.

صوتو ⭐⭐⭐⭐

علقو .....

قصة

اجتياح

الفصل : ١٧

الكاتبة ندى البياتي

..........

قبل ثلاثً وثلاثون عام

قبل تلك المذبـ**حة بأيام ...

حتى بعد ان احترقت روحي وتحولت لرماد  لازلت تفوح مني رائحة الألم "

..... 

الراوي العليم...

بعد ما اتزوج تميم من رؤى  گطع  كل صلته  بأبوه  واعماله

راد  يبدي من جديد ويا مرته  واطفاله بداية تكون  من الصفر يوكلهم  مال حلال مثل ما وصاه جده لأن مال الحرام يفسدهم وعلمهم على طريق  المعاصي  ومايخليهم مرتاحين بحياتهم عدا ان الله ماراح يوفقهم رغم كل الفلوس التصير عدهم

و الداعم الرأيسي اله جان جده هو جديته دعموه   وساندوه  حتى يبدون بداية جديدة ونظيفة رؤى  ماجانت تتذمر من تعفف حالهم لأن بدو  من الصفر لأنو هي عاشت كل عمرها فقيرة وحالتها تعبانة    

كعدوا بببت جده و شوي شوي لحد ما أجروا  بيت صغير  خاص بيهم  وكملت فرحتهم بولادة ولدهم التوأم "عزيز وا مين "

من بعد انتظار سنتين  بالبداية   ما جانو  مقررين يخلفون لا واحد ولا اثنين  لأن جان اهتمامهم  الأول  والأخير هو يوگفون على حيلهم   ويأسسون حياتهم ويستقرون بيهة و  بعدين يخلفون على راحتهم بدون ضغط  المصاريف عليهم  

بس الله  قدر ان  بعد سنتين من زواجهم  اكتشفت  رؤى انها حامل  وجانت خايفة تصارحه  بس بعد ما انسدت كل الطرق بوجهة قررت تعترف له  وتفجر له الخبر انتظرته يحي  من الشغل ومدد يرتاح بغرفته

رؤى: تميم عندي الك مفاجأة هي سعيدة وتعيسة بنفس الوقت بيمن تحب ابدي

تميم : يا ستار هم مفاجأة وهم بيها سعادة وطيحان حظ ابدي بالسعيدة والتعيسة عوفيهة ورة ما اگعد من النوم لأن تعبان مابية حيل صدمات

رؤى : المشكلة  هنة اثنينهن لازگات سوى  هو لو تفرح لو تلطم على راسك

عدل گعدته وگال :  احجي الفار گام يلعب براسي شمصخمة وابدي بالتعيسة احسن حتى اتلاحك لروحي

ضحكت واتقربت عليه شاورته وبعدت من يمه  جحظ عيونه وباوع بوجهة مصدم  : لا بربج صدك تحجين من شوكت هاي

رؤى : من شهرين

تميم : وضامة علي

رؤى : لا والله بس ما حسيت بأي اعراض لو ما مفتقدة الشهرية جان ولدت واني ما ادري هههههه

تميم : خاف مو حامل !

رؤى : لا سويت تحليل وطلعت حامل

باوعلهة صفح بعدين استسلم لنظراتهة العفوية  وگال : هذا  رزق من ربنا والف الحمد لله عليه ما لازم نتبطر لو ننكره

بس مرة ثانية اعلگج بالبنگة اذا طلعتي حامل

رؤى : هاااا ماتعلگ نفسك بالأول قابل اني احبل من الهوى  

سحبهة لعنده ضل  يكرص خدودهة وهو يگول الهة بعد لا تدلعين جدامي حتى  لا تحبلين 

رؤى : شوف شلون يذبها براسي باجر اروح اسقطهم واخلصك من المسؤلية

تميم : وينطيج گلبج تسوينهة وتأذين روح توهة نابضة برحمج

رؤى : هاي شبيك شگالولك عني سفاحة اقت*ل واصل*خ بكيفي

اصلا حتى لو متريده اني اجيبه و اربيه

تميم : منو گال ما اريده هو اكو احلى من الخلفة بالبيت بس لأن وضعنا شوي تعبان  وما اريد اتعبه وياي

حاوطت ركبته : حبيبي ان شاء الله ابنا هذا هو يجيب النا الرزق والخير وياه

تنيم : ان شاء الله

  ...

من سمعو جده وجديته بحمل رؤى  طارو من الفرحة وخصوصًا بيتهم يفتقد لجو الأطفال 

وحمل رؤى  خلاهم  يشكرون الله وحمدونه على هاي الفرحة العاشوها

ما قصرو وياهم ماديًا ومعنويًا

لحد ما ولدت وانوب طلعو توأم مو واحد

رغم جان بالبداية حاير شلون يدبر امره ويا ابنه بس مع مرور الأشهر اتعلق بيهم وهم ببطن امهم وگام يشتغل شفتين حتى يوفر الهم الحياة الي تناسبهم وما يحتاجون لأحد غير الله

اصلان جان يدز هداية الهم بس يرفضها لأن فلوسهة حرام وهو قسم ما يخليهم  يشمون نفس من الحرام مو عاد ياكلون ويلبسون من الحرام 

وكل مرة يجي جده يشوفهم ويلعب وياهم ويغني الهم  اغاني قديمة معتز بيهة حيل جان  متعلق بيهم  ومرات مايگدر يطلع من البيت فيجيبهم تميم    لجده حتى يشوفهم ويملي عيونه الضعيفة بيهم

سهيل  الوحيد ما جان عاجبه الوضع  لأن جده يحب خلفة تميم وهو حتى خلفة ما عنده ولا متزوج  زواج عام  لأن ابوه مايخليه يتزوج  الا اذا لگى المرة الي تناسبهم  وهذا الشي يخليه يحس ان هو انسان منبوذ محد يحبه لو يفكر لسعادته و بس يردون سعادة تميم لأنه ابن عائلة حسب ونسب عكسه 

لذاك هو شايل الفكرة من راسه مكتفي بزواجه  السر و المتعة ويا البنات  حتى لا يفتح عليه حرب ويا ابوه اصلان  ويطرده من الورث والعز الي هو بيه

فجان يريد اي مستمسك يخرب بيها حياة تميم ويا ابوه وجده وحتى مايعيش براحة ولايتهنى بحياته

واجته عدلة باليوم  الي شافو البنت  التشبه  رؤى ويا خطيبهة متباهي بيها  جدامهم وقرر يبدي انتقامه منهم اجى لبيت جده  بعد ما  عرف تميم عدهم هو ولده 

فتح الباب و دخل بدون استأذان وعلى وجهه ابتسامة خبيثة توحي بالشر

سهيل: السلام عليكم يا جماعة

محد رد عليه وجده من شافه اتعصب وملامحه انگلبت

سهيل : ماتردون السلام لو تشوفونهة صعبة عليكم

جاوبه جده بعصبية : الحجي مايجيب نفع وياك نسكت بلجي تحس على نفسك وتطلع من البيت وبعد ما ترجع عليه

سهيل : ليش جدي شگد شايل بگلبك علي   مدري  شلون تدخل بگبرك وانت گلبك اسود

نجم الدين : اني گلبي اسود  ؟؟

سهيل : اي گلبك اسود . وتفرق بين احفادك ،

ترى اني هم حفيدك،

وهم ابن ابنك ما جايبني من الشارع حتى تستنكف تحجي وياي و ما  تعاملني نفس معاملة  

نجم الدين : اني  ما مستنكف منك ولا افرق بينك وبين اخوك  بس مازلال انت لاحگ ابوك وتشتغل بالحرام وياه،

ما اعترف بيك ولا اريدك  تدوس  بيتي حتى لا توگع ذرة تراب من الحرام التمشون عليه والله يحاسبني عليه

سهيل : ليش تميم مو جان لاحك ابوه ومكيف بفلوسه وسيارته وطباته وطلعاته ومتونس على اخر حباية اشو ماتكول حرام ولايدوس بيتي برجليه حتى لا يدخل عليه حرام

نجم الدين : هو من البداية ما راضي بشغلكم ولا اعمالكم 

سهيل : بس جان عايش بخيره ومن فلوسه، ولا هو منين له كل هذا العز الجان عايش بيه

هسة صار التقي النقي الي ما يقبل درهم حرام بجيبه

نجم الدين : ما اريد اتجادل وياك

سهيل : ولا اني اريد اصلًا اني ما  جاي علمود اسمع كلامك الي يغث  جاي اريد اكوله لأخوي التقي النقي الماياكل حرام  خل يضب مرته ومايخليهة  تطب وتطلع بكيفهة ويا الزلم على حل شعرها

تميم جان ساكت طول الوقت لأن يعرف اخوه ما ينخاذ منه لا حق ولا باطل بس من جاب سيرة مرته كام على حيله جاوب سهيل بعصبية وعصابه تتطافر من عيونه  : سهيل اللزم اللسانك و احترم نفسك شنو تطب وتطلع ويا الزلم لا اخليك تندم على هذا الأتهام 

سهيل :  اني محترم نفسي ومامفتري  عليهة شفتهة بعيني حتى اسأل ابوي لابسة لبس گحاب وطالعة تسهر ويا واحد ومخليتك مثل الثور لاتهش ولاتنش ولا فوگها حاسبهة مرة علينا وام جهالك

تميم : سهيل  گتلك اللزم اللسانك كلمة اخرى عليها    وادفنك بالگاع واحسب الله ما خلقك 

على صوته  اللتمن عماته وجده وكف على حيله

حجت جديته بعصبية ما گدرت تكتمة : ولك عمت  عينك جاي مناك لهنا حتى  تفتري على مرت اخوك وتطعن بشرفهة  حط الله بين عيونك  ولو انت وين تعرف الله يا حيوان يا خنزير

تجاهل كلام جديته وجه كلامه لتميم : بدال ماتدفني روح ادفن مرتك الي مصاحبة عليك واحد زنگين وكوا*د يفررها عالزلم

ولو  هي الي امهة شاردة من اهلهة وعشيرتهة ويا واحد ومنزلة راسهم  شتترجى من بنتهة  تطلعلك ايمانهة يخرخر من فوگ لجوة طبعًا تطلع

گحـ* ـبة 

ما اتحمل اكثر يغلط بحق مرته لزمه من ياخته وضربه كلة رجت راسه 

لزم سهيل راسه ويهدد : صاير بطل يمي ومرتك مسويتلك كرون وتشحط بيك بالشارع

عاط بيه : سهيل اعتذر عن كل كلمة گلتهة ولاتخليني اطلع جنوني بيك

سهيل : وليش اعتذر قابل حاجي جذب حتى روح اسأل ابوي وراح يكولك نفس الشي

وانصحك لا تشوف نفسك اله لأن متخلف بيك راح يخلص عليك بس يشوفك مرتك سودت وجهه 

تميم :  مرتي اشرف منكم شوكت شفتوهة طالعة على حل شعرها

سهيل : قبل يومين لازم جنت نايم من وكت  لو مخليتلك منوم وماتدري شكو ما اكو بالدنيا وهي تلعب بكيفة من وراك

راد  يخنگه بس جده  دفعه  غاد حتى لايبتلي بدمه  وضل يطرد يدفع بسهيل لباب الحوش

ويلعن بيه وبالساعة الي اجى بيهة مثل الشيطان

رجع ليم تميم و خلة ايده على جتف تميم ويهدأ بيه  : لا تسمع له هذا جلب على ابوه يريد بس يغثك  بمرتك احنى نعرفهة ما تسوي هيج ولا تقبل بيهن

جديته : اي يمة هاي بنيته شنو ما نعرف رؤى شنو من شنو

كلها تشهد بأخلاقهة لاتخلي هذا الساقط يگلبك عليهة ويطلعهة من عينك

ضلو  يقنعون بيه مايسمع لكلام سهيل حتى لايخرب علاقته بمرته لأن اخذهة غصبًا عليهم وعافهم وحدهم،

بس هو الخبله و  دخل الشك لگلبه يعرف اخوه نذل وحقير بس بعمره  ما يجذب بهيج امور وخصوصًا خلا  ابوه بالطاري،

ويعرف ابوه  رغم كل المشاكل الي صارت وبينه وبين تميم  ما يقبل احد يغلط بحقه  لو يجيب طاريه بالموزين بكلمة

واذا تميم راح و گاله عن كلام  سهيل راح يفتح حرب على نفسه  وهو گظى حياته كلها يريد رضاه على حساب حياته  الشخصية  

جديته : يمة   لاتخليه يلعب بعقلك ترى  مرتك شريفة وعفيفة وما تطلع منها هيج سوالف،

هم اثنينهم متفقين عليك حتى تطلگهة

و مو بعيدة  ابوك يصف ويا سهيل،

هاي اذا مو هو دازه حتى يبهذلونك ويحرگون گلبك،

لا تخليهم ينالون الي يريدونه،  خلي عقلك اكبر منهم  

الله يجازيهم وينتقم منهم ويحرگ گلوبهم مثل ما هسة حرگو گلبك بهالحجاية الباطلة

شگد قنعوه وفهموه  بس گلبه ما برد

عاف الولد يمهم وراح لبيته يريد يعرف منه ويريح گلبه  استقبلته من الباب بأبتسامة عفوية  مثل كل مرة 

بس من شافت حالته هيج   والولد ما اكو وياه خافت وصابهة قلق  سألته بخوف على ولدهة 

رؤى : وينهم وين عزيز و أمين ليش ما جايبهم وياك

تميم : عفتهم بيت جدي راح يباتون هناك اليوم

رؤى : ليش

تميم : جديتي لزگت بيهم

يحجي وياهة وداخله يفور يريد يعرف الصدگ من الجذب سألهة بدون مقدمات 

تميم : قبل يومين وين رحتي  

اتوترت وبللت شفايفهة وبقت تفر بعيونهة مثل الي تدور على جواب :  قبل يومين ! .. ليش تسأل

تميم : جاوبي على سؤالي بس

بلعت ريگهة وبؤبؤ عينهة يتحرك عشوائي و عاصرة اديهة بتوتر : جنت ... جنت يم  عمو اوراس،

حكت راسهة مثل الي يدور حجة مقنعة :  شوف  نسيت اكولك هو اجى اخذني گال نطلع نغير جو لأن مدري شأجاني من اتصل علي كتله ضايجة

وهو ما جذب خبر گال راح اجيج ونغير جو حتى الضوجة تروح ، بس ليش تسأل  صاير شي ؟؟؟

تميم :  لا ما صاير 

رؤى : اشبيك مو على بعضك

تميم : مابية شي

رؤى : احد مزعلك حاجيني الجهال وينهم ليش مو وياك ليش مبقيهم بيت جدك

صاح  بوجهة : كتلج مابية شي ليش تلحين

نرفزهة جوابه  : ما الح  بس  الجهال وينهم خوفتني خوما صاير بيهم شي وما تريد تحجي  

صك على سنونه واعصابه وصلت لخشمه بالكوة لازم نفسه  : وخري من يمي لا اطلع ضيم الدنيا كلها بيج

من شافته هيج عصبي وما يتفاهم عافته وراحت للمطبخ بعد ما خافت من شكله

ما تعرف شصاير بيه و ليش هيج ملامحه مگلوبة بأي لحظة يخلص عليها

بين  ما هو اتأكد من  كل شكوكه بخيانة مرته اله لأنه باليوم الي طلعت بيه قبل يومين بدون ما يعرف وين راحت اتصل بأوراس وسأله اذا جانت جاية عليهم او لا،

بس اوراس  نكر  

اوراس : رؤى لا ما جاية علينة ليش هي وين رايحة

تميم : ما اعرف گعدت مالگيتهة اتصلت ببيت جدي  گالو ما جاية علينة گلت يمكن اجت عليكم

اوراس : هااا ايجوز راحت تزور قبر والدتهة هي من زمان جانت ناوية تجي تزوره اذا اجت علينة انطيك خبر

تميم : اي والله اكون ممنونك

اوراس : تدلل لايضل بالك

تميم: ماشي مع السلامة

مابقى عقل براسه بعد ما جذبت عليه   واكدت  كلام سهيل صدگ و ان هي تخونه يمكن  ملت منه ومن عيشة الفكر

هيج فكر بينه وبين نفسه والا ما اكو سبب ثاني يخلها تخونه بدون مبرر

عاش ايام  مثل الجحيم يحرگ بداخله من بعد ما عرف هي تخونه وكلام سهيل صدگ  انگلبت مشاعره عليهة مية ثمانين درجة  لا يا كل ولا يشرب مثل الناس بس يحرگ بروحه

كام يشك بكل كلمة تگولهة بكل لبس تلبسه بكل تصرف تتصرفه  وهذا كله يغلي ويفور بداخله وينتظر الساعة الي تنفجر بيه

حتى من يروح للشغل گام مايأمن بيها وساعات الشغل طويلة عنده  ويتأخر لخاطرهم لخاطر مايجوعون ولا يعطشون  ولا يتعرون كام يريد اي حجة حتى يتعارك ويا احد دايطلع نار الي بداخله

الا ان قرر يكلف شخص يراقبهة وين تطلع وين تدخل وهم ما ريحه هذا الشي  ومابعد الشك والقلق عنه

وروة ايام اخرى طلبت منه تروح لبيت اوراس وهو اصلًا بغير محافضة وساعات يلا تصل

تميم : شتسوين تروحين

رؤى : ضايجة من البيت واريد اغير جو  يمهم 

تميم : والجهال تاخذينهم

رؤى: اي اخذهم وياي

تميم : من افرغ اني اخذج

رؤى : ليش تتعب نفسك اني اروح ااجر سيارة هو گالي اني ادفع الأجرة

تميم : وين تروحين وحدج اني اخذج من افرغ

رؤى : شبيك تميم ليش تصعب الموضوع لو ما اعرفك تتعب من الشغل جان طلبت منك  تاخذني بنفسك  بس اعرف الطريق طويل وراح يتعبك بالزايد 

گلت بعزم ونهيت الموضوع  : ما اكو روحة

رؤى : والله ضايجة وروحي طالعة خل اروح اذا ماتصدگ اتصل بيه 

تميم : كلت ما اكو روحة واذا طلعتي بدون علمي يا ويلج

جاوبت بعصبية ونفاذ صبر من تدخلاته : هاي شبيك صارلك فترى مكرهني بعيشتي 

لا تگولي شبيك ولا تخليني اطلع ترى اني تعبانة واريد اشوف العالم،

كافي حابسني بالبيت 

هاي مو عيشة ترى اني مو سجينة يمك وتتحكم بية بكفيك فك ياخة مني ترى خانگني خنگ اريد اتنفس من تدخلاتك بية

رد عليه بدون مايتمالك اعصابه  : لا تريدين على راسج تطلعين  حتى تتفرفرين ويا الگوا*ويد

قطعت كلامه بكف على وجهه خلاهم اثنينهم يسكتون ومايحجون شي

رمت جنطتهة بالگاع وقفلت  الغرفة على نفسهة مصدومة من الكلمة الي گالهة حتى الولد ما اهتمت الهم ولا شافتهم 

ثاني يوم  كعدت من الصبح اتملصت من حضنه حتى لايحس عليها  بعد ما اجى و اعتذر منهة على الكلمة الي طلعت منه غصب  وبدون ما يقصد

اتحجج الهة بضوطات الشغل ومايگدر يسيطر على اعصابه  وهو موقصده يجرحهة  بقى يتوسل بيهة ويبوسها حتى تسامحه

بالاخير حضنته  وسامحته رغم مافهمت ليش هيج صاير وياها بس تعرف بيه هو يحبها وما يكدر بدونها واكو سبب يخليه هيج يتصرف وياهة ومن بعد هاي الليلة قررت  تخصم كلشي  وترجع الثقة الجانت بينهم

طلعت ملابسهة من الكنتور  وراحت للحمام  سبحت  وطلعت  على كيفهة حتى لايگعدون على صوتهة سدت الباب  وسحبت نفس قوي وطلعت من البيت

گعد وراهة  ما لگاهة يمه گام  دور عليهة بالبيت ما اكو  فات الحمام  لاحظت بيه رطوبة  عرف هي سابحة قبل لاتطلع

بدون ماينتظر رجعته او يشوف وين رايحة اتصل بالرجال الي مكلفه حتى يراقبهة

تميم : اريدك تجيبهة الي من جوة الگاع فهمت

_ صار سيدي

سديت التلفون وكوم افكار تتلاطم براسي  و يا من هسة هي وبحظن من ! هيج عدها تكسر بخاطري البارحة كلها ردت ابدي صفحة جديدة وياهة وهي بس طلع الصبح رجعت لقذارتها

بعدها گعدو امين وعزيز يبجون سوى يريدون حليب واني عقل ما ضل براسي انوب همة گعدو يبجون فوك راسي صحت بيهم بنبرة قاسية حتى يسكتون مالي خلگهم  وبدال ما يسكتون زاد بجيهم

فركت صدغي قوة  احاول اهدي  اعصابي كبل لا افقد السيطرة على نفسي واسوي شي اندم عليه بعد

مرت ساعات لا هي رجعت ولا  هذا رجع خبر. ويا كل دقيقة الأفكار تاكل براس تميم. عدا عن التوأم مايسكتون مرة يلعبون ومرة يبجون

ومرة يردون اكل وكل شوي بمزاج شكل 

وهو عقل ما بقى براسه من التفكير

بعدها دگ علي رقم رفعه  طلع نفس الرجال الي كلفه يدور عليهة

_ استاذ لگيتهة

جاوبه بنفاذ صبر  : وين

بالبداية الرجال  اتردد يگوله وبعدين گاله   عالمكان ويا منو !

ماگدر  يصدگ مو معقولة الي يگوله حقيقة سأله خاف متوهم

فأكد له الي شافه 

سد التلفون  وراح لجارتهم تدير بالهة على التوأم  تحجج بالشغل ومستعجل لحد ما يجي ويرجع الهم 

_ ولا يهمك هسة اجيبهم يم البنات يشلنهم بعيونهم

تميم : اشكرج 

اجر سيارة وراح  للمكان الي گاله  عليه جان عبارة عن بناية متروكة نزل  من السيارة

يريد يجذب  افكاره  بعده ما ماشي بتجاه البناية شاف ابوه طلع من البناية  واضح عليه التعب يعدل بملابسه 

بعده  بنص دهشته شافه هي هم  طلعت وراه  جانت لابسة غير الي لابستهم قصيرات ومكشوفات وحتى حجابهة نازعته ومتمكجية

طالعة انسانة ثانية غير الي يعرفها  وشكلها  يوحي  انها  كانت تخوض معركة حميمية ويا ابوه

بالگوة تمشي ويا كل خطوة تعدل بملابسهة المفضوحة

صارت له الصدمة صدمتين

خر  عالأرض بعد ما فقد التوازن  من الي شافه،

كلشي تلاشى من تفكيره    

ما بقى بعقله غير هذا المشهد والخيالات الي تدور براسه عن لحظاتهم الحميمية

ضل يردد ويا نفسه  معقولة .. معقولة .... معقولة ابوي ومرتي 

اتقرب عليه الرجال الي يراقبهة

_ استاذ انت بخير

ما سمع شگال الرجال  جان احساسه داخل بير عميق مايسمع ولا يشوف اي شي غير هذا المشهد الي انطبع بعقله

ورة وين مسح وجهه وگام على حيله ما يعرف وين يروح ولا شيسوي كل الطرق ضاعت منه  ويردد ويا نفسه ... ليش ويا ابوي ..  ما كفيتهة اني. ... ما كفوهة الرجال الباقين  ...حتى تكسرني ويا ابوي بأبشع صورة  تكسر الضهر والروح.

بذاك اليوم ما رجع  للبيت الا بوقت متأخر  بعد ما گضاه يشرب  يجلد بذاته  لحد ما فقد عقله بسبب الشرب سكر لدرجة الجنون  ورجع للبيت شياطينه تتگامز براسه  حتى الشرب ما خلاه ينسى الصار

فتحتله الباب وعاتبته : وين تأخرت لهسة ماتگول وراك بيت ومرة

كل حقد الدنيا التم عليه همس من بين سنونه :  الصبح ويا ابوي و بالليل وياي اشكد ساقـ*طة وما عندج  شرف

بعدين فكر  يجوز  اوراس هم من الناس الي تطلع وياهم  ويجوز صدك باكت ذهب مرته ومسوية نفسهة بريئة كل هاي الأفكار تتلاطم براسه وهي جدامه

عافهة  وراح  للغرفة ذب  نفسه   ع السرير نوم نفسه غصب حتى ما يرتكب ببهة جريمة

اجت ليمه  ومددت بصفه  تحاجيه  وتتشاقة وياه بس  واضح عليهة  التعب والارهاق كل جم كلمة تسحب نفس وتكتم تعبهة دحست نفسهة بضهره وخلت ايدهة على شعره

رؤى : تميم

تميم : هااا

گالت بتعب :  احزر شنو اليوم

جاوبهة ببرود مميت وعقله مشتت : شنو اليوم

رؤى : احزر

جاوبهة حتى يگطع الكلام  

_  احجي شنو مالي خلگ احزر  اريد انام

اتصنعت الزعل ندسته من جتفه  وماتدري هو بأي لحظة ينفجر لبركان  : صدك تحجي ماتتذكر عيد زواجنا انتظرتك ما اجيت كلت ايجوز مسوي الي مفاجأة بس اشو اجيت كبل مددت على بطنك وفوگاهة سكران ومطفي ماتدري بالدنيا  طشت رشت حتى مالك خلگ تسهر وياي بهذا اليوم

عدل گعدته وهي هم كعدت على كعدته  صارو وجهًا لوجه  ضل  صافن بيهة جاوبهة بسخرية : زين اذا متذكرة اليوم عيد زواجنا

رؤى : ليش اكو احلى من هاي الذكرى حتى ما اتذكرهة

بس انت شكلك ناسيه ومغلس عليه و على هديتي

تميم : تريدين هدية من عيوني بس اصبري علي شوي وراح اجيب لج احلى هدية ابد ماتتوقعينهة بحياتج

رؤى : احجي لي شنو هي ما اتحمل اتضمهة علي وتريد احزرهة شنو

اعتلت على شفايفه ابتسامة سخرية : لاتستعجلين عليها راح تجيج

دار ضهره ونام صفح 

رؤى : هاي سويتهة صدك ونمت اكعد اريد اسهر وياك اريد نبدي من جديد مثل قبل بدون زعل وضغوطات

بالگوة كتم  غضبه غمض عيونه وجبر نفسه ينام وهي ضلت ضايجة ليش هيج يتصرف وياهة 

ثاني يوم كعد وانعاد عليه شريط الأمس والي هو عبارة عن ذاك المشهد  كلسع يخلص ويرجع

صاحت عليه حتى يجي يتريك 

حرك عيونه بتجاه الباب وجسمه متصلب عالسرير بدون حركة اشبه بالمشلول

اتعجب اشلون تتصرف عادي ولا كأن مسوية شي تلاعب الجهال وتشتغل وسوت له ريوگ

وجت اتكومه يروح للشغل

رؤى : شنو اليوم ما تريد  تحجي لي شبيك ليش اجيت سكران البارحة  وانت اصلاً ما تشرب !

من شافته بس يباوع عليه بدون مايحجي شي اتقرب عليه

كام رأسًا من مكانه قبل لا تلمسه

استغربت تصرفه بس ما حجت انتظرته هو يحجي شبيه  : اذا تريد ريوك  جهزته الك 

تميم : ما اريد

رن التلفون راح  ايشوف منو. طلع صوت ابوه  جاوب  وهو  كاره صوته وشكله 

تميم : الو

اصلان : ها تميم صباح الخير

ما جاوب بس طلع صوت يدل على سماعه الكلمة

اصلان :  تعالو اليوم اتعشو يمنا

تميم : شنو المناسبة !

اصلان : عندي موضوع مهم احجي بيه وياك ضروري تجي

تميم : اي موضوع

اصلان : من تجي احجي لك عليك ماينحجي بالتلفون  وهم اشوف احفادي شو فد نوب حارمني منهم عبالك عدوك مو ابوك

تميم : اليوم ما راح اجي عندي شغل على باجر راح اجي 

اصلان : يلة مو مشكلة بس  مو تنسى ضروري تجي

تميم : تمام

سد التلفون و طلعت بالحوش لحگته

رؤى : شبيك ياعيني من البارحة مو على بعضك متعارك ويا احد احجي لي اني مو حبيبتك وماتضم علي

صاح  بعصبية ضهرت كل غضبه المدفون   : وخري ايدج عني لاتلمسيني بعد

خافت من صوته وبعدت ايدهة

رؤى : على راحتك بس لا تبقى هيج متعصب ومخوفني

ما جاوبهة وراح اللتقى  ويا واحد يعرفه من جان  ويا ابوه  اتصل بيه وطلب  منه يلاگيه  بالگهوة اسرع من الضوة

وهذا الرجال ماجذب خبر اجى بساع

طلب منه يدبر له جم واحد من القتلة مأجورين واهم شي يكون من بينهم قناص

خلة الستكانة عالميز وحجة بريبة : شتسوي بيهم  منو ناوي تقتل

تميم : مو شغلك منو اقتل  انت بس عليك تنفذ واجرك واجرهم واصل ضروري تدبرهم  اليوم بالليل  

_ مادام بيها اجر وجبير  ادبرهم مايكون خاطرك الا طيب اليوم بالليل ساعة بالعشرة هم يمك

تميم : ركز لي عالقناص هذا اريده ضروري  وشرط يكون  يكون شاطر ما يخطئ الهدف 

_  اجتك عدلة  قبل فترى اجى واحد شلون يقنص  يجيبهة بالهدف فيت  من بعد اميال  يفيدك راح اتصل بيه

تميم :  جيبه خل نشوف

_ هم الك بس خلينا  نتفق  عالأجر حتى اكول الهم  حتى لابعدين تصير مشاكل تعرف هيج ناس ماتشتغل الا بالفلوس  والأجر العالي

تميم : مو مهم الفلوس شگد ما يطلبون اني حاضر

_ تمام اتفقنا

شرب استكانت الجاي وگام 

راح يجمعهم  بالليل جابهم مثل ماوعد تميم  ومن بينهم القناص

_ هذولا همة  ناس خبرة محد يطلع عايش من الي يحطونه جوة الزائد

شرح الهم  تميم الخطة كلها وشلون  يبدون الهجوم وهو البداية من القناص الي بدوره يقتل اصلان حتى لاينهزم  ويخلص نفسه  وبعدهة الباقين  يهجمون عالقصر  بس ما حدد الهم منو  المقصودين من داخل القصر  بس گال الهم  محد يطلع عايش من البيت

القناص جان متردد لأن بالبداية عبالك يصيد اي شي الا ارواح بشر

بس قنعه تميم  وكله مكافئتك اكبر منهم اذا نفذت المهمة بشكل صحيح.

وبسبب الفلوس  اقتنع طلع له تميم  صورة من جيبه  وشوفه اياها : هذا الشخص اريدك تخلص عليه ما اريده يفلت منك لو شما يصير ، فهمتني

ما لازم تعوفه لازم يموت ومايطلع عايش  من القصر

اندار للبقية واكد عليهم مرة ثانية : محد لازم يطلع عايش كل الموجودين لازم تخلصون عليهم  و اي شخص يتهاون وياكم راح يكون حسابه عسير

حركو روسهم بالأيجاب 

بعد الأتفاق رجع  للبيت و  كل ما اشوفهة يذكرهم سوى ويتخيل

لحظاتهم  نفس لحظاته وياهة بنفس اللهفة والنشوة بنفس الحب بنفس الهمسات والمداعبات

كل مايتذكرهم  سوى  يكره  نفسه لأنه جان غبي وغدروه بكل سهولة وهو  وثق بيهة

اكثر مما وثق  بنفسه 

قدم الهة الحب اكثر من ما قدمه لنفسه

عاف  كلشي واختارهة  هي والأولاد بس طلعت جذابة  وتريد تعيش حياة الثراء والسهرات من وراه 

تميم : حظري حالج باجر نروح نزور ابوي عزمنا

رؤى : ليش ما نأجل الروحة احس نفسي تعبانة حيل ومالي خلگ اروح

تميم : ليش من شنو تعبانة

رؤى : الجهال متعبيني وما اكدر كلشي اسوي اذا اتريد تروح روح وحدك لو اخذ الجهال وياك بس اني ما اروح اريد ابقى بالبيت وارتاح شوي 

تميم : راح نروح كلنا سوى ما نتأخر وبعدين هناك الخدامات هنة يعتنن بيهم لحد ما نرجع يعني ماراح تتعبين

رؤى : فدوى تميم خليهة غير يوم ما اريد اروح روح وحدك لا تجبرني اروح وياك

طخت بباله  يفضح كلشي جدامهة بس تمالك نفسه وحجة  بعزم : باجر نروح كلنا  وهذا اخر كلام زين

تركهة وراح  لفراشه اتمدد عليه 

الصبح عافهة تتجهز وهو  راح  لبيت جده  شافته جديته  مخنوگ ومهموم وجهه كالح

_  شبيك يايمة مهموم خوما بعدك تفكر بسالفة اخوك  والله يجذب  ومرتك ماتسوي هيج وتبيعك مرتك ذهب صافي واشرف من هاي التهمة الرموهة عليهة بدون ما يخافون من الله

تميم : لا جدة مامفكر بس مريض ومالي خلگ  اجيت اشوفكم خوما محتاجين شي

_ ما محتاجين شي بس ترد الضحكة لوجهك  وماتضل هيج مهموم والدنيا ضايگة بيك

تميم : ان شاء الله تهون ما تبقى هيج

_ ان شاء الله ،ان شاء الله انت بس لا تخلي الأفكار تاخذ عقلك هي تهون

كعد ساعة ويا جديته وقبل لايروح اللتفت الهة  : سلمي لي على جدي وگولي له يدعي لي محتاج دعائه

_ دوم ندعي لك الله يبرد گلبك ويرزقك ويبعد عنك الشر  واهل الحرام المايخافون الله

رجع لعده دنك لمستواهة  حظن  اجفوفهة بأديه وباسهن طول بالبوسة

_  الله ينتقم منهم شلون حارگين روحك  ومخلينك بس رماد شوي شوي تتبخر لحد ما تختفي

ترك ايديهة  وطلع من البيت خاف لا يبقى اكثر  ويكشف نفسه رجع  لبيته  لگاهة  جاهزة بس من فوگ خشمهة ما راضية تروح  همس ويا نفسه بحقد

_ ماترضى تروح وياي  بس ترضى  تروح  تتختل بالبنايات وياه

وصلو  لبيت ابوه  والطريق كله رؤى متوترة وحاظنة ولدهة  جان واضح عليهة ما جانت راغبة الروحة بس ما گدرت تعترض 

استقبلهم اصلان بالحوش بدون سهيل جان دازه بشغل بداله

من شافهم  ضحك : ابني الگاطع  همزين جيت وشفناك  عاجبتك گطع الصلة والرحم

ابتسمت من فوك جروحي وسويت نفسي عادي وبيدي امين  اخذه مني وباسه وشماه حيل وهو يكول ماشاء الله

بعدها رجعه الي

اتقرب على رؤى بس اتحولت ملامحه لغضب اخذ منهة وهم  وباسه  وخلاه بحظنه يلاعبه حجة بضحك 

اصلان : ولك تميم شو ذولا مايشبهونك ذولا يشبهوني هههههههه

ابتسمت واني اغلي من جوة هم صدگ بيهم شبه منه ماجنت منطيه اهمية بس هسة صرت اشك هم ولده مو. ولدي اني لهلدرجة جنت غبي ومخدوع بيها

دخلو  بالبيت وكعدو ثلاثتهم صح گاعدين سوى بمكان واحد   بس كل واحد بيهم فكره بمكان ثاني  اجت الخدامة

: انطيني اخذهم شوي عنج مدام

رؤى : لا شكرًا  خليهم يمي

حركت راسهة بأبتسامة وطلعت من الغرفة

اللتفت لرؤى حيل وضعهة تخربط لازمتهم بكل قوتهة ما تريد تعوفهم

وابوه  حاله مو احسن منهة تسائل ويا نفسه

تميم : معقولة خلانا نجي حتى ياخذ ولده الي جنت خادع نفسي انهم ولدي اني ومتباهي بيهم

فجأة اجى  صوته بنبرة جادة

اصلان : تميم اللحكني للمكتب عندي حجي احجيه وياك

اشرت له براسي وكمت جانت اخر نظرة نظرتها لرؤى بادلتني بأبتسامة مكسورة متصنعتهة گوة حتى ولدي نفسي خربت منهم وكرهتهم  ولا اهتميت الهم

گلت بگلبي والله لأدفعج الثمن غالي يا ساقـ*طة

لحكه للمكتب وكعد على الكرسي مقابل الطاولته

وبدون مقدمات گال : لازم تطلگ رؤى بأسرع وقت

حجيت برود واستهزاء : ليش هيج مستعجل على طلاگي  لازم تريد تاخذ راحتك اكثر وياها. شكل التختل ما يعجبكم بعد 

اصلان : شنو هالحجي شجاي تهذي انت

تميم : الحقيقية مرة مو ؟؟؟ بس يلا مجبور تسمعهة و تتجرعهة وتبلعهة وانت الممنون مثل ما جاي اسوي اني

اصلان : انلصم ولك  شنو نتختل وشنو اريدها انت واعي على نفسك شتكول

رديت ببرود كأني انسان

ميت  : مو علمود هالشي عزمتنا حتى تگولي طلك مرتك

وحتى ورة اشهر اذا مو اسابيع اللگيكم متزوجين واني طز بية وبمشاعري اني والحمار واحد

اتكورت ملامحه واتهجم وجهه صاح بغضب  : تمييييييييييم انت بوعيك لو شارب شي،

يعني حتى لا اكشفهة على حقيقيتهة الوصخة اللفت علي هاذ الأتهام

تميم : اتهام ؟؟ ترى شفتكم بعيني انت وياهة ما لگيت غير هالعمل حتى تكسرني بمرتي ما لگيت غير تغويهة وتسوي علاقة وياهة وحتى ولدي صرت اشك هم  مو مني

گطعت كلامي وبجيت من صدمتي ولدي الي جانو  قطعة روحي وفرحة عمري  و حرصت ما اخلي ذرة حرام توصل الهم طلعو هم من الأساس حرام

اصلان : لك ياغبي تبجي علمود وحدة خاينة،  تلعب بعقلك وتحرضك علي حتى لا اكشفهة  اضاهر التهديد والضرب  ما جاب نتيجة وياهة  وعرفت شلون تفرك علي

فتح الجرار وطلع مسدس ويتهدد  يخلص عليهة بس كمت وجريته ماخليته يطلع

تميم : تريد تضم سوالفك وتبرأ نفسك بموتهة مو

اصلان : شنو ابرأ نفسي ماخايف منها و  منك اني

حتى ابرأ نفسي  بموت وحدة ساقطة

..

المستشفى

الدكتور : اخي ترى اتأخرت هواي واحنى ورانة كوم شغل منا لنص ساعة اذا ما اجت راح نلغي الموعد

اوراس : اترجاك دكتور لاتلغيه هي هسة تجي البارحة اتصلت بية وكالت جاية

الدكتور : وينهة وقفنا كوم مراجعين حتى نبدي العلاج وياهة وهي ما اكو 

اوراس : دكتور اترجاك انتظرهة

الدكتور : تمام ،  راح اخذ غير مراجعين واذا اجت  راح نبدي بعلاجهة 

اوراس : ماشي

مشيت ليم الأستعلامات 

اوراس : ممكن استخدم التلفون

_ طبعا

رفعت السماعة ودكيت على تلفون بيت تميم. اريد اعرف وين اتأخرت  واليوم اول مرحلة  علاج  كيمياوي الهة  من بعد ما طلعت النتائج عدها سرطان بالثدي

اتنظرت احد يجاوب بس محد جاوب. سديت التلفون ورجعت من جديد واني اعتب عليهة هسة شكو لو گايلة لتميم عن مرضها هو اول تالي راح يعرف قابل تضل هيج  عايش على عماه  وغصبًا عليه يدبر فلوس ويعالجهة

بس هي معندة ماتريده يعرف شي عن مرضها  تريد اني اعالجهة بالسر حتى لاينقهر لأن ماعدنه فلوس حگ العلاج

وما يگدر  يطلب حقه من ابوه. سديت التلفون بعصبية وقررت اروح اگوله وشيصير خل يصير هو رجلها ومسؤل عليها  واذا على الفلوس يروحن فدوة الهة اني ادفعهن

نزلت يم بابهم ودكيته نفس الشي ما اكو احد طلع لي تالي فتحت القفل و دخلت كلت يجوز نايمين بس لگيت الداخلي مقفول بقفل

اوراس : وين راحو ذولا معقولة گالت له و راحو للطبيب  عفت القفل ورجعت للمستشفى على امل اللگاهم جدامي

حاجيت السكرتير :بلا زحمة  اجت المريضة رؤى حسان لو بعدهة

_ لا لحد الأن ما جت والدكتور كال خليها اخر دور لأن  تأخرت حيل 

بلعت ريگي وكعدت انتظر شوكت تجي  والمشكلة ما ادري وين راحت

......

زيد

هاي جانت اول مهمة الي وعدوني ينطوني فلوس جثيرة مقابل هاي المهمة حتى اكدر ارجع مرام الي و ارمي  كل هاي الفلوس على ابوهة حتى يقبل يزوجهة الي لأن هو  هذا الي يريده ابوهة من البداية فلوس وكلمن يدفع اكثر ينطيها

حظرت القناص مالتي رغم  ماجنت راضي  اقنص انسان  بس لخاطر اخلص مرام من اهلهة الجشعين  ومن الجحيم العايشة بيه قبلت اضحي بأنسانيتي واللوث ادي بدم بشر  علمودها

ثبتت القناص على احد الأسطح البعيدة  الي مواجهة لمكتب اصلان 

بس الهدف ما جان واضح لأن ما يثبتون كل دقيقة متحركين كل ما اريد اطلق يروح من الهدف من عندي

وباللحظة الي صار جدام هدفي اطلقت  بدون تردد  لكن  بنفس اللحظة مدري شلون  صار  الشخص الثاني الي وياه بالمكتب جدام  الطلقة واخترقت ضهره وگعو اثنينهم بالگاع، لعنت نفسي لأن المهمة فشلت و اكيد راح ينهزم بعد ما حس بالخطر

شلت القناص مالتي ونزلت  من السطح  وصعدت بسيارة جانت تنتظرني براس الفرع وانطلقت بيا  حتى لا انكشف او يتعرفون علي ويبلغون علينا

وعلى اثر هاي الرصاصة دخلو الجماعة للبيت وهمة اصلًا جانو متواجدين داخله بس ينتظرون اللحظة المناسبة واجتهم صارت  مواجهة بين الطرفين

بذاك الوقت جانت رؤى مختلة بزاوية الغرفة وحاضة ولدهة بحظنهة لا يصيبهم الرصاص العشوائي 

بس الأمر ازداد سؤء وصار صوت الرصاص قريب عليهة  وهوسة جبيرة خارج الغرفة  ماجانت خايفة على روحهة  لأن بكل الاحوال جانت راح تموت بالسر.طان بس خافت على تميم وجهاله لا يصيبهم الرمي ويموتون قبلهة شالتهم  اثنينهم ورادت تطلع  من الغرفة بس ما كدرت بسبب صوت  الرمي

رجعت لنفس مكانه  حاضنتهم لا يتصاوبون من شافت الرصاص قرب اكثر  ما لگت غير. الكومدي تخليهم بيه وتسد الباب عليهم  وبقت اتردد اية ( وجعلنا من بين ايدهم سدًا ومن خلفهم سدًا فهم لا يبصرون )

فجأة انفتح الباب ودخل واحد جنه ملك الموت يمشي بتجاهة بكل ثقة ويمسح بمسدسه وبحلگه جگارة باقي منهة ربع

جمدت بمكانهة  وشفايفهة  يرجفن من الخوف توسلته

رؤى : امانة لا تقتلني لخاطر جهالي

لا تقتلني اني مريضة اريد اتعالج اريد ارجع اعيش وياهم

بعدني هالسنتين بس يلا شفت الراحة والأمان، لاتاخذون حياتي انتو  والمرض

امانة الله ارحم بحالي و لاتخاذ حياتي بعدني ما شبعانة من الدنيا اريد اعيش وياهم  اريد اعيش ويا رجلي وجهالي امانة الله خلي رحمة بگلبك لاتقتلني اريد اعيش

يشوفهة تبجي وتتوسل بيه حتى لايقتلهة  وعيونهة  عالكومدي تخاف لايلمحهم همة هم لزمهة من شعرهة من فوگ الحجاب  برود اعصاب 

_ ما اقتلج .! معقولة لج تدرين شگد عرض مبلغ مقابل يشوف جثتج جوة التراب متفسخة وانتي بكل بساطة تكولين لاتقتلني

مانفع وياهة  لا توسلهة  ولابكائهة ما ضل عدها غير تستنجد بتميم وتصيحه حتى  يخلصهة منه

رؤى : تميييببيم تمييييييم فدوى تعال خلصنا منه

لكن  صوتها ضاع بالهوى ويا صوت الرصاص والموت 

_ اششششششش ليش مرعوبة  !!!.

الموت بكل الأحوال جاينة وما اكو منه مفر  فـ ليش نستقبله برعب وخوف ونسوي له قيمة اكبر منه وهو عبارة عن نوم عميق مايستحق كل الخوف ،

عادي استقبليه بكل بساطة استقبلي الرصاصة وكأنما تستقبلين حظن دافي ياخذج لمكان بعيد و حلو  عن هوسة هذا العالم وشره .. 

شمر عقب الجكارة وسحقهة بحذائه  ونفثت الدخان بهدوء مستمتع بالشعور الي يخلفه الدخان وراه 

وباوع الهة  بنظرات بادرة ابرد من الموت بين ما هي جانت حيل مرعوبة منه فما راد  يزيد عليها  رعبها اكثر خلصها  برصاصة اخترقت راسهة واخذت روحهة بنفس الثانية

عافها واكعة بالگاع والدم يجري من راسهة  وصوت بكاء امين وعزيز ملا المكان بس ما اهتم الهم هو تخلص من الهدف الجي علموده  وبعدهة يملي اجيوبه فلوس وكأن شيئًا لم يحدث ،

طلع  وهو يهمس ويا نفسه  ويرجع المسدس لخصره : أذا جان كل همجن  الخيانة  ع ليش تحبن وتتزوجن وتاليهة تنكشفن و تموتن

....

يتبع ...

لازال هناك  احداث اخرى  ،،،