.

صوتو ⭐⭐⭐⭐

علقو .....

قصة

اجتياح

الفصل : ١٢

الكاتبة ندى البياتي

..........

قبل خمس وثلاثون عام بعد

وقبل  اسبوع من ذلك اللقاء الغريب بينمها في ذلك الشارع

تميم

رفعت التلفون وجاوبت بلا مبالاة " الو " اجاني صوت اوراس بدون مقدمات گالي

اوراس : تميم شكد تحبني

ضحكت وعرفت من ورة هالكلمة  طلب جاوبته : بگد جنة الله ورحمته كول غالي والطلب رخيص

اوراس : مايغلى عليك شي بس عندي امانة اريد اخليهة يمك انت كد حملها لو لا !!

تميم : افا اكيد كد حملها اصبر لك جبل واحملها  اامر واحنى ننفذ 

اوراس : تعرف المرة الي جنت احبهة

تميم : اي اعرفها

اوراس : قبل اشهر توفت

تميم : الله يرحمهة ويصبر گلبك مو خوش خبر

اوراس : ويرحم والديك  قبل لا تموت وصتني ادير بالي على بنتها لأن مالهة احد غير امهة وهسة ضلت وحدهة

تميم : شنو صايرة من فطر الگاع ما عدهة لا عمام لا خوال لا كرايب تروح الهم

اوراس : اصبر تجيك السالفة

حركت راسي وكلت كمل

اوراس : هي امهة بوقتهة شاردة من اهلها ومتبرين منها ورجلها على حظها جم سنة وميت وضالة هي وبنتهة وحدهن  ما يكدرن يرجعن لأهلهن لأن راح يقتلونهن بس يشوفونهن

تميم : اييي كمل

جر نفس وكال : طلبت مني ادير بالي عليها واني نفذت وصيتها وجبتها لبيتنا بنية مؤدبة وخلوقة تنفذ الي الينطلب مها بدون تقصير ولا اهمال

بس زوجتي ما قبلت بيها فوگ ماسوتهة خدامة يمهة ضلت بس تتعارك وياهة وتهين بيهة جدام الناس  وتعيرهة بأصلهة وكل هذا والبنية ساكتة وضامة بگلبهة

واخير شي تهمتهة بايكة ذهبهة كله واشتكت عليهة بلكوة خليتهة تتنازل عليهة لأن اعرفهة ماتمد ايدهة وتبوگ بس شسوي لغيرة زوجتي عامية عليها. عبالهة عندي شي وياهة بس لأن اني اعاملهة بطيبة گلب وما اريد احسسهة بوحدتهة وخسارتهة لأمهة

بعدين قبلت تتنازل عن التبلغ بس بشرط ما تبقى بالبيت ويانا

تميم : وانت شنو موقعك من الأعراب اذا الأمر والنهي بيد زوجتك

اوراس : موقعي بالخـ*را طامس

كلشي بأيدهة حتى اني لو حطت عقلها وياي حتى اني تطردني

تميم : الله يعينك هذا الي يتزوج وحدة اهلها كلهم بشوات واصلين يصير هو المرة وهي الرجال بس ناقصك تحبل وتجيب ههههههههههه

اوراس : لا تضحك علي ترى واصلة لحدها عندي خاف اخنگهة واخسر حياتي من وراهة

تميم : انصحك لوجه الله تخنگهة وتدخل السجن على الأقل بالسجن ما اكو مرة تنگ براسك

اوراس : هسة انت لا تستلمني تصنيف عود انت صديقي وتواسيني بمصايبي

تميم : هههههه

اوراس : المهم اريدك تدبر مكان زين للبنية مكان ترتاح بيه لحد ما تخلص دراسة اني ما اكدر اخليها بوحدة من بيوتنا ومزارعنا

حتى لا افتح حرب جديدة عليهة وهي مو ناقصهة وهم ما اكدر اامن عليها بغير مكان  فما اكو غيرك يساعدني

تميم : سهلة خل تجي واني ادبر الهة مكان تكعد بيه معززة مكرمة وحتى اخلي الهة حارس حتى لا تصلهة زوجتك الشريرة ههههههههههه

اوراس : يعني موافق

تميم : اكيد دزها دزها بيوتنا جثيرة توسع للكل واذا ما توسعها بيوتتا انشيلهة على راسنا،

واذا تريد انت هم تعال بعد ما أأمن بيك وياها اخاف بليلة سودة وتطردك بطرگ الداخليات وتصير فرجة للعالم

اوراس : هههههه يلا باجر راح اجيبهة اريد اشوف بعد شنو حجة مناهل

تميم : ولك والله اريد اتعاطف وياك واقدر موقفك

بس الضحكة تجيني غصبًا ما علي هههههه يا اخي انت فلم اذا لمرة ماتكدر المن تكدر بعد وما دام هيج ماتكدر تكسر كلام زوجتك شأجاك وحبيت عليهة وتصخمت

اوراس : گلبي الكلب غدر بية وخلاني احبهة واني على ذمة غيرها

تميم : يلا الحمد لله على كل حال انتظرك باجر بس سؤال متأكد هاي البنية مو بنتك !!

اوراس : شگالو لك عندي ناقص

تميم : وشجاب الناقص على سؤالي ايجوز متزوجهة بالسر ومخلف منها مو الا الي ببالك

اوراس : لا لا هاي بنتهة هي رغم هيامي وعشقي الهة بس ما دنيت نفسي عليها ولا فكرت مرة وحدة بيها تفكير وصخ

تميم : اهاا بعد انت رجال تخاف من الله ومن زوجتك واذا توگع بالحرام  تخسر الدنيا والاخرة زوجتك تستلمك بالدنيا وتشويك شوي  والله هم يشويك  بالاخرى  هههههه

اوراس : شهالزمن الأغبر الخلاني اصير صديق لواحد عايش حياتك ينكت ويضحك على جراح الناس وما هامه

تميم : واني اكول منو حاط عينه علي وحاسدني طلعت انت، تدري البارحة ابوي زوعني العافية

حتى ضرب ضربني لأن مامشيت على مزاجه

وانوب سهيل الكلب متشمت

اوراس : ابوك غير نفس العندي

ضحك بصوت وعالي على التشبيه وگالك : عاش حلگك نفس التشبيه بالضبط يول طلعنا اني وانت مهمشين وماندري

اوراس : هههههه النا الله

تميم : ونعم بالله

سديت التلفون الأرضي

ثاني يوم گاعد بسيارتي يم باب العمارة انتظر اوراس يصل هو والبنية الي يريد يخليهة يمي وكلسع اباوع للساعة اتأخرو

ورة وين وكفت سيارته يمي سيارتي ابتسمت له ونزلت صافحته جان شكله مهموم حيل

تميم : انتظرتكم هواي

اوراس : علما وصلنا الطريق طويل يلا بابا انزلي هنا راح تسكنين

راح ينزل جنطتها من الصندوك وهي نزلت ضليت صافن بوجهة هاي نفسها الي شفتهة قبل اسبوع بالشارع تبجي انتبه اوراس علي

اوراس: تعرفها ؟

تميم : اعتقد !

اوراس: هذا استاذ تميم الي حجيت لج عنه راح تسكنين بوحدة من شققه هنا

حركت راسهة بلا اعتراض وسلمت : مرحبا

تميم : اهلا وسهلاً بس ما عرفت شنو اسم الاخت الكريمة !

اوراس : رؤى حسان

تميم : اتشرفنا اختي

رجعت حركت راسهة بايجاب

صحت على الحارس حتى يوصل جنطتهة الشقة الأختاريتهة وانطيته المفتاح

اخذ الجنطة وراحت وياه

اوراس : هاي امانة غالية حافظ عليها

تميم : ليش محسسني مخليها بالمخزن مال العمارة بلا اكل وشرب هاي جدامك احسن شقة اختاريتهة الهة وصيت سعدون شتحتاج يجيبه الهة

اوراس : ادري بيك ماتقصر بس هاي مسكينة ومالهة احد والدنيا كل مرة تكسرها فوگ كسرها

تميم : لا تخاف عليهة صارت بحمايتي طير البلسما ما اخليه يضوجهة وانت تعرفني واصل اي واحد يضوجني لو يضوج الي

يخصني امحيه من الوجود بعد شتريد

اوراس : مو لهدرجة

تميم : ترى حرت وياك

شوف هاي البنت مالك شغلة بيها بعد صارت بحمايتي

اطمن ولا تشغل بالك عليها تكدر ترجع لزوجتك مطمئن البال

اوراس : اروح اشوفهة وارجع

تميم : على راحتك واني هم اروح عفت مشاغلي من وراك

اوراس : ماشي

تميم : بس لحظة تعال انت متأكد هاي مو بنتك !!

اوراس : مو كتلك مو بنتي بنتهة هي

تميم : لعد شعندك صاعد فوگ تشوفهة يلا اخذ سيارتك وارجع لبيتك

لأنه شرعًا لا يجوز تصعد الهة اخاف انوب تتذكر المرحومة وتوكع بالحرام شيخلصك من عذاب الله وعذاب زوجتك

اوراس : هسة كمت اتطبق الشرع براسي خل اوصيهة على جم شغلة

تميم : الطريق كله ما موصيهة هسة يلا اتذكرت اتوصي يلا شوفني عرض اجتافك

اوراس : شلون طلابة وياك روح لشغلك واني اصعد اوصيهة وارجع لبيتي

صعد واني هم رجعت لنادي المصارعة الي تابع لأبوي

هو المدير ماله هو بالنهار نادي مكون من عدة صالات للمصارعة وصالات جيم اله سمعة طيبة بعضها للناشئين وبعضها للمحترفين اجى لنادينا كوم مصاريعين الهم شهرة بالعراق والوطن العربي والهم مشاركات بدول الأجانب

وعلى هذا الأساس كسب نادينا شهرة واسعة والكل يجي عليه حتى يشوفون الابطال الي يحبونهم ويتمنون ياخذون صور وياهم

ما اتذكر يوم من الايام حبيت المصارعة ولا اخذت صورة ويا بطل مصارعة اجى لنادينا عكس سهيل الي يكتل روحه علمود صورة

ويحس بعدهة انه بطل مثلهم

شكد حاول سهيل يحترف الملاكمة ما كدر دائما ينهزم ما عنده قوة كافية يغلب منافسينه رغم ابوي على طول يعلمه القواعد والقوانين المصارعة بس ما يجيدهة ولا تضبط وياه

اما بالليل فيتحول النادي الى مقر  للمتاجرة بالأسلحة الي نشتريهة والي نبيعهة ماعدا تجارة الممنوعات بدون علم الدولة والنظام الحاكم بس ابوي عرف شلون يبعد الشبهات عن الشغل الرأسي

هو ايضًا مصارع ويحب الملاكمة والمصارعة ويحب يتحدى المصارعين الي الهم شهرة واسعة

دخلت للصالة المخصصة لأبوي جان يدرب والعرگ يخر من جسمه وتفكيره كله شلون يسدد الضربة الأخرى وشلون يتفادة ضربة عدوه كعدت عالكرسي اراقبهم وبالي يم البنية الي جابهة ارواس اشلون ماعرفتني وشجانت تسوي هنا قبل اسبوع وحدهة

وهي مو من المحافضة كوم اسألة اجت ابالي واني اباوع على ابوي شلون يتصارع ويا خصمه بكل مهارة لحد ما غلبه ورمى قفازات الملاكمة ونزل ينشف عرگ وجهه بالمنشفة جاب له سهيل بطل مي اخذه منه رشفة  وحاجاني

اصلان : وين صافن

تميم : ما صافن جنت اتفرجع الملاكمة

اصلان : ما ناوي تصعد للحلبة

تميم : بعد وكت ما اشوف نفسي كد الحلبة

سهيل : وشنراد الهة قوي گلبك واصعد

تميم : گلبي قوي وعضلاتي قوية بس  بعد وكت

سهيل : التبريرات عندك سهلة كول مابية خير وفضهة

تميم : بية خير بس ما احب الملاكمة ومو ضروري اثبت لك اني كدهة اولا

اصلان : عوفو  هذا النقاش اليوم سدو النادي من وكت عدنا اجتماع

سهيل : ان شاء الله

اصلان : تميم  اريدك اليوم موجود ويانا اي عذر مامقبول  منك

تميم : صار

اصلان : وبلغو الجماعة حتى يكونون متواجدين ما اريد اي اخطاء

عافنة يخلي المنشفة بمكانهة

سهيل : اليوم ما بيها مجال تهرب لازم تكون حاضر

تميم : خل نحضر ونشوف شيصير

اخذت منه بطل المي الي رجعه ابوي اله شربت منه وانطيتله

وفعلًا قفل النادي واتحول لمقر عصابة اتبدلت الوجوه كلها اغلب الي يشتغلون هنا هم متنكرين بوضائف بالنادي بعضهم مدريبن للناشئين

و لاعبين كمال اجسام

وبعضهم مسؤلين على صالة الملاكمة

وصالات  الجيم

وبعضهم يستدرجون معاميل يشتغلون ويانة بهاي المنظمة السرية طبعًا قلة قليلة تعرف بهذا المقر مو اي شخص بس الي يثق بيهم ابوي والبقية بس يشتغلون حسب الاوامر الي تجي عليهم

الأجتماع جان ويا مجموعة من البرطانيين علمود صفقة بيع قطع اثرية ترجع لمدينة سومر

واجو يشوفونهن تم الاتفاق والمبلغ جان خيالي بذاك الوقت اني جان دوري بس مستمع ابوي هو الي يناقش ويساوم ويقرر

وابد ماينغلب خلا الجماعة مايعرفون شلون يراوغون وياه لكنته الأنگليزية تخليه يبين كأنه امريكي الأصل

صح ما اوافق ابوي بأكثر القرارات بس حيل تعجبني شخصية رجل تاعب على نفسه ذكي مراوغ وما يخلي اي طريق للغلط ولا لأي شخص يتغلب عليه ينفع يكون قيادي تخطيط عقله داهية

خلص الاجتماع واخذو الأثار وراحو عدلت جسمي و رخيت الرباط خنگني

وثاني يوم رجع النادي لوضعه المعتاد ناس داخلة وناس طالعة وعليه رواج ملفت للنظر بحيث محد يصدك بالليل جان اسوء مكان ببغداد

اني ماجنت هالكد مهتم بالنادي ولا بشغل ابوي بس سهيل مايفارك ابوي ولا لحظة

رحت للبيت جدي من بداية الفرع اشتميت ريحة الأهل واللمة الحلوة دكيت الباب القديم وكلت : تستقبلوني  لو ارجع

جديتي شافتني  انفرجت ضحكتهة وبينت اسنونهة

وجدي جان كاعد عالقرويلة بالحوش ويمه جديتي كاعدة بصفه

اللتفت لي يحاول يعرف منو اني

نضره جان ضعيف وما يشوف من بعيد  ومايكدر  يمشي الا  عالعكازة رجال جبير بالعمر زاهد من اهل الله رفع اديه فوك عيونه حتى يركز  علي

_ منو هذا الجاي علينا

جاوبته جديتي بفرحة : هذا وليدنا تميم

حاجاني بوجه ثگيل وبنفس الوقت ما يريد يكسر بخاطري ويفشلني

نجم الدين : تميم، اذا وحدك هلة بيك

واذا  الجلاب وياك  لا هلة بيهم بيتنا مايستقبلهم

رفعت ايدي بستسلام وحجيت بمزاح : وحدي وحدي

اتقربت عليه وبست ايده وراسه وكعدت يمه وانداريت على جديتي هم بست ايدهة وراسهة اشگد احب كعدتهم سوى  

_ الله يخليك النا وما يحرمنا منك

تميم : ولا يحرمني منكم

نجم الدين : شلون خلاك تجي تشوفنا وما عارض

تميم : ليش مايخليني انتو  جدادي ماله حق بيكم، الة

عماتي وين

_ موجودات جوة هسة اكيد يفرحن بشوفتك

تميم : شالسالفة يفرحن بشوفتي اليگول صار سنين مامار عليكم مايطول اسبوع اذا ما امر عليكم

_احنى نريدك دوم يمنا بس شأكول على ابني الهجرنا واخذك منا وشاف حياته

تميم : غيرو السيرة مو كل ما اجي لهنا تعيدون سيرة ابوي السودة ترى ادري بيهة وحافضهة  كلهة  ههههههههههه

نجم الدين : كوله ما راضي عليه ولا راضي على ذاك الجلب ابن الخدامة

تميم : سهيل شعليه

نجم الدين: جلب مسعور  طالع على ابوه عاض اصبع ندم لأن خلفت هيج شيطانين مثل ابني وحفيدي 

بس انت غير عنهم ويا خوفي لا يلعبون بعقلك ويغيرونك وتصير مثلهم

تميم : لاتخاف ميأسين مني

نجم الدين : دير بالك ابني ذولا مغسول عقلهم بالحرام ما يخافون لا من الله ولا من عباده

وعدهم القتل مباح وما اريد يجرونك وياهم

لقاء : هذا منو زايرنا اليوم

وكفت على حيلي بأبتسامة وحظنت عمتي الجبيرة : شلونج عمة

تميم : الحمد لله بخير بعد عمتك توة جنت على بالي كلت ليش مطول علينا

لقاء : اليوم ممنوع تروح تتغدة ويانا

تميم : منو اني حتى ارفض العزيمة بس كون من الا كل الي احبه

لقاء : انت بس أامر واني اطبخ لك كل الي تحبه

اتغديت بيت جدي نفسي انفتحت نفسي عالأكلة ويا عماتي وجدادي كعدة من العمر ببيتنا ما اكو هيج شي واصلًا نادرًا نكون  متواجدين بالبيت كلنة  لذلك اني ما گطعت رجلي من بيت جدي حتى لا  احس بالوحدة من البيت

مرت الأيام و اوراس  كطع اتصاله بية كل اتصاله وية قريبته الي صار عندي فضول اعرف شنو  قصتهة وليش جانت تبجي ذاك اليوم وكأن الدنيا طافية بعيونهة

وبيوم جنت مار من يم العمارة  وقررت اروح اسوي نفسي اتفقدها اذا محتاجة شي وهم اسألهة من باب الفضول

صعدت للشقة ودگيت الباب فتحته لي

تميم : مرحبة

رؤى : اهلا وسهلا استاذ

تميم : اني مو استاذ  عادي صيحيني بأسمي  تميم

رؤى : ماشي اخي تميم امر خدمة

كلت بگلبي لو باقية على الأستاذ احسن باوعت لي بتساؤل تنتظر  اگول شأريد 

تميم : أ جنت مار و اريد  اسأل ارواس على جم شغلة وتلفوني عطل

دخلت للشقة واتجهت للتلفون الأرضي ادك على اوراس حطيت ارقام عشوائية حتى لا احصل الرقم :  شكل الخلل عنده لأنه حتى هنا ما حصلته

رؤى : صدك بس قبل لا تجي جنت احجي وياه عادي

سكتت ادور حجة جديدة : صدك !! شو ما يحصل وياي ؟

رؤى : ما اعرف

تميم : غريب يمكن متقصد ما يرد علي  ما اكو جاي گهوة اي شي

كلت اخر كلمة وكعدت براحة   وخليت رجل على رجل عالقنفة واضح عليهة متضايقة من كعدتي بس ما تگدر تحجي

_ اذا متضايقة من وجودي اروح ؟

رؤى : ياريت لأن الجيران بدون شي ما خذين نظرة سيئة  علي بحكم  وحيدة وكاعدة بشقة وحدهة  وليش ما اكو احد وياهة ومحد يعرف من وين جاية وشنو قصتهة  ويحاسبوني عالطلعة والخشة عبالك 

گطعت كلامها بس فهمت شنو قصدت  كمت من القنفة 

وكلت : ماشي اخذي راحتج

رؤى : اشكر تفهمك للأمر اني ما عندي احد و  اريد اعيش واكون نفسي ما اريد  ابقى عايشة بخوف والناس تتحكم بية

تميم : لا مو مشكلة بس گولي لي من الي ماخذ عليج نظرة سيئة منا

رؤى : الي بصف شقتي كل ما اطلع لو ارجع من  المدرسة يسمعني كلام يكول ترى شغلتج مكشوفة 

مرات تطخ ببالي حتى الدراسة اعوفهة بكد ما يضوجتي صاير حارس بحيث يعرف الأوقات الي اطلع وادخل بيهن اكثر مني

تميم : اهاا

اتوقعت يكون قحطان العرگجي هو الي يسمعهة كلام وهاي مو اول مرة جثير شكاوي  تجي بسببه

بس مانگدر نطرده لأنه جلب وفي لأبوي ودائما يعتمد عليه ببعض المهمات  ولهذا مگعده بهاي العمارة

طلعت من الشقة مالتهة ورحت لباب شقته  طلعت منزعج لكن من شافني رجع لطبيعته وگام يتلوگ لي 

_  اشلونك استاذ

لزمته من ياخته وهمست له

تميم : اللسانك اگصه اذا ترجع تتعرض للناس بكلامك القذر

جاوبني بخوف :  شمسوي اني عبد مطيع الكم  ؟؟

تميم : تعرف  شمسوي  اجت شكوة اخرى  عليك

واذا استمر الوضع هيج اني بنفسي اخلي رصاصة براسك واخلص من قذارتك  فهمتني

_ مثل ما تريد استاذ بعد ما احجي شي

ضرب بطن  ايده على حلگه بمعنى سداه

تميم : انشوف 

عفت ياخته  وعدلت ملابسي جانت رؤى واكفة بالباب ما اعرف اذا سمعت الكلام او لا بس ابتسمت بوجهة بمعنى ما اكو شي. اتقربت يمهة  وكلت

تميم : ادبته الج بعد مايتعرض لج

رؤى : خاف يسوي اك مشاكل

تميم : لا هو  غير لو يگدر  يفتح حلگه بعد

رؤى : اشكرك استاذ

تميم : اوهو هم استاذ ترى اني مو استاذ صيحيني تميم وفضيهة شنو هالرسميات الي تشلع الگلب

رؤى : طيب مثل ما تريد اخ تميم

تميم : عود يعني رهمتيهة  اخ تميم ،

اني رايح واي شي تحتاجينه  اطلبي مني وبالخدمة اني

رؤى :  ان شاء الله 

ضليت كل ما ايصير عندي مجال  اروح ازورهة بحجة اذا محتاجة شي وهي امانة لازم اصونهة لحد ما صارت علاقتنة عادية مابيهة اي رسميات

بس اوراس ماعاجبه روحاتي لعدهة  جنا نحجي اتصال

اوراس : يول لا تكثر روحات الهة  لاتگع على وجهك ومحد يسمي عليك 

تميم : وانت شكو ما دام اني الوصي الجد  عليهة  بكيفي اروح او ما اروح

اوراس : تذكر كلامك  شرعًا ما يجوز تروح عليهة

تميم : هاي شنو كمت تبيع سوالفي علي 

وبعدين  قابل شرايح مسوي اشو كله ناشف بس سوالف

اوراس :  ترى كمت احس كروني گامن يطخن بالسگف

شو تحجيهة طك بطك  

تميم :  هههههه بعدني اشك هاي بنتك وضام علينا عمي ما اروح افتن لمرتك بس بينا

اوراس : مثل بنتي واخاف عليه لاتروح تقشمرهة  مو كافي الدنيا مقشمرتهة

تميم :  اذا مو بنتك  اطلع منها  

ارواس : كتلك مثل بنتي وهاي امانة المرحومة شلون اطلع منها

تميم : الله يرحمهة

اوراس : تميم اني واثق بيك بس ما اريد ينكسر گلبهة  اوعدني ما تكسر گلبهة

تميم : شبيك عمي شو سويهة ادارما علي  ترى كلشي ممسوي الهة

اوراس : مابية شي دا أوصيك عليهة بس

تميم : انت اخوي و صديقي  اتطمن بنتك بحمايتي

اوراس : اهوووو  شلون طلابة جلبت بيهة بيش احلف لك مو بنتي

تميم : هههههه 

ما گطعت زياراتي عليهة  وارواس كل مرة يعيد نفس الأسطوانة  لاتروح ولا تصل هواي وخلي بيناتكم حاجز

بس ماجنت اضن بيوم راح احبهة  واتعلق بيهة من مجرد زيارات واحاديث عادية 

بس وكع الفاس بالراس وحبيتهة رغم جنت واثق من ابوي ما راح يقبل اتزوج من وحدة اهلهة ما معروفين منو وافشله جدام  الناس وهو دوم يضرب بالعالي ويريد حسب ونسب وعائلات بشوات واغنياء حتى يتباهى بيهم جدام الناس مع العلم احنى اصلنا ناس عادين جدي رجال على كد حاله عايش وقانع ببيته القديم. ويا مرته وبناته

لكن ابوي من صغره  الطمع  بالثراء والسلطة خلاه يبتعد عن ابوه واهلة وعن حياة الفقر وحتى يستنكف من الحي الي عايش بيه جدي جان يريد يوصل للثراء بأي طريقة حتى لو يضطر يقتل ويسلب المهم تزيد سلطته ونفوذه

بيوم  بالليل راجع من بيت جدي  للنادي تلگاني سهيل :  ابونا يريدك

رحت للمكتب ماله

اصلان : همزين شرفت حضرتك

تميم : جنت بيت جدي يسلم عليك

حجة بستهزاء لأن يعرف جدي يكرهه بسبب شغله و مستحيل يسلم عليه لو يحجي وياه

_ جدك يسلم علي!!

وعليكم السلام ورحمة الله وبركاته

اكعدو خل نتناقش منا لشهر جايتنا شحنة اسلحة جبيرة ونحتاج مخزن يكفيهة بدون ما تلفت النظر وبنفس الوقت تكون قريبة من عيونا

سهيل : مثل ما اقترحت عليك قبل شوية ، مخزن العمارة كلش مناسب للأسلحة

تميم : بس بيهة ناس ساكنين بالعمارة شلون نفوتهة من جدام عيونهم

سهيل : نطردهم

تميم : وشنو السبب تطردهم من بيوتهم وهم اغلبهم مشترين الشقق بفلوسهم بيا حق تطردهم

سهيل : كوم اسباب اكو و اولها نحرگ العمارة وهم يطلعون منهة بدون مايعترضون

تميم : شنو هالتفكير تحرك بيوت الناس علمود تضم اسلحة بالمخزن مالته

سهيل : واحنى شعلينا !!! تماس كهربائي وحرك العمارة كلهة والناس ماراح تحاسبنا لأن احنى لا بيهة ولا عليهة وبعد ماتحترك العمارة ما راح تنسكن بعد لأن راح انعوفهة مهجورة

وما نجددهة والناس تمل و راح يلگون غير بيوت الهم وبذيج الساعة نكدر نظم السلاح بيها بدون ما احد يحس على شي بحجة نشيل الأنقاض المتروكة  بالشقق

اصلان : صاير خوش تفكر ابن مهجة عجبتني

تميم : بابا عدنا مخازن جثيرة ليش الة مخزن العمارة الناس وين تروح على الاقل انطيهم خبر يطلعون منها قبل لايصيبهم الحريق

اصلان : تريد تجيب النة الشبهة ويعرفون احنى ورة الحريق ما تنطون خبر لأي احد و بالليل تدزون واحد يحرگهة ويطلع بدون ما يترك وراه اثر

بقيت مجتف لا اكدر اغير رأيهم ولا اكدر امنعهم

شنو ذنب الناس الي تموت بالحريق والي تخسر كل ممتلكاتهم ، وانوب الأمانة الي تعكدت لصديقي بيهة

سهيل : شكلت اكول لقحطان يبدي بشغله 

اصلان : كوله كل ما استعجلنا يكون احسن

....

يتبع لازال هناك المزيد .....