس ينراد له صبر والاثاث راح نشتريه بس خل يهدي الوضع نجيب كل الي نريده

حاوطتني بأديهة مثل الطفل الي يجلب بأمه : كلشي يهون مادام انت وياي

بعدت راسهة بأيدي بست خدودهة وحدة ورة الثاني : صدگي سنة وحدة وتصيرين بنت قرية معدلة

حتى تسرحين بالغنم والبقر بالوديان وحدج بدون ما تدورين مساعدة هههههه

سيري : تتوقع اكدر اسويها

اخذت لي صفنة افكر : ليش اجذب عليج ، ما اتوقع تدبرينها لذاك من البداية

راح ادزج للزرع ويا البنات تزرعين وتحصدين

لأن مابية حيل تروحين للأسطبل وترجعين البقرة رافستج ومسگطتج واخلص عمري اداري بيج

سيري : هاااا هيج يعني تشك بقدراتي اشوف بعد سنة شلون احلب البقر بحترافية

عزيز : هسة عوفي الحلال والمال وكلشي فكري بس بعرسنا

جلبت برگبتي وقدمت جسمهة لزك لجسمي بجراءة منتظرة ابوسهة

عزيز : اگلج اشو ما اكو مستحى ولاخجل مثل البنات شو ماخذة راحتج

سيري : هو انت حبيبي وراح تصير زوجي عود ليش استحي منك

عزيز : قنعتيني بصراحة،

لعد اذا طلعنا مصخمينهة من هالغرفة لا تلوميني

سيري : عدم المستحى شي والاستهتار شي ثاني اني لگيت بيك الأمان والحب الي فاقدته من حياتي عادي احظنك و اضم نفسي داخل ضلوعك بس مو معناهة تلعب بكيفك هنا اشوفك وجهي الثاني الي

عزيز : عاد مشهودتلج هاي

المرة الماضية خليتي رصاصة جوة گلبي المرة الثاني براسي مباشرتًا اذا لعبت من وراج

سيري : لاتذكرني عفية اريد انسى كلشي

عزيز: تمام خلينا نطلع جاي نجيب الشبهة لأرواحنة

طلعنا من بيت احلامنا ورحنا لعند جدي الي كاعد على الكرسي الذبحة القلبية هواي مأثرة عليه متعبته من شفته كاعد عالكرسي حسيته صار شخص هرم جاي يذبل يوم بعد يوم قبل جان رغم كبر سنه بس نشيط وضهره مستقيم ومايهمه شي اما الان كل الي يسويه يكعد عالكرسي ويباوع النا

كعدت يمه بالكاع وخذت ايده افركهة بلطف

اصلان : عجبك البيت !

عزيز : اي عجبني وعجب سيري هم

اصلان : الله يهنيكم بيه وتشوفون الخير عليه

عزيز : امين

ابتسمت بوجهه وتابعت المساج ايده

ورة فترى سوينا حفلة زواج على تقاليد القرية واجو كل الي بنفسهم يتزوجون عسى ياخذون الي يتمنونهم لاحظت محمود ماله خلگ

يمكن لأنه مرة خطب نجوى ورفضته وبعدها كل ما يصير عرس بالقرية هو يضوج

ما ادري ليش رافضته نجوى مابيه اي عيب يخليها ترفضه بس بعد نجوى عناد اذا كالت لا، لو كلها تصير ضدهة ماتغير رأيها

تلطش عليه

نجوى

ما جنت اتوقع اكدر اتجاوز هيج مرحلة ان اشوف الشخص الي عشت وياه طفولتي وشبابي وحبيته ومتعلقة بيه لدرجة اغار عليه من ظلي يتزوج غيري واني ما يلتفت لي ولا يحس بالقهر الي بگلبي

لكن كان كلام همام صحيح عمرها مشاعري ما ابد كانت حب

انما هي مجرد امتلاك جنت اريده الي وحدي لانه يعرفني ويفهمني ويدافع لي ومهتم بية اكثر من الباقين لذلك متعلقة بيه واخاف لا اخسره يوم من الأيام لحتى اترسخت ببالي فكرة ان هاي المشاعر هي مشاعر حب وهيام

اما الان بوجود سيري وياي طول الوقت وبنفس البيت خلاني اوعي على نفسي واميز شنو المشاعر الي جنت احس بيها تجاهه

و هواي تحسنت من تملك المشاعر

راحة نفسية من تتخلص من احاسيس هي مو الك بس تخدع نفسك انها الك ومايجي من وراه بس الشقاء والوهن

علاقتي بهمام اتطورت وعبرت مرحلة الصداقة والاهتمام وصلت للحب المتبادل بينا بس اثنينا مو شجعان حتى نعترف لبعض بأن احنى نحب بعض

مكتفين بالاهتمام والكلام الي نتبادله والطلعات الي نطلعها للجبل من نضوج من القرية وكأنه نلكى راحتنة بأي كلام عدا كلام العشق والغرام كأي حبيبين يتبادلونه من يكونون سوى

اشوف بعيونه شكد مهتم بية بس مو مثل عزيز عادي يطلع مشاعره

صعب يعترف بمشاعره مرات احسه مايعرف يحجي بالغزل والحب ويتهرب منه

يمكن ينتظرني اني اعترف له وانا مثله هم ماخذة وضع التغليس ما ادري شوكت نتنحنح ونعترف لبعض بدال هذا اللف والدوران

ساعدت البنات بترتيب سيري فستان احمر مطرز خاص بالأعراس يمنا ما يلبسن فستان ابيض يلبسنه لونه احمر والطرحة من نفس لونه

وانوب هي شگرة و بشرنها ناعمة طلع ثوب العرس يخبل عليها تمنيت الهة حياة سعيدة ويا عزيز من كل گلبي

سيري : حبيبتي نجوى يوم الج وتاخذين همام وتخلصيني منه

حتى عوفني بحالي

نجوى : ياااا يجوز بباله غير وحدة گبل جلبتيه بية

سيري : صدگيني ما اكو اي وحدة بباله هو غير مسطور بيج بس انتي مغشمة حالج وعاجبتج الشغلة

غمزت لي بمعنى تعرف كلشي احمريت خجل هاي كلها تعرف بينا وانا جنت مأمنة عود بس اني اعرف بمشاعره الي ضامهن علي

اميرة : مستحيل اشو سويتنها صدك على الأقل عوفن لي واحد شنو ما شايفات رجال بحياتجن اثنينهم حجزتنهم وخليتني افر باذاني

سيري : انتي روحي دوري بعيد عنهم. ترى والله اشوفج وجهي الثاني اذا لمحتج تتمايعين ويا عزيز هذا ملكي اني

ضربتهة بقبضة ايدهة على

ضهرهة خلتها تكح من الضربة : گبر شبساع شفتيه وصار ملكج وكمتي ماتخلين احد يحجي وياه

ترى من احنى زغار نلعب ونتعارك ونتصالح ونسولف سوى وانتي عاشرتيه سنة وگمتي تسوين تفرقة بينا وبينه وتريدين يكطع علاقته بينا

سيري : ما اسوي تفرقة بس انا اغار عليه ما اريد وحدة تباوع له بنظرات استهتارية

اميرة : عجل ما تحجين على نجوى لو بس گدرتج علي

سيري : شبيهة نجوى

عضيت شفتي بخزرة تريد تفضحنا وتگلب العرس عزى سيري غيرتها جنونية والحمد لله افتهمت علي وتداركت الموقف

اميرة : نجوى على طول تحجي وياه ليش ماتكولين الهة لا تحجين وياه لو بس لأن انا فقيرة

سيري : نجوى اخته

اميرة : من دبش

سيري : شنو يعني هاي الكلمة

نجوى: يعني معناهة اي صح كلامج

يلا اميرة لا تسولفين خل يجهزنها

اميرة : طيرتن واهسي گلت اليوم اعرض الزواج على همام وطلع محجوز شكد حظي فگر

اني

كملنا تجهيز وطلعنا بالجول الحفلة عالطبيعة الكل ترگص وتصفگ على صوت الموسيقى بكل فرح

الحفلة بسيطة بس مليانة سعادة من الگلب الي يغني والي يرگص كلها من گلبها تأدي واجبهة وسعادتهة

بدون ما تصنع او تمثل حتى يثبتون الباقين ان هم فرحانين حالهم حال الناس بس بداخلهم غل وحقد

اجى همام وگف يمي بدون مايحجي و اني صافنة بيه قاطع صفنتي

همام : شنو رأيج نصير من مثلهم

نجوى : شلون يعني ، ما فهمت ؟

همام : يعني نتزوج

حجاهة بتردد وخجل : فهمت اذا تريد نتزوج ذاك جدي وروح حاجيه شوف شيكولك يمكن ما يقبل بيك

همام : و ليش ما يقبل !

نجوى : يعني كلشي يصير ايجوز ما يقبل بيك هو شيعرف عنك حتى يزوجني الك

همام : يعرف كلشي مايحتاج يسأل

نجوى : روح اساله وشوف

همام : اروح اسأله شنو يعني،

درت راسي كاتمة الضحكة اعرفه ما راح يكوله بقيت اراقبه من بعيد واگف يم جدي بس ماحجى شي رجعت انداريت عكس اتجاهم اهز بايدي واغم بحظي اذا لجدي ما گدر يگول شوكت يفتح الموضوع ونتزوج

شكلي راح ابقى انتظر لحد ما يصير عنده شجاعة ويطلبني من جدي

زيد

ما طولت هواي بتركيا بس سويت الجوازات السفر ورجعت الهم وكملت رأسًا حجزت بالطيارة على رحلة بريطانية و سافرنا

بس الي اخرناهي التأشيرات اضطرينا ننتظر كم اسبوع حتى نحصلهن بدون مشاكل رغم گالو لي اذا دفعت اكثر راح يستعجلون بأكمالهم ويكتبون حالة مستعجلة بس ما ردت اخلص الفلوس وهنا نبقى نفر بروسنا بلا حولة ولا قوة لأن ما نعرف شنو الي ينتظرنا هناك

اولاد بنتي جانو متعتجبين من شكل الطيارة وبنفس الوقت خايفين لأن اول مرة يصعدون طيارة طمنتهم وكعدتهم بأماكنهم المخصصة وشديت الهم احزمة الأمان

بعدها انطلقت بينا الطيارة واخذتنا البريطانية لمطار هيثرو

نزلنا والأودلا مذهولين من ضخامة المطار ومن شكله العجيب ومن الناس الي ماتشبهنا لا بالشكل ولا بالملابس يمشون وعيونهم تتلفت على البنات الي لابسة ملابس قصيرة وفاضحة وعالشباب الي ازيائهم بالنسبة الهم غريبة وماشايفين احد بالمنطقة يلبس مثلها

حرى : عدلو روسكم شبيكم ما شايفين بشر، راح اطلع عيون ولدي هنا بعدنا بالبداية وماشالو عيونهم عن الاخرين

زيد : خليهم يتأقلمون ويا الوضع لا تخنگينهم بتحكمج بيهم بعدين كثر الكبت تولد عدهم عادات وافكار سيئة يطلعونهة بطريقة غير صحيحة تضرهم وتضرج

لأن هنا لو شكد ما جنا محافضين على عاداتنا وتقاليدنا لازم نعرف ان هذا البلد متفتح واله قوانينه وعاداته

الحياة هنا تختلف حافضي عليهم وسيطري عليهم ونفس الوقت انطيهم مساحة يشوفون شلون الحياة هنا

حرى : واذا طلعو من الدرب

زيد : صار ساعة امسلت وانتي بعدج تسألين واذا طلعو من الدرب لذلك اسكت احسن بعدين نحكي

كملنا اجرائاتنا واخذنا حقائبنا وطلعنا من المطار وكأنه عالم ثاني بالنسبة النة اتصلت بمرام ورة دقايق ردت

مرام : هلو زيد شعجب متذكر تتصل بية

زيد : احزري اني وين ؟؟

مرام : وين

زيد : يمج بـ بريطانية اليوم وصلت اني وبنتي واولادهة

مرام : وين بيا مطار انت !!

زيد : احنى نزلنا بمطار (هيثرو)

مرام : حيييييييل هاي وين نازل انت

زيد : ليش ؟؟؟

مرام : هذا يبعد عن منطقتي ١٣ ساعة

زيد : لا بربج

مرام : هههههه والله

زيد : هسة شلون

مرام : ما اعرف وما اگدر اجي اوصلك لأن ما عندي اجازة. بس راح انطيك ارشادات توصلك

زيد : هم خلف الله عليج

باوعت لأبنتي واولادهة تعبانين مو مال يكطعون ١٣ ساعة انوب فگلت لمرام باجر راح اتصل بيج ودليني وين انتي بالضبط

مرام : ماشي

سديته وگتلهم امشو نستأجر فندق نرتاح بيه وبعدين نتسكع بلندن على راحتنا هنا محد يعرفنا ولا احد عليه بينا اخذو راحتكم

شلت ودود ومشيت جدامهم وستأجرنا غرفة وحدة بالفندق حتى مانخلص الفلوس كلها وبعد ورانا كوم مصاريف

دخلنا للغرفة : الي يريد ينام خل ينام واني اتمددت عالسرير ارتاح

والأولاد هم اتمددو عالسرير الثاني وامهم تنزعهم احذيتهم

باليوم الثاني بعد ما گضيناهة نوم من تعب السفر اتصلت بمرام ودلتنا منين نطلع وياقطار نصعد حتى نوصل لمدينتهة

ويا تعليمات مرام والناس الي سألتهم بصعوبة لغتي الأنگليزية مو مضبوطة لكن تفي بالغرض للسؤال والجواب لحد ما وصلناهة واستقبلتنة بمحطة القطار هي وابنهة سلمت على بنتي وبوست الأولاد واحد ورة الثاني مبتسمة بوجهم بقت تشغل نفسهة بالحديث ويا بنتي حتى لا تلتقي عيونهة بعيوني

بعدين طلبت منا نروح لشقتها

دخلنا ميتين تعب

مرام : اتفضلو البيت بيتكم. لاتستحون

حرى : خاف نسوي عليج زحمة وازعاج

مرام : لا ابد لا ازعاج ولا شي اتفضلو ارتاحو

كعدت حرى بالصالة ترتاح ويمها ولدهة

مرام : سليم اخذ اصدقائك لغرفتك خل يرتاحون بيهة

سيلم : صار ماما

اشر الهم يروحون وياه راحو اثنين ودود بقى گاعد يم امه

مرام : يلا حبيبي. روح وياهم

استغربت من تجاهله

حرى : هو مايسمع وما يفارگني

مرام : اصم اني اسفة

حرى : لاتتأسفين عادي

بقيت اتلفت بالبيت ما اكو اي صورة تجمع مرام وهذا اللزگة بيتها سوى،

حتى صور. زواج ما اكو

بس صور الهة ولأبنهة

و الصورة المكبرة لرسالة تميم الي بمجرد ما ندخل للبيت تصير بوجه الواحد

مرام : ليش تتلفت ماعجبك الديكور يعني

زيد : لا الديكور حلو بس جنت ادور على منافسي

مافهمت شنو اقصد وضحت الهة وحجيت بجرائة يائسة : قصدي هذا اللزكة الي يريد ياخذج مني

مرام : اااه قصدك زياد بالشغل. وبعدين يروح لبيته

زيد : ليش هو ما عايش وياج

مرام : لا ليش يعيش وياي !!

زيد : لاتفهميني غلط بس قصدي هو مو زوجج و لازم تعيشون ببيت واحد

مرام : لا مو زوجي بس راح يصير عن قريب

جوابها جان مثل الغرگان وطلعوه من البحر حسيت بسعادة غامرة وصار عندي امل برجعتهة الي گلت بثقة

وغرو : حلم بليس بالجنة

حجيته وكعدت عالقنفة بسترخاء بقت صافنة بوجهي وكذلك حرى نفس حال مرام مصدومة بية

وحتى ابعد عنهن الدهشة وگفت على حيلي واتقربت عليها خليت عيوني بعيونها وگلت: كافي هجر عاد خلينا نتزوج و نخلص هالجم سنة سوى ومن اموت عود خل ياخذج ذاك اللزگة

مرام : وعلى شنو ماخذتك وجم سنة وتموت و ارجع اترمل واكملها مطلگة وارملة وعايشة وحدهة شلون سمعة حلوة خو اخذ زياد واستر على حالي

زيد : هسة لا تاخذين كلامي راس مال الأعمار بيد الله وبعدين كل عقلج اخلي ذاك اللزگة ياخذج حتى بعد ما اموت ما اخليه يقرب عليج

حرى : بابا انت تتشاقة مو،! منين طلعت بسالفة الزواج هسة انت ما تشوف حالك

زيد : ليش شبية ترى بعدني بحيلي

اللتفتت لمرام وكلت : هسة شگلتي وافقتي مو

مرام : خل استشير ابني يقبل لا

زيد : ابنج حتى لو يقبل عناد بية ما راح يقبل فأحسن شي اخذه ارميه بمكان يخليه بس يسمع بأسمي يكوم يتراجف

شهگت وخلت اديهة على حلكهة : تريد تتخلص من ابني

زيد : بس تخويف حتى يحسب لي حساب علمود شيباتي فشلة ابنج الزعطوط يسحل بيهن

حرى : يعني جبتنا هنا وبهدلتنا حتى تتزوج هسة اخذهم وارد للعراق وانت. تزوج بكيفك محد لازمك

زيد ازوج احسن ما امشي بدرب الحرام انوب البنات هنا مغريات واني گظيت حياتي كلها طيحان حظ كلشي ما شايف

مرام : لحظة اوگف شنو تتزوج هو منو موافق عليك حتى كمت تتزوج

زيد : شنو مموافقة

مرام : طبعًا لا

زيد : اي مو مشكلة توافقين شورانا بس بلا رجاءًا بلا حركات المراهقات لأن احنى كبرنا ومابية حيل انفذهن الج هو

ايجوز تالي الليل لو نحصل بوسة من بعض لو ننام بحسرتهة

فتحت مرام عيونهة على وسعهن من الصدمة وبنتي صاحت علي : بابا اشو استخفيت

زيد : غير صرنا بريطانين ونحجي براحة

حرى : لك بابا اثگل شكول لولدي جدكم خرف كام يدور حب تالي عمره

زيد : انتي وولدج وابن مرام كلكم راح ااجر الكم بيت واخلص منكم

مرام : ترى الموضوع مو بهالسهولة لازم احجي ويا زياد بدون ما اجرحه لأنه صاحب مواقف وياي و مستحيل اتجاهله وامشي وراك

زيد : احجي وياه وضحي له انج ما تصيرين لغيري

مرام : وبصفتك شنو بلا

زيد : حبيبج الأول والأخير

مرام : قصدك حبيبي الي خذلني وعيشني بجحيم بعدها

زيد : مستعد اعوضج عن كلشي بس انطيني فرصة

مرام : كتلك الموضوع مو بهالسهولة خليني احل اموري كلها بعدين نفكر

زيد : يعني موافقة

مرام : گتلك افكر

زيد : تمام هاي اني كاعد وانتي فكري براحتج

مرام : انت جاي تتقشمر علي لو شنو

زيد : مرام كافي هجر تعبنا خلينا نرتاح

مرام: مو بهاي السهولة

انت تعرف جم سنة عدت

جم دمعة نزلت

جم حسرة انكتمت وانفجرت داخلي

جم الم تحملت بدون ذنب صرت مكفخة للرايح والجاي الكل حملني اذنوب اني ما الي علاقة بيهن

وانت هسة جاي تگول خلينا نرتاح بعد ما مامتت ارواحنا بهاي الحياة شلون نرتاح گولي

زيد : طيب راح انطيج الوقت الي تريده بس لا تستخدمين الوقت للذكريات السيئة استخدميه لبداية حياة جديدة مشطوب كل الماضي منها وكأنَ اليوم اللتقينا واليوم اتعرفنا على بعض والبعدهة كلشي امحيه من ذاكرتج

يلا بنتي صيحي اولادج خل نروح من توافقين راح نجي ونطلب ايدج وتكونين زوجتي وملكي

صاحتهم ومامستوعبة شي

طلعنا من العمارة وسألتني بحيرة : وهسة وين نروح

باوعت للعمارة راح نأجر هنا قريب عنها ما اريد هذاك اللزگة يستغل الي صار ويتقدم الهة قبلي رحت للحارس وسألته والحمد لله طلع عراقي وخلصني من سالفتة اللغة

بس ما انطاني امل كل العمارة مأجرة ماباقي غير شقة هي بالأساس مخزن جوة العمارة متروك من زمان كالي اذا اريدهة حتى ياحاجي صاحب العمارة وافقت مجبور. حتى ابقى قريب عنها

اتصل بصاحب العمارة مافهمت شي من حجيهم بس عرفت هو جاي يحجي له عني شوي وسد التلفون

_ گالي راح يمر للعمارة يريد يشوفك وياخذ معلومات منك تعرف اجراءات زلازمة حتى يگدر يسكنك بعمارته

زيد : يعني هو وافق !!!

_ ليش اجذب عليك ما كال شي يأكد على موافقته بس كال راح امر للعمارة واشوفه وان شاء الله يوافق. واذا ما وافق تعالو ببيتي مفتوح الكم عين غطى وعين فراش

زيد : تسلم خل نشوف شيگول

دخلنا الرجال للغرفة المخصصة اله وضلينا نسولف هو يحجي لي عن حياته هنا و احنى نسمع منه

بدت الضوجة على وجه حرة بسبب التعب و الوضع الي احنى بيه،

ورى ساعات اجى صاحب العمارة وماراد ياجرنا المخزن ما اقتنع بينا لو لا الحارس تكفلنا واضطريت انطيه جواز سفري كضمان لتأجيرنا المخزن يلا اقتنع مع كوووم نصايح لازم نطبقها وما نتجاوزها خلال فترة اقامتنا بالعمارة وافقنا عليها وسلمنا المفتاح

اول ما فتحنا الباب كفختنا ريحة العفونة عبالك گبر

_ گتلك المخزن متروك من زمان محد يستخدمه

زيد : مو مشكلة يتنظف ويرجع جديد

اخذنا الشقة ونضفناهة بس الرطوبة والعفونة البيها تشك الخشم شك بالگوة تنحمل حتى بعد التنظيف

اجتنا مرام فاتحة حلگهة من الدهشة : شجابركم تسكونون هنا هذا المخزن راح يموتكم

زيد : انتي الي جابرتنا وافقي علي حتى نأجر بغير مكان

مرام : زيد مو هيج تنحل فكر باحفادك. خطية

زيد : شعليج بينا احنى راضين

مرام : گتلك احفادك راح يتمرضون هنا انت ماتشتم العفونة لو شنو

زيد : اشتم العفونة و خطيتهم برگبتج

مرام : هاااا اني شعلي

زيد : ماتوافقين علي واني گاعد هنا غصبًا عني وشيصير بينا انتي المسؤلة

مرام : يعني اذا ما وافقت ما تطلع منا

زيد : ابد وتحملي ذنبنا

مرام : اني شعلي انت تحمل ذنبهم

راحت من يمنا لشقتها ورى يومين شافت ودود يگح ونفسه ضايق عليه رجعت النة مرة ثانية ترزل بينا

مرام : شوفه شلون يگح راح رأته تلتهب من العفونة وانت بعدك بعنادك

زيد : مازلال تعرفين وافقي بية حتى نطلع ومانموت موتـ.....

قاطعتني وخلت ايدهة على حلگي حتى لا اكمل الجملة وكالت : موافقة بس اطلع من هل مكان خطية الأولاد شنو ذنبهم

وخرت ايدهة من حلگي : دگولي هيج من البداية لو الة تعلين گلبي عل

قربت چفهة لحلگي وبسته وبعدها حظنهتا حضنة شوگ سنين طوال مفارگهة بيهن

وحرى مغمضة عيون ودود و تصيح علي : بابا لاجدامهم هاي انت الجبير عود

زيد : خلينا نتزوج بساع ونفضها لأن حرى حالفة تنتقم مني وما تخليني اخذ راحتي وياج

النهاية ...........