٠

صوتو ⭐⭐⭐⭐

علقو .....

قصة

اجتياح

الفصل : ٣

الكاتبة ندى البياتي

..........

همام

باوعت للساعة الوقت متأخر  ماباقي غير ساعات على الاجتماع  ولازم اخذ الأوراق الي،جمعتهن للجبير مالنة 

كمت اريد اطلع من الغرفة ما كدرت امشي الجرح عاق حركتي شوي لا وكعت حسيت بيه انفتح  ضغطت عليه  اجو ليمي يساندوني

مسلم : وين رايح ارجع لمكانك 

همام

فلتت نفسي منهم مستحيل اخلي اصابة تعيقني عن الأجتماع لازم اوصل الملفات "للجبير" بأي ثمن والا راح يحسبني وياهم ويضيع كل تعبي  مستحيل اخلي اي حثالة منهم يتشمتون بية

فتحت الباب لفح وجهي هوة بارد حيل الدينا غروب و المكان نائي عبارة عن خرايب  متفرقة شوفتهن خلتني احس انه اني بمكان بس الله يعلم بيه  سألت نفسي اني وين ومن جابني هنا

مشيت خطوات بطيئة من شكل البيوت عرفتها قرية او هيج شي

صار بوجهي شايب متفاجأ من شوفتي ثواني و اجى حظني بلهفة كأنه ممصدك اني جدامه وكام يبجي لزم وجهي بأثنين اديه وكل شوي يسألني عن حالي وعن الصار وياي  دفعته عني بعيد  اكره الناس الي يتصرفون بعاطفة ويسوونها دراما بلا بمعنى  اخذت نفس وحجيت بصيغة امر : دبرو لي سيارة بساع  اريد اروح لبيتي

مسلم : يابيت هذا من شوكت عندك بيت !!

همام

باوعتله بلا اهتمام وردت اجاوبه بس الشايب قاطعني ولزمني من ايدي العدلة وگال 

اصلان : ابني تعال خش جوة الجو بارد نحجي بعدين اخاف جرحك يلتهب

نفضت ايدي منه و دريت عليه بنبرة امر : وخر ايدك عني ، ولا تلزمني بهاي الطريقة 

عفتهم وكمت امشي عشوائي ادور بعيوني عن سيارة ما اكو غير البيوت قديمة بيهن متلازگات وبيهن متفرقات و  وحظاير الحيوانات موجودة ويا كل بيت  بأي مكان من العراق ما اعرف

رجعت لعدهم اريد اعرف اني وين : منو جابني لهنا

محمود: جدك جابك شايفك متصاوب وجابك هنا عالجك

همام

اتقربت للشايب وحجيت ويا بصغية امر : مرة وحدة اكولهة وين تلفوني ومسدساتي

اصلان : عزيز انت من شوكت تشيل مسدس مو هيج ربيتك اني

همام

زعجني كلامه  لأنه تجاهل سؤالي وجاوبني جواب مو يم سؤالي ابد وبدون سابق انذار لزمته من رگبته : كتلك مرة وحدة اكولهة  لاتخليني استخدم وياك غير طرق

اختنگ جوة ايدي  وكام يتنفس بصعوبة اجو بعدوه من قبضتي ودفعوني  حجت البنية بذعر  

نجوى : هاي شبيك شلون تمد ايدك عليه هذا جدك معقولة اتمد ايدك عليه  شصاير وياك

همام 

اللتمو باقي الناس مستغربين اني شلون اتجرءت ومديت ايدي على هذا الشايب وردت اخنگه بعدها حسيت جسمي صار نار بعدني ما حاجي انهاريت بالگاع بدون ما احسن على شي

من فتحت عيوني نفس ضحكات الأولاد المستفزة بأذني ردت اكوم عالسريع بس ايدي اتأذت بسبب القيود لگيتهم مجتفين ايدي بالجرباية  تليتها مرتين ثلاث ما اكو فايدة انزعجت من الوضع اني بحلم لو علم  شنو الي جاي يصير وياي

همام : ااااه  هاي منو مجتفني وينكم تعالو فكوني يا حثالة. منو تجرأ وجتفني والله لأخليكم تتندوم على هذا الشي

اجت لعندي بنية

وكعدت تفك بأيدي وتحجي

نجوى : عزيز گعدت شلونك هسة خوما بعدك مصخن  اجيب لك كمادات لو متريد

سألتها   : منو التجرأ وجتف ايدي هنا

نجوى :  ليش ماتعرف هاي سوالف محمود عود كال ملبوس وجتفك وضل ساعتين يعزم عليك لحد ما جدي طردته من البيت

بس ما فاد كل شوي وجاي يتفقدك ويكول اذا سوى حركات غريبة صيحوني اجيه بالعودة

همام

سحبت ايدي من الحبل وكمت على حيلي : صوتج كطعيه ومرة ثانية اختصري الأجابة بلا لغوة زايدة

دخل الشايب للغرفة يباوع لي ببسمة لزمني من راسي

اصلان : شلونك يا عزيز گلبي اتحسنت خوما تحس بوجع

وخرت اديه من رگبتي : مو شغلك بشنو احس رجع لي تلفوني وسلاحي لو راح تندم

اصلان : ابني اهدأ شوف حالتك من تتحسن نحجي تمام

هسة اكعد بمكانك ارتاح

كولي جوعان تريد اكل

نجوى : اكيد جوعان ابو بطن ليش هو يكدر يضل يوم بلا ما ياكل الأخضر واليابس هسة اسويله  صينية مرتبة

همام : مو شغلك اذا اجوع اولا اكل بالمكان اليعجبني بس رجع لي تلفوتي اريد اتصل بـ زيد

اصلان: منو زيد شتريد منه بهذا الوقت

صحت عليه : وانت شكو تسأل تنفذ الأگولك عليه  بس

غير هذا تگطع صوتك ومتحجي اي  كلمة  فهمت

اصلان : استغفر الله لك ابني شبيك شجاي تحجي منو زيد هذا،  وعن اي مسدس تحجي ومن شوكت صاير تشيل مسدس واني الي اعرفه تكره هيج اشياء

همام

دفعته وكمت اتفتش بالغرفة واضح ذولا الجماعة شاخطين وميفيد وياهم الحجي كلبت كلشي بالغرفة وطشرته

ومالگيت تلفوني بالي ضل يم زيد ما ادري شصار من وراي

باوعت للساعة  الوقت خلصان  اكيد هسة الجبير يتهمني ويا الخونة وبعد ما اكو اي مبرر يرحمني منه و اكيد هسة مطلوب حتى يصفيني وياهم

سألت الشايب بيأس : اليوم شنو !

اصلان : احد

همام : متأكد !

هز راسه بـ اي والبنت هم اكدت كلامه

شلون احد! يعني  اني راجع يوم ورة ! لو شنو متأكد جانت ليلة الأثنين عالثلاثاء قبل لا اتصاوب

رجعت سألته :صار لي شكد متصاوب ؟

اصلان : اسبوعين

همام

صدمني جوابه صار اسبوعين واني فاقد وما اعرف شي عن نفسي ولا ادري شصار وراي ومنو ذولا الجماعة  الي هجمو علي  كلت بسرعة

_ دبرو لي تلفون بسرعة

اصلان : اشبيك ما تعرف ما اكو اشارة هنا وحتى اذا اكو ضعيفة حيل

همام : لعد ليش واگف شتنتظر دبر لي سيارة

اصلان : سيارة هم ما اكو كل اسبوع تجي سيارة تبيع وتروح الي عنده شغلة يروح بيها  ويرجع وياهة

همام

حسيته يستهزء بية لو ماخذني على كد عقلي لأن مستحيل اكو هيج شي معقولة قرية مابيها لا تلفون ولا سيارة  شجاي يصير وياي شنو هذا الكابوس الغريب

لزمته من ركبته بأيدي السليمة   وجريته لعندي صار وجهه بوجهي :  تتسهزء بية حظرة جنابك  هسة تدبرلي سيارة لو هذا راسك يتدعبل من اجتافك بدون اي جهد 

نجوى : عوفه عزيز راح تخنگ اتخبلت انت مو تعرف كلشي هنا المكان مگطوع مابيه اي تواصل

همام

احتقن الدم بوجهه والبنت بعد ما ايست تفكه مني كامت تصيح   حتى اعوفه لحد ما اجو البقية وطلعوه من جوة ايدي

طعناتي خانني والا جنت هذولا الحثالة خلصت عليهم بسرعة وكع بالگاع يتنفس بصعوبة

والرجال الأخر يحجي ويرزل بية بأسم عزيز متحملت صوته وصحت بيه : صوتك اكطعه لا اكطع لك لسانك واخليك تبلعه وانت الممنون

بقو يباوعون لي بريبة مذهولين  من نبرة كلامي  بعدين يأسو مني اخذو الشايب و طلعو من الغرفة وقفلو الباب علي  بقيت مامستوعب  ذولا صدك يحجون قافلين الباب علي وما حاسبين لي حساب بس خل اتشافة واني اعلمهم

نجوى ..

طلعنا جدي مكسور الخاطر من غرفة عزيز الي اتغير جثير  علينا جان يتخبل اذا يصيبه مكروه  وهسة هو  كلشوي يسمعه كلام لو يحاول يخنگه ومايفكر يمكن راح يموت بين اديه

كعد جدي بالگاع لام نفسه ودمعته بعينه اشكد كسر بگلبي الله يسامحك عزيز هيج هانت عليك دمعة جدك بس هم ارجع و اكول اكيد هو مو بوعيه اكيد من وجعه مايعرف شيسوي لو صاير عنده فقدان ذاكرة وما جاي يتعرف علينا 

سرحان : لاتنقهر اكيد هاي من الصخونة والألم مايعرف شيكول وشيسوي هسة بس يتعدل  وتردله عافيته يجي يعتذر منك ويبوس راسك وبعد ما يسويهة هذا وليدك المدلل اكيد مايهون عليه اليسوي بيك

محمود : كتلكم ما صدگتوني هذا عزيز  ملبوس ولازم ينرادله واحد يعزم عليه  وبعدين ياشاطرة فتحت ايده وماسمعت حجي

نجوى

محمود متعصب ويحجي ونظراته علي يعرف اني الي اسويهة رد عليه ابوه : من وين جبت هالحجي

محمود : هي هاي المنطقة مسكونة بس غير متوازين نگعد بيها ما بيها كل شي حتى شبكة الأتصال ضعيفة حيل والا فوگ التلة يلا نحصل اشارة عبالك كاعدين بفلم رعب

سرحان : محمود بوية خيالك الواسع خليه الك. صح مجبورين نگعد هنا. بس الديرة مامسكونة صار عمر عايشين هنا شو لا شفنا شي ولا احد انمس

محمود : وبنت ابو مطر مو هالتشوفهة انمست و هسة عقلها مو براسهة تركض بالقرية. ويومية شاردة لمكان 

سرحان : بنت ابو مطر منين ملبوسة ليش مو تعرف قصتهة لو الا تريد حجة حتى تشرك الجن ويانا روح نام بوية روح نام اني باقي يمهم خل يطلع الصبح ونشوف شبي هالولد وليش هيج يسوي

اكيد الصخونة تخليه يهذي    الأفضل لاتحتكون بيه لحد مايتعدل ونشوف شنو سالفته

محمود : ترى سالفته هذيج هي مبية لازم نجيب له واحد يعزم عليه

سرحان : محمود روح كبل لا اخلي الصوندة تعزم على ضهرك لا عاد تجلبلك بسالفة وبعد ماتفك منها الولد مابيه شي بس شوي هذيان ويروح منه باجر من يصحى على روحه 

محمود : رايح  رايح ديرو بالكم على نفسكم  وانتِ  لاتحتكين بيه  لا يخنگج

نجوى : يابة ما احتك بيه التوبة بعد سيد محمود انوب اسمع حجيك

محمود : اشو تحجينها من فوگ خشمج شني ماعاجبج سيد محمود احجي اشوف

نجوى : اوهو انوب لگاله سالفة يجلب بيها وياي حتى مايروح  عمي سرحان احجي وياه 

سرحان : محمود بوية روح ولاتضل تلح

نجوى

طلع وسد الباب وراه بقينا گاعدين مخلين ايدنا على خدنا ماندري شنسوي له اني هم خفت لا يطلع  حجي محمود صدك ويطلع ملبوس  لأن كرهة النة مو طبيعي

لو بيده يشرب من دمنا وگلبه مايرتاح. بين غافين وما غافين طلع الصبح خليت جدي نايم و وعمي سرحان گبلي رايح لبيتهم يصلي فجر ويشوف حلاله

و اني كمت اخبز عالتنور الطين واشوف الغنم بين مايجمر التنور حتى اكدر اخبز

الدجاج على حطته خامل ما ادري شلون نعالجه اتنهدت بقهر ورجعت اخبز عزيز يحب خبز الحار اكيد اذا شافه راح يتحسن وتروح منه هاي العصبية

بعدما كملته رحت مديت راسي على غرفتة اشوفه نايم لو گاعد. لگيته واگف يريد يلبس فانيلة ثخينه لابس ردن  واحد والثانية صاعبة عليه بسبب طعنة ايده يحاول يدخلها  ومايكدر

صبحت عليه اللتفت لي نفس ملامحه العصبية ورجع يحاول يدخل ايده ويا كل حركة يزم شفايفه ويسحب نفس من خشمه حتى يخفف الألم عليه

نجوى : اساعدك

جاوبني بنتر : طلبت منج اني ؟!

نجوى : شبيك  يمعود  من شوكت تطلب مني

مو اني على طول اني اكوم بواجباتك بدون ماتكول لو هاي هم نسيتها

رد بنفس اسلوبه العصبي : كطعي صوتج  وخري عني

نجوى

ما ماهتميت له واجيت اللبسه   الردن الأخرة حتى لا يبرد  ما اعترض بس نظراته بعدها قاسية كأنه انجبر اساعده حتى يلبس الفانيلة ابتسمت بوجهه وكتله : شوف خلصنا

خوش سويت الدنيا هيج وكت ثلج لا تطلع بالجول اخاف جرحك يلتهب اكعد هنا هسة اجيب لك الريوگ الي تحبه ويا خبز حار  اريدك كله تاكله حتى تتعدل صحتك

ماسمع مني طلع من الغرفة ما ادري وين راح طلعت وراح وصحت عليه : وين رايح الدنيا باردة ارجع

من شفته ما جاوبني ركضت على جدي وگعته فز من على صوتي

نجوى : جدي اكعد يا جدي عزيز مدري وين راح صحته ما سمع مني

گبل گام على حيله. ولبس حذائه وطلع وراه. بدون مايلبس شي على جتفه من البرد  واني رحت لبيت عمي سرحان دكيت الباب عليهم طلعت نشمية واميرة جانن گاعدات

اميرة : خير. نجوى  شبيج من الصبح هيج مخروعة

نجوى : وين عمي سرحان خل يلحك جدي وعزيز

سرحان : اشبيهم

نجوى : ما ادري بس عزيز بدل وما اعرف وين طلع وجدي لحگه اخاف ايأذي مرة ثانية

سرحان : لا اله الا الله

نجوة

يلبس بجاكيته و يسأل منين طلعو اشرت له على الأتجاه الي راح منه اجى محمود جان متجهز حتى يروح يرعى بالغنم وسأل من شافنا مخبوصات

محمود : شكو شبيجن من الصبح

اميرة : عزيز طالع من البيت ومايريد يرجع

عقج حواجبه وكور وجهه  : اشكد حجيت محد ياخذ بحجيي يلا مسلم خل نروح

نشمية : اليوم خل يضل واحد منكم  اخاف يصير شي نعتازكم

محمود : يلا اروح وحدي مسلم ضل هناي

نشمية : الله وياك ترجع بالسلامة اتأكد من زادك لاتجوع يمة

رفع السفرطاس وكال ايانه شلون اروح بلا محبوبتي

نجوى

يحجي ويا امه وعيونه علي بعده محتفظ بهاي السفرطاس الي انطيتها اله مرة حتى مايجوع بالسراحة  حسيت بلجمة بگلبي محمود لهسة بعده منتظرني اقبل بيه بس شسوي لگلبي الختار غيره وطرد كل الرجال منه

دنگت راسي وصديت غاد  حتى لاتبقى عيني بعينه ولا يبقى عنده امل مني ويعرف گلبي مو اله

سلم و راح  يسرح بالغنم وبقينا احنى انتاني جدي وعزيز اشوكت يردون 

نشمية : مسلم ماتروح تشوفهم وين

مسلم : وين اللگاهم هسة

نشمية : هي من كبر القرية ماتلگاهم روح شوف وين صارو

نجوى

بعدهم يتجادلون رجعو جدي وعمي سرحان وراهم عزيز يمشي عبالك شخصية جبيرة فرحت حيل من شفتهم بخير ورحت ركض على جدي اريد اسأله بس مترددة وگفو يم بيت سرحان وعزيز دخل لبيتنا بدون مايحجي شي

نشمية : اجيتو وين رحتو من الصبح وگفتو گلبنا

سرحان : جانت مشكلة صغيرة حليناهة طلع الولد يريد يرجع لبغداد  علمود التمثيل والوضع خابط عليه بسبب اصابته

نجوى

باوعت لجدي حالته زينة بس مقهور حقه ينقهر منو جان يتوقع عزيز هيج ينگلب علينا بيوم وليلة

سرحان : تعالو اتريگو يمنا

اصلان : لا مشكور  تتريكون بالعافية اريد اروح ارتاح مالي نفس

دخل للبيت حيله مهدود  لحكته  : جدي شلون قبل يرجع وياكم

اصلان : ما قبل كتله منا لجم يوم تجي سيارة تبيع وروح وياها للمدينة لأن ما اكو سيارة هنا غيرهة

نجوى : واقتنع

اصلان : اقتنع بس لو اعرف شبيه وشصاير له ليش هيج يتصرف

نجوى : مابيه غير العافية هسة يتعدل ومايضل بيه شي

اصلان : ان شاء الله يابنتي هذا اخر واحد بقالي ما اريد اخسره مثل ماخسرت ابني ومرته

نجوى : لا ان شاء الله ما تخسره ازمة وتعدي هسة اكوم اسوي له ريوك ياكل ويصحصح عليه ويرجع مثل گبل

كمت عالسريع بكل نشاط وسويت له الريوك الي يحبه واخذته له لگيته امدد خشيت واتقربت عليه

نجوى : وهذا الريوك هم جهز وراح ناكل سوى

ولو انا احالفة ما اكل وياك لأن انت كلهن تاكلهن واني بعدني الوك بالگمة

بس ميخالف راح اصوم واكفر عن حلفاني شو اكعد شوي خل احط الصينية خوما احطها فوك بطنك

جاوبني ببرود مستفز  : طلعي برى

نجوى : انوب طلعي برة هاي بغداد هيج گلبتك علينا الله يرحم ايام كبل هههههه

خليت الصينية فوك بطنه اشاقيه  وجان رأسًا يدفعهة غاد ويطشر كل الأكل والستكان بالگاع اتكسرن صوتهن فززني

نجوى : عزيز

همام : طلعي برى وهاي الحركات اذا سويتهة مرة ثانية اكسر لج ايدج

نجوى

كلامه غثاني بالكوة سيطرت على دمعتي لا اغص بيها  اني جنت اشاقة وياه  حتى يتروح منه هاي الحالة بس هو كسر خاطري  لميت المواعين شلون ما جان وطلعت.

فلا احجي وياه بعد حتى لو يجي يعتذر مني حيل كسر خاطري على شي مايستاهل

مر جم يوم والسيارة ما اجت على عكس العادة ولا مرة مسويها گبل وعزيز نفس طبعه وجهه معبس ومايتحاجة ولايقبل احد يسأله شبيه

عازل نفسه بالغرفة حتى تنضيف جرحه منعنة  نساعده بيه ماعدا كل شوي ويجرحني و يجرح جدي بالكلام حرنا شلون نتعامل وياه وشلون نعرف علته

وانا هم زعلت عليه كلت بلكي من يشوفني زعلانة يجي يراضيني مثل گبل جانت اطول زعلة ساعة وحدة ويجي يراضيني ونرجع اصدقاء

بس هسة صار ايام وهو حتى مايتگبلني ومايريد يشوفني ويأذيني بكلامه عبالك عدوته اني

انوب اتهم جدي يجذب عليه وما اكو سيارة تجي لهنا لو ما بيت عمي سرحان واهل القرية اكدو كلام جدي. بس ضلت على رحمة ابو السيارة

بهاي الأيام هواي تأذة جدي من كلامه ماقدر عشرت العمر بينهم ولاقدر هو فنة عمره يربيه ويكبره حتى يصير رجال  وتالي ينكر كلشي ويفضل بغداد علينا

بعد ما يأس منه جدي گاله روح واتركنا بحالنا احنى مو بعازتك  وحسب الله ماعندي حفيد مات ويا اهله

يحجي والغصة خانگته  اشكد قهرني حاله من كل گلبي حقدت على عزيز شكد ناكر الجميل جان كال هذا الرباني وتعب علي خل ارد تعبه

واكفين اني واميرة نشر الملابس عالحبل  وهو طلع من البيت ايده شوي متحسنه بس الطعنة الي بخاصرته تأذيه كل مرة

اميرة : اكلج نجوى ملاحظة هالشي لو بس اني ملاحظته

جاوبتهة واني اشر  : شنو

اميرة : عزيز بيه شي مختلف مايشبه گبل

نجوى : شلون

اميرة : جسمه وصاير عنده عضلات خو هاي نظراته وخزراته تموت

نجوى : خرب عقلج اشكد سخيف احنى بيا حال وانتي كاعدة تتفحصين بيه شبر شبر

اميرة : والله دشوفي شلون جسم رياضي قبل شو موجان هيج

نجوى : احتمال داخل هذا اليلعبون بيه رياضة  وصاير عنده عضلات

اميرة : ايجوز  المهم صاير يخبل لو ما هالطبع الموحلو بيه. بس اني شعلي بطبعه خل امتع عيوني بيه وبجسمه

نجوى : ولج اسكتي لايسمعونج اخوانج يطيحون حظج

اميرة : هسة اني شحاجية دا انطي رأيي بس،  وين حرية الرأي العام مسويتهة ظلمة علي،

بس والله صاير يخبل مشيته  هيبة  مثل الشخصيات الكبار

نجوى : دشري الهدوم قبل لا تروح الشمس

رفعت راسهة فوك وزعجها شكل الغيم : اهووو ، بيها غيم بس لا تمطر

نجوى : المطر خير وبركة اكو احد مايحب المطر

اميرة : اي اني، اذكرج خاف ناسية من تمطر شلون نغرگ والطين يوصل للرگبة ونصير مثل سلابيح الطين بس عيونة تبلبص

نجوى : ما ناسية بس هم خير على هاي القرية المگطوعة احسن من الجفاف

اميرة : اي والله مو كافي جفاف گلوبنا انوب  جفاف الدنيا علينا

كمت اضحك وغميتهة وهم رجعت على عزيز  : بس والله اخوج هذا صاير يطك بالگاع بغداد مسويته اكابري

ولج  اخاف ماسيطر على روحي واتحرش بيه اليوم هههههه

نجوى : هههههه يبووووو هم رجعتي عليه دعوفيه هو مدري شبيه انوب انتي تكملينها عليه والله يلزگج بالگاع ومايگول خطية

اميرة : عليج الله ماتشوفينه شلون يجنن هو من جان مسلوع وجنه بزون منتوف حاطة عينج عليه  انوب شوفي شلون يخبل ماتحطين عينج عليه

نجوى : هاي شنو حجيج ترى هذا اخوي عيب وحرام هيج تتبلين علي

اميرة : عجل ليش رفضتي محمود

نجوى : محمود هم احسبه مثل اخوي كلنا ربينا سوى هنا وما اشوفهم غير اخواني ومالي نفس بيهم

اميرة : هاي هي لعد اني راح اتوكل واحشم الزلم ونروح  نخطب عزيز دام ما اكو شي بينكم والساحة خالية

نجوى : خرب ببليسج انوب  تاخذين زلم و تخطبينه

اميرة : مو تعرفين هالأيام  خبالاته تتطافر منا ومنا غير احشمهم يلحگوني لا يصفگني براشدي و اروح بالخساير

نجوى : ههههههه والله عليج سوالف عوفي عزيز هسة هو بمزاج مايتقبل اي شقى

اميرة: منو كالج اني اشاقة والله حطيته بالزائد الة اخليه يصير الي

بلجي يگلعني وياه لبغداد احسن من هالمكان المگطوع والغنم وريحة البعرور تارسة الخشم ،

لو اكلج احسن شي اخلي اخوي محمود يربطني  خاف اصخمهة الليلة وياه احس بعد ما اكدر لروحي اخاف يصبح الصبح واني بحضنه

نجوى : عزى بعينج ولج اثگلي   كتلج يصير عمل شعبي 

اميرة : ماضل ثگل صار ايام كل ما اشوفه انظر له النظرة المغرية

نجوى : انوب هاي النظرة المغرية شلون

اميرة : ما اعلمج عليهة خاف تسوينها وياه وبعد مايشوفني 

نجوى : استغفر الله  اكولج هذا اخوي

اميرة : لاتزعلين بس جاي  ابوگ جوة لسانج  واشوف ردة فعلج حتى اتأكد ما تنافسيني عليه بعدين

نجوى : تحجين صدك  انتي !

اميرة : لا احجي جذب ترى كاشفتج اني من زمان وذني الدورب مو علي،

اخوي واخوي شسواه اخوج وانتي جابوج من الشارع  اهلج شامرينج بين الدغل وجده رباج يعني حتى ما راضعين سوى حتى يحرم عليج

نجوى

رغم كلامها صحيح بس غثاني هاي اقرب صديقة الي وتذكرني بماضيي المشؤوم والي مو ذنبي ان انولد عند ناس حتى ما اعرفهم وتالي يرموني  بكارتونة  ويرحون والله اعلم اذا جنت  لقيطة لو بنت حلال

كملت شر  الهدوم  وشلت السلة

وخاطري مكسور

اميرة : نجوى ترى مو قصدي

اني  هيج احجي تدريني اجفص بالحجي وانتي هم بزعتيني تريدين تخاوينهم گوى وانتي عاشگة التراب اليمشي عليه

بس مازال  ضني طلع غلط هم بعد احسن  حتى اتمنظر له النظرة المغرية  بكيفي ومحد تحاسبني

نجوى

كملت جملتهة ضربتني على عجسي للشقى  : مو مشكلة  على راحتج اتمنظري له بهاي النظرة المدري شسمهة

عفتهة ورحت  للبيت. شفت جدي واكف يم جماعة بس من شكلهم مو راحة من تقربت عليهم  افترقو  وكلمن راح لدربه

نجوى: منو ذولا!

اصلان : التاجر الي نشتري منه علف للدجاج يريدون دينهم كتلهم علفكم خسرني وهواي دجاج بس ما يقتنعون

يريدون الفلوس واني جنت ناوي من ابيع الدجاج اوفيهم بس شوفت عينج اغلب الدجاج راح منا والباقي خامل

نجوى : شراح تسوي

اصلان : ما ادري بلكت يصبر النة

نجوى : شيصبر النة تعرفه شكد جشع ومايملي عينه شي

اصلان : نحاول اخوج وين

نجوى : توى طلع يتمشى

اصلان : اي احسن من گعدة البيت والنگ مالته انوب عايش دور رجال عصابات ويتهدد علينا وحاسب روحه واحد جبير بيهم ،

الله يثبت عليه عقله هالتمثيل راح يخبله

.نجوى

ضحكت على وصف جدي شلون يصنف عليه وگلت بيأس

:  شوكت  يبطل هذا الدور  ويرجع مثل گبل

اصلان : يرجع يرجع

.....

همام

طلعت تمشى بالقرية انتظر  السيارة الگال عليهة ما اجت  واصلاً اشك بيهم يجذبون مو معقولة عايشين هنا وبدون اي تواصل ويا المدينة ومشين حياتهم عادي بدون اي متاعب 

الجان مضايقني ما ادري شصار هناك حتى تلفون ما اكو  داعرف شنو الصار مع اني متأكد هسة اني من المطلوبين يم جبيرنا والخونة كلهم احرار بدون مااحد يحاسبهم

زين  زيد ليش ما دور علي معقولة قتلوه بعد الأجتماع

لو اتعاون وياهم ضدي  لأن محد يعرف بطلعتي بالليل غيره اكيد بعد ما طلعت خابرهم حتى يبعدوني عن الاجتماع ويگولون هرب لأنه جان ويا الخونة

والمصيبة بقائي هنا مثل المجتف لا ايد ولا رجل ولازم اتحمل ذولا الناس المجانين الي حاسبيني حفيدهم الغبي  رغم كل مرة اوضح الهم اني مو عزيز  ولا اعرفه  بس مصيرين ياخذون كلامي  بدون وعي وبسبب الطعنة

جيت السيارة هي الي راح تخلصني منهم ،

قاطعو تفكيري اطفال يلعبون طبة

_ عمو ذب النة الطبة

ركلتها الهم بدون مبالاة وكملت طريقي لفت نظري طفل صغير  كاعد بعيد يتفرج عليهم بلهفة وهمة يلعبون كعدته ذكرتني بنفسي قبل رحت لعنده

همام : ليش ما تلعب وياهم

_ ما يلعبوني يكولون ابوك حرامي يبوك بيض من الحظاير  ويقلدون علي

همام : لهذا السبب

هز راسه بـ اي

همام : وليش تخليهم يتنمرون عليك !! اذا اتنمرو عليك او عيروك بأبوك تعرف شتسوي

باوع لي متسائل صرت بمستواه وهمست بأذنه : اضربهم وطلع دمهم بحيث  ميكدرون بعد  يحجون وياك ويحسبون لك الف حساب

جحظ عيونه ممصدك الي حجيته له طبطبت على خده وكمت :  سوي الي گتلك عليه وبعد محد يگدر  يحاجيك

رحت ليمهم ولزمت واحد من ايده حيل

_ هاي شسوي عوف ايدي وجعتهة

اشرت للولد وصحته : تعال

اجى متردد وكف يمنا والولد البقية مستغربين شدايصير 

همام : تعال اضربه

بقى جامد بمكانه واضح يخاف منهم ومايكدر يسوي لهم شي   نترت بيه : على شنو تباوع تعال  اضربه

تقدم خايف وضربه على كيفه جان خوفه اقوى من الضربة كتله : عيدها مرة ثانية

عادهة مرة ثانية بنفس الخفة  عفت الولد الجنت  لازمه  وصفعته هو بمكانه وكعته بالگاع لزم خده الصار احمر دم من اثر الضربة  

بقية الأولاد كلهم انهزمو حتى الطبة عافوها  بقى الولد لازم خده ويبجي  رفعته من ياخته

همام : تذكر كل ما تتهاون ويا الي يتجازون عليك ويقللون من قيمتك  راح تاكل هيج صفعة واقوى منها بعد حتى تتعلم ماتبقى جبان  وتاخذ حقك بأيدك

فلتت ملابسه وكع بالگاع  وانهزم مني

رجعت للبيت  ورة شوي اجى ابو الولد الي ضربته يشكي للشايب ولسانه متر يهدد ويتقاوة عليه والشايب ساكت ويبرر

_ حفيدك مايستحي وما مربي  يضرب ولد  عمره ١١ سنة شوف وجهه شلون احمر لو كاسر فجه لو موگع سنونه وين ننطي وجهنا بيه

اصلان : حقك علي ما ادري شبيه حتى احنى ما خلصانين منه

_ شوف ربي حفيدك لو  تكبر الشغلة واسويهة ثار ابني ما جايبه من الشارع حتى حفيدك يتقاوة عليه ويضربه

همام : علمني شلون تكبر الشغلة بلا !!

اصلان : عزيز  لاتتدخل انت خش جوة

_ عيب عليك تتقاوة على طفل  لوجنت رجال تعال واجهني الي  وشوف شراح اسوي ببك،

مو  تواجه طفل ماعندة لا حول ولا قوة

همام : ما شي راح اواجهك الك

وكفت يمه وبدون مايحس صفعته خليته يتفل دم من حلگه

همام : بعد تريد لو اكتفيت

_ انت تضربني بسيطة والله  لأردهة الك و....

بعده يحجي وصفعته مرة ثانية خرس بمكانه

همام : كلمة زايدة منك وتاكل الصفعة الثالثة واوعدك راح تكسر لك فجك وتضل طول عمرك ماتكدر تحجي 

اصلان : عزيز خش جوى الله يوفقك  كافي  تسبب النة مشاكل ويا الناس

گام يدفع بية حتى ادخل   بس بقيت واگف اباوع للرجال  خليته يخاف من نظراتي ويرجع لبيته مذلول.

يلا دخلت للغرفة ناس حثالة يخافون من خيالهم وبس اللسانهم يرعد

اصلان : تالي وياك ليش تعذبني اخر عمري ليش ماتفكر بكرامتي  وليش من الأساس تضرب طفل

همام : اششششش صوتك گطعه

ولا تخليني امد ايدي عليك فاهم

بغداد.......

عزيز

مثل كل مرة جابني زيد لمكان بدون مايكولي اي شي عليه بس هالمرة جان المكان  مثل البار  وبيه شخصيات كبار وناس تلعب ورق وناس تلعب بليارد وناس جاية للفرجة 

ماعدا النادلات الي يتموعن  لرجال المكان جان صاخب جدًا وريحة المشروبات تفوح منه 

التنافس بينهم جان عنيف لدرجة اي شخص يخسر يگوم يسب ويغلط على المقابيل بأفضع الكلمات 

مااستهواني  اي شي بهذا المكان غير بس البنات  عليهن اجسام  تخبل  ويمشن بدلع وغنج  كعدنا زيد بمكان معزول تقريبا عن الكل  ما اشوف اي شي فوكها الكراسي  مسندهن عالي جدا بحيث الا اكوم يلا اشوف  بقيت بس الف براسي حتى اكدر اباوع عالبنات گرصني زيد

زيد :  لاتتلفت مثل الماشايف

عزيز : ااااخ  غير اشوف نعمة الله خلينا نغير مكانة احسن هنا كلشي ما اشوف

زيد : لاترفع راسك انجب بمكانك الهمام جان من يجي هنا يكعد  ومايتلفت

عزيز : وعليش يجي هنا اذا يگضيها يباوع للحيطان

زيد : يجي هنا لأن اكو جماعة كل مرة يتفقون وياه على لعب الورق ويغلبهم ويرجعهم فشلانين ولا مرة اتخلف عن موعده وياهم  حتى يخسرهم ويكسر خشومهم

عزيز : لعد اليوم يومهم يكسرون خشومنا

جاوبني بأستنكار  : ليش !

عزيز : هو اني بالدومنة دوهم يغلبوني انوب بالورق ... 

يتبع .....