.

صوتو ⭐⭐⭐⭐

علقو .....

قصة

اجتياح

الفصل : ٥

الكاتبة ندى البياتي

..........

عزيز : ماجنت اعرف شنو يقصد بالبداية  فما اهتميت لكلامه وانت ما سمحتلي اسألك ولا سؤال 

زيد : شلون راحت من بالي اكيد سهيل اله ايد بختفائه واكيد سووله كمين حتى يتخلص منه، بعد  احجي شگالك يعني شك انت مو نفسه لو شنو احجيلي كلشي بالتفصيل

عزيز : ما اعرف بس كالي احسد قوة بدنك مفعول الحليب مبين بيك بس هو شيقصد بالحليب !

زيد : الهمام يحب يشرب حليب هواي يفضله على كل المشروبات حتى بجتماعاتهم السرية اغلب الموجودين يشربون كحول ومُسكرات وهو يشرب حليب

عزيز .

كتمت ضحكتي جدام زيد وكلت : من صدك عايف المشروبات الغالية والطيبة و يشرب حليب هذا عقله بيه شي

زيد : ليش انت تشرب

عزيز : لا ما اشرب اني بس  الي اعرفه العصابات وتجار الخمور  يشربون هم عايشين عليهن

زيد : اتذكر كلمتي هاي كلش  زين "صانع السم لا يتذوقه "

يعني دير بالك اشوفك سكران بشي مكان  لأن هذا الخطأ اذا اقترفته  راح اني بنفسي اخلص عليك،

عزيز :  يعني حتى  مچعة  ممنوع

زيد : مچعة شنو

عزيز : يعني رشفة

زيد : ممنوع عزيز ممنوع

الكل يعرف الهمام  مايقرب عالمشروبات واذا شربت وكثرت  راح تدوخ وتخرط الأول والتالي وننفضح ويصير كتلنا بلاش

عزيز : مازال بيها كتل ممنوع اتقرب عليهن

زيد: ان  شاء الله

هسة عوفنا من المشروبات  وسهيل من ترجع  نحجي بيه خل اعلمك اشلون تتصرف

وين تكعد

وشوكت تحجي 

وشلون يكون جوابك له 

واهم شي ماتكثر حجي

لأن الحوار بينهم قليل لازم تفهمه من الأشارة

فهمتني من الاشارة لازم تلگفها والا راح تنكشف لأنه ذكي ومايعبر عليه شي اي خطأ يكلفك حياتك

عزيز

من خلال كلامه حسيت بشوية خوف منه لازم اكون حذر  واتصرف بحكمة بس ما ادري شلون اتصرف بحكمة ويا شخص مهرب وعنده ملف اجرامي مليان هاي اذا  الحكمة  طبعاً

وصلنا  للفيلا مالته والحرس مالينها من الخارج دخلت بسهولة محد كدر يكول لي اوگف وين رايح  ومشيت من نفس الطريق الي  وصف لي اياه رفعت راسي حتى اندل الأشارات

لفت نظري بنت بكامل اناقتها  على الدرج ماهتمت لي  واني بالمقابل ما اهتميت الها عايش الدور بحذافيره  اجاني شعور حلو لمن تحس نفسك فد شي مهم والناس تحسبلك حساب  بس ما تمنيت ان اكون مجرم 

بعد ما مشيت على نفس الوصف  طلعت من الباب الخلفي للحديقة جانت جبيرة حيل بيها انواع الأشجار وشجيرات ورد زينة من كل الألوان والاصناف عبالك مشتل باريسي الريحة تطخ بالخشم

مكان اشبه بالجنة على الأرض منظرها خلاب و الحراس متفرقين بكل مكان وكفت بأحترام وشابك ادي قريب منه انتظرت يحجي مثل ما علمني زيد

ثواني ودار وجه علي ينفث دخان الجكارة من حلگه

ادريس : تعال بطلي اكعد يمي

اتقدمت وكعدت على يمينه سألني بدون مقدمات

ادريس : شبيك

عزيز

ارتبكت ما عرفت  شأرد بس بقيت محافض على ملامح وجهي قبل لا احجي اني  هو حجى

ادريس : انت ملاحظ نفسك  حيل متغير هاي الأيام وجاي تسبب مشكلات بايخية

عزيز : اعتذر سيدي

ابتسم لي بطريقة غريبة : انت مو بس صاير تسبب مشكلات انت صاير تنسى هم متگولي شبيك همامي !

عزيز

باوعت له بقلق ماگدرت احجي شي خلاني بالزاوية ما اعرف شأحجي وشأجاوب ابتسم مرة ثانية وخلا الجكارة بحلگه وسحب نفس

_ المهم احجي لي عن الصار البارحة اريد اسمع منك كونك انت الطرف المتسبب بكل هاي الضجة وشنو الخلاك تدخل بهيج عركة وتسبب مشكلة لنفسك اني الي اعرفه انت حذر وماتسوي هيج اشياء تافهة

عزيز

اتنفست بعزم وبديت احجي له كل الصار بدون مبالغة وبدون اضافات

وهو كاعد يصغي ويأشر براسه وياخذ نفس من جكارته وينفخه  ويا كل كلمة اكولهة منظره خلاني احس ان هو كاشفني ويعرفتي دا اجذب بس مع ذاك ما خليت ملامحي تبين علي انه اني متوتر بقيت متقمص شخصية صاحبه لدرجة حسيت فعلا اني هو

القرية .........

همام

فتحت عيوني  على صوت جدال قوي بالبيت ما اعرف علمود شنو  كمت من السرير بحذر حتى لاتتأذي خاصرتي الي ما تشافت لحد هسة ومشيت لحد الباب اريد اشوف شنو هالأصوات العالية

لكيت عدد من الأغبياء واكفين ويا الشايب ويهددون بيه. لو يرجع الهم الدين لو يخلي البيت الهم وهو يحاول يهديهم بخوف

بقيت واكف واتفرج على هاي المسرحية الهابطة وهمة يرفعون صوتهم عالشايب وهو كل الي يكدر عليه يهدأ بيهم

ردت ارجع للغرفة لأن اكثر شي اكرهه هو شوفت شخص جبان يسمح للأخرين يدوسون عليه  بس من حسيت  الكلام يخصني رجعت  وبقيت واكف بالباب

اصلان : كولو له  خل يصبر لي اني ادبرهن انتو تعرفونه متصاوب و مابيه حيل يشتغل

_ ليش ما بيه حيل بكد الثور شنو محد متصاوب غيره قبل ليش وكت المشاكل والضرب كلشي مابيه ومن الشغل تكول متصاوب

ادري بيه يتحجج حتى ماتدزه يشتغل ويانة

اصلان : ليش ماتشوفونه لحد الأن يشكي من خاصرته ما عدكم رحمة ومخافة من الله

_ اكلك هاي مال رحمة وخواتهة ما تمشي يمنا ترجع الدين خيراً على خير ما ترجع الدين هسة نشحطه جدامنا للشغل بدال الدين ونرجعه الك بذاك الوقت واحد يفك الثاني

همام

بقى الشايب ساكت لايكدر يرد ولايكدر يمنعهم اجى واحد بتجاهي يريد ياخذني بالقوة كتله ببرود : شيل ايدك عني

ما اهتم لكلامي ومستمر يضهر عضلاته حتى يجرني وياه

لزمت ايده الي لازمة زندي وبلمح البصر لويتها لحد ما طگت من الألم كام مايعرف شيسوي البقية الي جانو وياه صابتهم خوفة ما كدرو يتقربون شوي وطلعو من البيت كلهم يهددون الشايب الة ياخذون ثار صاحبهم

اصلان : هاي شسويت ماتجوز من طبعك هذا مو اني جنت راح اتصرف وياهم

همام : ماشفتك اتصرفت شفتك بس شوي لا بست قنادرهم

صاح بوجهي بغضب   عزيييزززززز

ابتسمت بوجهه اريد استفزه : طلع عندك صوت،  ديلا اتمرن عليه بلكي تكدر ترفعه على ذولاك الناس الي خلوك تتراجف وماتكدر تسوي شي غير ضام راسك منهم مثل النعامة

عفته ومشيت

اصلان : وين طالع  ارجع لمكانك  ماتشوف ذولا راحو يتهددون اخاف ياذونك على غفلة وانت ماتدري

همام

طلعت وما جاوبته بقيت اتمشى بالقرية لا كوني محمود واخوه 

محمود : هاا ولك هاي شمسوي بالرجال كاسر ايده

همام : و راح اسوي نفس الشي وياكم اذا ما وخرتو من طريقي

مسلم : ادري شجايك القرية كلها كفختها وكسرتهة ماجنت هيج انت

همام : للمرة الألف اكول الكم اني مو عزيز بس عقولكم المحجرة ما تقبل تصدك شسويلكم

مسلم : الله يثبت عليك العقل صاير عندك طخة بعقلك بكد ما كلسع گالب على دور شكل 

كالهة ويفر بأيده بستهزاء  : هاي الحركة لاتسويهة جدامي مرة ثانية

لأن بأي لحظة راح تلگى ايدك مفصولة عن جتفك

مسلم : والله مخبل والمخبل كلشي يسوي هههههه

محمود : ترى ذولا ماينلعب وياهم شرانين ويريدونهة حجة على جدك وراح تأذي اختك بهالتصرفات ليش ماتحس على نفسك

همام : ذولا مو شرانين بس انتو جبناء اكثر من اللازم ومخلينهم يستقوون عليكم

عفتهم ومشيت واني افكر معقولة عايشين هيج بأنقطاع عن العالم بهاي الجولة كل عيشتهم عالغنم والدجاج و الاشياء النباتية عبالك من العصور القديمة كطعت تفكيري وحدة تكرب الهم

اميرة : قبل لاتعبس بوجهي لو تكسرني 

جبت لك حليب قبل شوي حلبت الهايشة علمودك  لأن لاحظت انت حثير  تشرب حليب وهذا عربون صداقة ولو احنى اصدقاء من قبل بس من ورة الأصابة  التحديث الجديد مالتك مخربط وينراد له تعديل وتذكير بأهلك وگرايبك هههههه

اخذت منها الكلاص وكبيته بالگاع وشمرته بعيد بقت جامدة بمكانهة

اميرة : هاي ليش نعمة الله ما يصير تگبها بالگاع البركة تروح والله يحرمك منها

همام : من اريد شي اني اسويه لنفسي منو يكول ما تكونين حاطتلي  بيه سم

اميرة : مستحيل اسويهة ترى اني احبك وما اريد اذيتك شلون تتوقع اخلي بيه سم الك

همام

حجتهة وسكتت تنتظر ردة فعلي بس خيبت ظنها بنظرة مستهزءة

و مشيت من يمهة لحگتني

اميرة : ترى اني  ما اشاقة من كل گلبي احبك بس ما جان عندي شجاعة اگولك وهسة هم ماعندي شجاعة بس كل ما اصير قريبة يمك ما ادري شيصير بية

همام : واني هم ما راح اتشاقة راح احسب للواحد اذا ما وخرتي عني راح  اصفعج كف يخليج تبتعدين عني الف متر وبعد ما تفكرين تتقربين مني مفهوم

بلعت ريجها وراحت من يمي تدردم

اميرة : عوذة  هاي فوگ ما اعترف له بحبي  وساحلة كرامتي عليه  هو الماعاجبه بس بسيطة الا اخليك تركض وراي وتريد رضاي 

همام

راحت ورجعتلي : يعني مابيها مجال تنطيني فرصة والله لأعيشك ملك زمانك بس اقبل بحبي وشوف

نفخت بعصبية وصكيت سنوني : بحياتي ما ماد ايدي على مرة بس اذا ما وخرتي عني راح اخليج تندمين على الساعة الي بقيتي واكفة بيها

اميرة : راح اروح وانت هم فكر لا فد نوب قافلها

همام

بقيت صافن هاي صدك تحجي لو ناصبة علي مثل البقية ومستغفليني

بالليل رجعت لبيت الشايب مالگيت احد دخلت للغرفة هنا كلشي يمشي بملل الساعة ماتمشي ابد يمهم اليوم احسه عمر من عمري مايخلص

بين مغمض وبين مفتح حسيت ايد تندس براسي بشكل مزعج فتحت عيوني شفت اللزگة محمود اكثر شي يسبب لي حالة عصبية  هي لزگته لما يضل مجلب وما يوخر

همام : ايدك وخرهة عني ولاتخليني اللزمك اياهة

محمود : كوم جدك يمنا وعازمينك عالعشى

همام : مو جوعان

محمود : ايا جذاب جنت ما تصدگ واحد يگولك عزيمة گبل تجيت بدون ماتسمي

همام : اخر مرة انبهك اذا خليت ايدك على راسي اكسرهة الك

محمود : هسة غير لو يكوم جاكي شان  هسة ياكلون العشة ومايخلون النا شي

همام : انت شنو ماتسمع حجي كتلك وخر عني ما اريد اجي وياك

محمود : دكوم امي شلون طابختلك ديج جبير  جانت عازته علينا  تگول هذا الديج ما اذبح بس للغالي وهاي طلعت انت الغالي واحنى ولد البطة السودة  عمي حظوظ

همام

طردته اكثر من مرة  بس ما فاد لزگ الة ياخذني واني هم جنت جوعان من الصبح طلعت وما اكلت شي  

اول مرة استسلم لعناد شخص ولو هذا نو بس عناد لزگة ماتنشلع

من دخلت  رحبو بية بحفاوة وسوو لي مكان يم الشايب ويم محمود

جانت اجواء عائلية  بس ما حسيت بأي شي مجرد ضوضاء ولغوة زايدة تطلع منهم

انوب طريقة اكلهم جدا بدائية وياكلون بديهم  بقيت اباوع بوجوهم اريد واحد منهم ياكل بدون مايطلع صوت من حلگه  وصلت لمرحلة ما اتحمل اصواتهم على لحظة وانفجر بيهم

اتذكرت الأيام الي جنا نروح للمطاعم الفاخرة بأحلى بذلاتنا السودة والأنيقة ونختار احسن الطاولات واكثر من نادل يسعي لخدمتنا وين جنت وين صرت  مرات احس نفسي داخل حلم  واريد اكعد منه

نشمية : ليش ما تاكل ترى محمود راح ياكلهن كلهن من جدامك

همام

باوعت لمحمود سد نفسي بالكامل يسوي لگمته اكبر من جف ايده ما عدا الي يوكع منه

اتنهد ونفيت براسي ما اريد حجة محمود وهو يحط اللگمة بحلگه ويلوكهة

محمود : ترى الماياكل يخسر نفسه هنا  ما اكو ثلاجة وتاكل نص الليل على مزاجك

تجاهلته و باوعت بعيون الشايب وكلت : شوكت تجي السيارة مو كأن تأخرت اكثر من المعتاد

سرحان : تجي تجي يجوز عطلانة لو ماعنده بضاعة يبيعها النا هنا لو صار عنده ضرف

همام : وانتو شنو الي جابركم تعيشون هنا مثل البادية

باوعو لي مستغربين من سؤالي بعدين حجت بنتهم اللزگة الثانية

اميرة : مو اگول الكم التحديث الجديد مالته متخربط وصاير ينسي جثير   هو حتى نفسه ناسيهة وبعده متقمص دور الشقاوجي علينا، يكفخ ويكسر بينا

شوف اني احجي لك بلجي تتذكر  احنى عايشين هنا لأن اهلنا بالنضام السابق  جانو مطلوبين للدولة فأمهزمو هنا  

بعد ما لگو  ابيار مي يعيشون بيها و شوي شوي عمرو  القرية وصارت صالحة للحياة  صح اول السنين جانت صعبة مثل ما يحجي  النا ابوي بس بعدين اتعودو عليها وصارت الهم وطن رغم العزلة عن الناس مو صح بابا      

هز براسه بمعنى اي

همام : زين هذا المكان وين بالضبط وشلون وصلت اني لهنا

كلامي جان موجه للشايب بس كالعادة ما سمعت اجابة منه مغلس

اميرة : شلون وصلت لهنا !

غير من حجي بابا اجيت انت وجدك لمن جان عمرك سنة اني جنت ما صايرة بعدني  صرت ورة جيتكم للقرية بجم سنة

بعدين  لگوا  هالمگرودة نجوى بالگماط  مشمورة بالدغل ما ينعرف اصلها من فصلها ومحد قبل ياخذهة لأن بذاك الوكت الناس بالگوة مدبرة عيشتهة وماتتحمل نفر زايد

بس جدك تكفل بيها گال اعوض بيها الراح خطية يقصد ابنه ومرته الي توفو بحادث سيارة وبعدها عشتو ويانا كل هالسنين لحد ماتصاوبت وكمت نتعرف كلشي نسيت الأول والتالي 

محمود : لسانج برنو خوما برنو اسكتي كوم زلم گاعدة وبس انتي التحجين

اميرة : غير اشرح لأن ناسي بلجي يتذكر ويغير طبعه

محمود : حتى لو احنى نحجي ونذكره لسانح اگصه اذا حجتي كلمة بعد

اميرة : مو بكيفك احجي الي اريده

باوعت لنجوى مدنگة وذولا واحد ينطي للأخر يعني هي مثلي ضحية اهل كل همهم غريزتهم وشهواتهم وبعدين يخلفون ويذبون بدون ما يحسبون حساب لأطفالهم

سرحان : كافي دوختونا خلونا نتعشى مثل الناس

اميرة : احجي وياه حسرة اكول كلمة كبل يسكتني

محمود : يا كلمة كولي بكيسي مايسكت

نشمية : شوف يا محمود هاي اميرتنا واذا زعلتهة ياويلك جم اميرة عندي حتى تزعلها وتكسر بخاطرهة

محمود : هاك استلم انوب امي صارت وياهة وراح تشيخ براسنا

اميرة : اميرة و يلوگ لي

مسلم : يلوگ لج ويا المطال والبعرور ههههههههههه

اميرة : هاي حتى انت يابة  احجي وياهم دوم يفشلوني جدام الناس ولايگولون هاي اختنا الصغيرة خل نحترمها ونسوي الها هيبة

سرحان : يلا كافي لا اللزم لثلاثتكم الصوندة واخليكم تسكتون للأبد

همام

سكتو وگامو ياكلون بس نظراتهم بيها تهديد واحد للثاني  

بعد العشى جابت جاي مخليته عالجمر قبل لا تصب جاي  حجة ابوهم

سرحان : هاي تعشينا وجاي نشرب چاي وخل نسولف براحتنا، وخل نحط النقط عالحروف  ابني عزيز ما اعرف شنو الي صار وياك بهالفترة

تراك متغير حيل وجاي تأذي جدك وهو زعلان منك واني اريد اصالحكم حتى تفتحون صفحة جديدة

همام : هسة عرفت ليش هالشايب ساكت طول الگعدة وكلشي ما حجة طلع زعلان

سرحان : اي زعلان منك  لاتنسى  هو رباك وسهر عليك وكبرك وفنى حياته علمود يشوك رجال تشيله بكبرته

بس انت جاي ترد له الجميل بالمگلوب جاي تسبب له مشاكل وتأذيه وتخلي الناس هنا تكرهه بسببك ترضاهة انت هيج يعاملون جدك وهو رجال جبير الناس جانت دوم تحلف براسه ليش تخليهم يسبون شيبته بسبب تصرفاتك العدوانية

همام : والمطلوب مني شنو

سكت من ردة فعلي الباردة ورة شوي گال : المطلوب منك يا ابني تخفف عداوة ويا الناس وترجع ذاك الشاب الطيب والمرح والي كلها تحبهة وتدعي لجده لأن رباه احسن تربية

همام

ما ادري ليش حسيت بالغيرة من مديح هذا الرجال للشخص الي يشبهني  طردت الفكرة من راسي وكلت : بس اني مو نفسه الي جاي تحجي عليه اني شخص ثاني وماتربطني اي علاقة بهذا الشايب يعني نصيحتك هاي لا توجهة الي وجهة لحفيده

سرحان : لاحول  ولا قوة الا بالله

ادري الأصابة مأثرة عليك بس مو هيج يا ابني حاول تتذكر لا تخلي  هذا التمثيل يعيشك بالوهم ارجع لنفسك القديمة

اميرة : لا بابا خليه هيج احلى من گبل دشوفوه شلون صاير جنه العافية

محمود :  الله بالخير ترى گاعدين

اميرة : واذا گاعدين ماگلت شي غلط صدك صاير احلى من گبل

سرحان : على كلًا جدك صح زعلان منك بس مقدر انت  مو بعقلك و مايكرهك بس عدل طبعك شوي لا كل مرة مكسر لك واحد وجايين اهله يريدون حگ منكم مو هيج ابو تميم

همام

هز براسه بس نظراته بعدهن بيهن زعل 

سرحان : شفت ترى سهلة اضبط اعصابك واتشافة كامل واذا عالسيارة تجي وهم ترجع لبغداد لشغلك وهسة كوم بوس ايده واطلب رضاه وعفا الله عما سلف

همام 

فتحت عيوني على وسعهن كل عقله ابوس ايده من شافني مذهول  بوجهه

سرحان : لاتدحج لي هيج كوم خل اصالحكم اريد اكعد الصبح اللگيكم راجعين مثل قبل و احسن بعد

همام

صكيت على سنوني وحجيت بعصبية كوة متمالك نفسي يريدون ابوس ادين لو اضطر اصفيهم كلهم  وما ابوس ايد واحد منهم 

_  خل يكون بعلمك اخلي طلقة براسه وما ابوس ايده

ودير بالك ترجع تفتح هذا الموضوع مرة ثانية لأن الطلقة الثانية راح تكون من نصيبك انت

كمت من يمهم واعصابي واصلة لخشمي يمكن لو سلاحي يمي جان  فرغته بيه على هاي السالفة  كلامهم  رجع لي ذكريات بالكوة اريد انساهة

اتفريت ورة بيت الشايب وكنبزت على رجلي لازم راسي بثنين ادي  ما اريد اتذكر ذيج الأيام ولا ذولاك الأولاد الي جنت ابوس اديهم وهم يتضاحكون بستفزاز

رجعت ضحكهم لداخل عقلي وما اعرف اشلون اطلعه اشلون ما  اضغط على راسي ماتختفي اصواتهم

لمحت فاس قريب مني وفوگ الخشب كمت عالسريع اخذت وصرت اضرب بالخشب حتى اتخلص من افكاري او بالأحرى اقتل افكاري حتى تروح من راسي

كل ضربة اقوى من القبلها بحيث جذع الشجر اتفلش  جوة ايدي  وانفتح جرح خاصرتي وما حسيت  بيه

بعد وين هلكت وشمرت الفاس بكل قوتي بعيد وهويت عالأرض اللهث والدم  يجري من خاصرتي وايدي المطعونة  ما احس بيهة   وجع ذكرياتي جان يعادل وجع جسدي اضعاف المرات

فجأة حسيت بأحد يراقبني درت راسي جانت نجوى واكفة بعيد  تباوع علي بخوف درت وجهي منهة وبعدني اتنفس بالكوة بسبب الجهد الي سويته اجت كعدت يمي جان شبه اكو ضوة ورة البيت

حضنت رجليها وتباوع لحطام الخشب بدون ماتحجي شي

ورة شوي كالت بهدوء مركزة عيونها عالخشب : ياريت لو اكدر اتغير مثلك واطلع كل الكبت العايشته  بهذا الخشب بس ما اكدر اشيل هذا الفاس ثكيل علي 

اخر كلمة كالتهة بضحكة حزينة مسحت ادموعهة  كملت ضحكتهة وكالت : شكلي لازم اتعلم اشيله حتى اطلع الكبت بيه

بقيت على جمودي ما اريد افتح وياهة اي موضوع  ولا اسألهة عن  شي من شافتني متجاهلها  باوعت لي بنظرة  ورجعت راسهة ليجدام

بقينا ساكتين لحد  حسيت بدوخة  تلمست خاصرتي غرگانة بالدم من شافت ايدي ملطخة بالدم  شهكت بفزع

نجوى : هاي شبيهة ايدك منين هذا الدم

نزلت عيونهة لخاصرتي  شافت الجرح مفتوح وينزف

نجوى :شلون ماحسيت بيك  جرحك ينزف كوم خلي يضمدونه الك گوم لاتعاند راح يخلص دمك كوم الله يخليك  لاتعاند گبل لايصير عندك مضاعفات

همام

من يأست من اقناعي اكوم وياهة عافتني وراحت صاحتهم

ورأسا  اجى الشايب ركض وكعد بمستواي  لزم وجهي بأديه

اصلان : شبيك ياأبني ليش هيج اتسوي

ليش تريد تعذبني واني البية كافيني وزايد

همام 

كوموني مسلم ومحمود لبيت الشايب  ضمدو الجرح  جان عقلي بحالة تخدير ما احس على شي

كل مرة يصير وياي هيج  من بعد نوبة الغضب التصيبني  ابقى ساكن لا احجي ولا اتحرك

كظيت الليلة كل شوي گاعد الشايب وحفيدته  ما عافوني ولا دقيقة بقو سهرانين علي

لما جنت انصاب بحالة انهيار رغم البيت مليان حرس بأشارة وحدة كلهم يجون الا اني جنت اگضي انهياراتي وحدي  بدون ما يكون احد وياي ويخفف علي حالتي

حتى زيد  اغلب الأوقات لما يكون موجود مايسوي شي لأنه لو يعرف جان  يواسي نفسه هو هم حياته عبارة عن انهيارات نفسية 

هاي اول ليلة اتخلصت من انهياري بيها بسرعة كعدت الصبح  والشياب ميفارگني ردت اكوم

اصلان : وين گايم ابقى بمكانك

همام 

اتنهدت وكمت بدون ما اجاوبه  رحت للحمام دايخ بسبب الدم الخسرته 

من طلعت لگيته واكف يم الباب

همام : منو خلاك حارس علي ملاحگني  وين اروح وين اجي

اصلان : حالتك مو زينة  لازم ابقى قريب منك جثير  دم خسرت بالليل واخاف تدوخ وتوگع

همام : من اطلب المساعدة منك بذاك الوقت تعال

هسة ما اريد اشوف خلقتك يمي

اجى محمود شايل باگة  كرفس ويدور علينا

محمود : هاي انتو  هنا واني ادور عليكم

تعال عزيز جبتلك شلون كرفس  يخلي دمك يتطافر من شراينك وبعد ما تلحگ عليه يمكن حتى تتبرع بالزايد همين للناس 

همام : هاي شنو

محمود : كرفس  اكله بالعافية

حتى يرجع دمك

همام : وخره عني

محمود : والله تندم اكله وشوف شلون ترجع  لك قوتك احسن من الطبيب والأبرة

همام : عجيب ليش انتو هم تعرفون الطبيب والأبرى

محمود :  شگالو لك علينا جايين من المريخ ما نعرف كل شي

همام : عبالي مثل الأنسان القديم  عايشين حياتكم بالكهوف

محمود : عمي ياكهوف  غير انت ما تعرف شي وين اكو احلى من عيشة البرية والغجر الي ساكنين قريب عن قريتنا والقرى  الباقية كل سهرة يمهم  تسوى ابو المدينة

اصلان : سوالفك خليهن الك ويلا جيب الكرفس ولي على غنمك

محمود : هاي بدال ما ارفه عن حفيدك  وبعدين هو منو علما على دروب الغجر غيره 

انا جنت تائب عابد اخاف ربي  وهو وسوسلي وخلاني اروح الهم وبعدها ادمنتهم

همام

عفتهم يحجون ورحت لغرفتي  لگيت نجوى  همست ويا نفسي هاي منين تطلعون لي كل شوي

نجوى : تعال اتريگ حتى يصير بيك حيل  وبعد ما تسوي هيج وتأذي نفسك حيل  اذيته لجدي البارحة

احلفلي بعد ماتعيدهة وتخلينا نقلق عليك

همام : ما محتاج شفقتكم اكدر اداري روحي بنفسي  مو حاجة احد يداريني

نجوى : على كلاً اكل هسة وبعدين نحجي ...... خليت الصينية وطلعت اعرف وجودي وياه مايخليه ياكل براحته واحنى جنا نتسابق منو ياكل لگم من الصحن  اكثر من الثاني ومرات توصل للعركات بينا عل. اللگمة الأخيرة

كعدت عالدجة بالجول الشمس حلوة  اجتني اميرة تتأفأف

اميرة : اكلج هذا اخوج ليش هيج ايسوي عناد

تصوري البارحة اعترفت له بحبي وكتله مشاعري صادقة وما اتشاقة جان يكولي واني هم اذا  صفگتج راشدي وكسرت سنونج ما اتشاقة

نجوى : اني هم مثلج ما اعرف شبيه متغير حيل ولا ذاك العزيز  الي جنا نعرفه 

اميرة : عبالج اعوفه اببببببببببيد  خليته بالزائد

نجوى : يمعودة عوفيه ولا تحتكين بيه  خل يتحسن مزاجه

اميرة : وانتي شعليج هو انت ماتحبينه بنفسج گلتي اني احسبه اخوي يعني لاتتدخلين بية شأسوي

نجوى

استغفرت الله  هاي اميرة بكلامها هذا گوة تريد تطلع البگلبي واكشف روحي مو زين متحملتها وهي تتغزل بيه جدامي هذا عزيزي اني  بس اااخ حلم صعب يتحقق  بحكم رابين سوة مثل الأخوان

درت راسي غاد  شفت  صاحب المخزن الي نشتري منه علف للدجاج   اجى هو وجماعته بيدهم عصي وناوين على مصيبة جبيرة  الله يستر منها رأسًا وكفت على حيلي خفت على عزيز وجدي هذولا ناوين يكتلونهم

يتبع .....