.

صوتو ⭐⭐⭐⭐

علقو .....

قصة

اجتياح

الفصل : الرابع عشر

الكاتبة ندى البياتي

..........

همام

الصفعة الضربني اياها خلتني بدون تفكير  اشيل المسدس من الكاع واصوبه عليه جنت مصمم اطلق بدون تردد 

بس خلت نجوى ايدهة على حلگها بفزع و زيد  اتقرب علي  راد يحذرني هاي مستشفى و مايريد احد ينتبه النا لو تصير مشكلة

بينما  اني جنت افور اريد اخلص عليه ومايهمني اي شي

بقى واكف بثبات وما هماه المسدس الموجه عليه بلمح البصر  جراه من ايدي  بطريقة احترافية  وشمره بعيد 

هاي الحركة مالته زادتني غيظ  بسرعة اندفعت عليه وردت اضربه بس كدر يتفاداني وفوگ كل هذا وكعني بالگاع اتقرب مد ايده حتى يساعدني اكف

اصلان : همام  كافي خبال  ما قصدت اضربك بس مو من حقك تريد تجر عزيز وياك  گبل لاتخليني اشرحلك 

نفضت ايده وكفت على حيلي : على شنو نتفاهم كلشي واضح كل  شوفت عينك لو عندك جذبة جديدة هسة اتذكرتها

اصلان : صدگني هو يريد يخلينا نتخارب هو هذا هدفه اني مستعد اوضح لك كلشي بس اهدأ ولا تخلي الغضب يسيطر عليك

همام : واني مستعد اخلي طلقة براسك  وما اسمعك  ... على اصواتنا اجى الطبيب طردنا كلنا لأن جاي نزعج المريض الشايب الخبيث حاول يبقى يم عزيز بس ما سمح لأي شخص  قبل لا اطلع  اتقربت لعزيز وخليت ادي اثنينهن  يم اركبته وجهي صار فوك وجهه بكد ماجانت نظرات تشتعل حقد على الشايب بكد ما هو نظراته جانت ضايعة ومشتتة وكأنه ما مستوعب كل الصار گتله لازم  تختار تصير وياي لو ويا هذا الحقير  الطبيب عاط بية

_  وخر من فوگ المريض جاي تزعجه 

همام

لزمني من جتفي حتى يبعدني من فوگاه ، نفضت ايده من جتفي ولكمته بوكس على خشمه الدم بقى يتطافر منه 

وهو بقى لازم خشمه يهدد الا  يشتكي علي  لأن ضربته  ردت ارجع اكسره بس زيد منعني وسحبني لخارج الغرفة للردهة  نفضت ايدي منه بقوى  وعطت بيه : عووووف ايدييي

زيد : انت تدري بنفسك شسويت 

همام : وراح اسوي ازيد  عباله راح يخلص مني هذا الكلب

زيد خلينا نرجع كبل لا يجون الامن ويحققون وياك

همام : ابن ابوه الي يوصل يمي 

زيد : ولهذا اكولك  روح منا واكعد بالسيارة  واني احجي ويا الطبيب لاتوكع براس عزيز 

ما راد يروح بس جبرته دخلت  للطبيب واعتذرت منه بأدب واحترام على الي سواه همام حتى اسد السالفة  بس الطبيب تكول لگاهة ولية وانهد علي بالتهديدات والا يشتكي عليه يم وزارة الداخلية ويطيح حظه على هاي اللكمة الي اخذهة من همام

اخذت نفس  عميق  الزين بية اني اجر خلگ لهيج نماذج تعبانة بس لسانهة يجعجع وكل خير ما بيهم بعد ما سكت وخليته يحجي البگلبه كله جريته من رباطه وكتله خلينا محترمك وجاي بنفسي اعتذر منك  لاتخليني افلش وجهك كله و اخلي الاطباء يحيرون شيصلحون بيه 

خاف وخنس  وريشه الجان نافشه ولسانه الطويل سكت گبل لا اطلع  من يمه گتله اذا تريد اهلك يبقون سالمين  دير بالك تفتح الموضوع لو ترفع دعوة  علينا 

طلعت من المستشفى وصعدت بالسيارة  لگيت همام  كاعد وينفخ حجيت بستغراب  : طلع جدك اصلان

همام : مو جدي ولا يشرفني اكون حفيده

زيد : اريد اكولك على شغلة عرفتها عنه اقصد اصلان  اني ما اعرفه شخصيًا بس وقت المذب..حة الصارت  اكو واحد بوقتهة  شوفني صورته  وطلب مني اقتله

همام : كتلك مو هامني  وياريتك قاتله من صدگ ومخلصنا منه

......

عزيز

بعد ما طردهم  الطبيب من الغرفة بقيت وحدي الغرفة صارت هدوء مخيف من بعد ماجانت مليانة صياح وشد اعصاب

غمضت عيوني حيل تمنيت كل السمعته كابوس واصحى منه لو مقلب حتى انسى الغدر  مال  سيري

بس للأسف  طلع كابوس من الواقع  ما صدگت جدي الي عشت وياه كل عمري وجنت اضنه احسن جد بالعالم بحنيته وخوفه علي

جنت مخدوع بيه يطلع كل هذا منه  جنت مصدك كل حياتي اهلي ماتو بحادث وجدي عاش كل  حياته  متكفل بية و يبجي على فراگهم ومايكدر يتخطى  موتهم  اني جنت شاهد على كل حزنه من بعدهم

معقولة هو جان يمثل حتى يخدعني ويخليني اكون مجرم مثله حتى يرجع امجاده بية مثل ما گال همام لو هو صدك جان مقهور عليهم

تاهت علي الحقيقة ما عدت اصدگ منو واجذب منو حسيت نفسي اختنگت من هاي الجذبة العايش بيها حتى امي ما طلعت مثل ما اني متخيلها  طلعت  خاينة  ومأذية ابوي  ويمكن حتى ابوي هم يطلع مو خوش

اريد اجذب كلشي اريد ارجع للبداية اريد  انسى كل هذا السمعته   اريد ارجع على احلامي القديمة  لذيج الايام الي كل همي اكعد الصبح واصبح على صورة امي وابوي واطلع اركض ورى طموحاتي واحلامي البسيطة

نجوى

من طردنا الطبيب  من الغرفة وراحو همام وصاحبه جدي خر من طوله  بالكاع ما كدر يكتم حزنه وقهره عليهم  صار يبجي من كل گلبه  خفت عليه لايخربط ضليت اواسي بيه حتى يصير قوي مثل گبل 

ورة شوي مسح دموعه  وگام للطبيب يسأل على عزيز  والطبيب من فوك خشمه يجاوبه جان ضايج من تصرف همام وياه   بقى جدي يتوسل بيه حتى يدخل يشوفه بس ما سمحله الا لثاني يوم يلا سمح  النا

دخلنا على عزيز جانو يبدون الضماد ويشوفون مكان الطلقة  بقينا واكفين لحد ما خلصو يلا اتقربت يمه لزمت ايده بحنان وسألته عن صحته 

نجوى : عزيز  شلونك صحتك  هسة

عزيز 

حركت عيوني بتجاهة عجزت احجيلها عن صحتي جنت شكد راسم خطط جنت متأمل ذيج المرة تطلع امي بس من كلام جدي هي ميتة او بالاحرى مقتولة بالقصر ويا ابوي خليت عيوني بعيون جدي وسألته بنبرة توسل حتى يحجي لي الصدگ ومايجذب علي

عزيز : متأكد امي ماتت !!

اصلان : عزيز خلني افهمك،  السالفة مو مال شد اعصاب وتوتر بس اتشافة اني كلشي احجيلك وحتى اذا تكرهني هم اكرهني بس هسة اتهم بصحتك وعوف كلشي

عزيز : عوف صحتي  بس گولي اي لو لا ، هي ماتت مو

اصلان : ماتت

عزيز

حركت رأسي بأسى جوابه خلاني احس بخسارة امي من جديد رغم  جاي اجذب كلام جدي واكول مستحيل امي تطلع خاينة اكيد اكو خطئ   وجنت متأمل هذيج المرة تكون هي حتى تأكد احاسي  وتكولي جذب ما اكو هيج شي

كافي على غدر سيري وغدر جدي انوب امي

نشكت خشمي وحركت ايدي حتى امسح دمعتي ماگدرت سبقتني دمعتي ونزلت

اتقرب جدي مني يواسيني  : لاتبجي عزيز گلبي يا ريتني اني الميت بذاك اليوم ولا ابوكم 

عزيز :  عوفوني وحدي

درت وجهي عالجهة الأخرى ما اريد اسمع صوت جدي هو هم ما لح علي طلع من الغرفة بقت بس نجوى كاعدة يمي هي هم مصدومة مثلي ما جانت تتوقع يطلع جدي مجرم و قاتل

نجوى : لاتفكر بالصار هو جدي گالك راح يشرح لك كلشي بس تتعدل انطيه فرصة

....

سهيل

من بعد ما عرفت بأبوي رجع لبغداد جنت حاسب حساب يزورني ولو حساب ضعيف لأن اني اخر اهتماماته ويجوز اذا جي بس حتى يهددني بسترجاع حقه مو لأن اني ابنه وصار سنين ماشايفني

وفعلًا اجى لبيتي نفس هيبته ونفس ملامحه القاسية بس الأختلاف هو هسة كبران حيل والتجاعيد مالية وجهه

اتقربت عليه ابوس ايده سحبهة مني بعصبية

اصلان : والك عين يا كلب !

رفعت راسي بكسرة خاطر شكد حزت بگلبي هاي الكلمة الينعتني بيها بس مابينت نفسي مهتم حجيت وياه بثقة بأنه اني احسن منه رغم كل السواه وياي : بعدك نفس طبعك مستصغرني بس

لأن اني ابن خدامة نفسك دنت عليهة

ما جنت اريد منك اي شي بس شوي اهتمام تحسسني اني هم ابنك وابنك الجبير الي لازم تفرح بيه لأن اول خلفتك

بس انت ركنتني بزاوية وكمت تتباهى بتميم لأنه ابن وحدة زنگينة استوليت على فلوسهة وصرت براسهة مال و احوال

وانجبرت تعترف بية حتى امشي لك شغلك

وكل هذا وهم جنت ساكت جنت اضم بگلبي واكول راح يجي يوم يحسسني بالأبوى صرت لك جلب وفي ومشيت كل شغلك وقضيت على انسانيتي وهم ماجنت تشوفني غير ابن الخدامة الي بأي لحظة يطردهة لأنه عدنه الأبن الي يريده ويشيل اسمه ويورثه

شكد جنت ضام بگلبي عليك حقد وكره بس هسة تلاشى هذا الكره لأن انت هسة منتهي حتى ما تستاهل ابلغ عليك الشرطة

اصلان : غلطان اذا عبالك اني منتهي، اني بعدني نفس قبل والسنين المرت ما اخذت حيلي بالعكس زادتني قوة

سهيل : بس حجي والدليل شكلك هسة شوف نفسك بالمراية

اصلان : لو اريد احط راسي براسك ساعة وحدة ما اخليك عايش بس عايفك لمزاجي وخلف الله عالفلوس الي اخذتهن مني خلنك تصير  رجال الناس تحسب لك حساب

سهيل : هذن الفلوس حقي لأن اني الي تعبت بيهن اني الي جنت اخطط وانفذ انت جنت مرتاح ويجيك عالحاضر

اصلان : اني ما جاي هنا حتى اخذ شي منك لأني حلفت ما امد ايدي على فلس واحد من الحرام بس جيت اجيت اسألك سؤال واحد  بس واريد تجاوبني عليه الك ايد بموتت تميم

تميم

وكفت مذهول لحد الان هو يتذكره وماناسيه ويريد ياخذ حقه : لا مالي ايد بيهة مع العلم جنت اتمنى اكون اني الي اخذ روحه بيدي لهذا ابنك المدلل الي كرهني بالأخوة بكد ما جان شايف نفسه وكلشي يجيه عالحاضر على حسابي واني اركض الكم اربع وعشرين ساعة

اصلان : ياريت تكون صادق و ماتجذب علي

راد يطلع من البيت صحت عليه  : حجي شنو ماتريد تتعرف على حفيدتك لو احنى مو من المقام

اندار علية وحجيت : لو لگيت احفادك وبعد ماتعترف بأحد غيرهم

اتقدم لعندي جم خطوة ورفع اصبعه بوجهي  :، دير بالك توصل لحدهم

سهيل : واذا وصلت شراح تسوي !! تقتلني مو مشكلة المهم اخليك تشوفهم ميتين جدام عيونك وما تگدر تسوي شي حتى تخلصهم

اصلان : بس جرب اتأذي واحد منهم  وشوف ،

عبالك اذا جذبت على همام وحرفت الكلام حتى تسوي فتنة بينا  راح نتخارب

لا تحلم بس خل يهدأ الوضع وارجعهم الي  وعيونك تشوف 

....

سيري

ويا دخلتي للحوش شفت رجال شايب طلع من البيت يمشي ومركز نظره علي اعتلت ابتسامتي على وجهي

وسط الغرابة الي اني بيهة لكنه ما بادلني بشي بقى على نفس هيئته وكمل طريقه

وگفت اباوع له لحد ماتخطى الحراس تسائلت ويا نفسي منو هذا اول مرة اشوفه

دخلت للبيت بابا جان متعصب

ماحجيت وياه ردت ادخل لغرفتي وكالعادة استوقفني سألني بصغية امر

سهيل : وين جنتي !

سيري

متحملت وجاوبته بأستفزاز : عجيب شعجب جواسيسك ما وصلو لك الأخبار وين اروح. وين اجي

سهيل : احجي وياي بأحترام  ولا اكسرج وما اخلي بيج ولا عظم صالح

سيري: جنت بأرض الله الواسعة المهم اطلع من هذا الگبر الكابس على روحي

اتقدم علي ورأسًا رفعت ادي احمي نفسي بيهن من بطشه

ظل واكف ماسوة شي نزلت ادي بعد ما حسيت بالأمان

وبلمح البصر صفعني على وجهي الصفعة شوغت روحي بس سويت نفسي مامهتمة لأن هواي ما كلة منهة بقيت اباوع له بتحدي عدلت شعري و غاصبة دموعي ما تنزل  ولا ابين نفسي اتوجعت من صفعته حتى ما يتشفى غليله بشوفتي ابجي واتوسل بيه حتى يعوفني وما يضربني  كتله بتحدي

سيري : لشوكت بابا تبقى هيج تمارس عنفك وياي لشوكت تبقى تعذب بية

ماما ارتاحت من تعنيفك وخلصت اني شوكت الله ياخذني واخلص من عقدك النفسية

لزم فجي بكل قوته وعصره حسيت سنوني راح يتكسرن بين اديه

سهيل : احمدي ربج للأن اني مامطلع كل عقدي النفسية مثل ماتگولين بيج  اعلمج منو ابو العقد النفسية بيج  وغصبًا ما عليج تنفذين كل الي اطلبه منج حتى لو اكولج ارمي نفسج بالنار ترمينهة وماتحجين

سيري : ودا انفذ كلشي الك في سبيل تعوفني بحالي حتى الشخص الي احبه جبرتني ااذي واوصله للموت حتى حضرت جنابك محد ينافسك ويوگف بطريقك

كلامي استفزاه لأن جيت طاري همام وهذا اكثر شي يكرهه لأنه اخذ الزعامة منه وهو جان مجرد شخص عادي يشتغل يمه ضفعني مرة ثانية وجر شعري رفع راسي لفوگ حسيت بفقرات رگبتي طگطكن ويا جرت. الشعر  هنا  دموعي نزلت ماكدرت اغصبهن اكثر

سهيل : غصبًا ما عليج تنفذين الي اكوله انتي بنتي ولازم تسوين الي اكولج عليه بسكوت مثل ما انا جنت انفذ كلام ابوي بسكوت بدون اعتراض

سيري : بابا عوفني كافي شتريد مني بعد كافي نخلت روحي نخل اني شعلي اذا جنت تنفذ كلام ابوك وتسوي كلشي يطلبه منك

كافي كرهت الناس بية ماضل عندي احد احجي وياه صرت معقدة مثلك محد يريد يحجي وياي

سهيل : وين لاگية هيج عيشة حتى تتبطرين عليهة اشكريني بسببي انتي هسة حرة وعايشة بزودي لو ما اني جان هسة معفنة بالسجن بين اربع حياطين

سيري : صح طلعتني من السجن بس دخلتني بسجنك لزمتني من نقطة ضعفي وخليتني انفذ اوامرك حتى بيع بعتني في سبيل توصل للي تريده ومو هامك شيصير بية

سهيل : سيري اصعدي فوگ مالي خلگ اتجادل وياج اذا بقيتي دقيقية وحدة اخلص عليج

صعدت ما ردت اعصبه اكثر لأنه راح يأذيني بدون مايحس

ذبيت جنطتي عالسرير بعصبية وهويت بالگاع خليت ادي على صدغي و استسلمت للبجي لشوكت راح تبقى جوى رحمته شوكت اخلص من تعنيفه ياريتني ما خفت من جواسيسه  وانهزمت ويا همام مثل ما اتفقنا....  سكتت اريد اصحح كلامي ... بس حتى ذاك طلع مو همام جان مستغل شكله ويضحك علي واني الغبية مصدگة اتغير علي وكام يحبني

بس على الأقل جان حبه صادق احسن من همام الي طول حياته يحب ايذلني مثل بابا بس لأن عاش حياته مذلول ويريد يطلع قهر حياته بية

كله من ايدي  غدرت الشخص الي حباني من صدگ بدون ما يفكر بمكانتي ولا بمكانة بابا ولا بكل القذارة العايشة بيهة  حتى ارضي بابا

مسحت دموعي وحسمت امري  على شنو اني باقية عبد*ة وخايفة منه هو اول تالي راح يقتلني لأنه مايكدر يتخطى الماضي  ولا يگدر  يسامح ابوه وكل هذا اني راح ادفع ثمنه

اني ما مجبورة ادفع ثمن غلط مو غلطي لازم اتحرر منه  لازم يسامحني حبيبي وننهزم سوة لمكان محد يگدر يلگانة بيه وطز بهمام. وبـ بابا  وبالكل

......

المستشفى

اصلان : عزيز ليش ماتحجي لي منو الي حاول يقتلك

عزيز : شنو الفايدة اذا كتلك

اصلان : شنو مالك احد ياخذ حگك والله اجيبه من جوة الگاع واخليه يتندم لأن فكر يأذيك

عزيز : ما شبعت قتل و ذنوب !!! حتى ترجع لنفس الطريق علمود تاخذ حقي

اصلان : لعد تريد اشوفهم يأذونك و اسكت

عزيز : كافي دم جدي ،

حقي ما اريده لأن اني انطيته بلاش ، جان لازم اسمع كلام زيد  وما انجرف ورة  عواطفي ويا هيج ناس عايشين بهذا المستنقع

اصلان : منو هذا زيد وين تعرفت عليه وهو يعرف منو راد يأذيك !!

عزيز : ما يعرف ما اريد احجي بهالموضوع سده

اصلان : مو بكيفك تسده احجي وياي منو الوصلك لهاي الحالة

عزيز : اني وصلت نفسي  وكاف بعد لاتفتح هذا الموضوع لأنه جاي ياكل بگلبي مثل العث جاي يذكرني اشكد جنت حمار واثول واستاهل الصار بية

اصلان :  هذا هو ما افتحه بس اهدي  ..... ردت اغير الموضوع .... اكلت لو تريد اجيب لك، حتى تشد حيلك

عزيز : ما اريد ما اشتهي

اصلان : شلون ما تريد لازم تاكل ابني 

عزيز : روحي انسدت من الحياة الأكل بيش يفيدني

اصلان : لا تخلي ببالك احجي اي شي حتى لو تعاتبني لو تحملني الذنب كله بس لا تبقى ساكت وتضم  بگلبك

عزيز : شيفيد العتاب وشترجع السوالف اني بس الي قهرني عشت بوهم اشوف امي

اصلان : يا وهم هذا  اني مو كايلك هم ماتو من زمان

عزيز : بس ما گلت ما گتلي الحقيقة  ماگتلي شلون ماتو وليش

اصلان : ما ردتك تتأثر بالماضي ردتك تعيش  حياة جديدة انت واخوك بعيد عن كلشي  ماردتكم تصيرون ضحاية لناس يكرهوني وينتظرون الفرصة حتى يأذونكم بسببي

بس اخوك  مثل الملح ذاب اشگد دورت عليه حتى اجمعكم سوة كل هاي السنين ونعيش سوة لحد ما كمت افقد الامل منه  بس الله ما ضيع تعبي ودعائي حتى اللگاه

بوقتها  جنت رايح لبغداد على امل اللگيه مثل كل مرة بس سمعت صوت طلقات قريبة بالشارع الي جنت اسوق بيه ماهتميت وبقيت اسوق لحد ما شفت سيارة بنص الطريق

وكفتها ونزلت اتأكدت من مسدسي حتى اذا كمين اكدر ادافع عن نفسي اتقربت للشخص الي جان امدد بالگاع بخطوات بطيئة وحذرة وايدي على خصري حتى اسحبه بساع واحمي نفسي لا يطلع كمين 

بس لمن وصلت لجهة راسه شفته بس ابد ما خطر ببالي هو كل عقلي جان يمك عبالي انت حتى نسيت اخوك  لأن ماجنت متوقع اللگاه بهالسهولة

هويت عليه ولزمت وجهه اكعد بيه : عزيز . عزيز منو سوى هيج بيك عزيز اكعد ابني

رجعت لنفس اليوم المات بيه ابوك وبقيت اتوسل بيه حتى يكعد ومايموت ويعوفني  

خليت ايدي على نبضه مامتوقف بعده عايش اتفحصت مكان الطلقات الي بأيده مو هالكد مكانهة حساس بس الي بكلاته جان وضعهة خطير ولازم اتلاحگ له سحبته بالسيارة واخذته لعند طبيب جنت اعرفه من زمان ما جنت متأمل اللگيه بنفس البيت الي جان  عايش بيه

بس قنعت نفسي اذا ما اللگيه اكيد اللگي ناس يدلوني عليه 

دكيت الباب وانتظرت دقايق

طلع هو ، مثلي العمر هالكه وماخذ كل حيله من  من شافني اتفاجأ صدفة ما جان متوقعهة ابد ولا حتى اني جنت راح اللتقي بيه يوم من الأيام

حسام : اصلان !! هاي بعدك عايش

اصلان : محتاج مساعدتك  اكو شخص  متعرض لأطلاق ناري واريدك تسعفه

حسام : ليش ما ما تاخذه للمستشفى احسن منا 

اصلان : ما اثق بأحد 

حرك راسه و لبس نظاراته ولحگني للسيارة

باوع له ورجع باوع لي سألني ببرود  : منو هذا !

اصلان : حفيدي

ماحجة شي فتح الباب وتساندنة ودخلناه للبيت مدده عالسرير وطلب من ابنه يجهز عدة الجراحة

اصلان : حسام انقذه واي شي تطلبه  اعتبره صار 

حسام : بس طلبي مستحيل يصير. ....اللتفت لي وحجى بدهشة .... ما جنت اعرف هيج الدنيا دوارة قبل سنين طويلة جنت اني بنفس مكانك وتوسلتك تعوف اخوي وما تقتله بس ما سمعت مني اخذت روحه جدام عيوني وعفت عياله يتيتمون ويضلون بحسرته 

وهسة انت جايب حفيدك حتى اعالجه قبل لا يموت

ردت اخذه من عنده اكيد ما ناسي الي سويته بيه ويريد هسة ينتقم لأخوه على حساب همام  واي ثانية تمر تنحسب عليه

منعني منه  وگال : عوفه، اني مو مثلك مازال جبته لعندي وطلبت مني  اعالجه راح اعالجه لأن هذا واجبي كطبيب  ولازم اادي واجبي بكل انسانية و اساعد كل المرضى الي يلجؤون لي بغض النظر عن الخلافات الي بينا  

لكن هذا مايعني اني مسامحك  ولا مري لك الذمة عالسويته بأخوي

جاب ابنه العدة الطبية الي موجودة عدهم بالبيت 

ورموه الجاكيت و القميص الابسه وخلاهن بيدي

خلا مخدر على مكان الجرح گامو يطلعون الرصاصات بكل سهولة وخيطو الجرح

كل هالوقت واني ابد ما عبالي اخوك الي ادور عليه لحد ما وگعت المحفضة بالگاع رفعتهة وشفت اسمك واسم ابوك يختلف حتى العمر وتاريخ الولادة والسكن كلشي يختلف عن بطاقتك الشخصية وگعت المحفضة من ايدي ورجفت شفايفي  بقهر عرفت هذا اخوك الضايع

صح جنت متمني اللگيه وارجعه لعندي بس مو بهالطريقة  مو بعد كل هالسنين اللگاه ملوث اديه بدم الناس  و ماشي بنفس دربي

وشايل ذنوب يمكن اكثر مني  قاطع تفكيري حسام : احنى سوينا العلينا بس لازم تاخذه للمستشفى لأن الطلقة مزقة اوردته ومسببة ضرر

اصلان : ان شاء الله راح اخذه  ساعدوني اخذه للسيارة

سندوه وياي وصعدوه بالسيارة وهو متخدر مايدري بشي  بمجرد ما سديت باب السيارة شخطتها وطلعت حتى عالمستشفى ما رحت لأن ابن حسام جان واضح الحقد بعيونه وينتظر الفرصة الي يريد يخلص بيهة علي  وديته للقرية احسن مكان ابعده عن الناس بيهة

عزيز  

مرت ايام وشوي بديت اتحسن بس گلبي كلما اتذكر طعنت سيري وجدي يوجعني جدي راد مني اجي وياه للقرية ارجع للمكان الي انتميت و عشت  بيهة  كل حياتي بس اني رفضت

عزيز : اني باقي هنا ما اريد ارجع

اصلان : وين باقي هنا وشلون اطمن عليك وعلى اخوك  سهيل متحلف بيكم  يريد يأذيكم حتى ينتقم مني  مو كاف اخوك راكب راسه وما يسمع مني

عزيز : وشتريده يسوي  يمكن انا الغبي الي لهسة واكف وانطي  واخذ وياك بعد كل السمعته منك

اصلان : راح يجي يوم وتفهمني 

عزيز : على شنو افهمك هو كلشي توضح   ع العموم ايجوز يجي يوم واسامحك  بس هسة حتى ما اكدر حتى  اباوع بوجهك لأنك ستغليتني كل هاي السنين وعيشتني بجذبة جبيرة

اتقدمت لجنوى وحظنتهة  : ديري بالج على نفسج

نجوى : ليش ماتجي ويانة والله گلبي ماينطيني اعوفك هنا  ولا گلبي ينطيني اعوف جدي وحده الله يخليك تعال ارجع ويانا بلا عناد بالي راح يضل يمك

عزيز : لاتخافين علي شراح يصيرلي اكثر من الصار واذا جاني الموت يا هلا بيه خل ياخذني خلص بعد ما عندي شي اعيش علموده

غصيت بكلامي  شلون هيج مستلسم يريد يموت  : اسكت اسكت حمار شلون گلبك ينطيك هيج تكول مافكرت بية لو اني مو من اولوياتك

عزيز : هو بس انتي بقيتيلي اختي الصغيرة وصرت اتمنى اموت قبل لا اخسرج بهاي الحياة 

نجوى : والله تبقى حمار طول عمرك وماتعرف تحجي ليش تخسرني ترى اني راح اضل لازكة على گلبك ما اعوفك  واريدك ترجع ويانا

عزيز : اذا تريدين ابقي انتي يمي شلج بذاك المكان المگطوع

نجوى : ياريت  بس اما اكدر اعوف جدي  وحده  كل شخص اله ماضي  ما اكدر احاسبه على ماضيه وانكر  افضاله الي قدمهة الي كل هاي السنين حتى انت مايصير تنكر افضاله هو تاب من ماضيه ليش ما تقدر هالشي وتحاول تتفهمه على الأقل تسمع منه

عزيز

ضحكت مجاملة  نجوى تربات جدي مستحيل تنطي بيه  سويت خروج على مسؤوليتي  وطلعت جدي ماقبل جان يريد بعد ابقى اتعالج  جرحي حرج

هو مايدري جرحي ما يوجعني  اليوجعني هنى ذكرياتي الجنت مخدوع بيهن وذني لو شما احطلهن دوة مايطيبن

وصلوني للشقة مالتي  بعدها محد مأجرها وبقو يمي  بس اني حبست نفسي بغرفتي وقفلت الباب  خليتهم وحدهم من راحو يلا طلعت من الغرفة

ورة يوم اجت خالتي جايبتلي  صحن عدس

_ فرحت من گالو لي رجعت شنو خلصت المسلسل

عزيز : اي خلصتهة  خلصتهة

شافتني حزين ومهموم  ويمكن ماتعرف اني متصاوب  واني هم ما حجيت الها حتى لا تنقهر علي

_ ليش حزين مو جنت فرحان لأن راح تمثل وتحصل دور مثل ما جنت متمني

عزيز :  منو گالج ما فرحان بالعكس بس تعبان  بس ارتاح ارجع مثل گبل

_ اي اكل العدس وراح ترجع لك صحتك

ضحكت بألم : ههههه والله مشتاگ لصحن العدس مالتج اشكد جنت اتبطر عليه ونفسي تلعب منه

_ يااااه ليش اني هم مطيتك قبل شو ما اتذكر

عزيز 

كمشت عيوني وگلت هم نست  ولازم اعيد الهة من جديد  بس  قاطعتني وگالت : اني اروح وانت ارتاح  مبين عليك تعبان نحجي بعدين

عزيز

ما جاوبتهة وخلينهة على راحتهة  طلعت من الشقة ورة شوي دگ الباب اتوقعتهة هي اكيد راحت تجيب لي عدس ورجعت

رحت فتحت الباب واخر شي جنت اتوقعه اشوفهة گبالي ...

يتبع