.

صوتو ⭐⭐⭐⭐

علقو .....  

قصة

اجتياح

الفصل : ١٥

الكاتبة ندى البياتي

..........

"اتمنى ان نعود لأول

نقطة اللقاء بيننا

فقط لأغير طريقي عنك

وكأننا لم نلتقي يوماً"

.....

عزيز

اخر شي جنت اتوقعه اشوفهة گبالي . بأبتسامتهة الي جنت اذوب بيهة  من اشوفهة شابكة اصابعهة  بتوتر كأنهة خايفة من هذا اللقاء  كالت بصوت هادي

سيري : مرحبًا

حجيت ببرود قاتل متجاهل سلامهة  : اجيتي  تتأكدين اذا عايش او ميت حتى تخلصين علي مرة ثانية ،

اذا  اجيتي  علمود هالشي راح اختصر لج المهمة اني ميت  لايغرج الجسم الواكف على حيله

ردات تتقدم خطوة داخل الشقة  بس ما انطيتها مجال وقفت بمكانها  وحجت

_ اني اسفة ما جنت اعرف ليش ما گلتلي  انت واحد ثاني مو همام

عزيز : وشنو الفرق !! اذا عرفتي اني نفسه او غيره

تجين تعتذرين مني وتروحين تخلصين عالثاني ؟؟

سيري : لاتگول هيج بس اسمعني  وبعدها كول الي تريده

عزيز

سديت الباب بوجهة

شكد سهل عدهم خلق الأعذار والتبريرات لأخطائهم  الي جانو متعمدين يسوونها بكامل ارادتهم

مايعرفون الي ينكسر  صعب يتصلح واذا تصلح ما يرجع نفسه  ومجرد حفنة اعذار لاتقدم ولاتأخر

سيري

دكيت الباب : افتح لي خل افهمك  لا تظلمني 

ضليت ادك بالباب وهو مغلس رافض يحجي وياي ولا يسمعني   اجو جهال من فوگ يتراكضون  وگفو يمي مستغربين

_ منو انتي خالة ليش تدگين الباب على عزيز ؟

سيري : مو شغلكم  روحو منا

راحو ورجعت ادك  صحته بأسمه عسى ينطيني فرصة : عزيز  اعرفك ورة الباب افتحه  لا تتتجاهلني اريد افهمك ليش هيج سويت  انطيني فرصة  وحدة احجيلك  اني مو مثل ما متصور كلشي صار غصب عني

يأست من الدك كل الي بالعمارة  طلعو من شققهم على صوت الدگ  وهو مغلس 

اتقربت  علي  مرة تبين شابة بعدهة موجبيرة  واضح عليهة الفضول

_  منو انتي بس لاتطلبيه فلوس

سيري :  لا

_  لعد ليش اتدكين عليه الباب ترى هو عايش وحده عيب جاية وحدج  لعنده

حجت الأخرى : خاف انتي من البنات المو راحة خية جفينا شرج ولاتورطين ارجالنا بسوالفج  

سيري : اعرف عايش وحده واني مو مثل ما تفكرن بنت عائلة معروفة اسألي اي واحد علينا وراح يگولج منو احنى

بس هو وعدني يتزوجني. وهسة گلب علي

سيري

من گلت هيج كل النسوان اللتمن علي حتى يرضن فضولهن

ام هشام : صدگ تحجين  وين تعرف عليج

سيري

من شفتهن هيج متلهفات  قررت اخليهن يساعدني حتى يسمعني  حجيت الهن  بقهر : تعرفت عليه بالفيس  وبعدين صارت بينا علاقة حب  لسنين وبعد ما تعلقت بيه كام يتهرب مني  وميريدني 

ام هشام : طاح حظج خية هم اهل وگرايب  وماتعرفين  شنو ما شنو  رحتي عالفيس وتعرفتي عليه  ليش  شعايزج اشو تخبلين وجمالج يسحر الناظر شنو رجال عشيرتج عميان ما شافوج  وخطبوج لو بيج عيبة ومحد يتگلط

سيري :  شعرفني  قشمرني بعد ،  و المشكلة اني حبيته وهو بكل صلافة لعب بمشاعري وهسة يگول ما اريدج شوفي حياتج وحتى ما يرضى يفتح الباب حتى نتفاهم 

ام هشام :  ياااه عزيز هيج يطلع منة والله جنت اضنه خوش رجال ما عنده هيج سوالف شكد گعد ويانا بالعمارة ما شفنا منه اي شي مو زين  بس هي هاي التلفونات خربت الشباب كلمن لزم تلفون وصار عنده حساب  يراسل بالرايح والجاي. وانتي  فوگاهة حلوة الجلب يدنى عليج مو عاد الشباب  غير تثگلين وما تنطينهم فرصة يضحكون عليج  الله ينتقم من الصنع التلفونات  عساه بنار جهنم 

حجت المرة الثانية : كلامج صحيح جنا عايشين والله هادينا  ما نعرف لا فيس ولا بيس ولا هاي السوالف المكسرة يوميا وحدة ذا***بحينها لأن مطية صورها لحبيبها واهلها كاشفينها

_ام هشام : اي عفية هاي سالفة الماتخلص. ومحد تحط عقلهة براسهة وتاخذ درس من القبلهة گامن ناس تقلد ناس 

سيري : خالة  كوليله خل يفتحلي  الباب

ام هشام : اشو  وخري خل اشوف

اتقربت عالباب ودكته بكل قوتهة وكامت تصيح عليه

ام هشام :  عززززززيزززز عزيييييز  افتح الباب راحت البنية المكان امن   

سيري

اندارت علي وغمزت لي عود  تريد تضحك عليه  حتى يفتحه ضلت تحاول وياه  لحد ما مل فتحه

عزيز : ها خالة  شرايدة كسرتي الباب

ام هشام :  ها خالة !!! ولك صدك جذب  المسويه بالبنية هيج عندك سهلة تلعب بمشاعر هاي البنية الصفيرة (يعني الشگرة )  شو تعالي خشي  خل نشوف شمصخمة منطيتة صورج،

نازعتله  ويهددج

لو ضاملج  فيديوهات  تكسر ارگاب  امشي  امشي

خل انحلهة بالبوگة بدون ما احد يدري

عزيز : يابوگة هاي كل العمارة سمعت صوتج  وعرفو

ام هشام:  اسكت ابو الفواين هم الك عين وتحجي واني الفطيرة كل ما اخابر اهلي اگول الهم عزيز نعم الجار مثل ما أأمن بيكم اامن بيه  ولازمة اختي اقنع ببهة اگول ماتلگين احسن منه شو جمال و اخلاق وتربية والكل يحلف براسه من اجى لحد الأن ،   خشي خشي

عزيز : وين  ؟

ام هشام     ياااا تسكت لو اجيب لك الجفچير، تريدها تدخل وحدهة  للشقة حتى الشيطان  يخليكم تلعبون  چبمق لمبق  ما مكفيكم الفيس. وفضايحه 

كلت بگلبي : لاتخافين عليها هي شيطان

دخلن وكعدن عالقنفة واني على الكرسي المقابل الهن شابكت ادي  مكان الأصابة يوجعني  بمجرد ما اشوفهة  مرت دقايق محد حجة بينا 

ام هشام : هاي شنو مگضينها ساكتين احجو تعاتبو  طلعو المدفون اريد اعرف  كلشي و منو الغلطان بيكم حتى اعرف شلون اصالحكم بلا ما احد يدري واطمطم سالفتكم گبل ماتصير غسل عار 

ترى فضيحة الي تلوحهة تلوحك انت  هم  اهلهة اذا عرفو يفضحونك. ويكعدونك فصل يخسرونك الأول والتالي. ما عدة الفضيحة  يم اهلك وكرايبك وبعد ماتگدر ترفع راسك جدامهم وكل ماتريد تحجي ويا واحد منهم يلصمك على حلگك ويسكتك بفضيحتك 

عزيز : ما اكو شي  نتعاب عليه  السكوت افضل شي

سيري : خالة كفيتي وفيتي   ممكن تطلعين وتعوفينا نتفاهم وحدنا نريد شوي خصوصية

ام هشام :  ياااا انوب خصوصية لا خية كاعدة يمكم تحجونهن كلهن  واخذج  ونروح

مال اعوفكم وحدكم هاي شيلوهة من بالكم

خية الشيطان شاطر واخاف انوب  يصورج وفوگ الصور الي مصورهن

سيري : خالة شوفيني عرض اجتافج وطلعي منا لزگتي خوما لزگتي مو گتلج  اريد احجي وياه بخصوصية  

باوعت لنا بستغراب  وگامت  ماعاجبهة : هاي شو انگلبتي علي گبل  شوي جنتي فقيرة  وانكسر گلبي عليج اشو هسة صرتي تخوفين

عزيز : مو گتلج

ام هشام : يمة عزيز ظلمتك  الله يعينك عليها هاي طلعت حرباية  خاف هي مهددتك وما تكدر تحجي كول لاتضم علي والله اخذلك حگك وافضهحة بالمنطقة

سيري : اشكد لغيتي لخاطر الله طلعي برى وفضيهة

طلعت سدت الباب وراهة وهي تدردم اجت سيري  ليمي

سيري :  عزيز بس اسمعني  اني اسفة انت ما تعرف شلون عايشة حياتي ويا بابا هو جبرني  اغدر بيك  اني ماجنت اريد ااذيك شلون ااذيك واني احبك مو اتفقنا ننهزم سوى  بس الصار غصبا عني

عزيز : صححي كلامج تحبينه هو مو اني

سيري : شوف انت هم ذنبك اني شمدريني انت متقمص حياته وخليتني اتعلق بيك هو ماجان ينطيني اي فرصة اوكف يمه مو عاد احجي وياه  واكون قريبة عليه

عزيز : والمطلوب !!

سيري : مافهمت !

عزيز : شوفي اني ما اللومج  على اي شي احنى عايشين بعالمين مختلفين والي سويتيه شي عادي جدًا بالنسبة الج

بس بالنسبة لية جان موجع حيل  موجع لدرجة كل ما اتذكره يزداد وجعي

واجذب عليج اذا اكولج كرهتج لو نسيت حبي الج  بس انتي هسة متي بالنسبة الي الباقي بيج بس ذكراج جدامي والذكريات بس مخدر للروح لاتغني ولا تسمن من الجوع 

الطلقة الي طلعت من مسدسج ما قتلتني الي ، هي  قتلتج بداخلي  خلتني اشوف الحقيقة وما اضل غبي واصدك بكلشي  

تعرفين شنو اسوء شي بية  هو اني ما اكره رغم كلشي سويتيه انتي وجدي بس بعدني احبكم ومتعلق بيكم واتمنى من كل گلبي  يطلع كل هذا كابوس واصحى منه حتى ارجع الكم

بس  للأسف  الصار وياي واقع ولازم اتقبله وهذا الشي الي يوجعني لأني ما اكدر اكرهكم واعاملكم بالمثل واغدر بيكم مثل ماسويتو بية

ما اكدر ارد الكم الصاع صاعين لأن گلبي ماينطيني اشوفكم متأذين

"الكاتبة ندى علي البياتي"

ولهالشي ياريت تبتعدون عن حياتي  وما تطلعون لي بكل مكان حتى تذكروني بغدركم وتذكروني بأني جنت عايش بجذبة ومصدگهة

بس صدگ  تدرين اني جنت وياج عايش بجذبة  ههه جنت اعرف انتي تحبين شخص غيري وميتة على كلمة منه

مع ذلك اني اندفعت بمشاعري و حبيتج  وعشت الدور ونسيت  اني بأي لحظة انشمر بعيد وانتي تروحين للتحبينه  وماتفكرين بية

سحبت نفس  وكامت : يعني ماراح تغفرلي خطئي

عزيز :  كتلج اني مسامحج وعاذرج و ما اكرهج بس صرتي مجرد حلم و صحيت منه

سيري : اتذكر احنى مو اتفقنا ننهزم سوى ونعيش سوة بهذاك المكان الحجيت عنه

عزيز : هاي قبل لا تغدريني  وماتنطيني فرصة اشرحلج

اني جنت جاي لخاطر اعترفلج  اني مو نفس الشخص  الي جنتي تتمنينه   وجنت عايش على امل واحد بالمية تقدرين مشاعري وننسى كلشي من صدك   نروح سوة لمكان محد يندلنا بيه بس نسيت  انتي بنت رجل عصابة ومصالحكم اهم من مشاعركم

سيري : اني ما علي بشغل ومصالح  بابا اني مجبورة انفذ  واذا مانفذت يحبسني بالسرداب مال  بيتنا الي مسويه خصيصًا على شكل زنزانة  ضيگة حتى يرجع الي ايام  الي جنت مسجونة بيهن

بسبب حادث سويته وهربت بدال ما اساعد الأطفال  الي دعستهم وخليتهم بنص الشارع 

بس اكو ناس شايفيني وانسجنت  ما تعرف شعوري بالذنب وبالخوف  من السجن خلا عندي حالة نفسية. وصلت للموت كل يوم جنت اشوف الأطفال بمنامي على هيئة اشباح داخل السجن

توسلت بابا يطلعني منه بأي ثمن من السجن ومايخليهم يحكموني  بس بابا استغل هالشي  اذا ما انفذ له طلباته يخليني بيه حتى ضوة  يمنعه علي   لحد ما استسلم من الخوف  انت لو عايش ربع من الي انا عايشته وياه جان عذرتني

عزيز : هسة شتريدين اذا عالسماح گتلج  اني مسامحج بس مستحيل نرجع مثل قبل

حجت بيأس  : هاي هي على راحتك ... مشيت من يمه وگفت يم  باب  الشقة بأذلال انتظر  يتراجع عن قراره بس ما عبرني ولا باوع لي بقى كاعد بمكانه شابك اديه ويباوع بالأرض 

عرفت هو خلص كرهني مثل البقية  ورجعت لنقطة الصفر وحيدة محد يرغب بية حتى الي يحجون وياي يحجون للمصلحة  لو خوفًا مني محد يحجي وياي ويصادقني لأن اني هم بشر وهم  مثلهم احب اعيش حياتي والي اصدقاء وناس تحبني ونطب ونطلع ونفرح ونحزن محد يدور مصالح مني

فتحت الباب  ردت اطلع هو هم حقه ما يسامحني ضربته رصاصة يم گلبه  واريده يكولي  عادي كلشي ماصار

ويا فتحت الباب صار بوجهي  همام  مبين عليه متعني علي تعني  حتى  يخلص علي  شهكت بفزع و بدون تفكير  ردت اسد الباب بوجهه  هذا اذا لزمني راح  ما راح يرحمني 

سبقني وخلا رجله عالباب  بقيت ادفع حتى مايدخل لان اعرفه جاي يخلص علي  اجى عزيز  عالدفع مال الباب

وما حسيت الا الباب انخلع و  اندفعت غاد ودخل  كمت انهزم ورة عزيز بس لزمني من شعري  ورأسا بيد الثانية صفگني على وجهي  حسيتهه اللتوة من الصفگة  وكعت بالگاع وشعري كله تملص بيده  

بعدني ما گايمة  رجع رفعني من شعري وكفني حاولت اخلص شعري من ايده لأن كام يوجعني  عبالك ملخ فروة راسي من مكانها

صحت على عزيز حتى يخلصني منه  رغم اعرف بيه متصاوب صفگني مرة ثانية  حسيت عيني طفت  وكمت اشوف كلشي بغواش بيها دخت  توقعت راح يعوفني بس الصفكة الثالثة اجت على خشمي عبالك انضربت بجاكوك عليه بكد ما قوي اتترس وجهي دم  منه كمت ادفع بيه حتى يعوفني بس هو مستمر  يصفكني راشدي ورى  راشدي لحد ما انتهيت بيده خشمي وحلكي و ملابسي اتلطخن بالدم

اخير شي گمت اللفظ بأسم عزيز كوة حتى يخلصني منه  رجع راسي ليورى شعري كمت ما احس بيه بكد ما يعت بيه

همام : تريدينه يساعدج  خل يتقدم اذا ما اطبگه وياج اثنينكم 

اني تسوينلي كمين  والله لأندمج على الساعة الفكرتي بيها تحطين راسج براسي .... طلعت مسدسي من خصري حتى اخلص عليها وارميها يم باب ابوها الجلب  بس عزيز اعترض

عزيز : همام عوفها خليها تولي لا تقتلها

همام : هو هذا الطلع منك  المفروض من اجت تركع راسها بالحايط  وتخلص عليها هي وابوها  مو واكف وتدافع الها

عزيز : اذا هي مو خوش احنى نصير احسن منها

همام : نصير احسن منها !!!  هسة اشوفك شلون اصير احسن منها ... جريتها من ايدها وطلعنا من الشقة وگفني عزيز وصار بوجهي 

عزيز :  وين ما خذها

همام :  ماخذهة زيارة للمكبرة و اذا لحيت وكفت بطريقي  اخذك وياهة  انت هم 

الكاتبة ندى علي البياتي

.......

قبل ايام في لندن تحديدًا اليوم الي تعرضله عزيز للأغتيال

المطعم

مرام : سليم  اياد  شكو وراكم احجو  هاي العزيمة  اكيد  لازم وراهة مطالب ولا ما تعزموني هيج بلاش

سليم :  اصبري ماما خل يجون الفرقة الموسيقية وانتي تعرفين كلشي

مرام : على شنو يجون الفرقة الموسيقية ليش شعدنا عري

لطم سليم على خدودوه وجراهن لجوة  : ماما لا تغشمين حالج  اليوم عيد ميلادج شنو  ماتذكرين 

مرام : يووووه كل هاي علمود عيد ميلادي  ترى عجزت على هالشغلات  هو بشبابي ماجنت اسوي عيد ميلاد  مو عاد هسة

اياد : انتي بنظري بعدج  ازغيرة  وچنچ گمر اربع طعش  وتستاهلين العيد ميلاد

مرام : هههههه اي قشمروني بعد يلا احجو  شتريدون ورى هذا العيد ميلاد شنو مطالبكم وخايفين مني وجاي تتحيلون علي بهاي الحفلة والكيك والشموع وملابسين على روسنا قبعات تضحك 

سليم : احجي عمو لو انت تحجي

مرام : اويلي انوب متفقين منو اليحجي گبل

ثواني واجو الفرقة يعزفون النة ويغنون  وفرحانين  سليم يصفگ ويرگص وياهم  واياد يباوع لي ويبتسم  گالي والله طخت ببالي اجيب رعد الناصري هنا واخليه يغني " گلب مامال للغير گلب عدكم واسألوه " 

ضحكت بصوت هو اياد شعرفه برعد الناصري  سألته وانت هم تعرف مطربين العراق الشعبيين

اياد : طبعًا من اليوم الشفتج عرفتهم كلهم

مرام

سواهة صدك  وطلع تلفونه وشغله على اغنية رعد الناصري  على الاغنية  وانخبطت علينا الفرقة الموسيقية واغنية رعد الناصري  والي فاجأني سليم هم طلع حافضها مثل اياد واثنينهم يغنونها بأحساس طالع من كلبهم خلوني متفاجأة بيهم 

بعدهة الفرقة الي اجو  بهتو ووكفو موسيقتهم ضلو صافنين بالغنية الشغلها اياد  والناس الكاعدة بالمطعم كلهم اللتفتو علينا وضلو يباوعون النا بأبتسامة  اعرف اياد متقصد يشغل هاي الأغنية حتى احس بيه  لأن اني كل مرة ارفضه بس هالمرة يمكن ماضل بية اتهرب اريد اشوف حياتي كافي خوف من الماضي  وكاف  اجيب النكد لنفسي وما افرح حالي حال الناس بسبب بس لأن عشت تجربة قاسية كسرتني وخلتني اكره كلشي اسمه زواج وارتباط

ورة شوي دخل زياد ايده بجيبه يمكن يطلع الهدية دك تلفوني رفعته اشوف منو طلع رقم عزيز استغربت اتصاله وهو صار فترة حاظرني بدون مايوضح لي ليش حاضرني  ما اتذكر سويت شي وياه  يستدعي الحظر وبالأخير خليته براحته

فتحت الخط عالسريع  خليت ادي على اذني وجاوبت بصوت عالي

مرام : الو عزيز  شلونك

زيد : السلام عليكم اعتذر عن الأزعاج  اني مو عزيز  بس مضطر احجي وياج بخصوصه 

مرام 

بعد هذا الكلمة توقف الزمن عندي، الفرحة والأغنية  والحفلة وسليم وزياد كلشي توقف  وتبخر من عقلي

ضليت مركزة بالصوت الي رجعني للماضي  البعيد   معقولة هو ؟؟ اي هو !  بحة صوته نفسها لما يسلم لو يحجي بموضوع جاد 

رجف گلبي وتخربط حالي عيوني وگف بيهن الدمع ينتظر الأشارة حتى ينزل

انتبه علي زياد  وطلع ايده من جيبه قربهة علي سألني بقلق

زياد : شبيج ليش انخطف لونج هيج

ما گدرت اجاوبه خفت لا احجي وغصتي تفضحني سليم هم انتبه  على حالتي

سليم : ماما انتي بخير

مرام

باوعتله بتوتر وكل تركيزي على سماعة التلفون اريد اجذب السمعته واكول يارب يطلع مو هو 

اياد من شاف حالتي اتخربطت رأسا طفى التلفون  ونظراته تسألني شبيج   اجاني صوته

زيد : اسف  اذا زعجتج  اتصل بوقت ثاني  اضاهر مشغولة ست

عدلت صوتي وماخليته يحس علي : لاء. لا  اتفضل اسمعك  گول

زيد : ما اعرف شلون اشرحلج بس عزيز جان ناوي يسافر لعندج بس تعرض لحادث وهسة هو  بين الحياة والموت  ياريت تجين تشوفينه

مرام : لا ميستاهل شنو الصار وياه

زيد : اتعرض لأغتيال

مرام : اغتيال .  يارب اللطف بيه  ليش !!

زيد :  قصة طويلة بس هو جان  يعتبرج والدته  اقصد تشبهين والدته  ومتمني يجي للندن و يشوفج وجهًا لوجه  حتى  يحس بحنان امه ولو لأيام بس

فـ اذا تگدرين تجين للعراق اكون ممنون الج  واذا ماتگدرين على راحتج

مرام : ما اعرف شأكولك  فاجأتني بهذا الخبر ما اعتقد عندي مجال اجي 

زيد : ياريت تنطيني خبر اذا قررتي تجين

مرام : اكيد 

زيد : اشكرج  واعتذر مرة ثانية على الأزعاج

مرام : لا ما اكو مشكلة تكدر تنطيني احجي وياه

زيد : هسة هو بالعناية المشددة مايقبلون احد يدخل عليه

مرام : الله يگومه بالسلامة كلش  احزني الخبر

زيد : ان شاء الله اخذي راحتج  واتمنى ترجعين لي جواب

مرام : خل اشوف

زيد : مع السلامة

مرام : مع السلامة 

سديت التلفون وتمنيت لو جنت وحدي حتى اكدر اطلع مشاعري المدفونة من زمن بعيد بدون مايشوفهة احد 

اتعذرت منهم ورحت للحمامات  سليم راد يلحگني اشرت له يگعد بمكانه  رحت ركض اريد اختلي بنفسي

دخلت للحمام وفتحت المي  وكلني ارجف من هالصدفة الغريبة  بعد كل هالسنين سمعت صوته وين جان وليش ضهر هسة !؟

......

فلاش باك

قبل خمس وثلاثين عام 

قبل  ذلك اللقاء و الرسالة الغريبة  بدقائق .....  

مرام : انت صدك تحجي بعد ما جهزنا كلشي واتفقنا نعقد والناس كلها عرفت وفرحانين علمودنا  جاي تگولي اني ما افيدج  واني مو خوش 

زين وين حبك الي وين الحجي الجنت تحجيه  شصار حتى هيج گلبت علي ومتريدني بعد 

زيد : هسة اذا اگولج ابوج هددني بيج راح تطلعيني جذاب مثل كل مرة

مرام : ابوي شعليه ليش تتبلى عليه كول اني مليت منج وجنت اضحك عليج واني الغبية مصدگتك وماشية وراك على عمى عيوني وجنت متأملة اخلص من الجحيم العايشة بيه وياك

زيد : اشكد  متمنيج تكونين الي بس ما اكو قسمة ابوج ماراح يعوفنة بحالنا گالي حتى اذا تزوجتها راح اللگي ملعوب واخليها تطلگك  ابوج يريد لج واحد زنگين يعيش بخيره واني ما عندي غير شغلي البسيط وهذا مايعجب ابوج يريد اضرب بالعالي 

مرام : عوف ابوي على صفحة انت مو تحبني وكلت احارب الدنيا علمودج ليش هسة تريد تعوفني بسبب ابوي ليش تريد تكسرني اني ما استاهل هيج تجازيني بعد كل هذا الحب القدمته الك

زيد : صدگيني لخاطرج ما اريد اعلقج بية  اكثر واعرف بأبوج راح يسوي المستحيل حتى يخرب حياتنا خلينا نفترك مادامنا بأول الطريق

مرام : عوف ابوي عوفه ليش هلگد خايف منه اني  احبك و راضية بيك لو شچنت مسوي قابلة بيك  بس لاتعوفني وتروح وتضحك الشمات علي تدري هاي الفرصة يتمننها نسوان اخوتي  نفترق ويتشمتن بية فدوة فكر زين فكر بحبنا بأحلامنا ولاتخاف من احد وخلي نكمل زواجنا

باوع لساعته وگال : اعذرني  لازم اروح  عيشي حياتج  لاتنتظريني

وگف سيارة وصعد حتى ماكلف نفسه يگولي شنو السبب الي خلاه يعوفني بنص الطريق   جلبت بيه  حتى ميروح ويعوفني  وضليت اتوسله يبقى وياي  بس صعد سيارته وعافني  ولاكأنه يعرفني 

واني ضليت معلگة لا اني بالسما ولا اني بالگاع  شأكول للناس الي تنتظر عرسنا وفرحتنا قتل كل احلامي بذاك الشارع

هويت عالرصيف وادعي يرجع ما معقولة يتخلى عني بهالسهولة خلصت عيوني من البجي  واظلمت الدنيا بعيني واني اسأل نفسي لهلدرجة اني  رخيصة عنده  حتى بسرعة يعوفني  قبل عقد القران  اجى على بالي اخلي نفسي جوة سيارة ولا ارجع لبيت اهلي واشوف الشماتة بعيونهم

لحد ما الله دز لي ذاك الغريب العبر من يمي و  رسم البسمة على وجهي برسالته   وطلعني من قهري وخلاني اضحك ، رغم كل جروح گلبي

قويت نفسي وكلت حتى لو عافني الدنيا ما تخلص وراه بس تريد حيل وصبر شلون اتخطاه  واطلع من التفكير بيه شلون هان عليه عوفني بنص الشارع

ورى ايام عرفت بيه مسافر ما ادري وين محد يعرف وين منهزم وعايفني

اتعاركت ويا بابا وكتله هو عافني بسببك الله يعلم بيش مهدده

بس بابا  نكر وگال ماله علاقة هو  واحد جبان يريد حجة حتى يعوفني 

وهذا الي  فكرت بيه هو واحد جبان  خان وعوده وانهزم 

رجعت كل هداياه والحلقة  لأهلهة ماردت شي يذكرني بيه بعد ما يستحق اتذكره وابجي عليه ، بس جذب كل ما اضل وحدي اتذكره واتذكر كسرته لية

وابقى الوم بنفسي شلون تعرفت على هيج انسان باع العشرة بلحظة وحدة

كل ما اريد انساه واگول خلص نسيته  اسمع اشكال اللوان من اهلي الي يعير والي يتشمت والي يذب بسامير وارجع اذكره واذكر  الطعنة الي خلاهة بية واكره نفسي والساعة العرفتهة بيه

بعد شهور  بابا  گالي جايج واحد يريد يتقدم لج وضل يقنع بية  اتخطى الصار لأنه ما يستاهل كل هالقهر  العايشة بسببه

وافقت عليه حتى اسكت الناس الي ماتسكت وبس تريد الفرصة حتى تغثني

وهم اريح راسي من هالكرايب الصارو لي عقارب  ومنا بدت معاناتي صح الي تقدم الي  جان زنگين ومتمكن وماناقصه شي ونفس مواصفات بابا

بس جان ناقصه غيرة  على عرضه جان عادي عنده ياخذني لأماكن مشبوهة ويخلي الناس تتفرج علي بدون زواج

اكثر من مرة رفضت اروح وياه   حسيت بالقرف من الي يسويه  كل اصدقاءه ناس شهوانيين ومجرمين وعيونهم زايغة

بس هو يگول متوهمة وماشايفة ناس راقين بحياتج وخلف الله علي  طلعتج من الفگر العايشة بيه ويسكتني

وكل ما اگول لبابا عنه وعن سوالفه

جان يسكت بابا  بالفلوس وبابا  ويصف وياه  ضدي ويطلعوني اني الغلطانة وهم الصح

يگوله خطيبتي ومن حقي اتباهة بيها جدام الناس وبابا يكوله حقك واذا تعترض اكسر راسها

اخر طلعة وياه جان بمطعم عازم جماعة امبينين ناس كبار والهم اسمهم

من گعدو وهمة مخلين عيونهم علي ابد ما شالوهة 

واني كالعادة جبرني اللبس ملابس مكشوفة وضيگة

اثنين من الجماعة الجان عازمهم الجبير جانت  نظراته تريد  تفترسني  من الحقد  بمجرد اباوعله ينترس گلبي خوف  والثاني صح جان عليه علامات الدهشة  بس بعدين اتحولت دهشته  لأبتسامة مستفزة

ردت العزيمة تخلص بساع  متت من الخوف من ذولا الأثنين  ما ادري ليش هيج يباوعون لي عبالك بايگة ورثهم ومنهزمة   

وما اكدر اللگي اي عذر واگوم من عدهم  بالشفاعات خلص العشى والسهرة  ورجعنا للبيت 

من وصلنا لباب بيتنا حسيت بالأمان و هددته  گتله  بعد ما اطلع وياه واصلًا راح افصخ الخطوبة وكلمن يشوف دربه  اني مو بنت ليل تطلعني هيج طلعات وصخة والزلم يخلون عيونهم علي

بس ماعجبه ارفع صوتي عليه واهدده  اتولاني ضرب ما رحمني بالگوة بابا  واخواني خلصوني من عنده

دخلت  للبيت ركض حتى اختل منه وهمة بقو يهدأون بيه ويتوسلونه يهدي و  ما يتعصب

ورة شوي دخل بابا للبيت  شايط من الغضب  وگام يصيح ويغلط علي لأن رافعت  صوتي عليه و طلبت افصخ الخطوبة

واني هم ما اتحملت بعد اكثر وكمت اصيح عليه كلمة مني وكلمة منه  وجن جنونه لأنه كتله ديو**ث  ونغـ""ـل تقبل بنتك من رجال لرجال وانت تتفرج حاط بحلگك خر*ى تخاف منه  وماتحجي 

وعلى هذا الكلام موتني من الكتل محد خلصني منه لحد ما نهاني ماضل بية عضم صاغ  بس النفس يصعد وينزل وعلى اي لحظة ينگطع  بس روحي عنيدة مجلبة بالحياة

بعدها قررت انهزم منهم

و افضحهم  واخلي الناس تشوفهم على حقيقتهم الوصخة  اخذت فلوس بابا كلهن وانهزمت گلت الهم اروح اعتذر منه حتى يسامحني وبعد ما اعيدها

وبابا فرح وگام يمدح بية مايدري اني جنت ناوية انهزم وبعد محد يلگاني گالي : عفية بنتي حطي عقلج براسج وشوفي شلون راح تعيشين ملكة وكلها تتمناج

مرام : مثل ماتريد بابا اني رايحة اشوفه

_سلميلي عليه

مرام : ان شاء الله

طلعت من البيت عادي كلشي ما شايلة بس جنطة ايد  حاطة بيها كل الفلوس الي اخذتهن حتى مايشكون بية 

اجرت تكسي وصيته على العنوان الي اريد اروحله بس بنص الدرب  لحگتني سيارات وسدن علي الدرب  جماعة غريبة نزلونا من السيارة اني والسايق   و اخذوني  وعافو السايق بمكانه كل ضني جان هو عرف بية اريد انهزم ولگفني

بس الغريب جان نفسه ذاك الرجال الي شفته بالمطعم ابو نظرات مخيفة هو وابنه

كل راشدي اكلته مني شل وجهي شل  ومابرد گلبه اتولاني ضرب وتعذيب اشكد توسلته ليش هيج يسوي  واني شمسوية حتى هيج يضربني بوحشية 

بس ما جان يجاوبني بس بكلمة خاينة حقيرة  ماتستحقين ابني

من كثر الضرب كمت ما اميز شيكول وشيحجي بس اكوله اي  وصار  واسوي الي تريده بس عوفني وارحمني كافي تضرب بية

بعدها عافني وطلع  وترك الباب مفتوح. واني طلعت وراهة منتهية من الضرب مشي ما اكدر امشي. بالكوة واكفة على حيلي وملابسي مخربطة ومشگگة  من بعض الأماكن بكد ما جان  يشيلني ويرجدني بالكاع

اخذت جنطتي  وتأكدت من الفلوس محد ماخذهن  وطلعت وراه  وبأول سيارة صادفتني انهزمت بيهة رحت لمكان محد اندلني ببه  ضليت مختلة هناك لحد ما سافرت لجوء لألمانيا بسبب التعنيف الأسري والي سهل لي امري وجود الكدمات والضربات الي علي ومن بعدها استقريت بلندن

بس معاناتي ما خلصت ورة سنين هم رجع لي شبح الماضي  خطيبي  كدر يلگاني وغصبني اتزوجه حتى يبقى يعذب بية ويخليني اشوف خياناته  وحقارته جدام عيني  لأن تجرأت وعفته

اشكد منعت نفسي اخلف منه واجيب اطفال يكونون ضحايا لهيج اب متوحش وظالم  بس الله شاء ان اخلف ابني سليم

ومن بعد ما صار سليم  قررت تتغير وما اخاف منه و اول قرار جان هو اتطلگ منه واخلص من هذا الكابوس الجاثم على صدري

......

الحاظر

طلعت من ذكرياتي على صوت  اياد  يدگ الباب  حاولت اهدي نفسي واكون قوية مثل ما اتعلمت  بس بمجرد ما فتحت الباب اله  خليت ايدي على حلگي و انهاريت بالبكاء مثل الي يريد احد يحس بوجعه ويواسيه

حظني وطبطب على جتفي

اياد : شبيج منو هذا الي گلب حالتج هيج گبل شوي جنتي فرحانة

ماحجيت شي ظليت مجلبة بيه وابجي  اجى سليم  خايف علي  تركني اياد وابتعد خطوة

صرت بمستوى سليم وحظنته  ورجعت ابجي

سليم : ماما لا تبجين اليوم لازم تضحكين لأنه عيد ميلادج ولازم نفرح بيج

مسحت دموع : اسفة حبيبي خربت عليكم العيد ميلاد

حرگ راسه بعفوية  : مو مشكلة  ويلا  غسلي وجهج واضحكي الدنيا ماتسوى الحزن مو هيج انتي علمتيني 

مرام : صار حبيبي

غسلت وجهي  ونشفته  ابتسمت بس عيوني الحمر غالبات على ابتسامتي

غصبت نفسي احتفل وياهم لخاطر سليم ما ردته يتأثر بحالتي وهو ياخذ القوة مني

بعد الحفلة  وصلنا اياد  وهو راح رغم قلقه علي  طمنته  كتله ما اكو شي بس جنت محتاجة ابجي وبجيت  ما صدك بية بس عافني على راحتي

دخلنا للبيت وبدلنا ملابس نوم مريحة و مددت يم سليم  رأساً حظني

سليم : ماما ليش بجيتي بالحمام مال المطعم من ورة الأتصال 

مرام : اي

سليم : ليش منو الي اتصل عليج بابا بس هو يبجيج كل ما يتصل عليج

مرام : لا مو ابوك ، واحد گالي عزيز مسوي حادث  وحالته خطرة ويرديني اروح اشوفه

سليم : وتروحين !

مرام : ما اعرف 

سليم :  ماما لاتروحين العراق مو خوش كلهم ناس مجرمين يأذونج

مرام : لا حبيبي لاتعمم اكو ناس مو خوش وهذولا قلة قليلة  الناس الطيبين اكثر منهم

سليم : عزيز هم طيب لأنه طلعني من ذولا المجرمين

مرام : شفت الناس الطيبة بكل مكان وذولا الجم واحد الحثالة لازم مانخاف منهم توعدني انت هم  ما تخاف منهم

سليم : اوعدج ماما

بست راسه وحظنه ورة شوي و نام  طلعت تلفوني من الجنطة واتصلت على اياد كتله عن قرار رجعتي للعراق

اياد : انتِ مخبلة بعد كل الصار وياج طلعتي بالشافعات وتردين ترجعين لنفس النگرة

مرام : طليقي  هسة انكشف  ما يكدر يسوي شي

اياد : ياعيني  طليقج رجال صاحب مشاكل  لو يحطونه ببير اظلم  مايكعد راحة  واذا سمع بيج راجعة راح يدفع روحة ثمن بس حتى يأذيج

مرام :  اني مو ذيج الجبانة الي تسمع لتهديداته بعد ما يخوفني

اياد : مرام لاتسوين شي تندمين عليه وشيلي الرجعة من بالج المن رايحة انتِ

مرام : رايحة ا شوف الي ساعد ابني حالته خطرة وطالب يشوفني

اياد : منو يگول هذا ملعوب منهم حتى يوگعونج بالفخ وترجعين لنفس المعاناة مرام گلبي فكري زين لاترمين نفسج بالتهلكة

مرام :  على كلًا انا بلغتك بس ما منتظرة اخذ امرك اني وابني راجعين  بس اكدر اضبط اموري نرجع للعراق

اياد : يا الله انوب ماخذة سليم وياهة  مرام عيوني لا تتصرفين من راسج العراق مكان خطر عليج ليش ماتفهمين هالشي 

مرام : انا گلت العندي  وراح ارجع  علموده

سديت التلفون وحسمت قراري ارجع  حتى اشوفه واسأله  شلون عاش كل هالسنين بلاي و ليش عافني وانهزم وخلاني جوة ادين الناس الماترحم

اياد كل يوم من  الصبح للمساء يقنع بيا اتراجع عن قراراي بكل الطرق

بس ما سمعت منه وقفت كل اعمالي  واخذت اجازة من الشركة الي اشتغل بيها بس

انطوني  بنفس الأيام گالي المدير انتظر اسبوع يلا ينطيني اجازة بس بشلعان الگلب يلا اقتنع

جهزنا ملابس بسيطة نروح بيها لأن ماناوين نبقى هناك غير جم يوم  

وبيوم السفر اتصلت بزيد حتى ابلغه بجيتنا

مرام : الو مرحبا

زيد : اهلاً وسهلاً ست

مرام :  اليوم راح نجي للعراق

زيد : صدگ الف الحمد لله عبالي  نسبتي الموضوع

مرام : لا ما نسيته هسة احنى بالمطار راح تطلع طيارتنا بعد ساعة

زيد : اهاا لعد راح انتظركم توصلون بالسلامة

مرام : اشكرك 

يتبع .....