ذو الوجهين

صوتو ⭐⭐⭐⭐

علقو .....

قصة... اجتياح

الفصل : الاول

الكاتبة ندى البياتي

..........

"عندما تخون ثقتي

اهرب فقط ولا تتوقف ،

لأنني اذا امسكت بك فستتحول حياتك الى جحيم "

فلاح

جاثي على اركبي ع الگاع الباردة كمت ما احس باطرافي من الخوف. والبرد جسمي يرتعش بقوة واسناني تصطك بعضها

بؤبؤ عيوني يتحرك بلاشعور ما اعرف على شنو ادور حتى اخلص نفسي من من هاي المصيبة الي وگعت تفسي  بيها

ادري ماراح تكون نهايتي ولا راح اشوفهة اعرف راح يخليني اتوسله حتى يخلص علي ويستمتع بتعذيبي  على هذا الخطئ البدر مني

يلعن ابو العوز الي خلاني اشتغل يم انسان مريض نفسي مادري شنو الهدف انه يحب يشوف الناس تتعذب جدامه ويزهقهة على نار باردة ويتلذذ بريحة الخوف الي تطلع منهم

والصفة الأسوء عنده لازم يكون التعذيب جدام الكل حتى ياخذون عبرة من القبلهم وحتى محد يفكر يخونونه

فلاح : ابوس اديكم ابوس اديكم حرروني اريد اشوف ابني قبل لا يدخل للعملية ابوس ايديكم

حجيتهن بشهكة ولعابي يسيل من حلگي وياه خيوط دم بسبب الضرب الي اكلته منهم مقيدين ادي ليورة

وعيوني مفتوحة متعمدين ما يخلون عصابة عليهن حتى اشوف كلشي جدامي و يزيد الرعب عندي

محد جان اكو بالغرفة احاجي روحي،  عسى واحد منهم برى  يسمعني و يحن گلبه علي ويهربني بس اشوف ابني عمليته خطرة واحتمال قليل بنجاحهة اخذوني من المستشفى وجابوني لهنا بسبب غلط مامقصود

رغم جانت هاي اغبى فكرة افكر بيها لأن مستحيل احد يكسر كلمة الهمام لو يفكر يلعب بذيله من وراه اذا على غلط صغير راح ادفع ثمن حياتي بس جنت اريد اي وسيلة حتى اقنع نفسي بأن راح اشوف ابني قبل لا يموت

رجعت بجيت واني اتذكر ابني و عائلتي منو الهم من بعدي اختي منو الهة سكتت و ركزت بسمعي على خطوات تتقدم نحوي جابت الرعب لگلبي على وقعاتهة

عرفت هو اجى غمضت عيوني ما اريد اشوف الي راح يصير وياي

مرة شفت الي يسوونه ويا واحد باك منه فلوس ضليت اشهر اتجافل من المشهد

انفتح الباب ودخلو جماعة اتحلقو علي واحد منهم خلة جنطة عالميز وفتحهة كام يطلع بالأدوات بگلب ميت جانت عدة تعذيب حجيت بتوسل ورعب عسى يفهموني للمرة الأخيرة

فـلاح : مو ذنبي هم باكوها مني اني ما خنته ولا اتجرأ اخونه

_ لك فلاح هيج بسهولة تعض الأيد الي سوتك رجال وثقت بيك خليتك من المقربين عندي وتالي مهمة بسيطة تروح تتعاون ويا اعدائي ضدي

فلاح

زحفت ليم رجليه مخلي شفايفي على حذائه اتوسل السماح منه

فلاح : سيدي مو ذنبي هم سوو لي كمين انت تعرفني شكد امين وما اخون الأمانة

لزم شعري ورفع راسه لمستواه

_ كمين صارلك عمر يمي، متعلمت شلون تكون حذر وماتخلي احد يسوي لك كمين

فلاح : سامحني غفلت هالمرة جان تفكيري بأبني المريض

دفع راسي لغاد و اشر لصاحب الجنطة يبدي عمله وياي

فلاح : ابوس ايدك سيدي سوي الي تريده بس خليني اشوف ابني اخر مرة

ما اهتم لتوسلاتي الكل يباوعون علي واني منهار محد بيهم يكدر يسوي لي شي

فجأة اجى صوت من الباب كلهم اللتفتو وراهم انفتح الباي و دخلت اختي تصيح عليهم واتسب بيهم حتى يعوفوني هاي شجابهة هنا  يعني حتى اذا جان الهم نية يعوفوني بعد ميعوفوني بسببها

_ ماتستحون على نفسكم لك انتو و رجال انتو،

تشوفون هذا الرجال يضربون بيه واكفين تتفرجون

روحو زينو شواربكم احسن الكم عارات قشامر

انوب عاطت على الحارس الي يسحب بيها حتى يطلعهة

_ وخر لك لا هسة اللزگك بالگاع

شنو السواه اخوي حتى هيج تسوون وياه ....رفعت سبابتهة تهدد بيهم .. هسة هسة تحلون اخوي لو اسويها عليكم ضلمة واخلي الداخلية كلها فوگ راسكم واديحكم ورة الشمس  مخا*نيث كبر لفكم اي والله

فرگ همام بين عيونه بعصبية شلون هيج تحجي وياه وبدون سابق انذار  لكم الحارس الي جان واكف برة بمؤخرة المسدس خلا حلگه ينزف

والحارس رجع وگف جدامه بخضوع بدون مايگول شي رجع ضربه مرة ثانية ما كدر يبرر له موقفه حتى لا يا كل ضربة ثالثة

_ شلون اامن على حياتي وياك اذا مرة فاتت و عبرتك وانت واكف ما سويت شي الهة حتى تمنعها من الدخول وفوگاهة واكفة تتجاوز علينا بكل صلافة

_ سيدي

كبل لا يكمل ضربه وكعه بالكاع ما كدر يكوم اللتفت لأختي واني احجي بگلبي اكول ولج سكتي يا خبلة ذولا مو اولاد الشارع حتى تحلين عليهم لسانج وتشيلين الهم ماسحتج وتهددين بيهم ذولا عصابات والي يگع جوة ايدهم ما يطلع عايش

بقى ينتظر تخلص اختي كلامهة لكن من شافهة ماسكتت كللهة بنبرة امر

_ هيييييي صوتج گطعيه

_ كطيعة التگطعك كون شكدك شكبرك مجتف اخوي وتتقاوة عليه ولك هسة اذا اني تلاويت وياك اللزگك بالگاع

زيد :شنو امصدگة حالج فوگاهة تريدين تلاوينه

_ شني انت مجتف اخوي بس لأنه جان يشتغل ويعيش جهاله ابنه بيه فتحة بالگلب ويريد فلوس عملية

هو لا بايك فلوسكم ولا يعرفهن هو رضة يشتغل هالشغل القذر بس حتى يعالج ابنه المريض

قبل يعرض حياته للخطر 

احجي ضميرك لو واحد من اهلك يمر بهاي الحالة وانت ما عندك فلوس حتى تبعد عنه الألم وتشوفه حاله حال البقية عايش ومرتاح

ومو تسوي اي شي حتى ماتخسره ، حتى لو ترمي نفسك بالنار علمودهم بس المهم هم بخير وما يتألمون مو اتسوي اكثر من هذا

لك على الأقل بس خله يشوف ابنه قبل لا يدخل للعملية

زيد : وفري هاي الدرامة لأنها ماتمشي ع الهمام

قاطعه بعد ما اخذ نفس وزفره

_ لحظة زيد كلامج بيه وجهة نظر وراح افكر اعفو عنج وعنه

ارتخت ملامحها بأبتسامة عميقة على تعاطفه وياهة وشكرته  بينما اني بقيت مصدوم اكيد دايدبر الها كمين 

_ اني مو محتاج شكرج تعالي اتقربي ليمي

اشر الهة بمسدسه بكل هدوء ما قبل العاصفة اتقربت مترددة خطوة ورة وخطوة جدام وهو كاعد نص كعدة ع الميز ملامحه الباردة جانت تنذر بشيء مخيف تمنيت اكدر اكوللها لاتتقربين هذا ماينحزر اي شي

صارت قريبة جدًا عليه لدرجة كامو يشوفون انعكاسهم صورهم بعيون بعض

مد ايده لرقبتهة وضغط عليها كلت خلص راح يخنگها بثواني بدون ما تقاومه

لكن بلمح البصر قرب راسهة لتجاهه باسهة من شفايفهة جدام الكل

كدرت تبعده وضربته راشدي صفگت وجهه صفگ وعلى اثرها كل الرجال الموجودين بالمخزن وجهو مسدساتهم عليها ينتظرون اشارة منه حتى يملون جسمها رصاص

بذيج اللحظة ماضل عندي اي امل ببقاء اختي على قيد الحياة كلت خلص راح يصفونة اثنينة بنفس اللحظة

زيد

ماتوقعت راح يغير رأيه بهاي السهولة رغم كل تعاليمي له وما لازم يكسر اي قانون منهن ويمشي حسب الأتفاق

والأدهى من كل هذا ما ادري شخطر له من طلب منها تتقرب عليه حتى يبوسهة

بس جانت ردة فعلها غير متوقعة بحيث صفگت وجهه بنفس اللحظة كلها وجهت مسدساتهة بوجها وهذا الشي اوتماتيكي لازم يصير بدون اي امر لأن الهمام

على طول يكول لزلمه الي يمد ايده علي كائن من يكون فورًا  يتصفى بمكانه

والي يشوف و يغلس عن حمايتي راح  يتصفى هو هم

لكن الي صار جان راح

يخسرني كلشي وينكشف سرنا جدامهم

بعد ما الشخص الي ماخذ دور الهمام لحد ما يرجع هو هم رفع اديه بأستسلام من الخوف

بعد ما شاف كل الأسلحة تصوبت عالبنت وهو واكف يمهة

كدرت اتلاحگ الموقف و ضربته من ورة برجلي على رگبته حتى ينتبه  وينزل اديه لايفضحنا ويحسون اكو غلط بالموضوع

اشرت له يطلب منهم ينزلون اسلحتهم بسرعة ويسجنون البنت واخوها حسابهم بعدين

نفذ الي كتله عليه وسجنو البنت ويا اخوهة وجريته حتى نطلع من المخزن بسرعة لأن الوضع اتخربط وعزيز شوي لا كشف نفسه جدامهم

عزيز

قبل اسبوعين جانت حياتي مختلفة تماما حياة مليانة مشاكل جنت اضنهن اسوء مشاكل بالعالم بالنسبة لي

بس لو جنت اعرف شنو الي راح يصير وياي وشنو الي راح اشوفه جان حمدت الله الف مرة على مشاكلي السابقة الي جانت زلاطة عن كلشي صار وياي وعلى البناية التعبانة وعلى الشقة الي جانت بس بالأسم شقة بس مجبور اكعد بيها لرخصها و اتحمل ازعاجات صاحبهة والجيران الي ما يوم سكتو من الصياح بيناتهم

رجعت من عرض الأداء خايب بعد ما رفضو انطوني فرصة اثبت مهارتي جدامهم انطو الدور لشخص كل موهبة ما عنده مجرد بالون منفوخ متباهي بالجمهور الي يطبل له

ع التواصل الاجتماعي

وهمَ هم مستفادين من جمهوره حتى تصعد مشاهدات المسلسل براسهم

دخلت للعمارة الدنيا طالعة من عيني دا اصعد الدرج  عود ليش رفضوني ماعندي اي تقصير اني ممثل بالفطرة كل الأدوار اكدر ااديها بسهولة بدون تشنج لو ارتباك

شفت  جارتي العجوز بالگوة تصعد الدرج بيدها علاليك ثگال  ساعدتهة واخذتهن منها بالبداية فزت مني بعدين هدأت

_ اااه يمة اسم الله ادري يا ابني غير تسوي صوت تتحمحم  وكفت گلبي عبالي حرامي يريد يجفت علي

عزيز : هههههه اعتذر ردت اساعدج بالعلاليك انطيني اشيلهن عنج

_ لا لا اخاف تصير زحمة عليك

عزيز : لا حجية زحمتيش المن صايرة  جارتي اذا ما اساعدج واوصل لج الأغراض

_ الله ينطيك الصحة والعافية ويحقق البالك

عزيز

ابتسمت بوجهة احب دعائها لأنه طالع من گلبهة واتفائل بيه حيل شافتني ضايج

_ ما انطوك دور مو ؟

عزيز : الا ما ينطوني بعدهم مامقتنعين بموهبتي من يقتنعون يغيرون رأيهم بية وراح تشوفين

_ ان شاء الله يقدرون تعبك ينطونك دور لخاطر جدك خطية وحده بالقرية و اكيد يشتاگ لك وهم يريد واحد يعينه ويصرف عليه حسب ماكتلي رجال جبير بالعمر وما يكدر يشتغل ويعيش نفسه

عزيز : اختي هناك وياه وهو بعده بصحته تكول شاب ملتهية بحقل دواجن يشتغل بيه وعايش منه الحمد لله

_ الله يحفضه و يخليه الك  وما يحرمك منه

عزيز : امين

_ اختك الي وياه متزوجة

عزيز : لا بعدهة

_ هي شسمهة و شعجب ممتزوجة لهسة ؟؟

عزيز

صفنت بوجهة عرفت نست كل شي وراح ترجع تعيد كل الأسالة من جديد لأن  كل ما اتلاگة وياهة اعيد الهة قصة حياتي وبالمرة الثانية من اللاگيها ناسية كلشي وهم ارجع اعيد 

عزيز : ما ادري اكيد لو تلگي الشخص المناسب تتزوج

_ ان شاء الله تتزوج بس هي شسمهة

عزيز : اسمها نجوى

_ عاشت الأسامي الا ما كتلي اهلك شعجب تاركينك هنا مايطلبون منك ترجع يمهم وتشتغل هناك احسن من هذا الشغل الي مابيه فايدة

جريت نفس : مو كتلج اهلي متوفين من زمان وجدي هو الي رباني من جنت بالگماط

_ هاااا اي كتلي ، گتلي

خطية الله يرحمهم

صعدت درجة وكفت تسألني

: همَ امك وابوك شلون ماتو !!

عزيز : جدي كال حادث جانو طالعين زيارة والسيارة مكلوبة بيهم ومتوفين

_خطية  الله يرحمهم

الله حفضك انت  واختك وما رحتو وياهم والا جان هم رحتو بالحادث

عزيز

بيني وبين نفسي كلت ياريت لو رايح وياهم جان خلصت من هاي الدنيا الماتسوة شي بلاهم بس ماحجيت

صعدتلهة العلاليك وانتظرت تفتح الباب دخلتهن للمطبخ ردت اطلع

_ اوكف يمة اشلون مسوية شوربة عدس البارحة وضميت حصتك اعرفك تحبها

شكرتهة مجاملة لأن شالعة گلبي بالعدس ماعدهة غير اكلة بس عدس راحت للثلاجة واجت بيدهة صحن جبير قدمته لية

ابتسمت بوجهه واخذته

_ اكله كله فوائد يفيد جسمك

عزيز : تسلمين

اخذته ونزلت لشقتي بالطابق الأرضي خليته عالطباخ الصغير

مددت على القنفة مالي خلگ كلشي اسوي اريد اغفى كاعد من غبشة علمود الأداء وتالي بح طار مني

اجى على بالي جدي اشلونه هسة وشجاي يسوي الشبكة ضعيفة حيل يمهم والأتصال بالكوة احصله صار عشر ايام ما سامع صوته اخاف يتخربط و يحتاجني

بعدني توة غفيت كعدت على سمفونية الشقة الفوگاي ام هشام واولادهة الي ماتخلص ابد تصبح عليهم كل العمارة تسمعهة وتالي تكول ما اريد صوتي يطلع

ام هشام : ولكم ولد المطي كافي تتراكضون بالشقة مو راح تنهجم علينا ،

اشو انزلو جوة الله لايشوف ابوكم خير بحياته من قشمرني وخلفتكم

ولك انت الأدكن الثور الجبير اكعد شوكت يصير براسك خير امشي نزلهم  وجوة

ولكم خبلتوني من الصبح بس انضف وراكم

ارحموني اريد ارتاح شوي،

اريد بس يوم اكعد واللگي الشقة نضيفة مامگلبوبة ومحيوصة

المن مسوين المنتزه اذا انتو مگابليني وگاعدين

امشو نزلو جووووووووووووووووة.

لا تخلون صوتي يطلع جدام الناس لا اجيكم بالماسحة انعنعكم  ولكم ولد المطفي بس اجيكم اشلع اذانكم واشمرهن للجلب مال ابو العمارة

نص ساعة حالة حلگهة عليهم تالي مااسمع الهم بس مراكضهم عالدرج وهي تركض وراهم بالماسحة حتى يطلعون من الشقة

حمدت الله لأن سكتو وكلت خل اغفى شوي انوب صاحب الشقة الي بصفي اطرش مشغل التلفزيون كل صوته عالأخبار والصوت يرگع بالعمارة كلها

وكل مرة الساكنين بالعمارة يهدون عليه حتى يوطي صوته يزعجهم بس مايفيد هم يرجع يعليه حتى يسمع شيذيعون بلأخبار

اخير شي خليت سدادات بأذني ونمت

كعدت العصر الباب اتفلش من الدك كمت طاير فتحته اجاني ابو الشقة

_ عاش من شافك حظرة الممثل

عزيز : اشكرك خالي

_ تخلخلت اضلوعك كون نايم الشفية  ولا يكول الدنيا طشت رشت اشوف شكو ماكو احد صار ست  ايام ينتظر رزقه

عزيز : خير ابو خيري

_ خير!.  هو اني من شفتك لا اني ولا عمارتي شفنا الخير يلا ورق الأيجار بسرعة بسرعة بسرعة اي اعذار ما اريد كل الساكنين هنا ينطون الأيجار بالوقت المحدد الا انت تخليني اركض وراك ايام يلا احصلهن منك وهم نصهن ملزگات

عزيز : هاا ، الأيجار الأيجار مو انطيتكياه قبل شهر شنو ناسي

ضحك نفسه كوة وهو شايط غيظ مني يضرب على جتفي بخفة واني مبتسم بوجهه مثل الاهبل: هه هه هه هه هه عود صاير دمك خفيف و تصنف وما اخذ الدنيا برحابة صدر على كولتك

بعد ما خلص حجي اتكور وجهه وانگلبت خلقته شوي لاتحول زومبي من العصبية عاط بية

_ جيب الأيجار بساع لو شوفني عرض اجتافك يلااااااااااااااا

عزيز : بس خل افهمك

_ ما اريد اسمع شي لو الأيجار لو المفتاح هذا اخر كلام عندي قفلت هيج مأجر يشلع الگلب ما اريده حط جوة كلمة ما اريده عشر خطوط  عريظة حتى لاتنساه

عزيز : ما تريد السرگي لأن باب الشقة مابيه مفتاح بس سرگي مزنجر صوته يكعد الميت

لزمني من جتفي يعت  بقميصي واني اتمايل جوة ايده بكد ما صار عصبي 

_ اكلك لا شايفني اخذ وانطي وياك

وجاي تاكلني بالكلام

الك مهلة لباجر اذا دفعت الأيجار خيرًا على خير ما دفعت الايجار

اني بنفسي ادفعك من الشباك انت وسلاباتك (ملابسك) واخلص منك الف واحد يتمنى هاي الشقة

عزيز: صار

_ باجر اريد المبلغ كامل

عزيز : ان شاء الله

صفك اديه ببعض وگال : اريدهة من الله ماتجيب الأيجار حتى اطردك واخلص منك دشوف شمسوي بالشقة ماليهة صور ممثلين

الحيطان كلها مزرفها ومبهذل احوالهة

ولك ليش اجرتهة الك مثل اللوز وتالي هيج تسوي بيها

عزيز : مو اليسمع مأجرلي شقة بسان فرانسيسكو وحاسبهة علي لوز وتبجي بحالهة

_ شأحسبهة احسبهة المهم ما اريد اشوف جهرتك  اذا ماتدفع الأيجار

عزيز: قابل كاعد على گلبك تريدهة من الله تطردني والأيجار قابل ماكله عليك مو كل ما يصير عندي انطيه بس انت طماع تريدهن مرة وحدة

_  فوك ما هنة تفاليس انوب تگطمهن علي تگطم بس اريد اعرف  منين طلعت لي انت

منو داعي علي بيك

عزيز : اسأل نفسك

_ اسأل نفسي مو بسيطة باجر نتواجه

طلع ورگع الباب وراه ورجع فتحه يحجي بعصبية : باجر بالعشرة يا الأيجار يا المفتاح

عزيز : شلون مشكلة هسة هذا شلون اقنعه ما عندي ادفع الأيجار رجعت كعدت عالقنفة مابيدي حيلة شكلي راح اطلع باجر منها قبل لا يجي ويفتح وياي نفس المحاضرة ابو كرش

لبست حذائي وصعدت للحجية

بالكي تدايني لحد ما الله يفرجهة علي

ما اريد ارجع للقرية بدون ما محقق حلمي و اصير مضحكة جدام اصدقائي واني بدون شي مستلميني اكس مربع

_ والله يا ابني ماعندي فلوس بس تكدر تبقى يمي لحد ماتضبط امورك

عزيز : هو هم هيج

_ باجر جيب ملابسك تعال يمي مايكدر يحجي وياك بوجودي

عزيز : الله لايحرمني منج

_  اتفائل تفرج ماتضل هيج

عزيز : ان شاء الله

_ الا ماكتلي انت منو اهلك !!!

عزيز : استلم هم رجعت نست ولازم اعيد الهة شجرة عائلتنا من البذرة للرأس

ثاني يوم نفس الشي كعدت على رگع الباب فتحت عيوني وباوعت للساعة بعدهة ثمانية ونص  شكل صاحب الشقة حاط عقله وياي

كمت متكاسل احك بشعري واتثاوب  واكوله راح اطلع من الشقة خل يتگشر بيها

فتحت الباب وبسرعة رجعت قفلتها وسندت ضهري عالباب حتى احمي  نفسي لايفتحه علي  اخر شي توقعته انه اشوف هذا  الرجال الي

اداينت منه فلوس وكل مرة اتهرب منه وبعد مابيهة مجال يعوفني بحالي صاح علي

_  لك اطلع اليوم ترجع الفلوس لو اكسر الباب عليك افتحه

عزيز : لك هذا شجابة هسة علي منين طلع لي شلون ورطة جنت بوحدة صرت بأثنين

بقيت ساند ضهري قوي  عالباب حتى لا يدفعه وهو يدكه مثل الثور واذا وكعت بيده اكيد ايسويني ميت وصلة ومايرتاح گلبه بكد ما اجلت الدين عليه

تالي عفت الباب وركضت للشباك افلت منه قبل لا يدخل علي ويعلسني ومن يروح ارجع بعدني ما فاتح الشباك حتى انهزم كسر الباب ودخل يصيح علي

على حظي انوب لازم ادفع فلوس الباب اخاف جنت ناقص ديون من شافني اريد انهزم كال

_اوكف وين تروح مني اليوم والله لأسحلك اليوم واطلع الفلوس من خشمك  اوكف اگولك

ما سمعت له  رميت نفسي من الشباك وانهزمت بس ابن الحلوة ما استسلم لحكني واضطريت اركض حتى لايلزمني اليوم ناوي لي نية سودة

زيد

جاي اسوق بالسيارة وكع التلفون من ايدي بكد ما اتعصبت واني اتصل بالهمام ومايجاوب

هاي اول مرة يسويها ويقفل تلفونه ويعرف اليوم لازم يكون موجود عالموعد والا راح تنگلب القضية  عليه اذا ما وصل الملفات بوقهتن للجماعة

نزلت راسي حتى اخذ التلفون من جوة الكشن واتأفأف رفعت راسي وبسرعة وقفت السيارة  على اخر لحظة

زين ما دهست واحد بنص الطريق مدري منين طلع لي

وكفت السيارة وبقيت صافن بوجهه وهو كبل راح يركض حتى مانتبهلي نزلت من السيارة عالسريع وصحت عليه

زيد : هماااام هماااام اوكف وين رايح همام

بعدني اصيح عليه شفت واحد اعصابه واصلة لخشمه يركض وراه رأسًا صعدت السيارة ولحكتهم. واني اتسائل معقولة همام ما تعرف علي !!

لو ماشافني زين منو هذا الي يركض وراه و مو معقولة همام يخاف وينهزم من واحد بدون مايكسر راسه وهو المنمون

بعدين ضيعتهم ما ادري وين راحو وكفت السيارة على جهة ونزلت اتلفت بكل مكان وين اختفو ما ادري وين امشي وبيا اتجاه اروح

صفكت ادي بيأس رجعت اتصلت عليه خارج  التغطية

بعدني اريد اسب واغلط عليه  لمحتهم اجو يتراكضون من يمي   عبرني بدون ماينتبه لي

وذاك الرجال بعده ما واصله خليت التلفون بجيبي ومن تقرب مني لزمته ورگعته بالگاع اغمى عليه

على صوتنا كف همام مستغرب من عملتي يتنفس بالگوة اتقربت عليه انفض بأيدي  ما باقي بية حيل مثل قبل

جنت اتصارع ويا اقوى واحد بدون تعب وهسة ماباقية عندي ذيج اللياقة

زيد : همام شصاير وياك ومنو هذا ؟؟؟ ليش يركض وراك

جاوبني بأستنكار يحاول ينضم نفسه : منو حضرتك !

رجعت خطوة ليورة عرفته مو همام بس الشبه فضيع بينهم

راد يروح يكمل طريقه وگفته

زيد : اوكف لحظة بس شوي اني زيد  صاحبك !

وكف والتفتت علي يريد يعرف شأريد منه جمعت افكاري وخليت ايد على صدغي والثانية خليتهة على خصري اريد حجة ابقيه بيهة بدون مايشك بية وكتله :: شنو ما عرفتني ...

حرك راسه بـ لا

زيد : معقولة  زين اذا مابيهة زحمة تعرفني على نفسك چني شايفك من گبل

زادت دهشته : بس اني ما شايفك گبل

زيد : لاتفهمني غلط بس شبهتك على واحد صار عندي فضول اريد اعرف ليش هذاك الرجال جان يركض وراك

حجة بلامبالاة وتعب : جان. جان يطلبني فلوس و اني ما عندي حاليا وضطريت انهزم منه

اللتفتت يمنة ويسرة شفت كافترية قريبة كتله : تعال اتفضل اعزمك على عصير شكلك ميت عطش من الركض

ما اعترض هز راسه واجى وراي كعدنا بالكافتريا وطلبت عصير له كام يشرب بيه

اجت على بالي خطة ماجنت ضامن راح تنجح بس ضيق الوقت خلاني اتمسك بيه سألته ليش مطلوب وشيشتغل والي ريحني كال هو ممثل ايدي ادوار بس مامحظوظ للأن ما لاگي مخرج يقبله

زيد : يعني انت صدك ممثل! لو هيج سوالف

شرب باقي العصير ورجع الكلاص : اي ممثل اعجبك بالتمثيل

زيد : زين اذا انطيتك دور تكدر تأديه بكل سهولة لو متكدر

عزيز : طبعًا اكدر جربني وشوف

اجيد كل الأدوار تريد اجرب لك هنا اذا متصدگني

زيد : لا لا ما اكو داعي مصدگك

عزيز : بس شنو هو الدور هذا وبأي مسلسل

زيد : هو مو مسلسل

عزيز : مسرحية

زيد : ولا مسرحية

جحض عيونه مستنكر كلامي

: لعد شنو هذا الدور، !!!

سحبت نفس وجمعت ادي خليتهن عالميز ردت اوصل له الخطة بختصار ماردت اتعمق بيها وافضح كلشي : شوف هو دور على ارض الواقع كل الي اريده منك تقنع جماعة بأدائك وتسلمهم امانة مقابل عشرالاف دولار امريكي

عزيز

بلعت ريجي  بدهشة بعد ماسمعت بهذا المبلغ الي مستحيل احصل مثله بحياتي حتى لو ابيع كل اعضائي بعدين تضاهرت مامهتم بالأمر ويمكن تكون كاميرة خفية ناصبين علي وما اريد اتفشل وتالي اصير ترند للميمز كلها تضحك علي

گلبت عيوني بكل الأتجاهات اريد اشوف وين مخلين الكاميرات بدون ما ابين نفسي منتبه عليهم اريد اكون طبيعي وحذر وذكي حتى اعجبهم

يمكن من هذا المقلب راح انعرف و اصل للنجومية بسببه بس يحتاج اشغل عقلي بدون اخطاء رحت اسرح بخيالي وعقلي كام يفكر بكيفه شلون اتصرف وشلون ابهر اصحاب الكاميرا الخفية

شافني الرجال اضرب اخماس بأسداس اني وعقلي الباطني وخصم الأمر حط جدامي جنطة سودة شكلها مريب من شفت الجنطة خرطت العافية واتلاش كل افكاري بأن هذا مقلب كاميرة خفية

يمكن يكون ارهابي ويريد يورطني بتفجير او ماشابه

عزيز : هاي شنو الجنطة !؟

زيد : لاتخاف الجنطة بيهة اوراق محتاج توصلهة لأصحابهة

ردت اتعامل ويا الموقف بذكاء وما ابين نفسي خايف منها

_ شنو اليثبت لي هاي الجنطة مو مفخخة وتريد افجرهة على ناس ابرياء مثل مانشوف بالتلفزيون

زيد : لا لا وين راح عقلك مو مفخخة ابد

فتح الجنطة جدامي وگلب بالأوراق مابيها اي متفجرات شوي حسيت بالراحة وبسرعة قفلهة وسحبهة عليه

زيد : هاي الجنطة والأوراق اذا ما وصلت بالوقت المناسب راح تصير كارثة راح يقتلون صاحبي الي هو من الاساس مدري وين اختفى

عزيز : يعني بس اوصل الجنطة لأصحابهة وهاي هي

زيد : صح وتحصل العشرتلاف دولار بعد ماتوصلها

عزيز : هاي الجنطة هالگد تسوي

زيد : اكثر من ما تتخيل حياة صاحبي متوقفة عليها اذا ما وصلت بالوقت المناسب راح يتهمونة بالخيانة ويصفونه بساعتهة بدون اي حكم

عزيز : وليش ماتوديها انت الهم

زيد : هنا المشكلة الجنطة لازم صاحبها يوديهة وهو من البارحة ما اكو وخطه مقفل ما اعرف وين واذا ما وصلت الجنطة بالوقت المحدد احتمال جبير كلنا يخلصون علينا

عزيز : زين اعتبرني وافقت بس عندي اسألة بخصوصها

زيد : ممنوع اي سؤال. كل العليك تاخذهة وتسلمهة وكأنك لا شفت ولا سمعت ولا تكلمت ودير بالك تحجي لأي احد عن هاي الصفقة حتى ويا خيالك متحجي

عزيز : اذا سويت كل ذني ما راح ايصيبني مكروه

زيد : اذا اعتبرت كل الي دايصير حلم تكون بخير

اما اذا اعتبرته حقيقية وحجيت لأي احد عنه حتى لو بالغلط راح تدفع الثمن

كلامه خوفني قررت انسحب وما اورط نفسي انا مو حمل مشاكل بس انا ضعيف جدام الفلوس خصوصا هذا المبلغ مغري جدًا واني بحاجته بعدين وافقت قابل شراح ايصير قابل  راح اعتبره حلم وانتهى بس حلم مربح هزيت راسي وكلتله موافق

جر نفس براحة ورخة جسمه

: اي هيج كول من البداية راح اسألك سؤال جربت بحياتك اتأدي دور شخص ماضاحك بحياته وعلى طول معبس ومن العصبية عيونه تريد تطك

عزيز : لا بس انا موهوب وراح اعجبك اخذ الأمر برحابة صدر

زيد : هذا هو

طلع من تلفونه صورة لشخص يشبهني تماما للحظة عبالي اني الي بالصورة لكن ملامحه الحادة وملابسه خلتني اعرف مو اني كطع تفكيري وفتح تسجيل

زيد : اتدرب على هذا الصوت خلي نبرتك تكون مثله

هزيت براسي وكال

زيد : اذا بعدك موافق  كوم ماعدنا وقت لازم تبدل ملابسك ذني طالع ببجامة النوم وشعرك مخربط عبالك مجدي راح يشكون بيك

رحت وياه للسوق واختار لي ملابس على ذوق صاحبه حتى لا يشكون بالأمر

ضليت حاير ياترى الي اسويه صح لو غلط بس المبلغ جان مغري لصم حلگي نساني كلشي على الأقل ادفع ديوني وارتاح منهن  بعد ما اشترينا الملابس وجربتهن

زيد : هسة تمام بس شعرك لازم تغير تسريحته لأن الهمام يحب يكون شكله يكون هيبة

عزيز : اوك

طلعنا من المحل ورحنا لصالون الرجال سويت تسريحة شعري مثله تماما

بقيت اباوع لنفسي للمراية الجبيرة واتمرن على نبرة صوت ذاك الرجال حسيت بشعور حلو ان تكون شخصية جبيرة

كمل لي زيد باقي اللمسات

زيد : يلا اتأخرنا

بنص الطريق ضل يعلمني ويحفضني اشكالهم وشنو الي احجيه الهم وحسب وصفه جانو ناس اكبارية  ويخوفون بس ما گالي شنو شغلهم بالضبط

زيد : افتح الجكمجة بسرعة

قبل لاينهي كلامه فتحتها عالسريع وجان اشوف مسدسين باوعت له

عزيز : كول ذني مسدسات جهال  حتى ارتاح نفسيًا

زيد : لا شنو جهال احنى نشيل هيج مسدسات  اخذهن وخلهن بخصرك ضروري

عزيز : ليش ضروري ترى انا بحياتي ما شايل مسدس مي وهسة جاي تكولي خلهن بخاصرتك وخل يكون بعلمك اني ما اقتل ولا ابوگ

باوع لي بنفاذ صبر : افتهمت افتهمت بحياتك ما قاتل نملة بس خلهن بخاصرتك حتى يكمل المضهر

عزيز : اذا هيج طمنتني زين هو صاحبك يشيتغل حتى يشيل سلاح وياه

زيد: بياع لبلبي

حسيته يستهزء بية بجوابه بعدين كالي

_ يشتغل بشغل صعب ولازم يحمي نفسه وبعدين مو كلنا ممنوع الأسألة لازم تكون صمًا بكمًا عميًا اذا تريد تكمل حياتك بشكل طبيعي

رجعت لي فكرة الأنسحاب بس الوگف بعيني الديون والمبلغ المغري الي راح يعيشني ويعيش جدي واختي ملوك احسن ما عايشين بالمنگطعة ويا الغنم والدجاج محد يدري بحالهم

وصلنا ليم فندق فاخر قبل ما ينزل من السيارة

زيد: مثل ما علمتك تسوي، لا تزيد ولا تنقص زين

عزيز : اوك

زيد : جيد ما اريد اخطاء لأن بس تنفضح انت اول شخص راح تروح بيها وما تطلع عايش من بينهم

عزيز : لاتخاف كلشي تحت السيطرة

فتحت باب السيارة وقبل لا اطلع اخذت نفس عميقة وقلدت الكلمة الشهيرة للمخرجين قبل لا يبدي التصوير وكلت "كيووووووو"

نزلت من السيارة واني متقمص شخصية رجل ثاني يشبهني بس بالوجه لكن بالحياة مايشبهني ولو مثقال ذرة

مشى زيد قبلي حتى يدليني وين اروح دخلنا للفندق ومشينا بممر طويل نزلنا لطابق سفلي جوة الگاع

دك زيد الباب اربع دكات خفيفات ومتفرقات علامة على كلمة سر

شوي ونفتحت شباكة صغير

زيد : اجينا علمود الجزر

بقيت اباوع له عن اي جزر يحجي

زيد : اجى الوقت لاتفشلني ونروح بيها كلنا

هزيت راسي بالأيجاب وانفتح الباب جان المكان مختلف عن الفندق مكان خاص بالأكابر والشخصيات الجبيرة

قبل لاندخل وگفونا الحراس وتفحصو الجنطة بلا اي مبالاة ورجعو قفلوهة بعدين اشرو للأسلحة مالتنا زيد بسلاسة طلع مسدسه وانطاه الهم

اما اني صفنت بوجه الحارس لحد ما ندسني برجلي حتى انطيهن اله

طلعهتن من خاصرتي بالكوة شايلهن وانطيتهنله

هز راسه بأبتسامة تعبر عن ثقته بينا

رجع مشى زيد جدامي جانت اكو طاولة مستديرة جبيرة وعليها كراسي وقبل لا اكعد على اي كرسي اشر لي اكعد على الكرسي المخصص لصاحبه. وهو بقى وراي ما جان واصلين غير بس رجالين كبار بالعمر مبينين تجار كبار ملتهين بنفسهم ورة شوي اجى الرجال الثالث هذا ما شال عينه عني وعلى وجهه ابتسامة خبيثة

بقيت على وضعي متقمص دور صاحب زيد بأنه مامهتم لأحد حاد ملامحي بينما داخلي على طكة وانهزم منهم شوي واجى واحد من شكله عرفته هو هذا صاحب الشأن والي لازم انطيه الجنطة كلهم وكفو من اتقرب واني هم وكفت وياهم بدون مقدمات كال

_ عرفت ماراح تخيب ضني وتجيب لي الأدلة كلها

اني اخرسيت بمكاني ما عرفت شأجاوب حتى العلمني اياه زيد نسيته لكن ماخليت الخوف يسيطر علي اتخيلت كل الي دايصير مسرح وهذا مجرد تمثيل لازم ااديه بحترافية

فتحت الجنطة وطلعت الأوراق سلمتهله. وكعد يتفقدهن وحدة وحدة ويبتسم ويهز راسه بعدين گال

_عفية ببطلي عاشت ايدك

وكام يضحك بين ما البقية كلهم  لونهم انخطف  واتوترو

ما عرفت  شنو القصة بعدين اتذكرت زيد كالي بس سلمهة واطلع كمت من مكاني

عزيز : ارخصولي اروح عندي شغل لازم اكمله

باوعو لي بستغراب خلوني اشك بنفسي لا حجيت شي غلط 

_ اخذ راحتك بطلي،  تستاهل اجازة على هذا الشغل الحلو

كمت اريد اطلع همس لي الرجال الي جان يباوع لي على طول

_ تدري  احسدك على قوة بدنك ما شاء الله الحليب منطي مفعوله  ههههههههههه

ضليت صافن  بوجهه مافتهمت شنو يقصد  عدا عن طريقة كلامه المستفزة  وضحكته الخبيثة

توقعاتكم 😊😊😊😊