.

صوتو ⭐⭐⭐⭐

علقو .....

قصة

عالم العصابات

الفصل : ٤

الكاتبة ندى البياتي

..........

عزيز

صاح زيد بعلو صوته "شلووووووووون" بعدين حس على نفسه خلا ايده على حلگه وهمس : شلووون،  تحجي صدك لو تشاقة

هزيت راسي بيأس بمعنى ما اتشاقى هو اني صدك لا العب ورق ولا لاعب بحياتي

زيد : وليش ما كلت ياغبي

عزيز : شمعرفني اذا جبتني ركض وكلشي ماگتلي لو كايلي چان لگيت حل لو جان اجلت الموضوع ونغلس عليه

زيد : مستحيل الهمام ما يأجل شي ولا يغلس عنه خصوصًا اذا شي يمس كرامته وهاي اللعبة ضروري اتم 

عزيز : من هذا اختفى لاحس ولا خبر وعاف الاول والتالي واني متورط بمكانه 

زيد :انت جيت برضاتك وحسب الأتفاق

عزيز : اذا اكو واحد نذل بالعالم هو انت  غريتني بالفلوس وتالي تگول جيت برضاتك

اتلفت وراه وجدامه ورجع باوعلي  يريد حل لهاي الورطة :

يعني ولا مرة ولا مرة  لاعب ورق  بحياتك

عزيز : ولامرة هو اني اسماء الورق ما اعرفهن بس اعرف ورقة الجوكر من الرسمة

زيد : يا فرحة امي وابوي هسة شنسوي فكر وياي

دنكت اربط گيطان حذائي واحجي : مانراد الهة روحة للقاضي نشرد گبل لايجون

زيد : ولك مايصير وهيبته جدام ذولا الحثالة

عزيز : يمي كلشي يصير

اسمع مني وخل نفلت بأرواحنة وبعدين نتحجج بأي عذر اخذ الأمر برحابة صدر ماراح تنقص شواربه اذا اتخلف على فد موعد

زيد : شنو نتحجج بأي عذر اكو واحد مايعرف يلعب ورق حتى الأطفال هنا يعرفون يلعبون ورق بأحترافية لك السلاح بدقيقتين يفصخونه ويرجعونه وانت بطول النخلة و ما تعرف هم حاسب نفسك رجال

عزيز :  رجال وغصبا عالكل بس هاي يمكم احنى الجهال كلشي مايعرفون  بس اتفل على عمك واتفل على خالك وهاي هي

زيد : ولك وين گايم

عزيز : جايز من روحي اني خل نشرد  ماسامع بالمثل الي يكول نص الشجاعة هي الأنسحاب قبل وصول العدو

زيد : والعدو اجى و شرف علينا بعد مابيهة شردة  انلاصت اكعد اكعد ولا تبين نفسك ما تعرف خل افكر بحيلة وبالبيت اني اعلمك حسابك عسير يمي

همست له : اكولك گتلي صاحبك ابد ما خسران وياهم ولا جولة

همس لي : ابد ابد ابد

عزيز : جا خوش عوف الشغلة علي اني احلها

زيد : الله اليستر اذا اعوفهة عليك

عزيز : انطيني مجال ابرز مواهبي لاتقيدني

زيد : مواهبك ابرزهن ورة الشاشة مو هنا 

عزيز : ماعليك بس شوف وتفرج راح  اطلعك مثل الشعرة من العجينة

زيد : مثل الشعرة من العجينة الله يستر ، ما اكو دعاء. حرز . سحر.  اي شي  يخليهم مايشوفنا لو تطلع الهم شغلة ويرجعون ولانتفشل هنا اليوم راح يطيح حظنا  وننكشف

سالم : شلونك همام مو عوايدك اليوم جاي من وكت اليوم

خلا عزيز رجلينه عالميز شبك اديه ورة راسه ورجع ضهره ليورة ويحجي وياهم بأستفزاز

_ يعني معقولة افوت على نفسي هيج منافسة اخسركم بيها و  اغسلكم غسلة زينة واروح مثل كل مرة

همست ويا نفسي وايدي على گلبي  والله هم راح يغسلونة غسلة زينة جدام كل هالحاضرين  

سالم : هواي مصدك روحك انصحك لا تتسرع قبل النهاية 

عزيز : قابل جذب مو كل مرة اجي اغسلكم غسلة واشمركم برى البار انتو وخسارتكم

خلة شدة الورق عالميز بعصبية وكعد

باوع عزيز للورق بنظرة استصغار عود ماهمة الوضع عكس سالم وجماعته الي مصممين اليوم يطيحون حظنا وحظ الخلفونة : انشوف

هنا بديت ايأس من عزيز وردت اللكي حجة حتى اكومه الوضع صار حرج وراح يلعبون ورق لكن فاجئني لما دفع الورق على جهتهم بكل برود   

عزيز : تدرون صايرة هزيمتكم مو مسلية مثل گبل

يعني شنو الفايدة كل مرة جايين لهنا ومتعرضين لخسارة ومفشلين ارواحكم جدام الموجودين مامليتو  الواحد هم يخلي كرامة لنفسه ويبطل لو انتو ماعدكم شي اسمه كرامة وخل نبطل وبعد مانفشل ارواحنا جدام الناس

لذلك بما انكم لزگة وعايشين على امل ان تفوزون علي يوم من الايام،

راح افوزكم اليوم  بمزاجي واحسبهة صدقة على ارواح موتاي

و هم خطية انتو تريدون تجربون شعور الفوز مرة بحياتكم حتى لو بالجذب

لذلك  اعتبرو نفسكم لعبتو وفزتو علي وجاي تحتفلون واصواتكم تتعالى بالضحكات 

نزل رجليه من الميز وگال : جنت اريد احتفل وياكم بفوزكم الجذبي بس تعرفون وقتي قليل ومشاغلي جثيرة وانتو تعرفون هالشي ...... طبطب على جتف سالم .... احتفلو بهذا الفوز الوهمي  على حسابي واطلبو اي شي منا ولا تستحون ماشي

مشينا من يمهم بهيبة بدون مانبينلهم احنى مهزومين منهم،

حيل عجبني من عرف شلون يخلص نفسه من هالورطة وهم يكسر خشومهم قربت راسي على راسه واحنى نمشي بثقة

زيد : عجبتني راح اكافئك على الي سويته بس نصل بالبيت

غمز لي بخباثة وجاوب : بعدك اشايف من مهاراتي بالمراوغة غسلتهم غسل بعد بحياتهم ما يطلبون يلعبون ورق ويا صاحبك خليت  كرامتهم راح تبجي بالزاوية

طبطبت على جتفه بفخر : عفية عليك،  للأمانة ذولا الثنين كلش ما اطيقهم وجنت اتمنى يجي يوم واللكمهم على وجهم وافلشه بس ما عندي صلاحية

عزيز : تريد انطيك صلاحية بعتباري زعيم  على سن ورمح  روح  كسف احوالهم  محد يكدر يحاجيك

زيد : هههههه مايصير مو بهالسهولة ذولا ولد مسؤلين كبار واليندك بيهم يروح ورة الشمس لهذا ساكت الهم ما اريد اللعب وياهم

عزيز : ولد مسؤلين كبار !!!!

زيد

هزيت براسي  ااكد كلامه

عزيز : ورطتني وياهم  ولك شكد نذل انت

زيد : هاي الكلمة دير بالك تعيدها حتى لاتشوف وجهي الثاني للنذالة  .... بعدني احذره من ان يعيد هاي الكلمة

وما احسيت الة واحد من ورة جراه من جتفه وحتى احميه لزمت  الرجال ولكمته على وجهه مثل ما جنت اتمنى وكع بالگاع

زيد : اكره اسلوب الغدر من الخلف لو جنت رجال  حاول تتعرض النة من جدام وشوف شنسوي بيك

اتعصب الرجال وشهر سلاحه بوجهنا وبدون حتى ما يهددنا او ينطينا مهلة رأساً اطلق على عزيز رصاصة  والله ستر هالملعون وانبطح بالگاع گبل لاتصيبه ويروح بيها

وما خلصت المصيبة الطلقة صابت رجل اعمال جاي علمود يسهر ويا البنات

من تصاوب جماعته اتخبلو همَ هم كامو يطلقون النار عليهم

صار اطلاق نار متبادل داخل البار

انگلبت الدنيا بنص البار

نشب  الخوف والرعب بين البنات صياحهن ترس المكان يريد يخلصن ارواحهن لا يموتن من الطلق العشوائي

والبقية الي باك الفلوس من طاولة الورق وفلت هو وجماعته والي اختل حتى لا يتصاوب والي اتصاوب ويريد احد يساعده

اني  ضليت ادور على عزيز مدري  وين اختفى خفت لا يكون اتصاوب بهالرصاص

لگيته مختل ورة الميز محتضن نفسه حتى لايتصاوب  اتقربت عليه وصحت عليه حتى يسمعني

زيد : عزيز انت بخير

عزيز : بنص الخير الدنيا كامت تمطر طلق علي بكد ما زاهيتلي

زيد : ابقى مكانك لاتتحرك لا تجيك طايحة

عزيز : لاتوصي حريص لازگ بمكاني كل عقلك اتحرك الة تجي الشرطة تفضهة يلا اتحرك منا

زيد : ولك يا شرطة غير ذولا كلهم مشبوهين محد يكدر يخبر عليهم .

عزيز : هاي هم حظي

زيد : لا والله كول حظي اني صار سنين نجي لهنا اني والهمام وكلشي مايصير وانت بس حطيت رجلك هنا  كلبت البار على بطانه

عزيز :  كله صوجك هو  اني وجهي وجه لعب اقمار وهالسوالف

زيد : ادعي لا احد يشوفك مختل والا راح تطش عليك الجبان رقم واحد للموت راح تبقى وصمة عار بيك

عزيز : وشتريد اسوي اكوم اهوبز بنص الطلق والله شوفوني اني. ما اخاف

زيد : تدري لو الهمام بمكانك شيسوي اذا احد اتهجم عليه من ورة

عزيز : هو شطيح حظي. غير همامك بس يلا گول شيسوي بهيج وضع

زيد : يرجع له بنص هذا الطلق ويفلش راسه بالحايط

عزيز : لعد خل يجي هو يفلش راسه اني بعد ما اتحرك منا بعدني شاب واريد اشوف حياتي

زيد : هسة اليسمع انت

"ايلون ماسك " وتخاف على حياتك ورفاهيتك الماتخلص

عزيز : حتى لو. بس حياتي اريدهة ما اريد اخسرهة بهالطلق والعركة

زيد

بقيت اتلفت اريد مكان امن اطلعه بيه بدون ما تجيه طايحة لحد ما لگيت مكان نكدر ننهزم منه : عزيز التف من ورة هذا الميز على كيفك وخل نطلع منا من هذا الممر اكو باب طوارء

اطلع منه وراح اللحگك

اشر لي براسه والتف على كيفه حتى لايصيبه شي  ويا كل طلقة يفز ويرجع يكمل

لحگته اطلع وراه  وجان يلزمه الي جان ويا سالم بدون سابق انذار رفعه لمستواه لكمه على وجهه وكعه بالكاع وهو صار مثل الفارة جدامه لازم عينه  حتى ما كدر يدافع عن نفسه اضطريت اتدخل  قبل لايلتمون عليه ويصير كتلته عمل شعبي

وصلت  ليمه و اتعاركت وياهم لحد ماهزمتهم وطلعنا بعدين اجت الشرطة واقتحمت المكان بسبب الأبلاغ عن العركة الصارت ولاصت الوضعية امرنا صار بيد الشرطة

بدون اي نقاش دخلت عزيز بالسيارة وطلعنا بيها وفلتنا من الشرطة باوعت لازم عينه لعزيز ضاربينه اللتفتت له

زيد : شوفني هسة نصل للبيت وعالجها

عزيز : شعالج منها طفوهة الي كمت اشوف الواحد خمسة  بيها

زيد : وليش خليتهم يضربونك جان قبل لا يضربك ضربته

عزيز : ترى اني مو جون سينا اضرب براحتي

زيد : هههههه ليش اني جون سينا بس هم كدرت الهم ذولا الزعاطيط لاتخليهم تكبرون عليك الي يتجاوز عليك اصفعه وخليه يحسب لك حساب

عزيز : يحسبون لي الف حساب هاي يمكم بس

جربت هذا الشي من جنت صغير عود ردت اصير شقاوة وبكيفي اضرب واتجبر على اولاد القرية وضربت واحد من القرية والتمو علي وشبعوني كتل ومن ذاك اليوم توبت ما اعيدها يا اخي مو گدها

.زيد : ههههههههههه

عزيز : راح تگضيها تضحك علي وعيني طافية بعد مايقبل بية ولا مخرج صار سنين محافظ على وسامتي ومعتني بوجهي حتى احصل دور يشد المتابعين وهسة اتشوهت

زيد : غير انت سينما بلاش والله من زمان ما ضاحك هيج ضحك

عزيز : ليش همامك ما جان يضحكك لو يخاف يصرف فلوس عالضحك

زيد : ليش هو ضاحك بحياته حتى يضحك الحواليه

عزيز : صار عندي فضول اشوفه

باوعت له صفح : خلي فضولك لنفسك لا يلزگك بالگاع هههههه

عزيز : ليش !!

زيد : صار كوم مخالفات تسوي من وراه واني اطمطم وراك بس هاي ما اضن راح تطمطم لأن الشرطة راح تحقق ورانة واكيد ولد المسؤلين ما راح يسكتون عليك

عزيز: وتالي

زيد : راح اخابر الجبير يغطي علينا بس لازم اتبرر له ليش هيج صار وشنو السبب الخلاهم يتعرضون لك

عزيز : غير احجي له الصدك

زيد :  الصدك وحده مايفيد لازم تلگي عذر قوي حتى يقنع

عزيز : وشسوي

زيد : اتركها علي

عزيز ،

رجعنا للبيت واحس عيني تريد تطلع من الوجع خليتلهة مرهم حتى يخف الأم شفتها بالمراية صايرة حمرة دم

وبمجرد ما خليت راسي عالمخدة رجع علي المشهد كله شلون ماتگلب ينعاد علي الرصاص والصياح والهوسة والدم الترس المكان

صار عندي ارق فضيع وراسي مابيه غير الطلق والصياح والتكسر والمشكلة كمت اتخيل اشياء ماجانت موجودة بالبار كمت اتخيل نفسي داخل ظلام بمكان ضيگ وابجي  وصوت من ورة الظلام الي اني بيه ما اعرف  شنو  يكولي بسبب صوت الرصاص الغالب عالكل كلام مامفهوم حتى ما اكدر اميزه اذا جان لرجال لو مرية

كعدت على حيلي وكمت افتر بالغرفة ضاغط على  راسي  حتى اوگف التخيلات الي جتني بسبب الأرق والخوف

بس ما اكو فايدة صور الظلام والبجي والصوت الي اسمعه والرصاص كله اتغلغل بعقلي على شوي راح اتخبل راسي گام يوجعني  شنو هالخيالات الي اجت هسة بحياتي ماعيش هيج  تجربة بس يمكن الخوف الي حسيت بيه داخل البار سبب عندي هذيان وكمت اخربط واتخيل اشياء مالها وجود من الاساس

بالاخير اتصلت بواحد من الزلم الي واكفين بالباب يجيب لي حبوب منومة قوية حتى اكدر انام وانسي الصار بدون ما افكر بيه واسلم على عقلي اذا بقيت للصبح اكيد راح اتخبل

زيد جان مشغول يشوف شلون يكدر يخلصنا 

نص ساعة واجاني اخذته منه وهددته

عزيز : ممنوع احد يعرف بهذا حتى زيد

_ اكيد سيدي

عزيز : روح

راح من يمي واتوجهت للمطبخ اخذت بطل مي من الثلاجة وشربت الحب

شوي  وحسيت جسمي ثگل رأسا انبطحت عالجرباية ونمت كل الارق والخيالات والضوضاء  اتلاشت مني  

كعدني زيد بوقت متأخر من الصبح

زيد : الجو محروگ من البارحة وانت نايم

كعدت بالكوة  : شصار

زيد : بالگوة كدرنا نسيطر عالوضع الليل كله نحاول نسد بالسالفة حتى لا توصل للمحاكم وينكشف شغلنا

عزيز : اهاا

زيد : انت شبيك مسطور

عزيز : مابية شي

زيد : لعد كوم اتريگ عدنا شغل مستعجلين عليه

عزيز : شنو

زيد : الجبير يريد يشوفك ويحجي وياك ولازم اعلمك شتكول وماتغلط لأن الغلط ويا الجبير مثل الي مصصم ينتـ * حر  حتى لو جنت مفضل يمه 

عزيز

هزيت براسي وكمت رحت للحمام حتى اصحصح دخلت جوى الدوش وضليت اضرب على وجهي حتى اكدر استوعب الي اني بيه والي جاي يصير وياي البارحة ليش اختلطت على الأصوات وصارت مزيج بين خيالات غريبة داهمت عقلي وبين الصار بالبار

باوعت للمراية الموجودة لأول مرة ما حسيت اني نفسي عزيز  اكو  شي تغير بية

طلعت من الحمام الملابس جاهزات لبستهن وطلعت من الغرفة

كاعد اتريگ  بلا نفس بعد ذيج الليلة الطويلة  و الي ماتوقعت راح اشوف ضوة الشمس بعدها 

بسبب الهجوم الصار علينا

شگد جنت اشوف هيج بأفلام المافيا  وشگد جنت اعشق هاي المشاهد الي تكون بذروة الأكشن والطلق الي ماينعرف منين يجي من الطرفين 

لكن ولامرة خطر بحياتي اعيش هاي اللحظات وبهذا العالم تحديداً

العشته البارحة ابد ماجان يشبه الأفلام،  جانت  مثل الي مخلي روحه بجف ايده وينتظر بأي لحظة  رصاصة طايشة تاخذهة منه  

زفرت  وحركت راسي  على امل يطلع من بالي الي صار البارحة ما كدرت  باوعت حوالي كلشي جان رهيب ويرمز للعظمة والأبهى  داخل هذا البيت

بس مو هاي  الحياة الي جنت اريدهة مو هيج جنت راسم لمستقبلي ولامفكر ادخل بهيج متاهة

لو ميت البارحة منو جان يدير باله على جدي  واختي الغير شقيقة

و اكيد جان راح يعيد نفس وجع  الماضي هو ناسيه  لخاطري  عايش حياته علمودي علمود اكبر وارفع راسه واشيله من يوكع

جنت على طول اكوله راح اصير ممثل تلفزيوتي اادي ادوار   تفتخر بية  جدام الناس ممثل الي مكانتي بالشاشة العراقية مو  مجر..م ومبتز 

اما هسة اذا صار علي شي او لزمتني الشرطة  راح اكون مجرد حثالة استحق الأعدام  بسبب الفساد العايش بيه

باوعت لزيد واگف يمي وهو هم  صافن علي يمكن جاي يحس بية اني مو كفو لهيج امور

وبين التفكير الي سطر عقلي و القلق  من الي صار البارحة فجأة حسيت بأدين رقيقات ناعمات حاوطني من ورة  وبوسة عميقة اجت بركبتي بعدين صعدت لخدي الأنفاس والعطر المخليته  وحدهن خلني  بغير عالم 

للأمانة حبيت  الوضع وبقيت مستسلم لهاي الحظنة الغريبة والبوسات الي انهالت بكل لهفة وشوق  نستني كل الرعب الي عشته البارحة تمنيت ابقى بهذا الشعور الحلو والاحلى من هذا ردت اندار واتبادل وياهة

لحد ما تحمحم  زيد  بعصبية حتى احس على نفسي وابعد هاي البنية عني خرب غيرتك زيد    معيشني بلحظات الرعب وحارمني من هيج نعمة  بس   بالأخير رجعت اتقمصت حياة ذاك الرجال و  سمعت منه وبعدتها عني حاجتني بلهفة وجان واضح الخوف بعيونها

سيري :  همام  الحمد لله على سلامتك  صدك الي حجوه صدك البارحة اتعرضت لكمين  احجي لي حبيبي احجي لي  ماتدري شصار بية من كالو لي  من البارحة مانايمة بس اريد الصبح يطلع حتى اجي اطمن عليك

عزيز

بقيت متفاجأء ويا لهفت هاي البنية الي لازكة علي ماتريد تعوفني خايفة علي  باوعت لزيد اريد اعرف منو هاي  وليش هيج خايفة علي  وعادي عدهة تكون بهالقرب بدون ما تخاف مني

لأن  الي  اعرفه ممنوع اي بنت تدخل لبيت الهمام  وهاي دخلت بدون استأذان لا وفوگاهة حاضنتني و تبوس بية قاطعنا زيد

_ احممممم ، شلونج  ست سيري  لاتخافين مابيه شي حادثة بسيطة  كدرنا  نتخطاهة وهذا الهمام جدامج   صاگرهم  بخير وسلامة

بعدين اشر لي بعيونه ابتعد عنها فأني افتهمت  شنو السالفة ودفعتهة عني بقسوة وكلتلهة 

عزيز : على شنو جاية هسة ها ،  على شنو جاية خل يكون بعلمج وصلي لهم الحجي  وكوليلهم ما ارجع لو شيصير ، كافي خل ينسوني   خل ينسون اهلي عدهم ابن  افتهمتي اني ماعندي لا اب ولا ام ولا اخت 

بعد ماخلصت كلامي بقت البنية فاتحة حلگة من الصدمة  وزيد شبك اديه وحرك راسه بمعنى طاح حظك

سيري : همام انت شدتكول عن  يا اهل تحجي انت منين لك اهل 

انصعقت من ردة فعلها  وحسيت نفسي جفصت بيها وما اعرف شلون ابرر سالفتي  رحت وكفت يم زيد وهمست له حتى لاتسمعني

عزيز : لك منو هاي انوب 

دنگ راسه علي و خلا  قبضة ايده على حلگه  وجاوبني بهمس حتى لاتسمع شنگول

زيد : هاي حبيبة الهمام يا حمار

رديت عليه صاك على اسنوني : بس انت كلت لي هو  مايحب  البنات

زيد : صح مايحب البنات بس هاي حالة استثنائية

عزيز : يعني عنده حبيبة ومسوي جفاف وحصار

ع اليشتغلون  وياه

زيد : لك مايحبهة ومگبلهة بس هي لزگة ،

عزيز : شلون يعني ؟؟؟

زيد : بعدين  اشرحلك هسة  ولي منا ولا تخرب علينا شغلنا كله لا ارگعك ميت دفرة

طلعت من الغرفة واني ادردم 

: ادري  زعيم عصابة جيس حب هيج يعاملني  لوما البارحة جان رحت بيها من ورة لعبة اقمار انوب شلون موتة تفشل الناس تموت بالشهادة واني اموت بالقمار

سيري : هذا وين راح

زيد : ست سيري ما اريد احرجج بس همام لو شگد ما تركضين وراه ما راح يتغير عليج ولا ينطيج مجال حتى تصيرين قريبة منه

وانتي بعدج شابة والف واحد يتمناج عوفيه وشوفي حياتج شلج بيه ميفيدج

سيري : انت شتگول  مستحيل هذول الألف واحد كلهم ما اريدهم بس هو لك احبه ليش مايفهم هالشي بعد شيريد حتى اسوي حتى ينتبهلي 

زيد : بس جاي تأذين نفسج

بدال ماتضيعين شبابج وياه شوفي حياتج  ويا شخص يحبج وانتي هم تحبينه احسن من هالذلة

سيري : لا الا  ما  يجي يوم ويتغير مايبقى هيج وراح تشوف راح اخليه يحبني  اني اعرفه هو هسة يكابر بس لشوكت الا ما يستسلم ويعترفلي بحبه

زيد 

اشرت الهة براسي واني اعرف هاي احلام مراهقة مدللة متعلقة بشخص حتى مايباوع بوجهة

من تصحي على نفسها راح تعرف شگد جانت ساذجة وتركض ورة الشخص الخطأ  هذا الجيل عبالهم الحب تملك ولازم يحصلونه بأي طريقة  ومشاعرهم كلها بأندفاع ولازم غصبا الطرف الثاني يتقبله مشر اختصرتلها الكلام وردت اتهرب منها : اوك اخذي راحتج بالبيت  عندي شغل لازم  اكمله

سيري : وهمام هم يروح وياك

زيد : اكيد.  غير هو الي يجبرني اروح وياه ولا انا شايب المثلي كاعد بالبيت اطفي بالكوبات والثلاجة  واسقي بالحديقة  واهم شي انكد عليهم عيشتهم بطلباتي  الماتخلص

سيري : هههههه صدك عمو زيد انت ليش لحد الان مامتزوج

زيد : ما عندي وقت  وما لگيت البنت الي تكون مناسبة الي

سيري : كل هذا العمر وما لگيت

زيد : هسة انتي شعليج ان لگيت او ما لگيت لاتأخريني هسة اكل رزالة منه واني بهذا عمري  و انتي بكيفج تنتظرينا اولا بس من هسة اكولج  راح نتأخر هواي  

سيري : مو مشكلة راح ابقى لحد ماتجون ما راح اعوفه اذا ما يكسر حواجزه  ويحجي وياي ماراح اعوفه

زيد: على راحتج  اتفضلي ارتاحي واني اترخص

عفتهة. ولگيت عزيز صافن  ينتظرني يم السيارة من شافني سألني

عزيز :  تعال احجي لي شجاي يصير  مو  كلت ممنوع بنت تدخل للبيت  وممنوع يحجي ويا البنات والي يشتغلون يمه نفس الشي

بس اشو هاي عادي عدها تدخل وتطلع  والله عبالي اخته واهلة متبرين منه لأن ماشي بهالدرب

زيد : ماعنده  اهل

عزيز : لعد منين جاي  !!!!

زيد : جاي  من فطر الگاع ،اكيد   عنده اهل بس مايعرف عنهم شي  ولا يتذكرهم

عزيز : اهاا كول مو شرعي وفضها  هههههه 

زيد :  شعرفني بس هو ابد مايجيب طاري اهله ولايحجي بيهم

هز براسه متفهم الوضغ  :زين  انت من شوكت تعرف همام

زيد : من اول ما اجى ويريد شغل يمنا  يمكن عمره جان اربع طعش او خمس طعش  بس الملعون كدر يثبت نفسه بسهولة  ويكسب ثقة الجبير وهذا الشي مو اي واحد يكدر يسويه

عزيز : هم يقتل !!

زيد

هزيت راسي بمعنى اي وكلت عوفك من  الهمام. هاي البنية  بالتحديد خليك بعيد عنها و لا تنطيهة اي  فرصة تحجي وياك

عزيز : ليش لأنها تخص صاحبك

زيد : لك لا اذا انطيتهة وجه راح تضن انك هو وتضل تحجي وياك وهي متعلقة بيه بهوس اي تصرف منك راح تفهمه ان انت خلص راح تحبها 

عزيز : وشكو بيها

زيد : شلون شكو بيها اذا اجى الهمام وشافهة تدخل وتسولف وياه عادي راح يزعجه الوضع  واحتمال يأذيهة فلا تخليها تحس انك تتلاطف وياهة ولا تنطيها مجال عبرهة وبس اعتبرها ماموجودة

عزيز : صاحبك شكد عار  عايف كتلة الجمال  ومامقدر النعمة ابد اني لو هيج بنية بجمالهة تركض وراي وتريد رضاي بعد شريد من الله

زيد: تعرف همام شيسميهة 

عزيز : شيسميهة !!

زيد : يسميهة الحية الصفرة

عزيز : ليش عود

زيد : لأن على ابوهة طالعة مابيهة ثقة ابد

عزيز : منو ابوهة !!

زيد : تتذكر ذاك الرجال الي جان كاعد يمك بغرفة الأجتماع

هزيت راسي... هو ذاك ابوها "سهيل" والهمام جان يشتغل يمه بس انشق عنه واسس له شغل خاص بمساندة الجبير

ومن ذاك الوقت وسهيل ما يحب الهمام لأنه جان هو ايد الجبير اليمنة بكلشي بس الجبير خلا الهمام يصير بمكانه 

واضن  سهيل يستخدم  بنته حتى  يخربون عليه حياته بأي طريقة و يرجع هو الأيد اليمنة للجبير مالنا لهذا اكولك خلك بعيد عنها ولاتنطيها مجال تكون قريبة منك

عزيز : هسة يلا افتهمت شنو يقصد بكلامه لما كالي

احسدك على قوة بدنك امبين مفعول الحليب بيك ، اكيد اله ايد بختفاء همام

زيد : وليش ماكتلي من البداية !

يتبع