.

صوتو ⭐⭐⭐⭐

علقو .....

قصة

اجتياح

الفصل : ٦

الكاتبة ندى البياتي

..........

نجوى

وكفنا اثنينا والخوف بين علينا خصوصًا اني  ضليت اباوع لأميرة بقلق لازمة ايدهة قوي وكأني اريد استمد قوة منها لأن   شوفت هذا الشايب  تخليني ارجف وقطرة حيل ما تبقى بية ادري بيه شگد حاقد علي ويريد حجة حتى يأذي الي احبهم 

اميرة : ولج نجوى  هذولا شعدهم هادين  عليكم

نجوى : يمكن بسبب عزيز لأن كسر ايد زلمته

اميرة : عزى هسة هذا  يدورها حجة عليكم اروح اصيح ابوي كبل لا يتولا جدج

نجوى

عافتني وراحت تركض ضليت جامدة بمكاني شوفت هذا الرجال ترعبني  اتذكرت  ذاك اليوم المشؤوم الي وافقت اشتغل بحقله رغم اعتراض جدي ماقبل گالي اني اوفرلج الي اكدر عليه لا تمدين ايدج وتشتغلين يم الناس 

بس اني من الضوجة لحيت اشتغل ويا البنات على واهسهن لأن جدي جان اغلب وقته ما اعرف وين يروح  وعزيز هم جان مسافر لبغداد وكام يتأخر بالجية  افتقدتهم بذاك الوقت حيل  وجنت اريد اي شي يخليني اخلص وكتي بدون ما ابقى اشتاق الهم  وهم حتى ما ابقى وحدي

رحنا اول اسبوع جان كلشي عادي ما اكو اي مشاكل نروح ونرجع  رغم تعب الشغل بس جنت فرحانة ويا صديقاتي الجديدات وحتى الضوجة راحت مني

بس بعدين بديت الاحظ هذا الرجال كام يعاملني على غير البقية ينطيني استراحة ومايخليني اشتغل جثير الباقيات هم لاحظن هالشي وكامت تصير حزازيات ان ليش اني ما اشتغل بگدهن ونفس الراتب  كامن يلمحن لي ان هذا الشايب عنده نية وياي وهيج يعاملني

خلني اشك بنفسي وبيه معقولة حجيهن صدك  تالي كمت اشتغل وياهن حتى لو هو ميقبل حتى ما اجيب الشبهة لنفسي 

بس ما خلصت اتحولت من معاملته الغرببة الي الى ايحاءات ونظرات مقززة و يتعمد يكون قريب مني بحيث يلزگ لزگ

لدرجة اضطر ابتعد عنه كمت اقرف منه والبنات  اتأكدن هو حاط عينه علي وكلشي واضح

حجيت ويا اميرة عن تصرفاته وهاي المگرودة  رأسا وصلت الخبر لأهلها ولمحمود  ما مر عشر  دقايق واجى محمود متحمق علي ويحجي بعصبية الا ابطل من هذا الشغل

انقهرت من كلامه حسسني اني متقصدة يصير هيج كتله راح ابطل باجر  بس هو نتر بية وگال

_  يا باجر بعد ماتروحين لهذاك ال.....  اني اروح  أكوله بعد ما تشتغل  وحتى الفلوس مانريدهن ساقط ينرادله واحد يشك حلگه  ... كام يسب ويغلط عليه وينفخ بگد ما صار اعصاب

عفته ومشيت والدمعة بعيني  ما جنت اريد يصير هيج كل الي ردته اخلص من الضوجة والهي نفسي بالشغل

ثاني يوم هم اجى محمود علي  ومبين عليه صاير نار ومتعارك ويا الشايب  حجة متضاهر بالهدوء بس كلشي يعكس داخله

محمود : حجيت وياه بعد لاتروحين هناك  واذا على الضوجة  مو احنى هنا جيران تعالي يمنا مو كضيتي عمرج يمنا    لو  صرنا مو من المقام 

نجوى : هذا هو بعد ما اروح

محمود : انا ما عندي اعتراض تشتغلين بس  غير لخاطرج احجي هذا واحد عوينجي وما يستحي  شجابرج تشتغلين يمه

نجوى : هذا هو بعد ما اشتغل

محمود : نجوى اذا محتاجة فلوس اني اشتغل و انطيج بس لاتشتغلين يم احد گلبي ماينطيني اشوفج هيج تتعبين نفسج  اطلبي مني لاتستحين

نجوى : اني مو علمود الفلوس بس ردت افضي خلگي من الوحدة و اطلع شوي من هالبيت

محمود : جنج على طلعة اني اخذج لوين ماتريدين بس كولي

نجوى : متقصر خوية محمود .... حجيتهة حتى اگطع الكلام وياه ورجعت للبيت انتظر جدي الي يطلع من الصبح ومايكول بينما بيني وبين نفسي ادري بيه يروح يتعب نفسه بالشغل علمودي ما جان عدنا حقل الدجاج غير جم وحدة 

ورة فترة نسينا الموضوع  وكلمن اللتهى بنفسه  واني  بقيت ويا دجاجاتي القليلات  جاي  ادخل بيهن بالگن بس وحدة منهن انهزمت  اتأفأفت ورحت ادور وراها طلعت غاد بالزرع  ما حسيت الا ايد جرتني وكعتني بالكاع  علما استوعبت الصار وياي شفت حجي ايوب فوگاي  ردت اصرخ بس سد حلگي وصار يتنفس بوجهي  ريحة حلگه خيسة  شوي لا زعت  منها  بقيت ادافع عن نفسي  واخرمش بيه وارفس برجلي  حتى يوخر ايده من حلگي ضاغط عليها  وكل جسمه فوكاي وبأيده الثانية يحاول يشكك هدومي حتى يعتدي علي

انهاريت ما عرفت شأسوي وهو كل همه ينهش بجسمي

كدرت اوخر ايده من حلگي وعضيته بكل قوتي خليت الدم يطلع من منها

اتألم وصاح وكردة فعل للعضة مالتي  ضربني بأيده الثانية دوخني بعد ما فقدت توازني وكمت ما اركز زين صرت  مثل الجثة جواه كل الي احس بيه هو شلون يرفع بملابسي  بستعجال  حتى يكمل اعتدائه علي 

وفجأة حسيت بيه انشال ونرجد بالگاع  فتحت عيوني اباوع جدي جان يضرب بيه بس هذا الحقير كام عليه ويتهدد الا يبهذل احوالنا وماينسالنا هاي الضربة بحياته  وجدي لا رد عليه ولا حجة  كل الي سواه گومني 

جلبت بيه من الخوف بس اريده ياخذني منا مشينا وهو بعده يتهدد فوگ ما هو الي اتهجم علي وراد يغتصبني هو الي ما عاجبه  اتمنيت جدي يرجع  يفلش وجهه القبيح  بس اشرلي ما اهتم له كال  المهم ما اذاج  انقهرت لأن جدي سكتله وما راد احد يعرف من بيت عمو سرحان كالي سدي السالفة لاتفتحينها جدام احد

بعد جم  يوم مجموعة من جلاب مسعور ة راكضة  ورة  حجي ايوب وملخاته من العض  شوي لا ميت جواهن  بس الحقير عمره طويل ما صارله شي جماعته مخلصينه قبل لا ينهشن لحمه مثل الفطيسة

.....

بعدين ما اتحملت اسمع اصواتهم تعلى  وكفت بعيد عنهم وحيلي كله يرجف اريد اعرف شيردون

ايوب : صايرين شقاوجية من ورانا وتكسرون ايادي  اريد اشوف ياهو الي يطلع عدل  بيكم  راح اخلي الزلم تحير شتدفن اليوم

اصلان : لاتكبر الشغلة  اخذ دينك وتجفى الشر مو ناقضين مشاكل وياك

ايوب : ليش هي بالحجي وين الدين ما جاي اشوفه

اصلان : راح انطيك البيت بداله

نجوى

اجى محمود يركض بعدما گالتله اميرة ما قبل ينطيه البيت

محمود : لا عمي شلون تنطيه البيت هذا تعبك

اصلان : ميخالف  البيت الك بس الحلال الي راح نفضيه  من الحظيرة

ايوب : بس اني ما اريد بيتك انت تعرف شأريد واعتقد حجينا بالموضوع وكتلك فكر على راحتك  وهسة اجى الوقت اترد لي الخبر

.......

همام

كاعد عالكرسي قريب يمهم حاط رجل على رجل وبيدي خيارة اگرط بيها واباوعلهم بلامبالاة ما ادخلت بيهم اريد اشوف هذا الشايب شلون يخلص نفسه بدوني او بدون مايستخدم عضلاته على هذولا الحثالة

اصلان : هذاك الأتفاق الغيه مو كتلك راح انطيك البيت وهو يسوي اكثر من الدين

ايوب : واني كتلك ما رايد بيتك  وغصبًا عليك راح تنطيني نجوى مو على كيفك تلغيه بعد ما اتفقنا

محمود : لاتجيب اسمهة على لسانك الوصخ  فوك شينك جاي بكل صلافة تريدهة

ايوب : اني حجيت ويا جدها وكال يفكر وارجع لك خبر يعني انت  تسكت ومتحجي فهمت

نجوى

وگفت مصدومة معقولة جدي بعد كل الي سواه  باعني لهذا الشايب وهو يعرف كلش زين شسوى بية 

اصلان : كتلك افكر وهاي فكرت تاخذ البيت وهاي هي بعد مالك شي يمي

ايوب : خلي البيت الك والبنت الي شتسوي بيها

هي اول تالي تزوجها واني اولى بيها اخذها  وبعد ما يبقى بينا دين

تقرب علي : امشي وياي  هناك راح ادللج دلال احسن من هاي الخسية العايشة بيها

محمود :  شنو بكيفك تاخذهة هايتة بيدك هي لو  مالهة والي

ايوب : جفيني شرك انت

لا اخلي ذولا الزلم كلهم ينكلبون عليك  ويكسرونك.

يلا امشي وياي اذا ماتريدين جدج واخوج يتأذون

نجوى : عوفني ما اجي وياك انا بس اشوفك  تگلب نفسي شلون لو عشت وياك ببيت واحد

ردت انهزم لعند جدي بس لزمني من ايدي ما خلاني اروح  بقيت اجر بأيدي خايفة من شكله المقرف اكيد ما راح يرحمني : جدي لاتخليني اروح وياه فدوة

اصلان : عوفهة انطيتك بيت يسوة اكثر من الدين  شتريد بعد

ايوب : وايد زلمتي الي انكسرت لازم اخذ بدالها فصل وهاي نجوى هي  بمكانه والبيت بمكان الدين واي حجي زايد ما اريد منكم

اجو ابو محمود وجم زلمة من القرية

سرحان : حجي شلون يصير تاخذهة هيج قابل سبية

ايوب : تطمنو  اني اعقد عليها و ازفهة بيدي هناك  ببيتي ويمي

محمود : كل عقلك تاخذهة شنو ما اكو زلم

ايوب : اخذهة وعيونكم تشوف واريد واحد بيكم  يمنعني

نجوى : عوفني ما اريد اروح وياك مو گوة هي

حاولت افلت ايدي منه  و رجعت عضيته شوغت روحه وبالمقابل جانت بيده عودة ضربني بيهة على وجهي حرگه حرگ الوجع خلاني اشهگ بألم

ايوب : عبالج ناسيهة الج 

والله لأخذج اذلج بالشغل واسويج خدامة  اكرب عليج عالسويتيه بية جنت انتظر هاي اللحظة التوگعين بيدي وما ارحمج

نجوى : هسة بين معدنك الخايس  قبل شوي تريد تدللتي

ايوب : اذا مشتي عدل ادللج واذا عوجتي وياي اعذبج عذاب ما صاير

نجوى : جدي  ساعدني  لاتخليني اروح وياه

محمود راد يتقدم ياخذني منه بس الحقير خلا ارجاله  تولوه  بالعصي بكل وحشية  وهو وحده مايكدر الهم لو ما ابوه والزلم الموجودة جان  موتوه بدون رحمة

همام

اتثاوبت بملل  ومطيت ادي  من الي اشوفه جدامي  رجال شايب الكبر ماكله و سنونه نصهن واگعات والباقي ماكلهن السوس من النفخة يموت 

و جم زلمة شايل عصا ما كدرو الهم  ومخلينهم  يتجبرون عليهم

وضعهم يضحك اكثر من ما يقهر  لأن  هم اجسامهم تبين اقوى من ذولا الحثالة بس الجبن مسيطر عليهم مخليهم يتجبرون عليهم بعد ما انسد اي امل بوجهم يخلصون حفيدتهم 

صاح علي الشايب بنظرات متوسلة حتى اساعده و اخلص حفيدته

اصلان : عزيز سوي شي

همام

باوعت له بدون اهتمام   ما جنت اريد اساعده  لكن اريد ارجع له الدين مال البارحة لأنه ساعدني و سهر علي بدون مقابل

كمت من الكرسي الخشبي ونفضت ملابسي  وكلت بهدوء 

_ عوفها

اجاني صوته يجعجع : انت حسابك بعدين  اذا ماخليت زلمي يكسرون عضامك عضمة عضمة ما اكون ايوب

"الكاتبة ندى علي البياتي "

همام

اللتفتت ورفعت ادي  بحالة يأس  للشايب وكتله : شفت مو راضي يعوفها مجلب بيها

كعدت عالكرسي ورجعت خليت رجل على رجل واشوفهم شلون دنگ راسه بيأس  ورة شوي رفعه يباوع للثاني :   اخذ الحلال هم بس رجع لي حفيدتي هي ماتريدك

ايوب : غصبًا عليها  تقبل بية غير اعذبهة تعذيب ماشايفته بحياتها اذا تجرأت واعترضت علي

همام

حجيت بسخرية واستهزاء  

_  متأكد انت رجال ؟  لأن الي يتقاوة على مرة  هذا مو رجال ولا ينحسب منهم  انصحك تروح  وتتأكد من نفسك اخاف مخدوع كل هاي السنين  وعبالك انت رجال

ايوب :  رجال وغصبًا ما عليك بس خل اخذ نجوى و حسابك انت  بعدين اعلمك شلون تكول علي مو رجال 

همام  : و ليش بعدين  حاسبني هسة ما دام جاي ومتعني 

علينا ودمك حار واتهدد ومحد يوگف بوجهك

كمت من الكرسي واتوجهت عليه وصرنا وجهاً لوجه ريحة حلگه فطيسة  تسطرلها اكبر واحد 

بلع ريجيه وكام يريد يفتحه حتى يلغي

لزمت فجوجه  (فكيه ) وعصرتهن

بحيث تطابگن اصابعي سوى بكد  ماضغطت عليهن  خليته ما  يكدر يحجي  فلت ايده من نجوى حتى يبعد ايدي عن حلگه لاينكسر فجه  بيدي

عفت فجه  ولويت ايده ورة ضهره وكتله : اذا شفتك هنا او حاولت تزعجهم مرة ثانية  لو تطالبهم بفلس واحد منهم  احسب الله ما خلقك ماشي

هز راسه بألم حتى احرر ايده عتيت ايده صاح من الألم

همام : ما سمعتك شگلت

ايوب : ما اريد الفلوس للموت بس عوف ايدي راح تنشلع

همام : سمعتو ما يريد الفلوس  واذا طالب بيهن مرة ثانية معناه راح  يحفر گبر بيده وكل يوم يدفن جزء من جسمه

بعدته خطوتين من جدامي ويا فلتت ايدي دفرته حتى يوكع على وجهه بس اذيت خاصرتي لأن استخدمت رجلي  المتصاوبة 

زميت شفايفي بألم واتنفست من خشمي  حتى ما ابين الهم الوجع الحسيت بيه  باوعت  للباقين

_  احسن الكم تاخذون زبالتكم  وتولون منا لأني ما مسؤول عن الي راح يصير وياكم

فورًا اخذو الشايب وراحو

اتنفست براحة لأن لو متعارك وياهم اكيد الغلبة الهم بس طلعو  اجبن من ان يواجهون احد كدرتهم بس ع البسطاء

دنگ ابو محمود  يتطمن من ابنه بس دفعه وكام من يمهم يمكن حس بالعار لأن انظرب وماكدر يدافع عن نجوى

سرحان : محمود وين رايح بوية

لحگه هو اخته بقو الشايب وحفيدته حالتهم ميؤس منها

رجعت كعدت ع الكرسي الخشبي واسمعهم

نجوى : معقولة جدي تريد تتخلص مني  و تنطيني اله

هيج تعاجزت مني

وگعدتي يمك صارت ثگيلة

اصلان : مو هيج السالفة هو صح  گالي واني رفضت من البداية  كتله عود افكر 

نجوى : يعني انطيته امل حتى يرجع يعيد الي ماسواه گبل  ماجنت متوقعة هيج اني رخيصة عندك

واني على طول جنت احتمي بيك 

من العالم تالي علمود دين تتفق وياه  تنطيني اله زين ما فكرت بالسواه گبل  بية

اصلان : كتلج والله مو هيج  اشلون اتخلص منج  وانتي بنتي الي ربيتهة وكبرتهة بس هي سالفة وصارت  اصلاً  جنت حاسم قراري من البداية  مستحيل انطيج اله ليش اني ما اعرفه  حقير ونفسه دنية

نجوى : وراح تتكرر هاي السالفة بس الله ايخليك جدي اذا تريد تتخلص مني اتخلص  مو مشكلة همة اهلي الجابوني اتخلصو مني بدون مايرف الهم جفن، مو عاد الغريب

بس گبل لاتخطي هيج خطوة گولي حتى اني بنفسي اقتل نفسي  وما اكون عبئ على احد

اصلان : انتي ليش لزگتي بكلمة تتخلص مني شوكت عفتج لو تعاجزت منج  ليش تحاسبيني على شي فهمتيه غلط

نجوى : علواه اكون فاهمته غلط لأني ما اريد انصدم بيك انت اخر شخص بقالي اذا تخليت عني ما تبقى لي حياة  تنسد الدنيا بوجهي مو كافي الكل  تركني بس بقيت انت جدي

لا تسويهة وتكسرني اني عايشة لأن انت وياي

اصلان: لاتخافين بنتي مستحيل مستحيل ارتكب نفس الغلط

نجوى :  ياريت يكون كلامك صحيح

همام 

دخلت جوة  على ملامحها اثار خوف بقى الشايب وحدة واكف اللتفتت علي يشكرني

اصلان :  اشكرك ابني لو ما وگفتك جان اخذهة

درت راسي تجاهه وحجيت بلا مبالاة : وفيت الدين لمساعدتي  والا اخر همي  الي يصير وياكم لأنكم فعلًا ناس مثيرين للشفقة  ماتستحقون الحياة مادام ما تگدرون تدافعون على نفسكم

اصلان : شتريدنا نسوي يعني ماعدنا اي حيلة عليهم

عدلت كعدتي وكلت  : هذا التبرير هو الي يزيد ضعفكم  جدام الناس ويخليهم يستغلونه ضدكم 

غير الموضوع : تعال خش جوة ضمد جرحك  اخاف انفتح

باوعت لخاصرتي الضماد غرگان بالدم

اصلان : يلا لا تعاند  بعد مابية حيل اشيل همكم اثنينكم ترى اني كبرت وماضال عندي حيل اشوفكم متأذين

همام

كمت جوة وغيرت الضماد وخلالي واحد جديد  بعد ما خلص طلب مني اكعد وارتاح اهتمامه ثار ريبتي  هو ليش هلكد يهتم بية ويخاف علي من الهوى بعدين باوعت لمراية مكسورة بالحايط وصار انعكاس وجهي اتذكرت انه اني اشبه حفيده وكل هذا  الخوف والمدارا هي اله مو الي

محمود

ما اذاني الضرب بگد ما اذاني عجزي عن مساعدة البنت الي احبهة  لو ما عزيز جان اخذهة ومحد كدر يحاجيه وانحرم منها طول عمري فوگ ما هسة محروم منها بس على الأقل جدام عيوني اشوفهة واسمعهة  شوي اخفف  شوكي الها

طلعت من بيتهم مليان خزي من نفسي المن هاي الضخامة والطول اذا ما اكدر احمي احد بيهن اليوم صار هذا الموقف ويا نجوى باجر يمكن يصير ويا اهلي وكلشي ما اكدر اسوي غير بس اتفرج عليهم بعجز

لحگني ابوي 

سرحان : اوگف مو احاجيك ليش هيج طلعت جنك مزاعل اهل البيت

محمود : شنو فايدة ضلتي هناك  وما كدرت اساعد البنت الگلبي هاويهة  اصلًا اشلون احط عيني بعينهة بعد

سرحان : وانت شبيدك اذا جانو مسلحين وهجمو عليك وانت اعزل

محمود : حتى لو .... سكتت معرفت بيش ابرر كلت لأبوي بقهر : عوفني يابة اريد اضل وحدي

سرحان : وين اخليك وحدك  و لا تلوم نفسك انت سويت العليك  واكثر هي مو عاتبة عليك 

محمود : لا يابة اني كلشي ماسويت  اني بس اتفرجت واستاهل الضرب  لأني جبان

سرحان : استغفر الله امشي بوية امشي ، ولا عرفتك هيج حساس 

محمود : يابة احبهة بس هي ماتريدني  هي لو قابلة بية جان ما تعرضت لهيج موقف وجان دللتهة وعيشتهة مثل الأميرة ،

بس رفضتني ماتريدني ما اعرف وين الخلل بية حتى اصلحه واخليها تحبني وتتقبلني

سرحان : رفضتك لأن حاسبتك مثل اخوها حقها من عمرها  يوم وانت وياهة  سوى لازم تقدر هالشي وما تجبرهة تغير مشاعرها  بيوم وليلة تجاهك

محمود : بس انا ما حسبهة غير مرتي  بعمري كله ما حاسبهة  اختي  من اول شبتها وانا احسبها حلالي واكثر من مرة حجيت وياها بس كل مرة تصدني

سرحان : ميخالف انطيهة وقت  لاتضغط عليها خليها تتقبلك من نفسها

محمود : صدك بوية هم يجي يوم وتتقبلني

سرحان : ان شاء الله يجي ربك اذا راد يجمع اثنين مايصعب عليه

محمود : ان شاء الله

كلام ابوي طمني لأنه واكف وياي وفاهم مشاعري وبنفس الوقت فاهم  مشاعرها هم

سرحان : يلا امشي نرجع  لايضل بال امك عليك

رجعنا للبيت وكل ما اتذكر تقصيري بمساعدة نجوى گلبي يلجمني  ردت اروح لبيتهم بس اتراجعت  بيا وجه اروح واحاجيهم

"الكاتبة ندى علي البياتي" 

همام

ورة يومين شوي رجعت لي صحتي والجرح وقف النزيف  والسيارة ما الهة اثر

كعدت على صفحة اتأفأف  الشايب ونجوى جانو يتريگون رجعت علاقتهم مثل قبل  ونسو الصار 

همام : ما عدكم رقم صاحب هاي السيارة  ليش تأخر هيج

اصلان : ليش مستعجل وما عندك صبر  تجي  السيارة اول تالي،لأن رزقه عليها

همام : لو ما عندي صبر جان هسة انتو ممگابليني حان جثثكم مفصخة بالجول

ضحكو على كلامي  : ترى ما حجيت نكتة حتى تضحكون

اصلان : ترى والله درينا جاي  تتمرن على هذا الدور بس مو كأن طوختها ولعبت نفسنا كلشي واله حد  

همام : انتو اغبياء لو تستغبون جم مرة لازم اعيد الكم  اني مو الشخص الي تعرفونه اني شخص ثاني 

اصلان :  عوف السوالف وتعال اكل شوف  حالتك شلون صايرة جسمك  ذبلان  وجهك مصفر من فقر الدم  حتى الجرح مايطيب لأن ما تعتني بيه ومگضيهة بس معبس وعصبي واعصابك بخشمك وتريد واحد يعبر من جدامك حتى تطلع عصبيتك عليه

همام : يعني الجرح راح يطيب  اذا ضحكت

اصلان : ليش لا اصلا الضحك هو نص الشفاء اذا مو كله

همام :  شنو انت جاي تتقشمر علي

اصلان : هــ ..... عزيز تعال اكل  عوف هسة السيارة  حير بجرحك الي مايتشافة  ولو هو شلون يتشافة اذا انت اربع وعشرين گاضب الناس وتكفخ بيهم

المثلك لازم يبقى بالفراش ومايتحرك  مو لازم القرية  من طرف ويكفخ بيهة

نجوى : اذا ما تريد تاكل  شنو رأيك اليوم نروح نتمشى بالجبل تغير جو صح الجو بيه برودة بس راح تروح منك هاي الطاقة السلبية ويتغير مودك .....

تجاهل كلامي ولاكأني حجيت جان مركز ويا جدي  سويت نفسي زعلانة واخذت على خاطري منه  

_ مو احجي وياك ليش ماتجاوب ترى  زعلت منك  هااا

برطمت  وهم نفس الشي تجاهلني ولا كأني موجودة بعدين  سكتت واتأكدت تمامًا انه ما يريد  يحجي وياي  وصرت غريبة بالنسبة اله 

كمت اكل ماخذة على خاطري من كل گلبي

بعدين كلت  على شنو اني مقهورة اشو متعودة الناس شوكت ماتمل تعوفني وحدي  واكيد هو هم مل مني

كملنا ريوك وكام جدي يشوف الدجاج  وبسرعة كام وراه يريد بأي طريقة يدبر له سيارة حتى يرجع لبغداد صارت بغداد تهمه اكثر منا  لميت الصينية واخذتهة اغسلهن يم التانكي المي يگص من البرد لحد ما كملتهن ضليت اهف بأدي حتى يدفن خليت المواعين  بمكانهن ورحت دفيت ادي عالجمرية

"الكاتبة ندى علي البياتي "

اصلان : ما دام اجيت وياي تعال ساعدني  خل ننطي علف الهن بسرعة لأن عدنا اليوم شغل طين لازم نسوي قوالب طين حتى نبني  خرابة جديدة للصخول

همام : لا تغير الموضوع

اصلان : يا موضوع  اشو كلنا مثلك  ننتظر السيارة  مو بس انت هاي الناس تنتظرها اكثر منك  لأن رزقهة وعيشتها عليها

همام : يعني ما اكو غيرها وانت شلون جبتني لهنا !! بدون اي وسيلة نقل

اصلان : اني لگيتك مشمور قريب منا  يمكن برجعتك متعرضين لك سلابة  ورايدين يقتلوك والله حفضك  من الموت بجيتي

انتهدت بعصبية اني وين احجي وهو وين يحجي لزمته من ياخته وقربته علي

_ لاتختبر صبري ماشي

فلت نفسه مني : انت هم لاتختبر صبري حتى لا تشوف الوجه الثاني الي  وهذا الدور  اطلع منه لو اني راح اطلعك منه غصبًا ما عليك اخليك ترجع عزيز القديم مثل الحباب

همام

بقيت صافن بوجهة ودفعته بيدي خطوتين  ليورى  متقصد حتى اخليه يفقد صبره مثل ما كال  لكن اتنفس بيأس ورجع لذاك الشايب الفقير  ومشى للگن يشوف اذا اكو بيض  بعدين اتوجه لگواني  للعلف يتفحصهن

طلعت من الحظيرة ريحتها تشگ الخشم  صاحتني ام محمود 

_ عزيز تعال ،  روح جيب ملابسك

ما دام اكو مي حار  وگاعدة  اغسل

سويت حركة بجتفي  بمعنى ما اجيب

نشمية : عابتلك ولك فوگ ما اغسلك

اميرة : خلي هسة اني اجيبهن

اتقريت مني وهمست لي

_ صاير  و لا يتحاجة بس يدلل علينا شعدنا غيره عزيز

همام

بكد ما يلفضون اسم عزيز جدامي خلو عندي عندي رغبة بس اشوفه اخلص عليه جابتهن واجت حتى النظيفات جايبتهن  بيدهة

اميرة :  هاج يمة غسليهن  خل اجيب لج مي من البير

نشمية : ولج كتلج بس الوصخات مو كلهن تعالي رجعي النظيفات  يالعوبة

اميرة : ميخالف يمة خليهن  اني اغسلهن

همام

لمحت نجوى راحت صوب الجبل وحدهة  اخذت من الگاع قمصلة ثخينة ولحگتهة صار عندي فضول اعرف شكو ورة الجبل هواي لحت عليه 

يمكن تعرف وسيلة نقل تاخذني لبغداد وما رادت الشايب يعرف بيها لأن قبل شوي هم ذكرت الجبل  بس ما اهتميت لها

مشيت وراهة بدون ماتحس

كله من زيد معقولة للأن ما لاگي لي اثر لو خلصو عليه مثل ما سوو وياي هسة لو بس اللگي شبكة اطمن عليه 

اميرة : عزيز وين رايح بهالبرد

همام

اتجاهلتها وكملت طريقي وراهة  حست  علي  من صرت قريب عليها

نجوى : عزيز  شعندك لاحگني

همام : كلت يمكن  تعرفين وسيلة نقل اروح بيها لبغداد

نجوى : لو عندي  جان اني رحت بيها گبلك

همام : اهاا

نجوى: والله

همام : لعد ليش تصعدين للجبل

نجوى : انت تعرف ليش اصعد للجبل بس راح اعيدهة الك. اني اصعد حتى اطرد الهم عني  كل ما اصعد جبل اعلى كل همومي تتلاشة وانسى كل شي عبالك انولد من جديد

همام : خوش طريقة راح اجربهة

نجوى : تفيدك حيل  بلجي ترجع مثل گبل

صعدنا مسافة من الجبل  بس بسبب اصابتي  اتوقفنا و  كعدنا الجو جان بارد بس المكان يبعد الطاقة السلبية حسيت روحي خفت وكلشي مني تلاشى  بقينا ساكتين نتأمل بالجبال والأشجار المتفرقة واليابسة بسبب البرد  الي محاوطتنا من كل مكان ورة مدى حجت نجوى

نجوى : رغم زعلانة منك  بس شكرًا

اللتفتت الهة ما عرفت شتقصد بشكرًا رفعت جتفي علامة على عدم معرفتي ليش تشكرني 

نجوى : شكرًا لأنك خلصتني من  ايوب

رديت بلا اهتمام : رديت الدين لا اكثر  انتو ساعدتوني واني لازم اساعدكم  ومايضل دين على اي احد منا

نجوى : انت ليش زعلان مني

باوعتلها : مو زعلان

نجوى : لعد ليش تتجاهلني وتحاجيني بجفا  وتحب تكسر بخاطري كل مرة

همام : هذا تفكيرج انتي

نجوى : شلون تفكيري واني جاي اشوف هالشي بعيني ومو بس اني كلها لاحظت انت شگد متغير علي وصاير متطيقني عزيز انت جنت اذا دمعة تنزل مني تحير شلون تراضيني وهسة متعمد تقهرني  وتبجيني

همام : يمكن انتي تحسين هيج بس هذا طبعي  ما احب اسولف ويا النسوان 

نجوى : منين جبت هاي الكلاوات من شوكت گمت ماتحجي ويا النسوان وانت كل عمرك بنص النسوان تتعلم منهن التمثيل

مارد علي وبقى مستغرب كلامي  رجعت كتله : يعني مو زعلان مني وكل هذا جان مقلب منك اعرفك ابو المقالب

همام 

لكزتني على عضدي بشقاوة وحتى  ما تاخذ راحتهة وياي گتلها  : نجوى انا مو الشخص  الي تضنينه مادري شلون صار هيج فجأة اجيت عدكم بس اني مو هو، افتهمتي

نجوى : لا كلشي مافتهمت

همام : افهميهة اني مو عزيز اني شخص ثاني شخص اذا عرفتيه راح تخافين منه وتتمنين انج ما شايفته ولا حاجية وياه

عكس الشخص الي تعرفونه مجرد  ممثل غبي وتافه 

نجوى : ههههههههههه

همام : الموضوع مايضحك

نجوى : بالعكس يضحك تتذكر من  مرة هم  تقمصت دور  محقق  بقيت شهر كامل  وكل كلامك بالأدلة والبصمات كمت حتى الدجاجات تحقق وياهن ولازم يعترفن منو  قتل العنز  البيضة

والله گلبت معدتنا من الضحك ذنيج الايام  الا جدي جدي جر اذنك  وخلاك  اتوب من الدور  هسة نفس الشي  لازم جدي   يجر اذنك حتى تبطل تحجي بهاي النبرة العصبية

همام : ليش هذا الشايب هم يتعصب  ويضرب

نجوى : لاتشوفه  هيج اذا تعصب  كارثة

همام : لعد ليش ما دافع عنج لما راد  الشايب الأخر ياخذج  ليش بقى ساكت و ما ضهر عصبيته عليه وفوگ كل هذا راد ينطيج اله مقابل الدين

نجوى : ما اعرف  بس مرات احسه يتقصد يضهر بدور الضعيف الي لا حول ولا قوة

همام : ما اضن جدج  شخص ضعيف يحب يكون خاضع للغير

نجوى : انت تعرف كلش زين ليش ما يگدر يدافع عني 

همام : ما اعرف ولا هامني اعرف

نجوى : على راحتك  خلينا نكوم نرجع جدي وحده  وهسة يضل باله علينا

همام : اني باقي هنا  حبيت المكان 

نجوى : المكان هنا رهيب  بس بالشتى  راح تتمنى لو الله يشمرك بالنار من وكت  حتى تخلص منه  ههههههه

همام

بقيت جامد بملامحي ما انطيت اي ردة فعل على كلامهة سكتت وكالت 

_ اني راح اروح اذا حسيت بالتعب ارجع حتى لايلتهب جرحك

همام

بعد ما نزلت من الجبل اتمددت ع الكاع  رغم جانت الگاع ثلج بس ما  اهتميت  ببرودتهة المكان جان مريح للأعصاب غمضت عيوني اريد اتذكر شنو الي صار وياي ومنو ذولا الناس الي رادو يتخلصون مني

فلاش باك  قبل اختفائه بساعة على الطريق العام

جنت راجع  من الميتم  قديم اتردد عليه  كل مرة حتى اتذكر ماضيي 

هذا الميتم  الي خلاني اوصل لهذا الحال رغم ما عشت بيه ايام حلوة بس كل ما اروح اشوفه اشكره لأنه طلع مني ذاك الطفل الفقير  والجبان ان صح القول وخلاني اصير قوي واگدر اخذ حقي بسهولة

وبين ما اني اسوق وشارد بذكرياتي السودة   ماحسيت  الا سيارة صدمتي  من ورة وبسرعة كدرت  اسيطر على سيارتي  حتى  لاتفلت من ايدي واتسبب بحادث 

وكفتهة  ونزلت  منها عالسريع  جانت الدنيا ليل المكان الي وگفنا بيه شبه اظلم

ويا نزلتي نزلو من السيارة اثنين امبين عليهم قتلة مأجورين شايلين عصي غليضة  وسجاجين و  متحضرين للعركة

همام :  هاي الحركة البايخة مالت الزعاطيط  راح تدفعون ثمنها  غالي

_ امشي جريذي عبالك اذا متحامي ويا الجبير مالك ما نگدر  نوصلك ونخلص عليك بثواني  

همام :  اولا اني مو متحامي بأحد هاي جدامكم وحدي  ...

رفعت ادي على على انه مامتحامي بشي ....  وبما انكم جاين بعصي  وسجاجين  راح اواجهكم بدون سلاح رغم جنت حاب احرم عليكم رصاصتين ماتخلي الكم اثر بهذا العالم

طلعت مسدساتي وشمرتهن بعيد عني 

_ خلوها تكون  قتال عضلات واشوفكم منو الي يتحامة بغيره 

بلمح البصر هجمو علية دايضربوني بس كدرت اتفادة ضربته بأيد لزمت جف ايده الي لازم بيهة العصة   والثانية لزمته من بلعومه و خنگته  خليته يرمي العصة حتى يبعد ايدي عن بلعومه  دفعته على صاحبه الي جي يريد يضربني بالسجين   شلت العصة من الگاع

سهل علي ضربهم بيها تدريبات زيد ما راحت سدى  رغم جانو  يتقنون ضرب العصى وصابوني اكثر من مرة وسببو لي خدوش بسيطة بالسجين مالتهم

بس كدرت اتغلب عليهم  شمرت العصى بعيد  واخذت مسدسي من الگاع وصرت بمستوى الرجال الي گوة يلتفض انفاسه من الضرب وخليت المسدس براسه  صكيت على سنوني وحجيت بنبرة غضب

همام : قبل لا افجر راسك بثواني گولي منو الي دزاكم علي

_ اذا اگولك يقلتني

همام : وانا هم  راح  اقتلك اذا ما حجيت يعني انت بالحالتين ميت

ضغطت مسدسي على راسه حتى يحجي  وفجأة اجته طلقة مجهولة اخترقت گلبه بنفس اللحظة اجت طلقة ثانية على صاحبه

انتفضت  مكاني حتى اشوف منو الي اطلق عليه النار  عليهم  صابني برصاصة  بعضدي  وگع مسدسي من ايدي  واضح جان قناص والرصاصة الثانية اجت بكلاتي اما الثالثة  حسيت بحرارتهة عبرت من فوگ گصتي خيط شعرة فاصلة بينه وبين جمجمتي 

وكعت على الأرض بس  مافقدت وعيي ضليت مفتح عيوني فورًا شفتهم اجو بس مكدرت اركز بوجوهم تحلقو فوگاي جانو جماعة وبلمح البصر ضربوني على راسي بمؤخرة الرشاشة  وبعد ما حسيت على شي

يتبع ......