.

صوتو ⭐⭐⭐⭐

علقو .....

قصة

عالم العصابات

الفصل : ٢

الكاتبة ندى البياتي

..........

عزيز

بعد ما طلعت الفندق يلا كدرت    اتنفس براحة و ارخي جسمي من التصلب الي جنت احس بيه رغم جنت أأدي دوري بسلاسة

ما اعرف شنو الصار وراي بذيج الغرفة السرية بس نظرات التوتر والقلق النفسي الي لاحظته بعيون بعض الموجودين خلاني اعرف ان الي راح يصير شي مو زين  ويمكن الي سويته شي غلط وراح تروح ارواح من وراي

ما ردت اسأل زيد لأن بكل الأحوال ما راح يكول ولا اريد اتعب تفكيري بشي  يمكن يكون مو زين وابقى شايل همه راح اعتبره حلم وهاي هي

صعدت بالسيارة وياه اللتفتت عليه اعصابه باردة معقولة احساسي يكون مو صحيح  مجرد تخمينات   شغل السيارة بدون ما  يحجي  شي رحنا للبنك

زيد : انتظر شوي راجع لك

هزيت راسي و انتظرت هواي  رجع بيدة جنطة صعد بالسيارة وطبك الباب  وخلاها  بحظني

زيد : اتعابك بدون نقصان

فتحت الجنطة مبهور بالمبلغ بحياتي ماشايف بگده

زيد : دير بالك لاتنباك هاذا مو حي الله مبلغ  اذا تريد رجعهن للبنك بأسمك

جانت فكرة منطقية وخصوصًا انا ما عندي مكان اضمهن شافني حاير 

زيد : تريد اساعدك 

عزيز : ياريت  اخذت سفطة منهن ونزلنا  حطيتهن بالبنك بأسمي  زيد ساعدني على الاجراءات وكملها  استغربت تصرفه جان يكدر يعوفني بحالي  واني احير بنفسي  طلعنا  من البنك  و اصر يوصلني للمكان الساكن بيه

عزيز : لا ما يحتاج

زيد : خل اوصلك لبيتك ما اعرف شلون اشكرك طلعتنا من ورطة جان ماكدرنا نطلع منها ابد

عزيز : اكدر اسأل سؤال شنو هاي الجنطة

زيد : الأفضل ما تعرف ولاتسأل ولا تكول منين هاي الفلوس حتى لاتجيب لنفسك المشاكل

عزيز : تمام

وصلني للعمارة. وراح بدون اي كلام خربطت شعري رجعته مثل ماجان ونزلت رداناتي جان شكلي فعلا مثل المجرمين  واجيب الشبهات لنفسي

لكيت الكل مجتمعين يم الباب ينتظروني  خفت لا صاير على جدي لو احد من اهلي

من شافوني اتفرقو كام صاحب العمارة متصخم وكاعد ينتظرني لو بيده يشرب من دمي هنا عرفت راح يحملني مسؤلية الباب الي خلعه ذاك الثور

_ لك كاسر الباب هسة طاح حظي

هسة انهجم بيتي اريد فلوس باب الشقة منك لو تصير مو زينة

ولك كعدتك بيها  وصيتك ادير بالك عليها هيج تجازيني تكسر الباب وتنهزم حتى تحرك  گلبي  بس لأن طالبك بالأيجار

هسة بهاي اللحظة تجيبهن فلوس الأيجار وفلوس الباب. وفلوس الدوش الكسرته وتجفيني شرك هيج مؤجر ما اريده

عزيز : خلصت نگ هاك اخذ  .... طلعت  من جيبي سفطت الدورلات وسحبت ورقة بقيمة مئة دولار جديدة تلمع. وخليتها بجيبه  طلع الورقة من جيبه يتفحصها عباله مزورة

و الكل بقو فاتحين حلوگهم من تصرفي  فتت للشقة ولحگني

_ ولك  احجي لي هاي منين لك بگتمن سلبتمن سطيت على يا بيت  كسرت رگبتمن وجبت ذني الفلوس

عزيز : شگالو لك عني حرامي ونصاب،  حتى ابوك وانهب و اسلب

شايف مسابقة الحلم لمصطفى الأغا

_ سامع بيها

عزيز ' شاركت بيها وفزت

جاوبني مذهول:   گول والله شلون شاركت وشلون فزت وليش ما كلت النة احنى هم نشارك  وياك ونفوز  جان على الأقل كلت الهم سجلو صاحب الشقة بلجي الله وافوز مثلك 

عزيز : ليش  تريد تطردني من الشقة مو

اصلاً اني بعد مايشرفني اكعد بشقتك الخايسة

_ يمعود البارحة راح ويا البارحة واني جنت ضايج وحبيت اداهرك شبيك متتحمل شقى 

عزيز: جذاب ما تداهرني جنت قاصد خل الم ملابسي وافرغ لك الشقة اروح ااجر بالخضراء احسن شلكي كاعد يمك ييييع ريحة العمارة تشگ الخشم

_ اشبيك يمعود غير حسبتك ابني وامون عليك . ابقى هناك وكعد على گلبي هم تمون بس كولي شوكت التسجيل انوب

عزيز

كام يتلوگ لي واني رافع خشمي وما اتحاجة وكل شوي اكوله راح انتقل وهو يجلب بية

هذا المبلغ حيل غير احوالي خلصت من مشكلة الديون والفگر والعوز العايش بيه  من صدك جنت ناوي انتقل منا واشتري بيت بيه خوش جبير واجيب جدي واختي لأن اعرفه يحب يربي الدجاج والغنم ومايكدر بدونهن من وعيت للدنيا وهو  يشتغل بالدواجن

بكد الفرحة الي حسيت بيها والخير الي جاني  واني افكر لمستقبلي بهاي الفلوس جنت غافل عاللعنة  الي اجت وياهن بدون ما اعرف

جيراني البلعمارة  اغلبهم گامو يدللوني دلال مو طبيعي بس لأن عرفو هاي الفلوس من المسابقة ويريدون اسجلهم عبالهم اني اشتغل ويا مصطفى الأغاة

وبعضهم جان واضح عليهم ينتظرون طلعتي من الشقة حتى يبوكونهن مني بس مايدرون اني خليتهن بالبنگ  و الباقي ضامهن بمكان حتى الجن الأزرق مايندله

( بالمخدة القديمة )

اخذت مبلغ وصعدته  لجارتي العجوز

_ هاي شنو يمة

عزيز : فلوس  اعرفج انتي هم على كد حالج وراتبج يادوب يكفيج  اخذيهن حتى لايصيبج عوز تتمنين المايرحمون

باوعت لي ببسمة بيها حنية وقهر بنفس الوقت : اشكرك يمة

عزيز : لاتشكرني  هواي ساعدتيني حتى لو بس ترفعين معنوياتي وتحسسيني انج وياي مو وحدي بهاي الدنيا

_ صدك راح تطلع من هاي الشقة وتروح للخضراء مثل ما سمعت

عزيز : هههههه مو للخضراء بس لازم اشتري بيت  اجيب جدي من القرية ونعيش سوى عليش كل واحد بديرة 

_ خوش اتسوي يمة بس راح اشتاك لك  وهمين ما اعرف منو اهلك حتى اسأل عليك واشوفك

همست ويا  نفسي : رجعنا للصفر بنچر عقلها ولازم اعيد من جديد .... حجية راح اكتبلج  اصلي وفصلي بورقة جبيرة واعلگها بالحايط  حتى كل ماتنسيني تقرينها وتذكريني

_ ليش شكألو لك علي مخرفة وانسى

عزيز : لا حشاج عقلج سالم مابيه شي

عزيز : لعد خل اكوم اجيب لك عدس تاكله ادري بيك جوعان ومستحي تكول

عزيز : حجية هو اني ليش  جبت لج الفلوس حتى تعوفين العدس وتشترين  لحم وفواكه وخضراوات  مابزعتي من العدس 

_ الطبيب گال  بيه فوائد

عزيز : دام الطبيب كال معناته هاي هي لا اعتراض على امره هههه

_ دأكعد هسة احميه واجيب لك

ورة شوي جابت لي واكلنا سوة  ضلت توصيني ما اكطع رجلي عليها لأن هي ما تعرف وين تلگاني وطمنتهة كل ما يصير لي مجال اجي ازورهة 

ورو ايام اتصل علي المخرج الي رفض ينطيني الدور

_ ها شلونك عزيز قبل جم يوم اجيت علمود الدور مسلسل ( اصابع متساوية  ) صح

عزيز : اي اني ورفضت تنطيني الدور  لأمور تافهة

_ اهاا عبالي مشتبه بغير واحد  المهم  الممثل الي اخذ الدور  صار عنده ضرف ما يكدر يكمل ويانة فأذا بعدك تريده تعال باجر خل نتفق

عزيز : طبعًا اكيد راح اجي

_ ديلا اشوفك باجر باي

عزيز : بايات .. يسسسسسسسسسس

سديت التلفون  واني ممصدك اخيرا راح امثل بمسلسل وابهر الناس بأدائي واصير مشهور  كلها تتمنى صورة مني  والمخرجين والصحافة كلها تركض وراي علمود اشتغل وياهم

مانمت ذيج الليلة ضليت اتمرن عالدور ، تمنيت جدي وياي يشوف فرحتي  دكيت عليه كالعادة  الخط خارج الخدمة

ثاني يوم من الصبح سبحت واتجهزت واني عايش شخصية "فرات "  الي راح ااديه واكف عالمراية امشط

دخلو علي اولاد ام هشام

_ هاي عمو وين رايح

عزيز : راح اروح حصلت دور بالمسلسل

_ و راح انشوفك بالتلفزيون مثل الممثلين

عزيز : ان شاء الله 

_ شوكت يعرضونها المسلسل

_ غير برمضان يعرضوها

_ عمو شنو دورك بالمسلسل

عزيز. : دوري  بطولة ابن عائلة متغربة من حرب ايران بسبب اضطهاد الحكم السابق يرجع هو امه  للعراق حتى  يدفن ابوه بعد ماوصاه اذا مات يرجع جثته و  يدفنه بالعراق ومايضل غريب بدول الخارج

فـ يشوف ان العراق مو نفسه الي جان  يحجي  له ابوه عنه كل شي غريب عليه خصوصا ان هو عاش وتربى ببلد اجنبي  عاداته تختلف جذريا عن عادات بلده  فيواجه هواي مشاكل ويا عشيرته توصل لقطع الصلة بينهم 

_ و اكيد عندك حبيبة بالمسلسل

باوعتله وغمزت : اكيد هو غير المشاكل راح تصير من ورة الحب

_عمو اذا صرت مشهور راح تروح منا مو

_طبعا يروح بعد ما يگعد بهيج مكان خايس

كملت مشط وكلت الهم.  تطمنو كل ما ايصير عند مجال راح ازوركم

طلعتهم من الشقة وسرگت الباب وراي  وقفلته القفل وهمة مكيفين اكثر مني بهاي المسلسل  وكل شوي يسألوني عليها واني اجاوب لحد ما  طلعت خارج العمارة

شفت  زيد طابگ سيارته. قريب منها  ومنتجي عليهة وجتف اديه كل احلامي وكعت بالگاع واطشرت  مثل السبحة بعد ما جانت طايرة بالهوى  وگفت بمكاني 

زيد : مرحبة

عزيز : هلا  بس لا اشتاقيت لي واجيت تشوفني

زيد : ههههه لا  شلونك حليت امورك

عزيز : الحمد لله حليتهن

زيد : بعدك هنا عايش بس لاتكولي انباكيت ورجعت للصفر

عزيز : ههههه لا بس اطرد عيون

زيد : اها هيج ، المهم محتاجك بشغلة

عزيز : شوف اني صح كتلك شتريد اني بالخدمة بس مو بهذا اليوم لأن هسة عندي تجربة اداء واريد اللحك عليها ما اريد اي شي يشغلني عنها

زيد : الدور الي راح تحصله ما ينطيك فلوس مثل الي انطيك اياهن اني

عزيز: لا تحاول تغريني ما راح اغير رأيي صار سنين منتظر هاي اللحظة حتى اوكف جدام الكاميرة واطلق موهبتي  ومامستعد اخسرها لو شيصير بعدين هذا صاحبك مو كلت راح  يرجع وبعد ماتحتاجني، وينه

زيد : صح كلت بس هو للأن ما رجع  ولازم احد ياخذ مكانه وانت مناسب كلش   الشبه بينكم  فضيعة  محد راح يشك بيك لحد ما يرجع

عزيز : للأن ما رجع !. وين راح معقولة عايف مشاغله ايام  بدون ما يتصل عليك لو يكولك وين مكانه

زيد : ما گال وحتى تلفونه مفصول خايف عليه وخايف لا غيابه يخلي الي يشتغلون وياه ينگلبون عليه وياخذون كل تعبه

عزيز :  مايحتاج تخاف عليه كول الهم طالع سفرة

رايح سياحة لبنان 

متزوج  بالسر على مرته ورايح شهر عسل وياها

رايح عمرة يتعبد  ويغسل ذنوبه 

كوم حلول اكو تغطي عليه  ليش لازك الة تخليه ضاهر للكل  وبعدين ليش هالكد خايف عليه

زيد : كتلك هذا صاحبي عشر سنين نشتغل سوى بدينا من الصفر لحد ما وصلنا لهاي المرحلة وما اريد تعبنا يضيع

ومستحيل اكدر اكول الهم  مسافر  لو متزوج لأن الكل يعرفه لايحب السفر ولا متزوج

و عنده علاقات ويا النسوان

واصلًا  احنا هسة عدنا عملية ووجوده ضروري جدا لازم يكون امام انظارهم والا راح تبدي الفتنة ويعرفون هو ماموجود 

عزيز : بدال ما واكف وياي روح دور عليه   احتمال مخطوف لو مقتول  ومحد يعرف بيه

زيد : مخطوف احتمال .

بس مستحيل يكون مقتول لأن الكل يعرف  اذا نمست شعرة منه  الجبير مالنا يحرك الدنيا عليهم واحد واحد

عزيز : مادام هيج ضهرة قوي ليش خايف عليه هو يرجع

زيد : الضهر القوي ما يفيد جدام الغدر والخيانة عنده اعداء هواي وكلهم ينتظرون الزلة منه حتى يكسرونله ضهره جدام جبيرنا

هزيت راسي بعدم مبالاة : ما يهمني،

اعذرني اني طريقي غير طريقك لازم اروح اتأخرت

زيد : الطريق والشهرة  الي رايح له ماينطيك ميت  الف دولار ،

كل الي ينطيك اياه تفاليس مايعيشنك اشهر وتالي ترجع للصفر هاي اذا صار صدى عالمسلسل وانشهرت

عزيز

وكفت بمكاني بعد مامشيت جم متر مبتعد عنه ما انكر اني ضعيف جدا جدام الفلوس لأن عشت عمري كله بعازة والفلس حسرة علي

وهيج مبالغ بالنصيب مايجي لعندي،  ما خليت كلامه  يأثر علي  حسمت امري وقررت  اروح للأداء وما اسمع له

بس رجلي بنچرن و رفضن يتحركن من مكانهن

زيد : خليها ببالك  بس الغبي يرفض هيج عرض

بهاي الفلوس تكدر تشتري اكبر بيت هنا وتفتح اكبر مشروع وتعيش مثل اغنياء البلد  وماتعتاز شي ولا تضطر  تتهزم تختل من الديانة مثل الفار

عزيز : لاتحاول افلوسك ما اريدهن

زيد  : متأكد

عزيز

سحبت نفس ورفعت راسي ليفوگ بحالة استعداد رجعت ليمه  وحسمت قراري : بس  خلي ببالك اي شي مخالف لمبادئي ما اسويه حتى لو غرگتني بالفلوس فتهمت

زيد : اتفقنا بس لازم تمشي على الي اكولك عليه  بدون ما تخالف اي شي منهن و الفلوس  تاخذهة  ورة  ما يرجع صاحبي وبعدها الله وياك 

عزيز : تمام

زيد : تمام

مد ايده يصافحني وانا بدوري هم صافحته عربون على اتفاقنا الي راح ياخذني للهاوية  بدون ما احس

الحاضر،،،،،

زيد

بعد ما رجعنا من المخزن دخلنا للغرفة.

جنت متعصب حيل عليه لو بيدي افرغ المسدس عليه وگلبي مايبرد عالسواه

زيد : يا غبي تعرف شسويت حضرتك

رد علي  هو منتجي عالقنفة وكأنه مامسوي شي يگطع حبات عنب و ياكل ببرود اعصاب

عزيز : شسويت !!

زيد : لك شلون تبوس البنية جدام اليشتغلون يمك  وانوب كملتها وضربتك

لزم مكان الصفعة : لك اي صدك ايدهة غير قوية بنت المطين عود ردت اسوي فد مشهد مثير ابهرهة بيه ماحصلت منه غير صفعة

زيد : هو هذا الهامك ايدهة قوية لك فشلتك جدام  زلمك هسة شيكولون عليك  جان البعيد والقريب من يشوفنك يحسبون لك الف حساب وهسة مرة مامعروف شنو اصلهة تضربك جدام زلمك  هاي ماعدا راح تفتر السالفة للكل ويضلون يتقشمرون عليك  هاي الحركة الغبية راح تنزلك من عيونهم

عزيز :  تحجي صدك غير هم بالأفلام  هيج يسون  الي يعجبهم سهر وبنات  وبوس ودك ورگص للصبح

زيد : كتلك افلام هوليود عوفهن على صفحة  هنا  اكو قوانين تمشي عليها   و فهمتك من البداية   ممنوع تسامح الي يخونك لو يتهاون وياك  ممنوع تحجي ويا البنات لو تطلع وياهن  لو شكد مايسحلن روحهن عليك ماتنطيهن وجه  تتصرف  وكأنك ما تشوف شي

عزيز :  بعد شلون ما تريد  الله يطير البركة من عدنا  اذا كله ممنوع ممنوع  وبعدين گلبي مايطيني اشوف  كل هالجمال واغمض عيوني وامشي  كأني ما اشوف 

لطمت على راسي وحجيت بعصبية : عوف گلبك وسوي الي اامرك بيه  ممنوع تتصرف على راسك

عزيز : بس ناقص تكول  ممنوع اتنفس حتى تكمل السبحة

زيد : عزيز لاتسفزني  وتخليني ارميك من فوگ العمارة 

عزيز : اذا ما تريد استفزك خلني اتنفس خانگني بهاي القوانين،  اخذ الدنيا برحابة صدر شدعوى هيج خانگين نفسكم بيها

بعدين  اني ممثل مو مجرم احب امثل ادوار عشاق حب اشياء ايجابية الناس تحبها وتستفاد منها مو مجرمين وقتلة وهذا مو اتفاقنا من البداية كتلك ما اغير مبادئي لو شيصير

زيد :  مبادئك نگعهن واشرب ميهن، 

هنا مادام بينا اتفاق  الي اكوله تنفذه فهمت واصلًا  شلون تساهلت ويا ذيج البنت بسهولة وسحلت روحك عليها جان لازم تكون اكثر قسوة وتعذبها وتخليها تتوسل الرحمة منك 

عزيز : بس كلامهة جان صحيح هو مجبور يشتغل وياكم مثل ما اني مجبور اخذ دور صاحبك المفقود علمود الفلوس

زيد : مو شغلك لازم ماتتسامح لأن القانون العايش عليه الهمام ما اكو تسامح ابد الخاين والمتهاون يتصفى فورًا

عزيز : بس اني مو الهمام ولو شكد ما احاول اصير مثله واتقمص شخصيته،

مستحيل ضميري يسمحلي اعذب ناس بريئة لو اظلمهم الرجال دايكول الكم مو ذنبه ونصبو له كمين بعد شنو ماتصدگوه

زيد : خليها ببالك  الحياة هنا متمشي بالعاطفة

تمشي بالقوة و الي يمشي بعاطفته ما يعيش ينداس جوة الرجلين  ومحد يشفع له،

هنا البقاء للأقوة  واذا ماصرت اقوى منهم تأكد راح يكون حالك حال هذا الرجال تبوس قنادر حتى يرحمونك

عزيز

خلص محاضرته وطلع من الغرفة يروح ينبه اي احد مايجيب طاري عن الصار بالمخزن

جريت نفس وكعدت عالكرسي ومسحت على شعري بتوتر  ورجعت خربطته كردة فعل  احاول اهدي نفسي بيها  واحاجي نفسي : شلون ورطة هاي وگعت نفسي بيها منو جان يتوقع نهايتي هنا بهيج مكان عبالي راح اتسلى جم يوم  واخذ الفلوس واخلص  بس صار العكس وهذا الهمام ماله نية يرجع،

شكلي ورطت نفسي شر ورطة وينك ابو الغيرة ارجع وخلي اخلص من هالمهزلة

صحت  بكل صوتي : الله يلعن الفلوووووووووس

رجع زيد متحمق علي ما عاجبه الصار

هسة واذا بستها غير زعيم ومن حقي لعد اشگد واحد خوثة هالهمام دافر نعمته بأيده اني لو بمكانه يومية ويا وحدة  شكل اشو فلوس وعنده خير من الله  المن ضامهن لا متزوج  ولايصرف على نفسه ولا يسافر  يرفه عن نفسه 

زيد : تدري اذا وصل خبر للهمام بالسويته اليوم شيسوي بيك

كلت بخوف : شيسوي !

زيد : يصلـ**لخ جلدك عن لحمك وانت عايش بالبلايس

بلعت ريجي بخوف : لو ما كايل لي احسن .... رفعت ادي ادعي لألله ....  يارب كون طمه گبل ما يطمني،

لو طمني اني گبل لايدري بالسويته ويصـ. لخ  جلدي

زيد : ينراد لك هيج

عزيز : انت هيج تشوف

زيد : انت السويته غلط

الف  مرة كتلك  سوي الي اكولك عليه بس

لا تتصرف من راسك بس مايفيد وياك  عايش الدور اكثر من اللازم

هسة انسى هذا جهز نفسك عدنا شغل جديد بالطريق اشرح لك عليه

عزيز : شنو هذا الشغل

زيد : كتلك بالطريق استعجل

عزيز : ما اتحرك من مكاني اذا ما اعرف شنو

لزكت عالقفنة ما اكوم  اجى لعندي يجر بية جر  واني مجلب بيها

زيد :  اشو دگووم مو شلعت گلبي

القرية .....

نجوى

من البارحة اكثر الدجاج خامل  ومريض  واليوم اغلبه مفطس  خليت ادي على خصري بيأس  واني اباوع الهن هواي خسرنا دجاج وخسارتهن  راح تكلفنا هواي 

سديت باب الحضيرة  ورحت كعدت يم الطلي الصغير انولد قبل اسبوع حاله  مثل حالي امه ماتت وخلته بأول ايامه

بقيت اني اهتم بيه اشربه حليب  من باقي الطليان حتى يتكوة ويشبع  وجدي والبقية يضحكون علي شلون اعارك الطليان حتى يقبلن يرضعنه خليته بحضني صوفه ابيض يرد الروح

وهو هم اتعلم علي بس يشوفني يجي لعندي عبالك امه  صرنا يتيم يربي بيتم  والحمد لله كعدت امسح له شوي  وجنت لازم اكوم ادور على جدي خل نلگة حل لهلدجاج لا يروح يفطس كله ونخسره 

طلعت اتمشى ادري بيه يكعد  ورة الخرايب گاعد  مغطي وجهه بالشماغ  وبجي  بشهگات تطلع من گلبه  انكسر گلبي عليه  منين اجتنا هاي المصيبة انوب

كعدت يمه و خليت راسي على جتفه

نجوى :  ما عرفتك هيج ضعيف  ومكسور ، و اني الجنت اخذ قوتي منك من تكسرني الدنيا

ليش هسة هيج يائس

خلي ندعي لألله يشافيه  هو قوي وراح يطلع منهة 

جاوبني بصوت  مقهور ويمسح دموعه بالشماغ : ما اضن يطلع منها صار اسبوعين غايب عن الوعي و بس يون وجرحه ورام ويا خوفي تكون كلاته متأذية

نجوى : دام هيج ليش ما اخذته للمستشفى حتى يتعالج ليش مخليه هنا  بس تنفرج عليه شلون يتوجع

اصلان :  العازة يابنتي جبرتني

نجوى :  هاي مو عمي سرحان وباجي نشمية والولد كلهم تگعدو يساعدوك بس انت رفضت ماتريد تاخذه

اصلان : همة منين الهم 

نجوى : لاتبجي جدي  ترى راح تبجيتي وياك وتخليني اني هم ايأس من حالته

اصلان : اذا صار عليه شي مستحيل اسامح نفسي اني الي دزيته بيدي للموت اني الي خسرت حفيدي

نجوى: ليش مفاول عليه  والله عزيز قوي  راح يطلع منها  وباجر تشوف

اصلان : ان شاء الله ان شاء

نجوى : جدي ادري موقتها  بس  شراح اسوي علمود الدجاج اليوم هم فاطس منهن هواي  ما تجيب البيطري لو تجيب علاج الهن

اصلان : مو مشكلة  راح  اتصرف

كام من يمي ينفض بهدومه ضهرة محني على عكس كل مرة  ضهره مستقيم ومايهزه ريح رغم كل الضيم العاشه بهاي السنين

بس شوفت عزيز گلبه كسرته حتى اني كسرتني اووف يا عزيزي  وين احلامك وين جنت تكوللنة  نشوفك بالتلفزيون  مثل المشاهير  وتالي رجعت النة بنص روح وعلى ساعة وتسلمها

مسحت دمعة نزلت مني وباوعت للسما اجذب اذا اكول حتى اني متت قهر وگضيت السبوعين ابجي عليه هذا عزيزي  لي ما عندي غيره كل الناس اتبرت مني  بس هو الي لمني  وكف وياي ماخلاني احس بالنقص العايشته

درت راسي شفت محمود واخوه  دخلو للبيت  كل ما يجون من السراحة ياخذون الهم جولة ببيت جدي وهم يطمنون على عزيز

صح مرات يشلعون گلبه بكد ما يناگرونه ويتقشمرون عليه وعلى احلامه   بس من شافوه مطعون  حارو شلون يخلونه يرد لصحته ويرجع مثل اول

....

دخل محمود للغرفة وكعد على الفراش وخلا عجسه عالمخدة وگال :  السلام على اهل البيت  احم احم. سوو درب اجينا

مسلم : اني الاعرفه الناس  قبل لا تخش  للبيت تكول سوو درب مو تخش وتكعد عالفراش وا

تكول سوو درب

محمود : اهم شي النية وتأدية الواجب

مسلم : هذا بعده بغيبوبة شنو ماخذ دور  الأميرة النائمة

محمود : اخاف لاگي له مسلسل بأحلامه وكاعد يمثل ومايريد يكعد الملعون

تضاحكو عليه  كام. محمود من مكانه لجرباية  عزيز وتفحص جبينه :  اليوم حرارته نازلة شوي

شال  ايده من جبينه  وكام يندس  بجتفه  ويحاجيه حتى

شوي و شافه يرمش بعيونه ويحاول يحرك اصابعه  صاح بعلو صوته

محمود: لك كعد والله كام يكعد عزيز تسمعني ولك اكعد شلونك تسمعني تس تس واحد ثنين واحد ثنين عزيز تسمعني

ضربه على وجهه راشديات بحجة يصحيه

مسلم : ادري  جاي تفصح المذياع لو تحاجيه كافي تكفخ بيه

محمود : غير اكعده  يلا ولك اكعد كافي نوم عزيز اكعد ، اكعد ، اكعد ، اكعد 

همام

حاولت فتحت عيوني بالكوة ماكدرت  حسيتهن لازكات ببعض  ويحرگني عدا عن الألم الي تارس جسمي كله ومكسره

وفوك كل هذا الضجيج والصوت الي ينخر براسي ما ادري منو اليحجي وشنو يحجي  وشنو هاي الأصوات  سون راسي طبل 

محمود : يلا اكعد كافي مشبعت نوم  ترى صرت مضحكة للقرية محروم نوم خوما محروم نوم كووم اكعد

صوته ضوجني حيل بس ردته يسكت ويعوفني  راسي انشطر نصين وهو لازم ايدي وينفض بيها حسيته خلعها بكد ما يعت بيها ومايجوز ولايتركني  

حركت ايدي الثانية  ولزمت ايده عصرتهة حتى يتوقف عن ازعاجي

محمود : لك لك لك عوف ايدي كسرتهة عوفهة لك   مسلم   هذا انلگف راح يكسر ايدي ولك عوفهة ، عوفهة يمخبل راح تكسرهة

مسلم : اروح اجيب توثية حتى اطلع الجني منه 

محمود : ولك راح يكسر ايدي روح صيح جده كوله حفيدك انمس وتخبل  .... اجر ايدي منه وبالثانية اضرب على ايده حتى يعوفني  ومسلم ايجر بية  حتى يعوفنا خرعنا ابن المطين  تالي

كدرت بالكوة  افلت ايدي منه  وكمت اغلط عليه  وكف گلبي

محمود : الله لاينطيك العافية امخبل انت لو كاسر ايدي بعد بيش اكل

مسلم : هذا الهامك

محمود : صدك والله بعد بيش اكل وايدي مكسورة حتى الاحبهة بعد ماتقبل بية هو اني كامل والكمال لله ومامعبرتتي انوب  مكسر

همام

بالكوة عدلت گعدتي صفحتي هاجت علي كبل استسلمت ورجعت هويت بمكاني  مغمض ع عيوني وزام شفتي حتى اتحمل الوجع   جسمي مابيه حيل يشيلني  يثواني و  رفعت عيوني لگيت يمي اثنين حثالة يلغون  فوگ راسي  نتنرت بيهم

_ صوتكم گطعوووه

محمود : ديلا يلا اكعد والله بيك كتلة على هاي سوايتك

همام

بقيت اباوع بالمكان اريد اعرف وين اني وشنو الصار وياي  ذاكرتي جانت تعبانة متذكرت شي غير ضوضاء  غير نفس الاطفال  اليتضاحكون جوة راسي و  ضحكاتهم جانت خبيثة ومخيفة لدرجة خلتني افز بألم بسبب حالتي حتى اخذ مسدسي

بس مالكيته  سألت والكلمة بالكوة طلعت  مني : وينه رجعولياه بسرعة

محمود : شنو هو

همام : سلاحي رجعولياه بسرعة

محمود : لاتخاف  سلاحك  بعده وياك  محد ماد ايده عليه

همام 

مافهمت شيقصد بس ضحكاتهم ضايقتني  وهو والي واكف ويا

مسلم : و طلقاتك هم بعدهن محد ما بايكهن  يعني امن بعدك كامل  ههههههه

همام

رجعو يتضاحكون انوب صوتهم ازعجني بالزايد لكيت علبة ادوية مقفولة. اخذهتة بأيدي السليمة  وهفيته بيها اجت ابراسه فيت خلته يدوخ بمكانه ويختل توازنه

محمود:  اااخ يابة  لك اتخبلت شلون تجرأ تضربني والله لو ما مطعون هسة اطيح حظك واخليك تتعذر وانت الممنون ... لزمني مسلم بس  فلتت نفسي منه وصرت قريب عليه متحمق  اول مرة يسوي هيج ويضربني  گضيت عمري كلهة اني اكفخ بيه  وهسة يريد يردهن علي بسيطة واكف جدامه وما اصبعي بتجاهه اهدد بيه

وكف على حيله ضاغط على  صفحته  وزام شفايفه حتى يجرع الألم  نفخ هوى بحلگه   وركز بعيوني واني بعدني اهدد بيه ومتقاوي عليه بس يتعدل اطيح حظه 

ما حسيت الة  لوى اصبعي شوي لا كسره و صفگني راشدي  بوجهي  سكتني بمكاني 

همام : كتلك صوتك اكطعه مفهوم

مسلم : هاي شبيك عزيز اكعد لاينفتح جرحك بعده ما طيبان

همام : عزيز ؟  منو هذا ! و منو انتو بالأساس

مسلم  : اهدأ خوية بعدك تعبان وما جاي تعرف شتسوي من صخونتك اكعد اكعد  محمود روح صيح جده كوله كعد خل يجي يشوفه جاي يهذي اخاف حالته تتخربط وبعد مابيدنا شي نسويله

محمود : عفتهم و رحت اصيح  حجي اصلان خل يشوف تاليها ويا حفيده الي تخبل الله يكسر  ايده  اشكد ثكيلة فر وجهي فر طگطگ كل عضام رگبتي 

شفت نجوى كاعدة بصف الحايط شمس الغروب  تضوي بوجهة  انوب هي مناك بيضة تكول كطن  وجهة صاير احمر طماطة  من وهج الشمس  

واني بدون شي ميت عليهة واحبهة  ودومها ماتحس بية لا مو ماتحس ، تحس بس تغلس لأ ن  ماخليت طريقة ما صارحتهة بيها  يعني مو معقولة لهدرجة ما تحس بية اخذت نفس  تحمحمت  ودنكت راسي

محمود : شلونج  نجوى

رفعت راسهة على وخلت اديهة على كصتهة تمنع الشمس من عيونهة

نجوى : هلا محمود

محمود : وين حجي اصلان   عزيز كعد  وشكله تعبان و.. 

بعدني ممخلص حجي كامت عالسريع  وراحت تركض للبيت لحكتهة ردت اگول الهة ديري بالج  اخوج ملبوس بعده ماكاعد كفخني وشوي لاكسر فجي  بس مالحكت احجي

دخلت له وشبكته حيل  الغيرة صعدت لراسي لو عندي سلطة عليها الا اجرها واقفل عليها الباب هي الي بس هم صح رابين سوة من هم صغار بس يبقى يحل عليها لو شكد مايكولون احنى  اخوان 

يعني شيصير لو تحس بية وتجي تشبكني بهاي اللهفة والله بعد كلشي ما اريد من الدنيا

نجوى : عزيز  كعدت  شلونك  ياگلبي الله لاينطيه الي سوى هيج بيك 

مسلم : على كيفج مو هيج اشو وخري  متشوفينه طعناته لاتفتحينهن

نجوى : معليكم بية هذا عزيز گلبي ما صدگت صحة  احجي لي  من صاوبك ياحيوان هذا المايخاف الله  والله لأدعي عليه يومية على حرگتة گلبنا عليك

محمود

بعدها خايفة عليه وتسأله عن الصابه بدون اي اشارة دفعهة  لغاد  وملامح وجهه متكورة بعصبية  استنكرنا تصرفه عمره ما سوة هيج ويانا بس يمكن  بعد الضربة مأثرة بيه ومنا هو الصخونة ما فكته ابد  

نجوى : عزيز شبيك ليش تدفعني اني نجوى

ما جاوبهة ضل يتلفت عالحيطان  ما عرفت على شنو يدور لحد ماتثبتت عيونه عالساعة شافهة ساعة فوگ الأربعة  ومابقى لأذان المغرب  نص ساعة تقريبا

همام : ما بقى وقت لازم اللحگ عالأجتماع ..

يتبع .....