.

صوتو ⭐⭐⭐⭐

علقو .....

قصة

اجتياح

الفصل : ٨

الكاتبة ندى البياتي

..........

عزيز

من گالت الو بقيت مركز بهاي  الكلمة  و اكول يارب تطلع هي يارب  تطلع امي  عايشة  وما متوفية  قاطعت تفكيري

_ الوووو عزيز  تسمعني

اخذت نفس وگلت :  اي اسمعج

_  جيد  اشلونك اني والدة سليم الي تعرض للخطف  طبعًا  حجالي ابني عن الصار شكرًا لأنك ساعدته من هاي البلوة

عزيز : هذا واجبي

_  واحييك على ذكائك من  خليت رقمك بجيب قميص  ابني  حتى اكدر اتواصل وياك 

عزيز : ههههه ما جنت متوقع راح تلگونه بس كلت خل اجرب حظي  بلجي يمشي عدل هلمرة

_ خطة عبقرية  وجنت ضامنهة  ان راح اتصل بيك حتى تاخذ المكافئة  مو

عزيز ؛ هههههه يعني هيج شي  والمكافئة اخذتهة  لا تحيرين بيها

مرام :   شلون اخذتها بلا !

عزيز  اتصالج بية هو مكافئة وزايد

مرام :  تدري لو شكد  ما اشكرك  ما اوفي حقك لأنك  خلصت ابني من ابوه

ما اعرف شجنت راح اسوي لو صابه مكروه  

عزيز :كتلج  واجبي لأن گلبي ما انطاني  اشوفه يكون ضحية لذنب مو ذنبه

مرام :   صار اسنين  اريد اطلعه  على حقيقته ما اكدر   رغم شكد عندي  ادلة و واسطات تخيسه بالسجن بس ولا مرة تجرأت اكدر اواجهه  

وانت  بساعات قليلة كدرت  تضهره على حقيقته جدام الناس وخلصتنا من ظلمه وتسلطه

عزيز : ان شاء الله بعد مايكدر يضوجج ولا يضوج ابنج

مرام : ان شاء الله

عزيز : هسة هو شلونه 

مرام :  الحمدلله حالته احسن

  صح  من رجع مرعوب وممصدك  ان خلص من الخطف    

عزيز : راح يبقى فترة يفكر بالصار وياه لحد ما يتأقلم ويا الوضع

مرام : اي للأسف  البارحة ماكدر ينام بس يهذي ويگول راح يقتلوني بالكوة هديته  كتله هذا كابوس وخلص

عزيز : الله يكون بعونه واسف لأن جنت طرف بهذا الكابوس 

مرام : لاتلوم نفسك انت ما خطفته انت خلصته من الخطف الحقيقي  

تعرف ابوه جانت خطته انه يرجعه للعراق ويوهم الناس انه مخطوف حتى  يكسب تعاطف الدولة وياه

بس انت خربت  عليه خطته كلها 

والا الله اعلم وين راح يرميه ومحد يعرف عنه شي

عزيز : اسف على كلامي  بس زوجج واحد حقير و

نذل  وما اكو اي رحمة بگلبه

مرام :  اعرف  اكتشفت هالشي بعد زواجي منه والحمد لله كدرت اتخلص منه بس الي يربطني بيه هو ابنة على طول يحاربني بيه ولأن يعرفني اخاف عليه يستغل نقطة ضعفي

عزيز : هسة انكشف بعد مايكدر كلشي يسوي

مرام :  اي الحمد لله 

  عزيز : الحمد لله 

مرام : احفظ رقمي يمك اي مساعدة اني بالخدمة و تدلل

عزيز : ماشي بس ايصير كل ما اشتاك اتصل بيج !

مرام :  هههههه ترى انا بكد امك

كلت بتردد  : او يمكن تكونين  امي !..

مرام :  امك !؟ ،  يا عيني طبعًا اتشرف و على راسي اكون امك

عزيز : يعني اكدر اكولج امي بدون كلفة

مرام  اكيد انت هم صرت ابني شوكت ما تحب اتصل بية ونتواصل

عزيز : ان شاء الله

سديت التلفون حسيت بأحساس ان يكون عندي ام حتى وان كان مجرد وهم  بقى بس اكول لزيد عن انسحابي من هذا الدور  وارجع لحياتي القديمة احسن ما اورط نفسي وياهم وبعد ما اكدر اتخلص منهم

لندن ...

مرام

گعد سليم خايف و اجى ركض لعندي

سليم : ماما ويا منو جنتي تحجين عمو  اياد مو

مرام  لا حبيبي هذا عزيز  اتصلت اتشكره  لأنه ساعدك منو ذولاك الاشرار

سليم : ليش ما خليتيني احجي وياه

مرام :  عبالي نايم كلت اتصل بيه واكعدك لأن عندك موعد ويا الطبيب حتى تحجي له كلشي شفته هناك. اتفقنا

سليم : اتفقنا

مرام : عفية بالشاطر

رن تلفوني واجتني رسالة

ع الواتساب رابط التسجيل المهرب عن زوجي هاي صار من البارحة لليوم واصدقائي  الي يعرفوني و المايعرفوني يدزون لي التسجيل واغلبهم جانو شمتانين بية و  يرسلونه حتى يذكروني بأختياري الخطأ والي شفت الويل يلا كدرت اتخلص منه  بعد معاناة  طويلة  ومحاكم ومحامين اخذو من عمري عمر  يلا مشو معاملة الطلاگ مالتي حتى اطلع من سيطرته  واتحرر

و ما اريد هذا التسجيل يأثر على حياة ابني  ويخليه يعيش بخيبة امل وخوف من ابوه طول عمره لو يسبب له حالة نفسية يخليه يحقد عليه ويتعقد  ويشوف الحياة من جانب مظلم

صح ابوه ما يستاهل يكون اب  بس ما اريد نذالته تخرب حياته اريده يكون شخص ناجح واثق من نفسه لا عقد  ولا انهيارات نفسية

اضطريت انطي خبر بالكروب راح اقفل كل المواقع مالتي فترة حتى اغير مزاج ابني وحتى ينسى الي عاشه يومين بالعراق

ولازم اخذه لطبيب نفسي  الحجزت له يمه حتى يحجي له عن الصار وياه

اخذت نفس بحرگة كل ما اتذكر الأيام العشتهة بالعراق الغصة تخنگني ليش اني وابني من دون كل الناس بلدنا يأذينا وما يحتوينا  حالنا حال العايشين بيه

اتذكرت اليوم الي خطفوني بيه بدون ما اعرف ليش  خطفوني  وشنو السبب

ذاك الرجال الضخم  بحياتي ما راح انسى شكله  وتجبره وقسوته علي  للأن بعد اثار تعذيبي واضحة بجسمي وتشهد على كلشي عشته بالمكان الحبسني بيه  

ما اعرف شلون طلعت عايشة من جوة ايده متت جوة اديه وما رحمني كل ضربة يضربني اياهة كفيلة تطلع روحي وترجعهة

تعبت بكد ما توسلتهم يتركوني لو يگولون لي شنو الي مسويته اني حتى اتعذب كل هالعذاب منهم

بمجرد ما اتذكرت رجع الخوف سيطر علي من جديد كأن الصار البارحة هاي الحادثة لو شكد ما اقوي نفسي ما اكدر اتخطاهة سببتلي رعب للأن اعاني منه كل ما اتذكرهة

اللتفتت  للصورة الي بالحايط هاي الصورة الوحيدة الي تخليني احس بالأمان وتبعد عني الخوف وتخليني اشوف  العراق بعده بخير ومو غابة والبيها كلهم متوحشين  ياكلون بينا مثل ما  صار وياي 

صح السنين العشتهة بالعراق مأساوية وخلتني اكرهه عالعذاب العشته وما اعتبره وطن ويأويني  ويحميني من الكلاب البشرية السائبة لكن هذا الرجال الوحيد  الخلاني احس انه بعده بخير ويصلح للعيش

سليم : ماما وين صفنتي مو على اساس نطلع نغير جو

_ اسفة ماما بس اجيب جزداني  واجي

غلقت تلفوني عام حتى محد يكدر يخرب علينا يومنا طلعنا من العمارة كلمن مهتم بنفسة محد عليه بأحد قابلنا اياد

هو هم واصله الخبر واجى يطمن على سليم  اياد  صديقي المقرب من وقت ما اجيت لهنا وهو وياي ماتركني ولا يوم  كل ما اريد مساعدة لو مساندة معنوية هو الوحيد اليكون موجود ويرفع من معنوياتي  ويرجعلي ثقتي بهاي الدنيا الغادرة 

اتقرب منا وصار بمستوى سليم وحضنه جان خايف عليه من سمع  بالتسجيل ورأسًا اتصل بية يتأكد رغم خلافاتنا الصارت قبل فترة

اياد : شلونك يا بطل

سليم : اني زين عمو

اياد :  احجي لي شصار وياك  و منو ذولاك الناس

سليم : ما اعرف سدوو علينا الشارع  شدو عيوني وخلوني بمكان غريب ما اعرفه

بعدين  زعيمهم  كالي راح ارجعك لأمك

اياد : هههههه جان مقلب و يتشاقون وياك 

سليم : لا جانو شايلين مسدسات حقيقية تخوف واتصلو على بابا وهددوه وما خلوني احجي وياه حتى يخلصني  منهم

اياد : المهم رجعت النا سالم  هسة احجي كل هذا للطبيب ماشي

مرام

هز براسه بمعنى موافق

وكف اياد على حيله

اياد : اوصلكم

مرام :  لا  اليوم اريد انكون وحدنا اني وابني

باوع لي بكسرة خاطر  : ما شي اتصلو بية اذا احتاجيتو مساعدة

مرام :  اكيد 

بالبداية رحنا للطبيب الي حجزت عنده من الليل  ما اتأخر علينا دخلنا بساع وكعد يسأل سليم وطلب منه يحجي له كلشي  وبعدين انطاه نصايح شلون يتخلص من الي عاشه بالعراق وانه رغم كلشي لازم  يحب وطنه وما يخلي هذا الحدث يأثر عليه وعلى حبه لوطنه وهذا الحدث يصير حتى بلندن

لأنه مثل ما بيه اعداء بيه ناس طيبين  الي حبيته بهذا الطبيب رغم مو بلده بس ابد ما انطى بيه خلا سليم يرجع يحب العراق وما ياخذ عنه صورة سلبية حتى بعد الي صار وياه

خلصت المراجعة وحسيت سليم خف الحمل عليه لأنه حجى كلشي بدون خوف وبالمقابل الطبيب عرف شلون يخلصه من  مخاوفه ويحولهن لشي ايجابي 

بعدين رحنا لمدينة الالعاب قضينا بيه طول اليوم لما يتعلق الأمر بمدينة الالعاب افرح اكثر من ابني واللعب اكثر منه حتى بأللعاب الاطفال اصعد واكثر لعبة عندي هي الترمبولين. نخلص فلوسنا عليها

ونبقى نتكمز لحد مانتعب

الي يشوفني اتگمز ويا ابني ما يكول هاي مرة جبيرة و  ناشطة حقوقية وعلى  راسها كوم بلاوي وسامعة الاف القصص الي تشيب الراس والي حاطين املهم بية  حتى اخلصهم منها

هذا عالمنا الصغير من تضيگ بينا الدنيا نجي عليه وننسى كلشي حتى نفسنا

و كالعادة خلصت كل فلوسنا واحنى نلعب وتشتري  الي نحبه  حتى كروة مابقت عدنا وكفت بالشارع اتفحص جزداني و ما باقي بيه ولافلس وبطاقة التأمين فرغت لأن من الاساس ماجان بيها مبلغ جبير

سليم : ماما شلون راح نرجع !!

جاوبته بيأس : شكلنا راح نرجع مشي

سليم : بس تعبت ما اكدر امشي الطريق طويل ،اتصلي على عمو اياد  يجي ياخذنا

مرام :  لا عيب نزعجه بهالوقت

سليم : هو مو گال شوكت تردون اني بالخدمة

مرام :  بس مو معناهة ان احنى نستغل كلامه  وشوكت مايعجبنا نتصل بيه لازم تعرف الناس هم عدها اشغال ويجوز ينحرجون منا اذا نبقى نرمي حملنا عليهم

دنگ راسه زعلان حقه ما يعرف انه اياد اخر مكالمة وياه  ا خذ على خاطره لأن رفضت ارتبط بيه  واتزوجه 

رغم  ما بيه اي عيب او نقص بس اني اكتفيت من الي عشته گبل  خلاني ابتعد عن مواضيع الزاواج ترليون متر مسحت على راسه  : لاتزعل هسة نأجر سيارة ونرجع ونخلي جاسم ينطي كروة لأبو السيارة

اتصلت على حارس العمارة مالتنا وكتله يجهز النة كروة السيارة لحد ما نوصل وبعدين انطيه

عرف فورًا مخلصين فلوسنة على مدينة الالعاب وكال : مرة ثانية ياست

_ تعرفنا ماناخذ فلوس هواي  ويانة  حتى لانصرفهن كلهن

جاسم : اي اعرفكم اصلاً ماتاخذون ولافلس بس الكروة

الكاتبة ندى علي البياتي "

اجرنا سيارة ونزلنا  يم العمارة اجى الحارس وحاسبه واني نزلت المشتريات مالاتنا

_ شكرًا  جاس

جاسم : انا اسمي جاسم ليش تطيرين الميم منه

_ غير ادلعك

جاسم : ديلا انوب ادلعني غير الأهل   لو يدرون هيج تدلعيني يخربون من الضحك

مرام 

ضحكت عليه: مالي شغل بأهلك اني علي بيك ولازم تتحملني

جاسم : متحمل شبيدي قابل

مرام :  انتظر هنا  بس خمس دقائق اروح اجيب لك الفلوس ما اتأخر

جاسم : لا  لاتعبين نفسج خليهن علي

مرام :  شلون يصير انت هم حالتك على گدك وراك عيال واني ابني كل مرة نخليك بهالموقف وتضطر تدفع بدالنا

جاسم : افضالج علي جثيرة ولو شما سويت ما اوفيهن

مرام : مامجبور توفيهن قابل اني شمسوية لك يلا لا تعاند خل اروح اصعد دقايق وراجعة

اخذت الاكياس الي اشتريناهن

و صعدت وبقى سليم يم جاس يحجي له عن مغامرتنة اليوم حسيت براحة لأنه كدر يتخطى الصار ورجع مثل قبل

فتحت الباب بالمفتاح صارت الصورة گبالي اشگد  احبها  شگد  تنطيني طاقة تخفف عني همي رغم شكلها مضحك واياد دوم يتقشمر عليها وعلى شكلها  ويكولي صايرة تؤمنين بسوالف العرافين لأنو اني دائما اكوله هاي الصورة تنطيتي طاقة ايجابية  وتخلي يومي سعيد كل ما اشوفها

هي عبارة عن وجه مبتسم  (😊) والدائرة مالته عوجة ومكتوب جواه

"اضحكي  الدنيا ماتسوى البجي

وخاف انوب  نغرگ بدموعج وماعدنا قوارب" 

شكد جنت بذيج اللحظة يائسة من الحياة  وگاعدة على رصيف الوطن الما نصفني ابجي دم على حياتي واصلة لمرحلة انو بأي لحظة  اخلي نفسي جوة السيارات  واخلص منها  

لكن الشخص الي شمرها يمي وعبر بدون مايلفت الأنتباه  غير كل حياتي اخذتهة من الگاع وباوعت للرجال الي واكف بعيد عني  يباوع لي واشرلي بأصابعه بالهوة بعلامة ابتسامة

حتى ابتسم ما اكو شي يستاهل ابجي عليه و كمل طريقه بدون مايگول شي  او يعرف على نفسه

مسحت دموعي وفتحتهة

هاي الرسالة الغريبة صارت لي مثل البلسم الي داوة كل جروح گلبي وخلاني اضحك من كل گلبي  جانت رسالة بسيطة و عفوية  بس كدرت  تغير  حياتي للأحسن

وكل ما احس بيأس ابقى اباوع عليهة واتذكر  صاحب العيون الزرگة المثل البحر  من يتلألألئ بأنعكاس الشمس عليه ويخليهن يلصفن  وجهه الباسم الضاحك الي مليان حيوية وروح حلوة  وهو يأشر لي ابتسم وما اسمح للحزن ينال مني 

بقيت اتأمل بهاي الصورة يا ترى  وين صفى الدهر بيه و شأخباره هسة بعد خمسة وثلاثين سنة ابتسمت  بأمل ودعيت له الله يحفضه ويسعده  وين ما كان  جان بعدها اتذكرت الكروة الدفعها جاس لازم انطيها اله

......

القرية

همام .

ما اعرف شبيهم ذولا الناس كل ساعة گاليين شكل نجوى  كاعدة وحاطة ايدهة على خدهة بملل  والشايب من البارحة داخل بحالة سكوت غريبة عازل نفسه عن الكل وما يحجي ويا احد  الا للضرورة

بالبداية جان اخر همي اذا عزل نفسه او سكت لكن اليوم صابني فضول

ما اعرف ليش فجأة صار عندي اهتمام لهذا الشايب سألت نجوى : شبيه الشايب ؟؟

نجوى : معقولة ناسي

همام

جريت نفس بنفاذ صبر يأست واني اكول الهم اني مو حفيدهم وهمة مايأسو يحاجوني على انه اني هو اخذتهة على ميهة وكلتلهة

همام : اعتبريني ناسي واحجي لي شبيه

نجوى : اليوم ذكرى موتت ابوك وامك. هو كل عام يصير بيه هيج  ينقهر من كل گلبه والدنيا تطلع من عينه يگضيه عازل نفسه يريد يحزن عليهم براحته  اكثر المرات اشوفه يبجي لحد ما تبيض عيونه بس هو يكابر يخفي وجعه عنا ما يريد نسأله عن شي  ضام ماضيه بگلبه ويا خوفي يتعب گلبه بگد ما ضام بيه

حجيتهة بأستهزاء  : اهاا يعني مسوي حداد على ارواحهم

نجوى : ليش هيج تحجي ترى ذولا اهلك انت  والمفروض تحزن عليهم اكثر منه

همام : انا على روحي ما احزن تريديني احزن على ناس ما اعرف من شوكت ميتين  وفوگاهة مايعنوني بشي

نجوى : بكيفك بس فدوة لا تحجي هيج جدامه ينقهر

همام : اخر همي ينقهر او لا 

نجوى : تدري بنفسك  اشگد متغير حتى على امك وابوك   ماجنت هيج جنت تخاف على جدك من الهوى وتموت گبله  اذا يصيبه مكروه ليش هسة تگول اخر همك

همام : لأن ببساطة انا مو نفس الي جاي تقصدينه

نجوى : لا لأن ببساطة الي لگة احبابة نسى اصحابة وانت شكلك لگيت غيرنا  هناك لحتى صرت تستنكف منا وماتطيقنا

مو مشكلة  لاتحبنا ولا تطيقنا ولاتفكر بينا

بس على الاقل احترم مشاعرنا 

احترم احنى بشر  من دم ولحم  والحجاية القاسية  توجعنا  لذلك خلي كلامك طيب ويا جدك  الفنى عمره علمودك

همام

ما جاوبتهة  محاضرتهة كلها جانت توجهة للشخص الخطأ واذا مثل ماتگول  ليش حفيده غايب ومايسأل عنه  ليش اني  لازم اسأل عنه 

مر اليوم كله  والشايب على حاله مايبين  عازل  نفسه

للحظة حسيت هذا اتفاق منهم لأني قبل بيوم هددته اذا ما اجت السيارة راح اخلص عليه  حتى يعترف  شنو سر تأخرها كل هالفترة

وثاني يوم سوة هالفلم الي عزل نفسه بيه  على اساس حزنان على ناس  ميتين من زمان يمكن عضام ماباقية الهم

مغمض عيوني بالجول  عالكرسي بالشمس لأن البرد هنا رهيب اريد اهدأ اعصابي الي ما كمت  اسيطر عليها

اريد ارجع  لبغداد

اريد اعرف شصار من وراي 

اريد اعرف البنيته بعشر سنوات ضاع لو بعده اتعرضت للخيانة لو الي يشتغلون وياي بعدهم

واذا بعدهم ليش محد كلف نفسه ودور علي  حتى ادريس  ما سوى شي حتى يدور علي 

معقولة اني ميت حاليًا ميت بنظرهم ونسوني 

وفوك كل هذا ضحكات الأطفال المستفزة الي براسي زاد اكثر من اي وقت  زام شفايفي واتنفس من خشمي  بقوة  حتى  اتجاهل هاي الضحكات  واگول بعقلي كافي اسكتو اسكتو  ما اريد اسمع ضحكاتكم  عوفوني بحالي ليش لازگين علي

فجأة حسيت واحد ندسني من صدغي عرفت هاي حركة محمود رأسًا كمت من الكرسي ولويت ايده ورة ضهره ردت اطلع  اعصابي كلها بيه  حتى يتوب وبعد ما يندك  بية  اتوجع بألم توسلني حتى اعوف ايده

حجيت بعصبية وكأنه عدوي : اكثر من مرة كتلك هالحركة بطلهة

ضل يتوسل حتى اعوفه وما أأذي بعدين هدأت وتعاطفت وياه وعفت ايده و كعدت عالكرسي

محمود :اااخ ايابة  اشبيك صاير ماتتحمل شقة جنت تاكل مني  كفخات  بس الله يدري بيهة ومتحجي هسة بغداد غيرتك وسوت عندك احساس  وماترضى احد يمد ايده عليك 

همام : حركتك هاي تثير اعصابي ومحذرك ماتعيدهة بس انت ماتفهم

محمود : بعد ما اعيدهة شنو مخبل اني واندك بيك

سكت شوي يفكر وگال : شوف نسيتني شأريد اكولك ، هاا اتذكرت  كوم اليوم اكو عرس بالقرية والكل حاضرين شعندك ضال وحدك هنا

همام : محمود امشي منا واسلم على ايدك لأن ما راح اكون مسؤل عاليصير بيها

محمود : هاي فوك ما اريد اغير مزاجك شلون عرس يفوتك

همام : مزاجي ما يتغير اذا ما رجعت لمكاني الأصلي

محمود : امشي جدك گال خل يجي يغير جو

همام : على اساس داخل  بحالة حزن هذا الشايب هلأيام و ماله خلگ بكلشي شيسوي رايح للعرس 

محمود : من يتعلق الأمر بعرس بالقرية محد يبقى حزين كلها تفرح  وتتونس وننسى كلشي تعال بلجي على حظ هذا  العريس وتنحل جبستنة ونتزوج اني وياك و كلمن ياخذ الي يحبهة

يابة اذبح دجاجة اذا اخذت الأحبهة لأن اذا اذبح ثور ابوي يذبحني وراه ومرتي تترمل كبل لا اتزوجهة

همام

غمضت عيوني بملل من هذيان محمود اصلًا مدري ليش اخذ وانطي وياه ندسني مرة ثانية على راسي وگبل ضربته برجلي على رجلته خليته يفقد التوازن ويگع كام حيله ينفض بنفسه متعصب

محمود : اشتعلو اهلك ولك راح تسگطني وبعدني مامتهني بخطبتي وفوگاها هدومي جدد اليوم ما اريدهن يتوسخن على الاقل بس اليوم خلني نضيف ومابية ريحة غنم

حجيت من بين سنوني 

_  لاتسوي هالحركة مرة ثانية

محمود : دكوم جدك كال جيبه وتعال  جان هسة اني رايح للعرس خاطب وانت جاي تأخرني ترى

همام : هسة انت  رايح على عرس لو على خطوبة

محمود : اثنينهن يكولون اذا تقدمت للي تحبهة بعرس راح يكون فال خير وتصير من نصيبك

امشي هسة تلگي نص شباب القرية جايين يتقدمون لحبيباتهم و انت هم تعال  بلجي تصير وحدة من نصيبك وتنفك چبستك وتلگي من تعدل طبعك وتمشيك على صراط المستقيم

همام : سخافات وين اكو هيج شي

محمود : مو سخافات احنى مجربينهة بس ما الومك الضربة مأثرة على راسك وناسي كلشي  شوف هسة حتى جدك تلگيه رايح يدور له عجوز من عمره ههههههه حتى البنات هم رايحات لنفس السبب

الة  صدك شعجب ما حبيت لك وحدة من بغداد  ولو يكولون هناك البنات حلوات وما يگلبن هيج شكولات ههه هههه هههه هههه ههه

استفزتني ضحكته المتقطعة

_ اني الي ما اگلبهن مو هنة

محمود  : هاي احجيهة للدبة اكص ايدي اذا وحدة بيهن مگلبتك لو مسلمة عليك يعوفن الشباب الحلوين والدارسين ويحجن وياك انت

همام : بكيفك  لا تصدك 

محمود : هسة امشي وياي لانتأخر بسببك

همام : خليني هنا مالي شغل بخزعبلاتكم

محمود : كوم يلا قابل اضل  اتوسل بيك

"الكاتبة ندى علي البياتي"

همام

رجع ندسني بأصبعه  على راسي  وخر ايده بساع خايف لا اضربه  اتنهدت بعصبية :  هذا اخر انذار الك اذا سويت هاي الحركة مرة ثانية ادفنك وانت حي ومحد يدري بيك

محمود : اني سويت الي علي بعد مالي شغلة بيك ضل هنا  وحدك واني اللحك على قسمتي قابل تريد اعنس من وراك

همام 

راح وعافني ورة دقايق هم حسيت احد تقرب علي

كلت بيني وبين نفسي اذا هو الا اخلص عليه لأن زودهة حيل ومايتوب من طبعه

مرت دقايق ما سوو شي ولا حجة  فتحت عيوني لگيت نجوى كاعدة قريب مني ومخلية ايدهة على خدهة بملل

بقيت ساكت دقايق بس الفضول منعني : شعجب ما رحتي وياهم

نجوى : على شنو اروح

همام : للعرس

نجوى : ما عندي احد انتظره هناك حتى اروح له الناس الي تروح هناك عدها الي تنتظره والي تتمناه انا ما عندي احد

همام : يعني صدك تؤمنون بهاي السوالف

هزيت راسهة بـ اي

رجعت غمضت عيوني الناس هنا عايشة على فطرتهة وتؤمن بأشياء يمكن تبدو للبعض مضحكة وساذجة

بقينا كاعدين  كل واحد فكره بغير مكان 

لحد ما اجو بالليل من العرس فرحانين محمود  ابتسامته شاكة حلگه وهو اهلة دخلو لبيتهم

والشايب  ودخل للبيت وسلم علينا  نجوى ردت عليه السلام  وسألته

نجوى : جدي شلون جان العرس

حجة من فوگ خشمة  : جان زين مثل اي عرس 

نجوى :  ههههه توقعت تكول هيج  مثل كل مرة  شكلك رايح  مغصوب

اصلان : نسقط فرض هههه  بما ان احنى عايشين وياهم لازم نتعايش على تقاليدهم 

نزع حذائه وكعد  يباوع لي

اصلان : ليش ما  اجيت للعرس من دزيت عليك 

همام : اني ما اسوي شي مامقتنع بيه حتى ارضي الناس العايش وياهم

ما جاوبني والتفت لنجوى يحاجيهة  : نجوى  تعالي اكعدي يمي  اريد احجي وياج 

نجوى : بشنو جدي

اصلان : اليوم محمود  رجع فتح موضوعج وياي ورايدج على سنة الله  گبل ماتگلبين خلقتج خل اگولج ماتلگين احسن منه  خوش رجال ويحبج ومستعد يفديج بحياته

نجوى : بس انت تعرف ردي اني ما اريده 

اصلان : كتلج ماتلگين احسن منه وهو شاريج واني وهذا الصنم الكاعد بعيد  ماندوم لج  محمود هو الوحيد الي يدوم لج

نجوى

انترس گلبي قهر  شلون اگوله گلبي معلگ بعزيز وما اريد غيره ومحمود  ما اشوفه غير اخو بس،

بس ليش هيج حظي عكس الي احبه مامعبرني والي يحبني مالي نفس بيه

باوعت بقهر لعزيز لشوكت تبقى هيج ماتحس بية وتكول اني رايدهة ما اقبل تروح لغيري

اصلان : انطيني سبب مقنع حتى اكدر ارفضه مرة ثانية  لأن اسبابج كلها ما مقنعة وما اريد احرجهم بسبب تافه

نجوى : احسبه مثل اخوي

اصلان : غير هذا العذر

نزلت راسي وگلت  : ما اكو غيره  مالي نفس بيه ليش ما يقدر هالشي

اصلان : هذا هو رايح ابلغهم

نجوى

گام راح لبيت  اهل محمود  وعزيز بقى على حاله واني بگلبي اتوسل بيه سوي شي  احجي اعترض  لاتضل مثل الغريب حتى اكدر اتشجع بيك  ويكون عندي عذر قوي حتى ارفض محمود

شوي ودخل محمود ويا اهلة  وجدي  ملامحه حيل مگلوبة كمت على حيلي خفت  لا اميرة جافصة بالحجي جدامهم  بدون سابق انذار  گالي

محمود : طول عمرج  تحسبيني اخوج وهو ماتحسبينه فهميني  شنو فرقه عني مو هم ربيتو سوى  ببيت واحد  ليش ماتگولين احسبه مثل اخوي  ليش اني دائما. تحرمين نفسج علي وما تريدين ترتبطين بية

سرحان : ابني ما اكو قسمة لاتلح  امشي عيب هيج تتصرف

نجوى

سحبه ابوه حتى يطلعه  ماقبل جان يريد جواب لسؤاله ما اريد هيج اجرحه بس انا من زمان احب عزيز واتمنى يبادلني نفس المشاعر بس حظي اعوج من يوم انولدت واهلي ذبوني بالدغل

محمود : جاوبيني شنو الفرق  بيناتنا 

نجوى : انت شنو قصدك فرق بين منو 

محمود : الفرق بيني وبين عزيز ليش هو رايدته واني ما تريديني

نجوى : ما اكو اي فرق بس ما عندي سلطة على گلبي  هو راد عزيز  وما اكدر اشوف نفسي ماخذة غيره 

ما ادري شلون طلعت مني هالكلمة وكشفت نفسي جدامهم كلامي خلاه يسكت  وجان خوفي الأكبر من جدي  ما اعرف شلون راح يفكر بية منا وغاد

محمود : يعني كلام اميرة صح وحاسمة موضوعج  جان گلتي احب عزيز وما املتيني. ولا خليتني احلم باليوم الي توافقين بيه وتصيرين من قسمتي

نجوى : اني اسفة ماردت نوصل لهذا الحال

محمود : يا مسهل  هاي الكلمة عندج  هذا هو الله يهنيج بيه 

نجوى

طلعو من البيت وضلينا ثلاثتنا الغريب ان عزيز ما اتأثر بالگلته وكأن السالفة مو يمه بس جدي  ما جان متوقع هذا الشي جان يحسبنا اخوة وانا كسرت هذا القانون

صح ما حجة شي بس ملامحه جانت واضحة متعصب مني  وما راضي على الصار

كعد عالفراش ورجع لعزلته والتعب واضح عليه ردت اوضحله اسبابي  : جدي. احجي وياي  كولي الي سويته غلط لأن حبيت شخص عشت وياه عمري كله ببيت واحد  اذا غلط حتى اقفل على گلبي واشيل هذا الحب وما افكر بيه

ما جاوبني  ولا كأني حجيت شي  باوعت  لعزيز هالدرجة ما هامة شي كلها عرفت بحبي اله وهو ما همه كاعد ويباوع النا  وكأنه غريب مايعرفنة  ولا هامه الي يصير ويانة

فشلت من روحي وگمت دخلت بالغرفة الجوة  والوم بنفسي ليش ما جذبت حجي اميرة  ليش ردتهة حجة حتى اگول الي بگلبي  الهم  هسة شراح يفكرون بية

معقولة عزيز بعده مصدوم من السمعه وراح يكرهني بعدين

....

همام

بعد هذا الصار كله گام الشايب بتعب وگالي : تعال وياي نروح نتمشى ، استغربت وين يريد ياخذني بهذا الليل البارد سألته وين نروح

اصلان : قريب منا بس شيل قمصلتك

همام : طيب

مشى جدامي ولحگته ضلينا نمشي تقريبا طلعنا من القرية الدنيا ليل شتى بارد  كعد على صخرة ياخذ نفس واشر لي اكعد يمه بالظلام

كعدت بلا مبالاة بدون مقدمات سألني :  شنو رأيك بالسمعتة من نجوى ؟؟

همام : اخر همي  منو تحب  ومنو ترفض

اصلان : ما الومك من تگول اخر همي  لأن هذا الكلام  من الأساس ما موجه الك يا همام  وهذا الشي الزين الوحيد الصار من كل هاي الهوسة  .....

فتحت عيوني على وسعهن بدهشة : يعني انت تعرف اني مو حفيدك ...

يتبع ....