.

صوتو ⭐⭐⭐⭐

علقو .....  

قصة

اجتياح

الفصل : الثالث عشر

الكاتبة ندى البياتي

..........

تميم : بابا فكر بالناس الي تموت  بالحريق شنو ذنبهة

اصلان : الي ورقته ما خلصانه مايموت اتصل بقحطان خل يبدي شغله

تميم

شفت ابتسامة سهيل الخبيثة

مالية وجهه ما عرفت شأفسر ابتسامته كأنه يتللذ بحرگ املاكنه وعقاراتنا اكثر  من شغلة المخزن والسلاح

ما اكدرت اقنعهم ، عفتهم وردت اطلع اجاني صوت ابوي

اصلان : تميم دير بالك تسوي مشاكل

تميم

ماسمعت له و صعدت سيارتي ردت اصل للعمارة احذر الناس منها حتى لو اتخارب ويا ابوي  لكن ويا وصولي جانت النار شاعلة والناس داخلة برعب وانذار

والنسوان تتصايح اغلبهم عاصين جوة مايكدرون يطلعون اطفال  وعجايز صعبة عليهم الطلعة بهالنار

ظليت اتلفت بين الناس ادور على. رؤى مالهة اثر صيحت بكل صوتي : رؤؤؤؤؤى  وينج

صوتي ضاع بالهوى ويا كل هاي الأصوات

رجال  الأطفاء دخلو يطلعون الناس العاصية جوة  وخراطيم المي مستمرة ترش  الوجهة بدون اي فائدة النار تزيد  وماتقل 

ما وقفت محاولاتي ادور على رؤى بين الناس المفزوعة وممصدگة الي حل بيهم فجأة

بقيت متجتف  وادور بمكاني  و  اتفرج على خوف الناس  اشوف واسمع  وساكت صرت شيطان اخرس

حسيت نفسي جزء من الجريمة وخطية هاي الأرواح الي احترگت برگبتي  هم

فجأءة لمحت هوسة يم مدخل العمارة ورجال الأطفائية يتصايحون يأشرون للأسعاف  رحت اركض اشوف شكو

لگيتهم شايلين طفل رضيع

توة صاير حتى الحبل السري والمشيمة بعدهن لازگات بيه  وشكله  فاقد مابيه روح من الدخان و مايتنفس  ويردون من المسعفين يتلاحگون له قبل لا يموت 

حطوه بالسدية وبدو يسعفونه ويخافون لا يمردونه بأديهم  كصو الحبل السري من عنده

شوي وفتح عيونه وگام يبجي  وبسرعة دخلوه بالأسعاف واخذوه للمستشفى هو واهله الي نجو من الحريق 

رؤى : تميم  المرة ماتت جوى  بالنار

انداريت عليهة جانت بحالة صدمة واديهة دم وحروق  خفيفة والعرگ مالي وجهة وشعرهة مخربط حظنتهة حتى اخفف عن صدمته

رؤى :  جانت وحدهة بالشقة ، رحت لعندهة حتى احذرهة من الحريق حتى تطلع  بس لگيتهة    واكعة بالگاع بحالة ولادة ماتگدر تتحرك

حاولت اسندهة حتى اطلعهة گبل لانختنگ  بس الم الولادة منعهة بقت تتلوى بالگاع مثل المذبوحة عالنص  لحد ما ولدت

گالت لي طلعي طفلي وعوفيني انقذي ابني جانت خليفة على ابنهة اكثر من روحهة

تميم ليش هيج صار ليش انحرم الطفل من امه بعده ماشايفه

تميم : ما ادري ما ادري

جذبت على نفسي  مو عليهة من گلت ما ادري  ودموعي سبقتني 

صح انكتب لهذا الطفل عمر جديد بس هواي اطفال انخاذت اعمارهم بلا ذنب

بعد كوم محاولات گدرو يطفون النار بعد ما  تحول كلشي بيها لفحم ما بقى من العمارة غير  هيكل اسود متفحم والناس بالجول تباوع على تعب عمرهة شلون تحول لرماد بدقائق معدودة

اجو ابوي وسهيل  يمثلون انهم مصدومين بخسارتهم  وعلى وجوهم نظرات الحزن

حتى يكسبون تعاطف الناس وياهم  تمنيت عندي الشجاعة واروح افضحهم  واكف وبوجهم واكول الهم انتو الي حرگتوهة انتو الي موتو الناس علمود صفقة حقيرة

بس شجاعتي خانتني  كلشي ما كدرت اسوي غير كعدت بيأس بالگاع واشوف الناس شلون خسرو كلشي وضلو يصفگون جف بحف  كعدت يمي رؤى  وحجت بقهر  : خطية الناس وين يروحون

والي اتأذو وتعرضو للحرگ شلون يتقبلون شكلهم الجديد  والخسرو حياتهم بهذا الحريق منو يعيل عوائلهم

تميم : ما ادري

حجيتهة بغصة لأن فعلًا ما ادري شلون راح يعيدون بناء نفسهم من جديد بعد هذا الخراب

خلت اديهة على راسهة  ورفعت شعرهة من على  وجهة   

_  هاي فاجعة صعبة ما اكدر اتخيل قبل ساعة جان كلشي ما اكو والناس ملتهية بحياتهة  وهاي المرة اجت علي حتى تتصل بزوجها لايتأخر لأن عدها الم ولادة

وهيج بلمح البصر كلشي يحترگ والناس تموت  وتتدهور احوالهة

باوعت الهة تحجي وترجف   : امشي اخذج لبيت جدي لحد مايطلع الصبح ويجي اوراس

رؤى : لا شكرًا راح ابقى هنا ما اريد ازعج اهلك بهذا الليل

تميم :  ما اكو اي ازعاج كومي شعندج  وين تضلين هنا  على الأقل للصبح و نشوف شنسوي

باوعت لي بستسلام  : اني لگيت مكان وذولا شلون بحالهم وين ينطون وجهم بهذا الليل الأظلم

تميم : اكيد عدهم كرايب يروحون الهم حتى يعرفون شلون يرجعون يدبرون عيشتهم

وصلتهة لبيت جدي   دكيت الباب طلعت جديتي مستنكرة جيتي بهالوقت وراي بنية مامحجة  تباوع بستغراب

_ خير يمة منو هاي الي وياك

تميم : خطار ي جدة

_  هلا بيك و بخطارك  فوتو يمة فوتو

دخلتنة وگلبهة لاعب منا  اجت عمتي لقاء وهدية  نفس الحالة متفاجأت  منها  سألن عليهة

هدية : تميم من هاي البينة وشعدهة جاية بهالليل

اضطريت احجيهن عن حريق العمارة  و مالهة مكان تروح له

لقاء : يا خطية شحال الناس هسة

_  الله يصبرهم على بلائهم

زعلن عالناس الي راح تتجهول بسبب ابوي

اجى جدي عالعكازة مايشوف

نجم : منو الجاينة هسة

تميم : اني  جدي

عرفني من صوتي واتقرب علي

نجم : تميم  خير ابني  شجايبك هسة ابوك مزعلك موو

تمتم : لا ابوي ماله شغل 

هدية عادت له السالفة. و كعد يحسب على الي حرگ العمارة بهالليل وخلا الناس ما تعرف دربهة  بقينا كاعدين انسولف عالصار  باوعت لرؤى مطفية من التعب بس تستحي تكول

اشرت لعمتي لقاء تاخذهة لغرفتهة ترتاح 

لقاء :  تعالي امشي ارتاحي امبين عليج  تعبانة 

حركت راسهة بأيجاب وكامت وياهن

سألتني جديتي : ما عرفتو  شلون احترگت

تميم : لا لحد الان ماعرفنة الشرطة والأستخبارات موجودة بالمكان هسة شوي وارجع الهم اشوف شنو الصاير

نجم الدين : عود طمنا شيصير لا  يضل بالنا

تميم : ان شاء الله

ثاني يوم انفتح التحقيق بحريق العمارة واتبين طبگ بأسلاك الكهرباء ادى لحرق الشقة والعمارة كلها سدو  التحقيق  وعافو وكلشي وابوي هم ما لح جان يريد تنسد حتى تنسي ويبدي بالخطة مالته

اوراس من سمع بالخبر اتصل علي يتطمن على رؤى اذا صابهة   اذى مايكدر يجي بسبب الشغل جان خايف لا تكون رؤى متأذية

تميم : لا تخاف هي بخير  كاعدة ببيت جدي

اوراس : الحمد لله

الله يعوضكم بخسارتكم

تميم : لا تخاف احنى معوضين وزيادة من  خراب الناس

صرت اكره نفسي لما احد يدعي لألله بأن يعوضنا بالخسرناه  وما  يدعون للناس الي خسرت فلوسهة وحياتهة من صدك  بسببنا

ابوي اتوعد للساكنين انهم يعوضهم عن الخسروه وماينساهم لكن بس كلام يأملهم  بيه مثل المخدر     

ضلت العمارة على حالهة هيكل متفحم مخيف بالمدينة الرايح والجاي يشوفها

رؤى اتأقلمت وجديتي وعماتي وكأن عايشة وياهن عمر رغم هي لابعمرهن ولا من نفس منطقتهن لو متزوجات جان بناتهن بگدهة 

بس فضلن يعلين جدي وجديتي بعد ما ابوي شال ايده منهم وضلو وحيدين

حاجتني جديتي بموضع  زواجي وجنت خايف تختارلي غير رؤى بس نتشلتني من خوفي من گالت : ليش ماتتزوج رؤى 

وبنفس الوقت  ما فرحت لأن اعرف ابوي راح يسوي لي مشاكل مثل ما سوى لسهيل وخلاه يطلك مرته بعد عقد القران لأنه مايشرفه بنت حافي  تكون زوجة ابنه 

واني ما اريد اوعدها بالزواج واعرف راح انجبر اعوفهة هي واحلامهة بنص الطريق

تميم : ماتناسبني

_ ليش ماتناسبك حلوة  ومابيهة نقص 

تميم : جدة البنية مابيهة نقص النقص بينة ابنج اذا سمع راح يكلب الدنيا على راسنا

_ ليش بكيفه انت وليدنا واحنى نزوجك  الي تريدهة معليك بأصلان غير اذا اجى لهنا اكسر العصى على راسه

ردت تغير الموضوع : ليش انتو شتعرفون عليها  حتى تخطبينهة الي

_ ابني  هي حجت لي كلشي عنها وعن امهة ، اني اعرف الأوادم من نظرة وحدة واعرف الزينة من الشينة تشوف عمتك هدية شكد تحاول تبين نفسهة حبابة  وتمشي على مي الناس وسوالفها عسل ، بس تجذب  

لو ننطيهة مجال شوي تصير انجس من ابوك بس اعرف شلون  اتعامل وياهة  وهالبنية الجبتهة مبينة خوش بتية والدنيا ظالمتهة  وانت هم بعد شكد تكبر  واذا. تضل ورة ابوك تخسر حياتك 

تميم :  جدة اني احبهة بس الحب وحده ما يكفي ما اريد اورطهة وياي واني اعرف ابوي ما راح يسكت

_ وتريد تاخذ على مرام ابوك  وحدة حية تسمم حياتك  اسمع مني. واخذ هالبنية  وعوف ابوك

تميم : اني عفته من يوم حرك الناس بنص العمارة ، كتله بعد ما اشاركم بخطاية الناس كافي الأرواح الماتت واني ساكت عنهم

_ اصخام بوجهي هو الحرگ العمارة وموت الناس

حركت راسي بقهر

_ وليش ماحجيت  ليش ماكلت خل ياخذ جزاءه ويروح اعدام  ونخلص من شره  هذا الملعون

كامت تضرب ببطنهة وتلعن الساعة الجابته بيهة

لزمت اديهة هي شنو ذنبهة 

تميم : لاتأذين نفسج علموده  مايستاهل 

_ ياريت هالبطن ماجابته  ولا حبلت بيه لك هذا شيطان بهيئة بشر  لو بيده يكتل كل الناس لخاطر الفلوس ابوه اذا درة راح يموت كل اذية يجيبهة للناس احنى نتحاسب عليها لأن ماعرفنا نربيه

تميم : لا تگولين له

_ شگوله ليش هذا هم حجي ينگال  ما اريد يخسر حياته علمود هذا الجلب  يارب انتقم منه وخلصنا من شره

مشيت بكلام امي ورحت خطبت  رؤى من اوراس اخذت جدي وجديتي وهي هم اجت ويانا  استقبلنا اوراس احسن استقبال  وجان فرحان حيل لأن انطيته خبر وهو اقترح اجيبهة وياي حتى يزفهة لي  من بيته  كتله وزوجتك شلون

اوراس : ما عليك جيبهة هي. راح تتزوج بعد ما تضل الهة حجة   ومو حلوة هسة تضل يمكم

سمعت كلامه وجبتهة ويانا

بس زوجته من شافتهة عبالهة جاين نرجعهة تعيش وياهم

مناهل : هاي الحرامية شعدهة هنا ! مو گلت ممنوع تدخل البيت  بعد ما باگته

اللتفتت لها وشفت ادموعهة انجمعن بطرف عينهة وماتگدر تحجي عبالهة من نعرف بتألف زوجة اوراس عليهة  وخافت لا نصدگ ببها ردتها جديتي :  منو الحرامية ! اشو ماتحترمين خطارج

مناهل : حجية اني احترم الخطار بس هاي الحرامية الي مدت ايدهة وباگتني واني انتشلتها من الشارع وكعدتهة ببيتي معززة مكرمة تالي نفسهة تدني على  ذهبي وتبوگه وهو ميسوة بس النفسهة دنية  شتحجين وياهة بعد

قاطعهة اوراس : هم جاين يخطبوهة 

سكتت وصفنت شوي  وضحكت بستهزاء وكعدت مثل سيدة الأعمال عالكرسي : هيج لعد جاين خطابة عليهة انتو تعرفون اصلهة وفصلها لو بس جاين ع الجمال  العدهة

نجم الدين : نعرف كلشي مثل ما نعرفج انتي شنو من شنو

گلبت السالفة وصارت تقنعنة

مناهل : هذا هو  هي البنية اول تالي تتزوج  وبما انكم تعرفون كلشي عنها وراضين  احنى شبيدنا نسوي الله يتمم على خير ان شاء الله  وحتى مايحتاج نسأل عليكم لأنه واضح نفس الجدر والقبغ 

نجم الدين :  من حقكم تسألون  علينا  

مناهل :  مايحتاج حجي اشو ما شاء الله انتو حاسمين امركم   بس خل يكون بعلمكم بعد الزواج احنى ما مسؤلين عن اي تصرف غلط  حتى لا تگولون غشونا هاي اني حجيتهة الكم  من البداية

_ البنية الهة شهور يمنا ما شفنا منها شي غلط ولو ما واثقين منها مانطلبهة لأبنة

مناهل : هاي هي  مثل ما تريدون خل نقرأ الفاتحة

بالكوة لزمت نفسي وما سكتتهة بسبب كلامهة المستفز ماردت اسوي مشكلة بسببها ما ادري اوراس شلون متحملها كل هالسنين

اتفقنا على الزواج واستأذنة وهي ضلت يمهم وصيتهة تطنشهة وماتتأثر بكلامها شما تحجي  واني راح استعجل بالزواج لأن اني ساعة ماتحملتهة شلون برؤى تعيش وياهة ايام وشهور

تميم : عود نتخابر

همست لي : غير تراقب الخط وتسمع كل حجينا

تميم  : عود نظل نمدح بيهة بالمخابرة حتى ترضى علينا ولو اني اخاف ما الزم اللساني واستلمهة اكس مربع بس لخاطرج اتحمل

رؤى : هههههه

تميم : اضحكي اروح  فدوة لضحكتج

سكتت شوي وخطت ببالي شغلة : اوگفي لحظة خوما انتي هم تراقبين الأتصلات

رؤى : لا غير انلگف بساع اذا رفعت السماعة بس هي كل مايرن التلفون على رجلها  وراه ترفع السماعة وتسمع و يامن يحجي

تميم : الله يعينه على ما ابتلاه هههههه

رؤى : استعجل. لا تنسى والله تشوفني انجوم الضهر بعيني

تميم : اسبوع ما اطول واجي اخذج واخلصج منها بس مثل ما گتلج طنشيهة وكأنها ماحجت شي لا تبجين عيونج علموود كلامهة السام اريد من تجي الزفة اشوف عيونج حلوات

رؤى : ان شاء الله

رجعنا من بيتهم والطريق كله اوزع ابتسامات و اغني  وجدي وجديتي فرحانين وياي تمنيت الطريق مايخلص من كد السعادة والفرح العايشهن بذيج اللحظات

من وصلنا لبيت جدي  لگينا سهيل بالحوش گاعد ينتظرنا ويا عماتي جدي  بالبداية ماميزه من من صوته  عرفه

سهيل : شلونك جدي

اتقرب عليه يبوس ايده  بس جدي سحبهة وحجة بعصبية  

نجم : اني مو گايل بيتي يحرم عليكم وما اريدكم بيه

سهيل : هاي شبيك جدي هو هيج السلام ع العموم اني  اجيت اخذ تميم وياي ابونا يريده بشغلة ومستعجل عليهة

نجم الدين :  شيريد منه ابوك عوفو الولد بحاله ولا تغسلون عقله بشغلكم الحرام

سهيل : شمدريني وهو ابنك ما ينحزر  بس گال جيبه

اللتفت علي وشافني كاشخ كال : اني بلغتك لازم تجي للنادي لو تعرف شلون يجيبك غصبًا على راسك

نجم الدين : امشي اطلع من بيتي ولاتشوفني وجهك

طلع من البيت  رخيت الرباط ورحت عالسريع وراه ظلو يصيحون بية ما اروح وياه بس لازم احسم امري واخليه يگطع امله بية ومايضل يتدخل بحياتي

صعدنا بالسيارة  وحجة سهيل بخباثة وحقد تجاهي : كل عقلك ابوك  يخليك تتزوج  وحدة شاردة مامعروف منو اصلها وعدها سوابق

تميم : هي مو شاردة اليوم رحنا على اهلهة و اتقدمتلهة رسمي

سهيل : اول مرة اشوف وحدة يروحون يتقدمون الهة وهي ببيتهم  بس تردي اجتك عدل حتى لو ابونا ما قبل بيها انت تگدر تتونس وياهة بحجة هي ببيت جدك  ومحد يدري شتسوون تالي الليل  بس اخذ احتياطاتك لاتحبل  وتفضحنا

تميم : اللزم اللسانك سهيل  ولا تحجي عليهة بهالشكل

سهيل : قابل اني شگايل بس گلت جتك عدلة ااااخ  كون اني بمكانك حتى ما اروح اخطبهة اشبع بيها  ببيت حدي ومحد يحاجيني 

لزمت الستيرن  وخليته يوگف السيارة بنص الطريق حتى لانتعرض لحادث

سهيل : هاي شبيك اتخبلت جان دعمتنا

تميم

بدون ما اجاوبه  ضربت راسه عالستيرن لزم مكان الضربة متفاجاء من تصرفي ثواني تلمس اثر الدم بأصابعه  الي نزل منه وگام يضحك : هههههه هي هاي الرجولة تضرب اخوك الجبير  علمود مرة 

تميم : دير بالك تعيد هذا الكلام لو تجيب طاريها على لسانك الوصخ

سهيل :  انشوف  يا اخوي

تميم

وصلنا للنادي حاجاني ابوي ببرود مستفز

اصلان : ما ناوي ترجع لشغلك  غياباتك واعذارك طولت  واني بديت اتضايق

تميم : اعتقد اخر مرة كتلك اني بعد ما اشاركم بجرائمكم  ما اريد ازيد ذنوبي يم الله

اصلان : صار لك عمر مشاركنا شنو الي تغير هسة ؟!

تميم : مامشاركم ولا راضي اشاركم بس مجبور  ومنا وغاد راح اگطع رجلي من شغلك بابا اريد اعيش حياتي بعيد عنكم

اصلان : تميم تريد  تتحداني مو !!

تميم : اذا تحسبهة تحدي احسبهة بس اني ما اتحدى بس اريد ....

بعدني ما گايل له اني اريد استقر واتزوج  سبقني سهيل مثل الشيطان وسوس لأبوي  

سهيل : عوفه بابا الرجال عاشگ  له وحدة  امهة شاردة من اهلهة ومنزلة راسهم  وهي مكملة على خطى امهة هم شاردة من بيت گرايبهم وعايشة يم تميم  وتريد تضحك عليه حتى يتزوجهة  خوش لاگية زوج على گد ايدهة 

تميم : انت ماعليك بمنو اتزوج شاردة ما شاردة هذا شي ما يعنيك لاتضل تنافق مثل ابليس

اصلان : تميم انت شتريد بالضبط  شنو الغاية من كل الداتسوي

تميم : ما اريد شي بس اريد استقر بحياتي

اصلان : استقر بحياتك وتزوج وسوي الي تريدهة بس اختار غيرهة اختار وحدة عدهة حسب ونسب  مو تتزوج  وحدة ملعوب بيهة وتريد تصير مرة براسك وعلى حساب سمعتنة

تميم

بقيت صافن بوجهة يريد يمشي كلامه علي مثل ما سووة ويا سهيل اخذت قراري وكلت : بابا اني مو سهيل شتگول اكولك صار  وأأمر والبنية الحبيتهة اتزوجهة وخلي الحسب والنسب الك ومشيهن عالي تكدر عليهم

جية لهنا بعد ما اجي وشغل وياكم بعد ما اشتغل  وشتريد تسوي سوي اني ما خايف منك وعنواني موجود يم جدي نجم الدين 

مشيت جم خطوة لباب المكتب ورجعت لعنده  : ويا ريت ماتلعب وياي لو تزعج  استقراري ببيت جدي لأن اني ابنك  من صلبك و اسوء منك بأضعاف المرات فلا تضطرني اشوفك الجانب السيئ مني لأني بلحظة غضب وحدة انهي كل  الي بنيته وتعب عليه بسنين

لازالت هناك احداث ......

.....  

(الحاظر المستشفى )

همام : و انت الي قتلت امي وابوي بذاك اليوم الي اقتحمو البيت و صارت بيه المذ**بحة

نجوى 

سكت دقايق واللتفت لعزيز ورجع اندار على همام

وحجة بثبات وثقة وبدون خوف من ردة فعلهم  : اي. اني ....... اني جنت السبب بموتتهم  وما ابرئ نفسي من هذا الذنب 

همام : انت ما جنت السبب انت  قتلتهم  بنفسك

اصلان : مو صحيح صح علاقتنة جانت مو صلح بس اني ما قتلتهم ابني و زوجته مو اني قتلتهم  

همام : لعد  گولي شنو الصحيح اريد اعرف

اصلان :تريد تعرف  راح اگولك   امك هي السبب، امك هي الخربت بيني وبين ابني

قطع علاقته بية لخاطرهة واتزوجها

وبالأخير طلعت ماتستاهل تكون زوجة ابني   طلعت وحدة خبيثة وشيطانة  بكل عين صلفة خانته ويا غيره  بدون ماتفكر بسمعته ومن كشفتهة على حقيقتها الوصخة  دزيت عليه حتى يعرف البنت الي اختارهة اشكدة وحدة خاينة وجذابة

تعرف شنو التهمة الي محظرتهة الي حتى تكسر ثقته بية  وتگلبه علي  اتهمتني على اساس انا عندي علاقة محرمة وياهة بدون علمه

لك اجى للبيت وشياطينة كاعدة براسه  گالي :  هي ما تجذب هي  شفكم  بعيني سوى   تريد اجذبهة لو اچذب عيوني الشافتكم

بذيج الساعة المشؤمة اتجادلنا وجان جدالنا اقرب للعراك  جان رافض يسمع اي كلمة مني لو بيده يشرب من دمي 

وفجأة بدون سابق انذار اجت رصاصة قناص من بعيد اخترقت ضهره لأنه جان يوگف قريب من الشباك واني يمه وبلمح البصر هوى وخر فوگاي وعلى اثر وگعته انظرب على راسي وفقدت الوعي

من حسيت على نفسي لگيته بعده فوگاي غرگان بالدم رفعته عني وكمت اخض بيه اتفحصه  بس هو فارق الحياة بلحظته 

ما ردت اصدگ هو مات بالهسرعة قبل اشوي جان يصيح علي ويتهمني وهسة صار جثة مددة بالگاع من حسيت نفسي خسرته من صدگ اول مرة احس نفسي خسارة موجعة

فقدت گمت اخض دايگوم حتى لو يتعارك وياي  حتى لو يحملني كل المسؤلية بس خل يگوم هذا ابني ابو گلب الطيب  بعد ما يأست منه وخرت غاد اريد استوعب الصار محد جان يكدر يحجي وياي بكلمة وتالي كتلو ابني جدام عيوني  كمت افتر بالقصر مضروب على راسي اتلفت ع الصاير

قاتلين كل البيه   ومن بينهم امكم الي تركناهة بصالة الضيوف وانتو ما لگيتكم   بس صوت بجيكم  دلاني عليكم جانت حاطتكم  بالخزنة وسادة عليكم  الباب حتى  لا يلگونكم 

فتحت الباب شوي لامختنگين  من البجي ونقص الأوكسجين  طلعتكم حاولت اسكتكم حتى لا يعرفون مكانة بس جنتو تبجون بكل صوتكم من الخوف

بعدين سمعت صوت خطوات وتمتمات يدورون علي حتى يقتلوني اني هم

شلتكم اثنينكم وانهزمت بيكم حتى لا يقتلونكم  وكدرت اطلع من القصر بدون ما يصيبنا اذى 

واختليت بواحد من المخابئ مالتنا  اتصلت بسهيل حتى يجي ياخذهم  لمكان امن  واتفرغ للخونة الي اندگو بية و  تجرؤو  واقتحمو بيتي  بس تعرضت للغدر  ساعة  حاوطني الجيش  من كل مكان

سهيل معترف على كل شغلنا وحتى متهمني اني الي قتلت  ابني وزوجته ومعترف على حرگ العمارة

الهرب بأثنيكم جان مستحيل لازم واحد بس وسط الحصار الي اتعرضت له من الجيش

همام : واختاريته هو فضلته علي

اصلان : لا ما فضلت  احد على احد  بس اضطريت اخذه  كرهينة حتى اكدر اهزم روحي بيه و ما يلزموني او اهددهم بيه

كلت بنفسي هم يدورني الي  مو معقولة يأذونك   وراح يرجعونك لبيت  ابوي راح ياخذك ويريبيك

واني ارجع عزيز ورة فترة من الوضع يصير احسن

كدرت انهزم من وسط الجيش وياي عزيز بدون ما يسوون لي شي  ومن بعدهة ما وثقت بأي بشر حتى مكاني ما دليت اي واحد من كل الي جانو يشتغلون وياي

ورة مدى رجعت حتى ارجع عزيز  بالسر لبيت ابوي واكتشفت انهم ما لاگينك مفقود  و ابوي ميت ورى تميم مامتحمل الخبر يموتون حفيده  وزوجته واولاده مرة وحدة بسببي  

امي من شافتني تفلت بوجهي   و اتصلت عالجيش  حتى يلقون القبض علي

ومن يومهة طلعت من بغداد وسكنت بذيج القرية المهجورة  وكل فترة وفترة  جنت  ارجع بدون ما احد يدري  اسأل عليك وادورك بس انت مثل الملح وذاب  ماخليت مكان ماسألت عليك

سهيل مع مرور السنين استولى على كل املاكي ومحولهن اله بالغش  وامي وخواتي ماتن  وحدة ورة الأخرى من العوز والظيم

قاطعني همام بضحكة  مستفزة مامصدك كلامي

_  سهيل جان صادق من گال انت  شاطر بتأليف القصص حتى تبرأ نفسك من دم ابوي وامي  والادهى من كل هذا جاي تشوه صورت امنا جدامنا حتى ننسى فضاعتك وجرايمك الأرتكبتها بحقهم

تدري شنو الحقيقة من كل هاي الأحداث الحقيقة هي بختصار  باليوم الي اجى ابوي عليك. ونصبت له فخ حتى تتخلص منه لأنه ما جان راضي على جرايمك قتلته واللفت قصة الناس الي اقتحمو البيت بأمر منك حتى تبعد الشبهات عنك ومحد يشك بيك

واخذت وياك عزيز حتى تسويه نسخة منك وترجع امجادك بعد ما سهيل باگ منك كلشي

بس القدر لعب لعبته وياك وعزيز ما طلع مثل ما جنت تريد  طلع واحد غبي ومهرج تفشل تعتمد عليه بشي

ومن شفتني وشفت اني اكدر اسوي الي عزيز ما گدر يسويه  بدلت كل خططك وصرت تتقرب مني حتى تسترجع حقك  الي اخذوه منك

باوع لعزيز وأشر له  : شفت هذا هو جدك  ذيب بجلد خروف   

نجوى

مشى  ليمه  وتجاهل اصابته جر ايديه اثنينهن  وجبره يلزم المسدس كوة حتى يصوبه على جده  بس الغريب عزيز جان ماينطي اي ردة فعل بس بؤبؤ عيونه مرة علي ومرة على جده   متت من الخوف عليه  شيريد يسويله اتقربت عليه واحجي بخوف 

نجوى : همام همام بداعة الله عوفه شتريد تسوي هو متصاوب وبعد حالته خطرة

ماصد علي ولا عبرني جان مصمم يخلي عزيز يكتل جده

همام : اشبيك  رخي  الزمه عدل وخل ناخذ بثار ابونا وامنا منه هذا مايستحق يعيش فوگ السواه جاي يتهم امنا

نجوى

صاح عليه جدي بنبرة بحياتي ما شايفته عليه كمية الغضب بيها تخوف ولا عبالك الواكف جدامي هو جدي المتعودة عليه هاي وحنين

اصلان: عوووفه   

اللتفتله همام : ليش ماتريده يعرف حقيقتك الوصخة هو سمع كلشي ولازم ياخذ بثارنا مو هيج عزيز  لاتضل جبان اضغط الزناد

اصلان

ماتحملت شلون يريد يخليه يشيل سلاح حتى ما يحس بأنه يختلف عنه بشي يريد يلوث ايد عزيز بالدم حتى يكونون متشابهين

جريته من ايده وبعدته غن عزيز بدون تفكير صفگته على وجهه  ضل متفاجأء من تصرفي ممصدك اني ضربته وبنفس اللحظة وكع المسدس من ايد عزيز على الأرض رفعت اصبعي بوجهه  علامة تهديد

اصلان : عزيز خط احمر اذا تخطيته راح اشوفك وجهي القديم 

تريد تكرهني اكرهني واذا تريد تاخذ بثار  اهلك اخذ ثارك مني   بس اياك  تورط عزيز علمود حتى  تصفي حسابك وياي

يتبع.......