.

صوتو ⭐⭐⭐⭐

علقو .....

قصة

اجتياح

الفصل : ٧

الكاتبة ندى البياتي

..........

الحاضر بغداد

......

عزيز

لازم خشمي بمديل ورافع راسي لفوگ حتى يوگف النزيف  وجسمي كله متكسر بسبب ذاك الرجال المخبل الي تحارشنا بيه وزيد  يصيح و ينگ فوگ راسي مدري احتار بيه مدري احتار بخشمي الي يمكن انكسر وراح وجهي يصير قبيح

زيد : لك كافي اخطاء لخاطر الله  كافي اخطاء  راح تفضحنا

عزيز : هو منو گالي شلون تخلي سايق سيارة مستهتر يجاوز عليك

زيد : كتلك بس مو تروح تدعس سيارته الي تسوة دفاتر وتنهزم

عزيز : وشسوي اغمه واعبر غير احرگ گلبه بسيارته وافلشهاله

زيد : اني راح اغم نفسي لحد ما اموت ع الساعة السودة الشفتك بيها

عزيز : وهو ماقصر ضل حاط ورانة بسيارته  لحد  سوة سيارتنة قوطية وگلبه ما برد الله سترنا وطلعنا من السيارة كبل لا يدعسنا ونروح بالخساير

زيد : الجبير بدون شي شاك بينا وانت بتصرفاتك راح تأكد له شكوكه مية بالمية لك اكو زعيم جبير يتصرف بهالغباء والسذاجة

عزيز : لاتذكرني بجبيركم  غير حصرني حصرة الجلب كلمة وحدة عدلة ما كدرت احجي  لو ما  اجاه اتصال  وخلصني يمكن كلهن گلتهن علي وعلى اعدائي،  بس الحمد لله  اشر لي اطلع واني هم ماصدكت

زيد : شفت لازم نكون حذرين وما نتهور هسة هذا خشمك بوري خوما بوري ما وگف نزيف عدنا مهمة ولازم ننفذهة

عزيز : مهمة انوب والله  مابية حيل اتحرك منا لهنا جسمي كله يوجعني من السيارة وانت مهماتك ماتخلص يطلعن من جوة الگاع

زيد : خوش يصير حتى تشغل عقلك عدل وما تضل غبي وساذج

عزيز :  هيج صارت اني غبي وساذج انت دوم تورطني وتحطني بوجه المدفع  وتريدني اشغل عقلي بالوقت الغلط

زيد : لاتضل تتشكى مثل النسوان كوم خل نخلصها بساع مستعجلين عليها الجماعة

عزيز : يا مهمة هاي

زيد : اشبيك نسيت لو ما الجبير فهمك عليه 

عزيز : قصدك مالت هذا رجل الأعمال  الي اخذ  مشروع  منافسه ويريد منا نرجعه اله بأي ثمن

زيد : صح هذا هو  واحنى لازم نضغط عليه لحتى يرجعه لصاحبنا 

عزيز : هسة كوم مشاريع اكو  شعدنه  لازگ  على هذا المشروع لو هاي شفتوني على كد ايدكم وتريدون تمشون شغلكم براسي 

زيد : حقك انت شمفهمك بهيج شغل عملاق انت شايف اذا نجح  راح يربح من وراه مليارات  تطيره للسما  ومو اي واحد يكدر يحصل على هيج موافقة من الدولة حتى يباشر العمل بيه 

عزيز :  يعني يستحق المجازفة

زيد : اكثر مماتصور و احنى العلينا نسويه اليوم ابنه راح يجي من لندن يزور ابوه ولازم نستقبله احسن استقبال بحيث ابوه بس يعرف يتنازل وهو الممنون

عزيز : وصلت الفكرة

دك تلفوني طلعته اشوف منو ردت افصله بس ما خلاني

زيد :ليش تفصل  جاوب و افتح اسبيكر

عزيز : اتصال مو مضروري

زيد : افتحه خل اشوف انت شمعرفك بالضروري  والمو ضروري

فتحت الخط

سيري : ليش ماتجاوب بسرعة

عزيز

بقيت ساكت  ومغلس و زيد يتأفأف ويصفگ بأديه بعصبية يمكن لو يشرب من دمي بهاي اللحظة هم مايبرد گلبه  اخذ التلفون مني وسوى نبرته هادء

زيد : هلا ست سيري

سيري : هذا انت زيد وينه همام ليش مايجاوب

زيد : مشغول ومو فاضي يحجي ويا احد

سيري : تمام من يفضى خل يخابرني

زيد : اكوله ولا يهمج

سيري : كوله جدامي اريد اسمع صوته

زيد : طلبج مرفوض ست و اعذريني راح اسد لأن مستعجلين عدنا شغل

غلق الخط ويباوع لي بعصبية  سويت نفسي فقير وممسوي شي غلط  : شكو

حجى بنتر  وجهه صار نار  : عزيز ما اريد اعيد نفس الكلام كل مرة  ممنوع يكون عندك تواصل ويا هاي البنت بالذات

عزيز : منو متواصل وياهة هاي شوفت عينك هي تتصل وحتى ما رديت عليها مو كلتلك اتصال مو ضروري

زيد :لا  لاتقشمرني  بذني السوالف هي  ما جانت تتجرء تتصل  بالغلط قبل  اكيد انت منطيها  مجال

عزيز

رفعت راسي حتى يوكف النزيف وردت اغير الموضوع واگلبه على همام   : وانت شمدريك ايجوز يتخابرون بالسر ومايگولن لك بعتبار هاي خصوصيتهم ومايريدون احد يعرف  لاتنسي هي تطب وتطلع عادي يعني لو همامك جان رافض خشتها جان وصى الحرس من الباب مايدخلونها  بس هو طايبتله الشغلة  وكله من جوة ليجوة وانتو ياغافلين الكم الله

زيد : لا تحاول تصير ابليس وتنافق بيني وبين الهمام  لأن هو  مستحيل  يضم علي شي ومستحيل يحجي ويا هاي لك مايتگبلها ولا يطيقها

عزيز : صحابك شگد ماعندة ذوق عايف الشگرة الجنهة روسية ومگابلك ومگابل الي يشتغل وياهم

ضربته على راسه  : ليش اني مو من عجاب حظرة جنابك

عزيز : لا من عجابي  بس الحق ينگال  هاي الشگرة تسواكم راس براس انت وجماعتك انت شايف نعومة بشرتها  ونزاكتها و خدودها وشفايفها وعيونها غير تشگ شگ

قريتنا كلها مابيهة شوي من نعومتها ونزاكتهة بس نجوى شوي  بيها كشفة وجه بس حظي الفگر اختي

ضربته مرة ثانية على راسه

_  دنجب لك  شنو تسوانة راس براس 

عزيز

انزعج مني لأن گلت الحقيقة  ردت اغيضه : حجي الحق يزعل مو

زيد : تدري  حجي الحق هنا وراه گطع ارگاب لايغرك جمالها هاي شايلة مكر وخباثة الدنيا  كلهة ، الشيطان بنفسة  يتعلم منها    

عزيز : طبعا  اذا عايشة بهيج مستنقع شتريدها تطلع معلمة اسلامية لابسة جبة نيلية من زمن جدي وربطة ستن ومگضيتها تفتي هنا وهناك

زيد : ليش انت ينگدرلك بالحجي ،  هسة هذا خشمك ما وگف نزيف شوفني

عزيز : اخ  على كيفك ترى هذا خشمي وعزيز علي

زيد : لا زين  واكف النزيف جهز نفسك خل نروح قبل لا يفلت منة  ونتعاقب  وماتضل عدنا لا اذان ولا خشوم

عزيز

ذبيت المنديل  و رحنا للمطار ننتظر  بسياراتنا شوكت يطلع ابن التاجر

الناس بدو  يطلعون وكلمن راح لسيارته او اجر سيارة باوعت لزيد يباوع بترقب يعني بعده ماطالع

ورجعت باوعت للجامة انتظر مثلهم صرت مثل مسرحية عادل امام "شاهد ماشافش حاجة"

لا اعرف منو ابن التاجر ولا شلون شكله ولا شگد عمره يعني اذا يعبر من يمني ما اعرف  فجأة ندسني زيد  همس لي

زيد : جهز نفسك ذاك هو

ركزت نظري على البوابة ماشفت احد ملفت للنظر سألته : وينه

زيد : ذاك الطفل الي يمشون وراه رجال اثنين

عزيز

صدمني لما شفت  ولد يمكن يطلع عمره ١١ سنة او اصغر متأنق على اخر حبة على طريقة الأجانب  بس جان ضعيف و بنيته صغيرة  وراه اثنين رجال شايلين له جنطه ويمشون وراه 

"الكاتبة ندى على علي البياتي"

عزيز : هذا ابن التاجر ومسافر لندن وراجع اني من جنت بگده عبالي العراق بس قريتنة ويخلص

زيد : هههههه انت وين اكو من عقلك

عزيز

خابر على باقي الزلم حتى يتجهزون ويلحگونهم  بعد ما طلع من المطار هو وحمايته صعدو سيارتهم السودة وانطلقو

نزل زيد لثامه و شغل  السيارة و اني هم  نزلت لثامي على وجهي   حتى لاننعرف و لحگناهم بأربع سيارات كدرنا نحاصرهم نبص الشارع  ما خلينا الهم مهرب ينهزمون منه وحتى لا يتسببون بحادث وقفو سيارتهم

نزلت من السيارة متقمص دور زعيمهم اتقربت من سيارتهم ودكيت الجامعة الي من جهة السايق  بمؤخرة  مسدسي بهدوء واعصاب باردة وزيد وراي

عزيز : صيرو حبابين و افتحو   الباب و اتفضلو ويانا بلا مشاكل او راح نستضيفكم على طريقتنا الي ما راح تعجبكم 

استسلمو من شافو ما الهم منفذ واي حركة يتم تصفيتهم  فتحو الباب  وجرو الولد من السيارة نزل  خايف  ومستسلم يستنجد  بجماعته حتى يساعدونه  بس همَ هم مثله لا حول ولاقوة كل المسدسات مصوبة عليهم

شدوو  عيونه بعصابة حتى لا يشوف شي هو گبل گام يبجي  ويحجي  بالأنكليزي 

اخذوه لسيارتنا صرت جدام واحد من الزلم و ضربت مرتين على خده  بخفة وستخفاف

عزيز : انتو هم راح تشرفونة وياه

اشرتلهم  يشدون  عيونهم  واديهم حتى لا يعرفون الطريق   اخذناهم  لمنقطة شعبية  وخليناهم ببيت قديم  وبعيد عن باقي البيوت  واضح من شكله بانينه لهيج امور

لاحظت على نظرات صاحبه ما راضي يستقبلنا بس حكم القوي عالضعيف

دخلناهم  صاحب البيت وزوجته بقو واگفين بعيد وساكتين اكيد الأعتراض مو بصالحهم و اكيد مو بس هاي المرة الي جايبين رهائن هنا حتى يمشون شغلهم ويا الناس الي يبتزونهم  

خلينا الولد خايف بوحدة من الغرف  والحرس مالته بغرفة ثانية 

كعد الولد بدون مايحجي شي ردت اهدأه بدون ما اللفت النظر

عزيز : لاتخاف  انت مجرد ضيف يمنا وبس تخلص شغلتنا  راح تطلع منا وترجع لأبوك كامل مكمل

حجة بخوف اشبه بالبجي ولكنته موعربية 

_  بابا اذا عرف راح يحاسبكم واحد واحد

عزيز : ما اعتقد كلامك صحيح لأن ورقته الرابحة يمنا

طلعت تلفوني اگلب بالأرقام ما اعرف اي رقم هو والزلم كلها واكفة

ذبيته على زيد وگلت بصيغة امر

_ اتصل عليه  خل نتسلى شوي

انداريت  ع الولد ولزمته  من حنجه اعصر بيه عود اسوي نفسي قاسي افتهم على زيد ودگ عليه حطاه على اذني واني اباوع بوجه الولد احجي بطريقة  استفزازية مالت شقاوات  

عزيز :  الوووووووو  السلام عليكم

جاوبني ببرود : وعليكم السلام  منو حظرنك

عزيز : هسة مو مهم منو اني المهم عندي امانة الك حاب اسمعك صوته

_ امانة شنو ومنو انت ؟؟

عزيز

اخذت التلفون من زيد واللتفيت ورة الولد وخليت التلفون على اذنه و الثانية ومخلي جفي على رگبته وكتله احجي ويا ابوك

سليم ؛ بابا خطفوني  تعال ساعدني 

رفعت التلفون منه وكلت : اكيد سمعت شگلك ابنك

_ منو انتو وليش خاطفين ابني اذا تريدون اي شي اسويه بس عوفو ابني  لاتأذونه

عزيز : حلو هسة نكدر نحجي بسهولة وعلى راحتنا بدون ما تقاطعني لو تهددني لو تطلع اعذار من جوة الگاع.

واني هم راح اجيبها الك من الأخير  الأستثمار الي اخذته بكل نزاهة وطنية  تنطيه بنفس الأسلوب لأصحابه الأصليين او راح تكون العواقب وخيمة وضحيتها ابنك

_ بس يعني هو  كال الكم تخطفونه ! 

عزيز : مو شغلك منو الي كاللنا المهم ترجعه والا راح نرجع لك ابنك بلا اعضاء والك منا لباجر نريد نسمع اخبار حلوة او انت الي راح تسمع اخبار سيئة عن  ابنك 

سمعته اتنهد بحسرة طلعت من گلبه كدرت احس  بالخوف الي صابه  من داخل التلفون الله يعينه على هيج موقف بالرغم من المنافسة البينهم بس  الحقراء مافكرو شراح يصير بيه من يسمع ابنه بين ادين ناس ماترحم وهم لو يرجعوه لو مايرجعوه

لكن الي صدمني بعد ماجر حسرة قهر وگال بعزم  :  سوو الي تريدونه  اني مستحيل اعوف هاي الصفقة راح اعتبر ابني طير من طيور الجنة

رأسنا وطيت صوت التلفون جنت فاتح سبيكر،  حتى لا يسمع ابنه الكلام الي يكوله وخليته على اذني متأمل يطلع جذب الگاله لكن  استرسل بكلامه

_ وموته راح يصير دعم اضافي للمشروع الي راح امشي بيه  يعني تهديكم نگعوه واشربو ميه  ولا تتوقعون راح اخضع الكم ولو شوي مع السلامة 

سد التلفون بوجهي وخلاني مصدوم شنو هالگلب الميت العنده واني الجنت مقهور عليه

اتمنيت هذا الرجل لو يمي الة افلش وجهه معقولة ينطي بحياة ابنه علمود مشروع وفلوس

خليت التلفون بجيبي، كمت اتنفس بعصبية حتى زيد اتفاجأ من عصبيتي

زيد : خير

عزيز

طلعت خارج الغرفة ولحگني

زيد : شصار !!

عزيز: الحقير كالي اقتلوه حتى يحصل دعم معنوي من الدولة ويتعاطفون  وياه وتخليه يكمل الأستثمار بدون لا احد ينافسه عليه

بكل برود طلب نقتل ابنه  وقفل الخط بوجهي هذا هم يتسمى اب

زيد : اهدأ عزيز ما لازم تبين تعاطفك ويا الطفل حتى لا يشكون بيك

نترت على زيد : شنو هالبرود البيك  اكولك ابوه سلم ابنه للموت بدون رحمة وانت تگولي لا يشكون بينا

اتلفت يمنة ويسرى حتى يتأكد ما اكو احد يسمعنا : عزيز اضبط اعصابك هذا يريد يلعب بأعصابنا حتى لانحس بخوفه هاي دروب قديمة يا ما شايفين منها لاتخليها تعبر عليك

انفعلت و صحت بيوت عالي :  لك  هو سد التلفون  بوجهي بدون مايفكر شيصير بأبنه  چنه رايدهة من الله  ينخطف وينقتل حتى يصير صاحب حگ ومظلوم جدام الناس

زيد : صوتك لاترفعه

ما تحملت عفت المكان كله وطلعت ما ادري شأجاني معقولة اكو هيج ناس تضحي بأطفالهة علمود نفسهم ونفوذهم  صعدت السيارة وطلعت من المنطقة كلها

وكفت السيارة على صفحة من الشارع ونزلت منهة كعدت عالرصيف وخليت راسي بين ادي هذا المشهد لزگ بعقلي 

وكل شوي اسأل نفسي شنو هالعالم القذر الخليت نفسي بيه محد عنده رحمة عالثاني ترك ابنه بسهولة وما فكر بالخوف العايشه وهو مجتف وعيونه معصوبة بين الحياة والموت

كلهم قتلة يمتصون دم الأبرياء حتى يرتقون معقولة هيج يريد يزيد نفوذه على حساب دم ابنه

دك علي زيد رفضته ما اريد ارجع و اشوف هذا الطفل يروح بدم بارد على حساب الطرفين الي يريدون يمشون كلامهم على بعض على حساب حياة هذا المسكين

رجعت للبيت جنت ناوي ابطل عالمهم مو نفس عالمي  ما اريد اشيل ذنب ناس ابرياء علمود ناس ثانين يصلون للي يريدونه ويتخلون عني  لحگني زيد  وعاد نفس الأسطوانة خصمت الحجي وياه

عزيز : تريد تكمل كمل انت 

اني ما اكدر اشوف هذا الولد يروح ضحية علمود  مشروع  متنافسين عليها اثنين

زيد : ادري الأمر صعب عليك وكدر يلعب يلعب بمشاعرك  بس صدگني هو هسة خايف عليه اكثر منك بس ما يريد يبين نفسه جدامنا

انفعلت بالزايد من برود زيد :  لك گالي تهديدكم نگعوه واشربو مية بعد شيكول اكثر حتى يثبت انه مامهتم باليصير بأبنه

زيد : ماشي اليوم ارتاح وباجر نتصرف وشوف شلون راح نخليه يتوسلنا. حتى نعوف ابنه  وما نأذيه

عزيز : انا راح انسحب حتى الفلوس ما اريدها هذا مو عالمي اني اذا احد ذ*بح  دجاجة انقهر عليها تريدني اشاركم بموت طفل ماله اي ذنب بس حتى ترضون الأكبر منكم

اتعصب علي  : مو على كيفك تنسحب تذكر  بينا اتفاق  لازم تكمل لحد ما يرجع  الهمام

عزيز : وبلجي ما رجع بلجي ميت بمكان مجهول محد يعرف عنه شي  انا مستحيل  ابقى هيج لخاطر ناس ما يهمهم شي غير نفسهم ومشاريعهم 

زيد : اهدأ اهدأ  انا راح اتصرف بس انت ابقى بالواجهة وشوف شلون اخليه يبوس قنادر علمود ابنه

عزيز

ضحكت بستهزاء بعده مصر ان ذاك الرجال راح يهتم بأبنه اكثر من المشروع  : وشراح تسوي!.

انت هم راح  تأذي الولد حتى تجبره يبوس قنادر يعني بالحالتين الولد ضحية لمنافساتكم يعني انتو  وجهين لعملة وحدة ما اكو اي فرق بينكم

طلع زيد من الغرفة لأن كلامي جان صحيح وماعنده اي رد علي

بقيت گاعد وحدي حسمت قراري طز بهذا العالم طز بالفلوس طز بيهم كلهم  راح اعوفهم  وارجع لحياتي السابقة ارجع للقرية  ولجدي واختي

دك تلفوني فتحت الخط

سيري : مو من عوايدك تجاوب بسرعة اكيد دا احلم اني

عزيز : كل هذا سلام ؟؟؟

سيري : والله بكد ما شالع گلبي واني اركض وراك من مكان لأخر   حتى السلام حاذفته من قاموسي اريد بس تجاوبني وتحجي وياي

عزيز : وشنو الي راح يتغير اذا حجيتي وياي او جاوبتج ورديت عليج

سيري : هواي امور راح تتغير انت بس انطيني فرصة وحدة همام تعرفني شگد احبك ومصر تتجاهلني لخاطرك نتازلت حتى عن كرامتي وانت نفس الشي مصر تخليني بموقف محرج ويا الكل

عزيز : سيري عوفيني بحالي صدگيني ما افيدج واذا تريدين نصيحتي انهزمي من العالم العايشة بيه بأقرب فرصة تصح لج

سيري : الله  اشكد حلو اسمي بصوتك  عيدها مرة ثانية

عزيز : ليش ماسامعة امسج  گبل بصوتي

سيري : ابد ولا مرة حتى من جنت تشتغل ويا بابا ماجنت تعبر وجودي ورغم كلشي اتعلقت بيك وحبيتك

عزيز : عوفي الحب  وخلصي حالج احسن لج

سيري : فات الأوان ماضل شي اسمه خلصي حالج

عزيز : ما دام اكو باجر يعني بعد الأوان ما فات لذلك اذا تسمعين مني اطلعي من هذا العالم  انتي حلوة  لاتلوثين حلاتج بهيج قذارة

سيري : شبيك همام ليش هيج تحجي خوفتني

عزيز : مابية شي بس دا انصحج  لاتلتفين لورة واطلعي خلصي نفسج

سيري : شبيك هذا مو حجيك ابد

عزيز : اعتبريه حجيي   واذا اتحبيني عوفي شغل ابوج وعوفي كلشي وعيشي حياتج لنفسج

سيري : احجي لي اكو شي مضايقك حتى هيج صاير كآيب ومتنازل تحجي وياي. 

عزيز

ما اعرف شأجاني جنت يائس واريد احد احجي له عن  الأشياء الفضيعة الشفتهة بهذا المستنقع. وما اهتميت لأوامر زيد  انه ممنوع احجي ويا هاي البنت  بالذات

بعد ما حسمت قراري انه اتركهم بعد  ما مجبور اتقيد بقوانينهم احجي ويا الي اريده  واسوي الي اريده

حجيت الهة كلشي عن هاي المهمة وشلون الطرفين مافيات ويتاجرون بأرواح الأبرياء حجيت الهة عن الولد الي حجزناه حتى نضغط على ابوه دايتنازل عن الصفقة

بس طلع هو يريدها من الله حتى يكسب تعاطف الشعب ما توقعت ان راح تهتم لأنها عايشة بهيج بيئة وتعرف كل قوانينهة  لكن اكتشفت عكس هذا رأسًا بين عليها الحزن

سيري : حقير هذا المفروض نفضحه  جدام العالم كلها حتى يكون عبرة لغيره

عزيز : وشلون تفضحينه وهو الحق وياه راح يكول قتلو ابني بدون ما يتفاوضون وياي

سيري : راح نستخدم كلامه ضده ونشهره بالتواصل الأجتماعي عندي مجمومة خاصة بدقايق يسونه تريند وكل العالم يعرفون حقيقته الوصخة

عزيز : اشلون

سيري : همام احنى لازم نتقابل حتى افهمك شلون نفضحه 

عزيز : اوك  راح نتقابل بس بمكان  خاص  مو عام

سيري : ما شي حدد المكان ونتقابل بيه

سيري

اتفقنا نتقابل بمكان مقطوع  بسبب قوانين همام الي فارضها عليهم واذا شافوني واگف ويا وحدة راح تصير مشكلة لزيد. واني ما اريد اسبب له مشاكل  قبل لا اختفي من حياته اشرت الهة حتى تشوفني  واجت ركض  حضنتي بلهفة

مشكلتي ضعيف جدام اثنين الفلوس والجنس اللطيف ولو هاي البنية ماخذة كل طيين الجنس اللطيف

وما مخليتلهن شي  بس مجبور ابعدها عني لا يلمحنا الشيطان   وبدون وز  وندس  اني كوة مسيطر على روحي يمها 

سيري : اليوم شنو فيلمك الله هاديك لو فاقد الذاكرة 

عزيز

رجعت اتقمص دور همام وحجيت بنبرته رغم جنت ذايب ويا كل حرف تكوله بدلع   : كلتي عندج طريقة حتى نفضح بيها ذاك الرجال احجيلي عنها

اتحمحمت وكالت :  اي صح اول شي اتصل عليه وخليه يعترف بكلشي وبعدين نسرب التسجيل بالتواصل الأجتماعي

كلبت الفكرة براسي  عجبتني جاوبتهة بثگل : خوش فكرة غير اذا نجحت كل الي تريدنه انفذه الج بس اطلبي

سيري : كول والله

عزيز : والله

كلتها بدون ما انتبه للحلفان بس الحماس اخذني انوب حجيهة ولهفتهة ترد الروح  ومنا جنت  بس اريد  انقذ حياة الطفل من الطرفين اتصلت عليه و  فتحت تسجيل الشاشة   ورة ورة دقايق  جاوب

عزيز : هاا فكرت بالعرض لو تريد انجيب لك ابنك مگطع

_ مايحتاج افكر كتلك قبل حتى اذا جبتوه مگطع راح اخفيه ورة افتتحاح المشروع راح اضهره للعالم  وبس شوف التعاطف الي راح احصل عليه لما يصير الأمر رأيي عام

عزيز : ياحقير ادعي لربك ما توكع بيدي

_ لاتعصب نفسك ابني هي هاي الدنيا لازم تضحي  بأغلى ما عندك حتى يصعد اسمك فوگ اكيد راح احزن جم يوم  وراح انسى لأن الدنيا ماتوگف على احد 

هدأت نفسي وردت اجره بالكلام اكثر : يعني هذا اخر كلام عندك

_ اكيد

عزيز : لعد اعتبر ابنك ميت

_ الله يرحمه ويرحم موتاك هههههه

عزيز

قفلت الخط وحفضت التسجيل

سيري : لا تتعصب هذا كلامه راح يدفع ثمنه غالي

ارسل لي التسجيل والباقي علي اني اسوي عليه تعديلات وانشره

عزيز

عجبتني الفكرة وردت ارسله الهة بس اتذكرت اني  حساباتي كلها بأسمي الحقيقي بس الرقم غيره لي زيد مو نفسه

بقيت اباوع الهة بفهاوة  كمت على حيلي وكلت بحزم راح اتصل بيج بعدين وانطيج التسجيل

كامت وراي : ما شي انتظرك بس لا تتأخر لأن مو بصالحنا

عزيز

صعدت بالسيارة ورجعت لنفس البيت الي خلينا بيه الطفل وامرتهم يطلعون كلهم استغرب زيد من كلامي

عزيز : طلعو خلونا وحدنا  حتى انت زيد

زيد : شراح تسوي

عزيز : بعدين احجي لك

طلعو بقيت وحدي يم الطفل وكعدت يمه وطمنته

عزيز : لا تخاف. ماراح نأذيك  ولا نسويلك شي

هز براسه مجبر يتجاوب وياي

عزيز : مو كتلك لا تخاف  ا عتبرني صديقك  اكدر اسألك سؤال

_ اي

عزيز : امك وين

جاوبني : بلندن

عزيز : و ليش خلتك  تجي هنا

_ ماخلتني بس بابا اصر يجيبني غصبًا عني  بابا جان يزگح عليها لأن ما خلتني اجي بعدين جاب ذولا الرجال واخذوني بالگوة

عزيز : اهاا شوف باجر راح اخلي واحد من زلمي يرجعك لأمك وبعد ابوك ما يكدر ياخذك

_ والله  !!

عزيز : ههه والله

راحت ابتسامته وكال : بس بابا راح يرجع ياخذني

عزيز : لاء  اصلًا بابا باجر مايلحگ يحگ شعره

ابتسم بوجهي ابتسامة بريئة

_ شكرًا عمو الحباب راح اكول لماما عندك  انت تخلصتني من بابا ومن ذولا الاشرار

عزيز : مايحتاج تگول شي

_ تريد تشوف صورتهة !

عزيز :  مايحتاج

_ بلى حتى تعرفهة اذا شكرتك لو قدمت لك مساعدة ماما تساعد هواي ناس

عزيز

كام يحاول يطلع صورتهة من جيبه بس اديه مجتفات مايكدر    يطلعها

عزيز : مايصير تشوف صورة امگ لأي شخص اخلي تكون امك شي مقدس  ما تسمح لأحد يشوفه 

_ بس انت حتى تعرفهة راح اتساعدك  هي تشتغل بمنظمة جبيرة تساعد الناس العرب بيها

عزيز

فكيت اديه من الحبل  وطلع الصورة بسهولة وانطاني اياهة

_ هاي ماما

عزيز

اخذت الصورة وما فشلته لكن جانت صدمة عمري بشوفة هاي المرة هواي تشبه الصورة الي گدرت احتفض بيها كل هاي السنين بدون مايعرف جدي عنها لأنه جان ضامهة عني وكل ما اسأله عن اوصاف امي وابوي يغير الموضوع ويتجاهلني

لحد ما عرفت هو عنده صورة وحيدة الهم بس ولا مرة گالي عليها ، لو ما انا شفتهة فجأة بيده وما بقى  اي مهرب اله انه يتجاهل سؤالي  بعدها گالي ذولا اهلك شوفني اياهم صورة قديمة تجمعهم سوة امي وابوي

بعدين اخذتهة منه بدون علمه

ومن ذاك الوقت واني محتفض بالصورة عندي  حتى ما احس نفسي وحيد  وياي امي وابوي حتى لو بس صورة

همست بلهفة وامل مزيف واني اباوع للصورة

عزيز : امي

باوع لي الطفل بفهاوة  مايعرف شيكول بس صافن بوجهي بعدين رجعت للواقع وكلت

عزيز : هاي الصورة تشبه صورة امي

_ تشبهة !

عزيز

هزيت براسي  ماجنت اعرف مجرد صورة هالكد ترجع لي حنين لأم واب ما اتذكر عنهم اي شي سوة صورة قديمة مخليهة وياي كل هالسنين حتى احسهم قريبين مني  وما احس نفسي يتيم وحيد

اشكد جنت احاجيهم عن احلامي وعن حياتي كل يوم گبل لا انام واحسهم يمي ويسمعونلي  معقولة تكون  نجت  من الحادث

زين ليش ما دورت علي وعلى جدي ليش سافرت للخارج معقولة ذاك الرجال الحقير  يكون ابوي ، لا مو معقولة حسب كلام جدي ابوي جان شخص طيب وبحياته ما اذى احد بحياته مو مثل هذا الي كل همه  يزيد نفوذه على حساب غيره

بسرعة طلعت من جيبي  صورتهم القديمة وشوفتهة للولد ردت اتأكد اذا جان هذا الرجال ابوي لو لا

عزيز: تعرف هذا الرجال ؟

نفى براسه : لا ما شايفه

عزيز : يعني هذا مو ابوك !

حرك راسه بلا

قاطعنا  صوت تلفوني سيري رأسا فتحته

سيري : التسجيل وينه

عزيز : راح ادزه الج بس  لحظة  مشغول

سيري : ماشي

.سديت الخط  ورجعت  طمنت الولد  بأن راح يرجع لأمه

طلعت من الغرفة وطلبت تلفون من الزلم. طلع واحد منهم تلفونه وانطاني اياه

زيد :  عزيز انت شجاي تسوي

عزيز : لاتخاف اريد اكسر خشم هذا الحقير

زيد : عزيز  ما اريد اخطاء

عزيز : لا تخاف ما اكو اخطاء هالمرة  بس لا تشيل عينك من الولد ما اريد يصيبه مكروه 

زيد : صاير تنطي اوامر الله يستر منك

عزيز

حولت التسجيل للتلفون اخر حتى لا تعرف حسابي  اتصلت  على سيري  واتفقنا نلتقي مرة حتى انطيها التسجيل من التلفون الثاني

اتقابلنا بالسيارة

عزيز : هذا التسجيل

جاوبتني ومركزة بعيوني  : وين رحت انتظرتك هواي

اتحمحمت وكلت : ركزي عالشغل مو علي

سيري : مو مشتاكلتلك وممصدكة احنى سوة بمكان واحد

عزيز

كل ما اسمع كلامها  اكول الله يطيح حظك يا همام من دافر هيج نعمة تفتح النفس  ولاحگ زيد وجماعته  الما من وراهم بس المصايب

دارت وجهة  فتحته ورجعت سمعته من جديد انتبهت على بين على  ملامحها  الغضب  وبعدين رادت تدخل حسابها  للتلفون بس مابيه تكنيك وصلتله من تلفونهة  وتمت العملية نقلت التسجيل 

بقت تراسل شوي تالي حذفت الحساب من التلفون وباوعت لي بأبتسامة منتصرة اني من مكاني ماگدرت اقاوم ابتسامتهة خفت لا ما اسيطر على روحي  اهجم عليها  وابوسها بوسة اخرب الأول والتالي  بس اتعوذت من الشيطان  ثگلت روحي كوة وسويت نفسي مامهتم

سيري: اعتبر الرجال طار ساعة وتجينا الأخبار

عزيز

بقينا ساعة ننتظر  بالسيارة  خلال هاي الساعة التزمت بالصمت  ما حجيت كلشي وياهة بس هذا ما يعني انه اباوع الهة من جوة ليجوة ما جانت مثل ما وصفهة زيد  جانت حيل طيبة وبريئة وقدمت لي مساعدة بأخلاص بقت تتراسل ويا جماعتهة حتى مايصير اي اخطاء بتسريب التسجيل وينفضح الرجال

يمكن العالم الي عايشين بيه زيد وصاحبه مخليهم ما يثقون الا بنفسهم لدرجة  خلو الكل بنظرهم ما يستحقون الثقة فجأة صاحت سيري بفرح

سيري : ييييسسسسس

اللتفتت لي وكالت انتشر الخبر هسة الناس تتولاه طلعت لي التسجيل بس صوته وهو يحجي  عن موت ابنه حتى يحصل الدم من الناس ويثبتون له المشروع 

المفروض جان افرح بس ضليت افكر بزوجته الي يمكن تكون امي او تشبهة شلون اختارت شخص خطئ مستعد يضحي بأبنه علمود الفلوس

وشوي شوي بدة التسجيل ينتشر وينحفظ يم الناس  لحد ما صار رأي عام  خلال ساعات ناس مصدكة وناس ممصدكة وكلها تحجي بيه لحد ما طلع الوضع عن السيطرة

الممولين الي انطوه المشروع سحبوه منه  وانطوه للحرامي الثاني الي خطفنا الولد علمود ينسحب من المشروع

بالحالتين هذا الأستثمار الضخم والي يكلف مليارات من الدولة  ما راح لشخص يخاف على الوطن  بس تحول  من حرامي لحرامي 

بس الشي الزين هو  الولد طلع منه سلامات وما راح ضحية لجشع ثلاثة اطراف متنازعة على

وصخ دنيا

بعد ما هدأ الوضع عن هاي الفضيحة خليت واحد يحجز طيارة  للولد يرجع لأمه  زيد ما قبل  الولد  يرجع لأن لازم الجبير يقبل  بالبداية  بس سويت الي براسي وحجزت له تذاكرة يرجع بيها  واتخبل علي زيد شلون اتصرف على راسي

عزيز : گتلك ما اكو داعي لبقائه هنا صاحبكم  اخذ الأستثمار وقع عليه وخلصت مهمة الولد  خليه يرجع لأمه شعنده باقي هنا

زيد : عزيز جاي تتهور اكثر من اللازم اذا تريد  ترجعه انطي خبر للجبير لا تتصرف من راسك حتى ما تتندم بعدين وتفقد حياتك ثمن غبائك 

عزيز : ليش هو مهتم لهذا الولد

زيد : عزيز لا تلعب بالنار اخر مرة اگولك  مو كل مرة اكدر اساعدك و اخلصك

عزيز : بما انه اني مكان صاحبك اكيد عندي حصانة

زيد : هههههه لا وعيونك ما اكو لا حصانة ولا هم يفرحون  الي يمشي عكس التيار كائن من يكون رصاصة وحدة وينتهي حياته  الحصانة بس حجي متتنفذ

عزيز

قنعني بكلامه اي حصانة هاي بس اطلع عن دربهم اتصفى كبل اتنهدت و اتصلت بالجبير  وانطيته خبر بأن المهمة تمت  وبعد ما اكو داعي يبقى الولد يمنا

ادريس : صح الخطة نجحت وكدرنا ناخذ الأستثمار  بس هذا مايمنع انك خالفت بعض الأوامر وما نفذتها مثل ما كتلك عليهن بالضبط

عزيز :  صح خالفت الأوامر بس قبل لايتعشا  بينا اتغدينة بيه 

لو باقين على التهديد جان هسة هو كاسب تعاطف الناس وكلهم صارو ضدنا

والدولة كلها تدور على ابنه الي بالأساس مو بعيدة عليه راح يوكل شخص يقتله حتى توكع التهمة براس المنافس  ويتخلص منهم

فجان تهريب التسجيل وفضحه جدام الناس صار لصالحنا هم خسر ثقة الدولة وهم خسر المشروع

ادريس : وجهة نظر عبقرية يا بطلي وعلى هذا راح اتغاضى عن الأخطأ الي سويته اما بالنسبة للولد  خليه يمنا يفيدنا

عزيز : تسمح لي اطلب منك طلب

ادريس :هاي شنو  ممسويها گبل

عزيز : بس  اريد اسويهة اذا تسمحلي

ادريس : اطلب وادلل بطلي كلشي يجرالك

عزيز : الولد عوفه يرجع  لأمه لأنه مو من نوع الي يفيدنا وراح يخرب علينا كل  شغلنا

ادريس :  مو اكولك انت متغير هواي بس على كلًا  سوي الي تريده  والولد الك وتحت تصرفك  شتسوي بيه سوي تبيعه تقتله  ترجعه انت حر

عزيز : اشكرك

ادريس : سلام

خلصت مكالمة ويا الجبير واتنفست براحة لأن سمح لي اتصرف بكيفي  بعدها

اخذته  للمطار  جان فرحان وفرحته ممزوجة بخوف من الصار ومتلهف  يرجع لأمه لزمت جفه وضغطت عليه  حتى احسسه بالأمان وبعد ما اكو شي يخوف خلص راح يرجع ويعتبر الصار كابوس وانتهى   رفع راسه علي

سليم : اني اشكرك عمو

شديت قبضتي على ايده وكتله  : لا تشكرني روح اخلص منا ولا ترجع بعد

سوى حركة عفوية براسه  وگال : انت شسمك عمو !!

عزيز

قربت راسي ليم اذنه وهمستله بدون اي خوف او تردد من افصاح اسمي الحقيقي

_  اسمي عزيز تميم اصلان

رفعت راسي  منه وصيت الزلمة ينتبه عليه ومايرجع الا يتأكد واصل لأمه لو لا يرجع من الاساس

ثاني يوم دك علي رقم دولي عرفت الفخ الي نصبته صاد الفريسة

فتحت الخط بلهفة و اجاني صوتهة بكل هدوء

_ الو ......

يتبع .......