.

صوتو ⭐⭐⭐⭐

علقو .....  

قصة

اجتياح

الفصل : ٢٠

الكاتبة ندى البياتي

..........

عزيز

كمل جدي صلاة واندار علينا على وجهه ابتسامة ودية تعبر عن فرحته بشوفتنا لكن ثواني واتكور وجهه وبدت عليه معالم الغضب  من شاف  سيري گام على حيله

اصلان : هاي شعدهة هنا ؟

عزيز

باوعت لي بأرتباك  بلعت ريگهة  ورجعت باوعت لجدي  وبدون مقدمات  اتقدمت حتى تبوس ايده  بس سحب ايده و ما خلاهة  

رجعت وگفت يمي بالعة اللسانهة ما گدرت تحجي شي همام  جان گاعد على كرسي  مخلي  رجل على رجل وشابك اديه ورة راسه حجة بسخرية  : هسة صدكت انت اصلان بالبداية خفت مضروب على راسك وفاقد الذاكرة  وگايم تخاف الله وتعبده

اصلان : هاي البنت  بزر  سهيل ما اريدهة يمي لأن اكيد نفس بيها نفس  النجاسة ابوهة   اطلعوهة من بيتي

عزيز :  بغض النظر عن ابوهة بس  هاي هم حفيدتك  مثل ما احنى احفادك،

و هي اجت وياي فـ اذا ماتريدنا نبقى بييتك  هسة نروح بدون مانسبب لك مشاكل

سكت  من شافني مخلي المنشفة على مكان الجرح وضاغط عليهة والدم ملطخها اتجاهل غضبه من سيري اتحولت ملامحه لقلق

اصلان : عزيز گلبي، اشبيك ليش جرحك ينزف 

  همام : شبيه يعني  الأفندي رايح متحارش بسهيل وهسة يدور عليه حتى يعجنه عجن

اللتفت لهمام ورجع لي كاتم غضبه : وليش تتحارش بهذا الجلب

عزيز : لا تخاف علي ما سويت شي  بس اخذتهة وجت برضاتهة يعني ما خطفتهة ولا جبرتهة مو سيري !

اشرت براسهة بتوتر بمعنى كلامي صح

اصلان : وهذا دمك شنو مأذيك لو متصاوب مرة ثانية

عزيز : لا بس شكلي من انهزمت انفتح الجرح 

همام : هسة لا تنگلب علينا  الجد  حنون فجأة، وتحسسنا انك  بحياتك ما شايف قطرة دم ولا مأذي حشرة  حتى هيج خايف على دم عزيز 

هذا حفيدك اذا تريده يبقى عايش خليه يمك ولا تخليه يطلع ويشوفونه رجال سهيل حتى لا يرجعونه الك مجفن

شهكت نجوى : آآه اسم الله عليه ليش  هيج تحجي عليه  الله لا يسويهة

باوعلهة صفح ما عاجبه كلامهة 

: هسة اني جايب من جيبي هو هذا  الي راح يصير هيج  سهيل ماراح يسكت ابد

اصلان : بدال ما تحجون بالألغاز احجو لي شصاير

همام : هذا حفيدك الي تحبه ومفضله على باقي احفادك ،

خلة كلها وحب هاي الحية الصفرة بنت سهيل واليوم صار  بطل وراح خطفهة من ابوهة وفوگ كلشي مگطع  اصابعه بالباب  يعني اذا ناوي يسامحه علمود خطف بنته ما راح يسامحه على الي سواه بأصابعه

اصلان :  عزيز صدك الحجي

حركت راسي بأيجاب

صاح علي بغضب من مكاني فزيت  : لك اني اريد ابعدكم عنه. وانتو تروحون تحتكون بيه، 

ما تعرفون شنو يگدر يسوي الغدر يمشي بدمه 

همام : بس مو مثل الي سويته انت ، غدرت بأبنك ابشع غدر  خليته يجي لعندك مأمن بيك وبعدين تخلصت منه  بدم بارد

اصلان : ما راح اتجادل وياك ولا ابرر لك  شي وصدك بالمقتنع بيه

همام : طبعًا لأن من الأساس ما عندك جواب تبرر جريمتك

اصلان : تريد تصدگ او لا  بس اني ما قتلت ابني ولا جنت مفكر اقتله رغم هو انقلب علي وتحداني

همام : اساليب الأقناع مالتك  ماتمشي يمي لو تحجي ما للصبح تبقى بنظري انت قاتل اهلي

اصلان : على اساس اخر همك شنو يكون مصير اهلك  وما تهتم اذا جان عدلين او ميتين.  هاا

عزيز

سكت ما عرف شيجاوبه ،عاف نقاشه ويا همام واجى يطمن علي

اصلان : ارفع فانيلتك خل اشوف شلون صاير اخاف  مفتوح كله

رفعتهة الدم مغرگ بطني  اتنهد بأسف  وباوع لسيري بتوعد وحتى اتدارك الوضع حجيت بألم

عزيز : هسة تبقى تخزر بينا لو تشوف لي حل دمي راح يخلص

راح جاب  وصل ثانية ومي مسح الدم الي متخثر  على مكان الجرح. والحمد لله ما جان فتح جبير  بگد وغزت الأبرى  بس شكله وريد حتى ينزف هيج  

ما لگى جدي  شي يسد الجرح ويوقف النزيف  بيه غير انه يجوي مكانه بالنار  

طلب من نجوي تخلي السجين عالنار مثل  ما جان يسعفنا بالقرية من ننجرح جرح عميق  يجوي مكان الجرح حتى لا نخسر دمنا

صح   جان يوقف النزيف بس  يخلينا نتگامز من الحرگ  ونبقى نلوب ساعات  گلت ويا نفسي لو مخليه يخزر بينا ولا هذا الأقتراح 

ونجوى هم ما جذبت خبر راحت عالسريع خلتها عالنار تحمي واجت  اشر لي اكعد  عالكرسي عريض يتسع لشخصين كعدت ونزعت فانيلتي كلها

سيري من الخوف نطقت : ترى  الدنيا اتطورت محد بقى يستخدم هاي الأساليب البدائية  اكو شي اسمه  شاش وتعقيم مخدر  و دكاترة مختصين بهالشي

عزيز :  لاتخافين غير متعود على طب العرب مال جدي تعرفين شلون جان  يخدرنا قبل العملية  يخلي جدر ستيل براسنة ويضربه بكل قوته بحديدة يرج عقلنا رج   وبعدها لا اراديًا   نفقد الوعي ههههههه

بعدني  ملتفت على سيري  واحشش على  طرق علاجات جدي  بالقرية وطبعًا سالفة  الجدر والتخدير اني اخترعتهة حتى اضحكهة وتنسي الخوف لأن شكلها ارتعبت من شافت السجين حمرة جمر عبالك هي الي راح تجربها مو اني 

ما حسيت الا  زيد خلا اديه على جتوفي  من جدام  وميل جسمي عالكرسي حتى  ثبتني  جسمي  و ما اتحرك  او انطي ردة فعل  وجدي خلا السجين على مكان الجرح بگلب ميت

حسيت بألم الجوي صعد  لراسي  غمضت عيوني وصكيت اسناني بكل قوة حتى اتجرعه وبحركة لا ارادية حركت نفسي منهم حتى  يعوفوني

حجيت من بين سنوني كوة لازم نفسي من الوجع : اااه غير تنطوني  اشارة قبل لا تجويني

انطى السجين لنجوى  وحجة بنبرة طبيعية مو كأنه قبل ثواني مشوغ روحي : لو منطيك اشارة جان عقلك يرفض بسبب الخوف وما راح تخليني اكوي لك الجرح بشكل صحيح يعني راح يصير العذاب عذابين

همام : من بعد هذا الحدث صرت اشفق عليك عزيز  الله يساعدك شلون جنت عايش  ويا واحد  هم قاتل وهم  مختل عقليًا

عزيز 

تجاهله جدي  وضل مركز وياي    وينطيني جرعات امل حتى انسى الحرگ

بس شأنسى الحرگ اذاني اكثر من النزيف باوعت لزيد الي  ماخذ وضع الصامت وگتله : لو مارين على صيدلية  قبل لانجي هنا مو احسن 

زيد : راحت من بالنا

بس يلا جدك خوش علمك درس حتى بعد لا تتصرف على راسك  ولو انت اجتك رصاصة شوي لا اخذت روحك  و ماتعلمت درس تريد تتعلم درس من جوية

عزيز : گول ادروس مدري  من وين متعلم على طب العرب مالته

ضليت  اللوب من الحرگ وسيري گاعدة يمي تواسيني  بس شيفيد محد يحس بالنار غير المجربهة

همست لي  : هسة ليش خليت هذا المتوحش يعالجك

عزيز : عدلي الكلمة مالتج لايتوحش من صدگ ويچويج  يخليج تصحين توبة اذا سمع  هاي الكلمة

سيري : بابا طالع على جدو بالعصبية  مدري شلون راح نرتاح بحياتنا وياهم

عزيز : راح نرتاح بس خلي تعدي هاي الأزمة  واوعدج راح نرتاح واذا ما ارتاحينا نعوفهم ونشرد

سيري : اخاف بس نبقى نحلم  وما نگدر نهرب ابد

عزيز : ثقي بية راح تكون حياتنا حلوة غصبا عالكل

جلبت بأيدي وخلت راسهة على جتفي

سيري : صرت اخاف احلم. بالراحة  وانصدم بالواقع  اخاف هاي الناس الحوالينا ياخذون فرحتنا وسعادتنا  ويعوفونا  نخيط بجروحنا الماتتخيط ولا تندمل

عزيز : شبيج سيري ليش يائسة كولي يا الله

سيري : يا الله  مالي غير الله وانت وهذا الي مخليني اتمسك بخيط حلم رفيع  بأن راح تكون ايامنة الجاية احلى. مو ضيم وقهر وفراق

حظنت راسهة بأيدي جانت خايفة من الأيام الي جاية ما جانت حالتي احسن منها بس جنت اتصنع القوة وخصوصًا زيد وجدي  وياي يرشدوني وما يعوفوني وحدي

انقطعت افكاري بصوت همام يصيح بالتلفون  بعد ما عرف جماعة سهيل مقتحمين البيت ماله يدورون علينا

همام : شلون تسمحون الهم يدخولن للبيت

_ غير دخلو مستعدين اي واحد يشوفونه يطلقون عليه النار  ومتوعدين ياخذون بثارهم

همام : اني ليش مخليكم ليش ادفع الكم فلوس اذا شوي زبالة يدخلون ويطلعون بكيفهم، لازم اي واحد  يفوت للبيت بدون اذن ما يطلع عايش منه

و  اذا اسمع بيهم داخلين مرة ثانية انتو الي راح  تتحاسبون مو همة

عزيز

سداه من يمه  اعصابه شايطة خفت لا يذب عصبيته بسيري، كمشت سيري جسمها يمي تدور على امان  ماعدهة ثقة بهمام  بأي لحظة يرجعها لأبوهة  حتى مايعرض شغله للخطر 

بعدها اجى اتصال لزيد راح   يجري الأتصال بعيد عنا

زيد : الو

مرام : اشلونك  ضل بالي شصار ويا البنت  كدرتو تعرفون اخبار عنها لو لا 

زيد : گدرنا نطلعهة بس  شكلنا اتورطنا

مرام : اتورطتو  ، ليش !

زيد : ابو البنت ماراح يسكت اذا ما ينتقم لنفسه  ويقتلنا

راح صوتهة من التلفون  

زيد : الو

مرام : وياك

زيد : مرام اذا صار علي شي سامحيني على الخذلان الي سببته الج ذاك اليوم وخليتج تبجين وراي

مرام : بدون ماتحجي اني سامحتك بساعتهة

سكتت شوي تستجمع افكارهة  وكالت : سامحتك  لأنك جبان و مو مال واحد يعتمد عليك بشي  فليش اعتب عليك  لو ما اسامحك

زيد : ههه فعلًا جبان و حقج شماتكولين

جرت حسرة قهر و سدت التلفون مني بقيت واگف بمكاني فعلًا جنت جبان  وما كدرت اسوي شي علمودهة

جبني خلاني اخسرهة وهي توسلتني ما اعوفهة و اقاتل علمودهة

رجعت التلفون بجيبي ، ورجعت يمهم  كاعدين يفگرون بحل يخلصهم من هاي الورطة  سيري لازگة على  عزيز  والجد وهمام كلمن گاعد بجهة  ونجوى مخبوصة تطبخ الهم  بس هو منو اله نفس ياكل كعدت يمهم  

نجوى

دخلت سيري للمطبخ  مشابكة اصابعهة سوى سألتني بأرتباك تحاول تبين نفسهة طبيعية  :  جدي راد علاجه بس ما اعرف وينه ؟

نجوى : هناك  ... اشرت الهة فوگ الكونتر  ابتسمت  وراحت مدت ايدهة واخذته ضليت اباوع الهة

طولهة حلو رشيقة و ناعمة حيل وشعرهة الأشقر مثل المي  بلا ارادة اتلمست شعري  وكلت ويا نفسي اشبي شعري مو مثل شعرهة قاطعتني

سيري : هذا !!

نجوى : اي هو

اخذته وراحت

شوي  ورجعته  : اساعدج

نجوى :  ما يحتاج اني راح اخلص

سيري : لعد اكعد يمج  لأن نظرات جدي تخوف وما اريد يبقى يباوع علي هيج

نجوى : هههههه اكعدي .... سألتهة بفضول ... هو صدك يكون جدج لو شنو اشو كلشي مافهمت منكم

سيري : والله مثلج اليوم عرفت هو يكون جدي واضح هو ما جان يحب بابا وبينهم عداوة و اكيد ما راح يتقبلني مثلكم

نجوى : وانتي ليش انهزمتي من ابوج

سيري : لأنه جان رافض علاقتي  بعزيز .

نجوى : علاقة شنو

سيري : علاقتنا  اني وعزيز  نحب بعض واتفقنا ننهزم بس بابا جان معارض

نجوى : يعني عزيز  يحبج !!

سيري : اي هو يحبني  وحتى انا هم احبهة رغم علاقتنة صارت بضروف غريبة ما جنت متوقعتهة تصير بس القدر خلاهة اتصير 

نجوى

بينت نفسي مامهتمة وتمنيت الهم حياة سعيدة سوة وهي منطلقة تحجي بسعادة عن حبهم  قاطعتهة : شبي راسج ليش مضمد يعني ابوج ضربج

سيري : لا لا انضربت بالحايط و اتأذيت والحمد لله عزيز اخذني للمستشفى وما جابني لعند جدو جان چواني بالسجين هههههه

نجوى 

حركت راسي بمعنى متفهمة كلامهة بعدها كملت طبخ وفكري كله يم عزيز  اشلون راح حب وحدة غريبة بهالسرعة واني ما انتبه لي

بعدين اتذكرت كلام جدي ما لازم اسمح  لمشاعري تسيطر علي هو عاش عمره كله يعتبرني اخته  واذا اعترفت له  بحبي راح تتغير افكاره كلها عني ويمكن يكون يكرهني  وهو بالأساس  لاگي غيري و حلوة وحتى تبين  احلى مني  وانعم مني عبالك مرمر

وانا الي جنت مغرورة بجمالي بالقرية ما اكو احلى مني

صبيت العشة وكعدو يا كلون سيري كعدت يم عزيز  هذاك المكان جان الي. اني جنت اكعد يمه واكل وياه

ونتعارك منو ياكل اكثر شي صعب اتحمله عبالي گدرت انساه بس اليوم رجع كلشي علي 

بالگوة اكل وجهي محتقن من القهر  وشفايفي يرجفن لحالهن خفت لا احد يسألني شبيج وابجي وافضح نفسي  بس جدي لاحظ اني مو طبيعية  

اصلان : نجوى انطيني المي

نظراته جانت توضح هو يعرف الي يدور بداخلي  

تمالكت نفسي واتضاهرت اكل 

بعد العشة اني بقيت اغسل بالمواعين ما اريد احد يشوفني ويحس علي  

حسيت واحد دخل للمطبخ درت راسي همام بدون مقدمات گال

_ بعدج ما ناسيته

سويت نفسي ما اعرف شنو يقصد  : هو منو !!!

رفع حاجبه  بمعنى مو علي النكران : هسة لو ما جنت بالقرية وكلشي صار جدام عيوني

نزلت راسي بقهر واستسلام :لأن حلوة  حبهة  مو !

همام : لا،  بس هي حرباية  وكلسع بلون فوگع بفخهة

نجوى : بس واضح  هو يحبهة مو مال فخ لو اجبار

همام : گتلج وگعته بفخهة شي طبيعي يحبهة  ويحب ابوهة هم

رفعت راسي وحجيت بنبرة حزينة : ياريت ما تگوله شي من الصار بالقرية

رفع جتافه بلا مبالاة :  اني شعلي بيكم، وبعدين خلصو الزلم هيج مجلبة بيه ترى اكو غيره ملايين بس انتي متريدين تشوفين

نجوى : هههههه  الملايين ما جانو موجودين بالقرية العايشين بيها لما اتعلقت بيه  وكمت ما اشوف غيره

همام : هسة اجيتي لبغداد  واستغلي الفرصة و راح تعرفين كل مشاعرج تجاه عزيز جانت عبارة عن نقص حنان واهتمام لگيته بيه  مو حب صريح 

نجوى : ياريت لو  يطلع هيج

لأن صعب ابقى اتفرج عليه وهو يختار شخص ثاني غيري واذا بقى الأمر هيج راح ارجع للقرية على الأقل ما اضطر اشوفه ويا غيري  واضل اقهر بروحي

همام :  قصدج ترجعين لمحمود ؟؟؟

نجوى : ما ادري 

همام : شنو ما لگيتي غير ذاك الأهبل

نجوى : على الأقل هو هم يحبني ويهتم بية

همام : وانتي ياهو يهتم بيح تحبينه !!!

حجاهة بنرفزة ما ادري شنو الي مضوجه  بكلامي خلاني احس نفسي رخيصة و يا هو يحجي وياي  گبل اكوم احبه واتعلق بيه وضحت له وجهة نظري حتى لايسيئ الظن بية : مو مثل ما مفكر بس ذولا الأثنين الهم مكانة خاصة  عندي  ويختلفون اخلاف جذري عن البقية الرجال

همام :  اها مكانة خاصة حقج

نجوى : انت شنو الي مضوجك بكلامي ليش احسك تستهزء بية وبمشاعري  شنو اني وحد عن العالم وحرام علي احب لو انحب

همام : ما ضايج من كلامج ولا مستهزأ بيج بس  ضايج عليج ما تعرفين تختارين الشخص الصح

نجوى : ومن هو الشخص الصح برأيك ؟؟

همام : اسألي نفسج منو هو الشخص الصح

نجوى : يمكن الشخص الصح هو محمود بس انا جنت  ما حاسة بهالشي 

همام :   تحجين صدك ! هسة ما لگيتي غير محمود يكون الشخص الصح بالنسبة الج

نجوى : ليش اكو شخص اخر غيرهم

بعده ممجاوب على سؤالي اجاه اتصال رفعه بسرعة

همام : أأمر بابا

ادريس :  شنو هاي البلبلة الي مسويهة،

انت تدري  سهيل متخبل وراح يحرگ الدنيا على راسك

سحبت نفس وجاوبت  : مو اني هذا اخوي الي سوة هاي البلبلة

ادريس : اخوك ؟ قصدك هذا الي يشبهك وجان متقمص شخصيتك ؟

همام : اي هو

ادريس : والله هذا ينراد له جرة اذن  معدلة تخليه  يفكر الف مرة  قبل لا  يندگ ويانة،

بس اريد  اعرف زيد وين لگاه وشاف منه حتى يدخله ويانا وهو كله عبارة عن اخطاء  بأخطاء

همام : لايضل بالك بابا ، الأمر شخصي بينهم مايخصنا  لا من قريب ولا من بعيد

ادريس : و أن يكن،  هذا يسبب لنا بلبلة ويخلي كل واحد عنده مشاكل شخصية ويانا تمرد علينا

راح يفتح علينا بوب مقفلة بحجة امر شخصي و ما علي بالشغل انت تعرف اعدائنا اكثر من الي ويانة وهو بهذا  بتصرفه الأرعن فتح الهم الطريق علينا  فهمتني

همام : فهمتك 

ادريس : انت وين هسة

همام : ليش ؟

ادريس : تروح تگول لهذا  اخوك يحل الأمر بسرعة ويرجع له بنته

وينهي المسألة ما اريد مشاكل تخلينا بنص الصورة جدام الكبار 

همام : واذا ما رجعها !

ادريس : ساعتها يتحمل غبائه وانت تعال يمي  محتاجك

سد التلفون  قبل لا ارد عليه  رحت لعند عزيز :  عزيز رجع. سيري لأبوهة قبل ما السالفة تكبر ويتدخل ادريس بنفسه  

اتفاجأ بكلامي  : وادريس شعليه

همام : سهيل من الكبار الي يشتغلون وياه والصيبهم يصيبه واكيد ماراح ينطي بيه علمود  حظرة جنابك 

جلبت سيري بيه بقلق  وتوسلته : لاتخليهم ياخذوني

عزيز : مستحيل ارجعج

همام : هي مو مال ادراما  اذا اتدخل ادريس ساعة وحدة ماتبقى عايش

عزيز : حتى لو نص ساعة مال ارجع سيري لأبوهة مستحيل

همام : انت شلازگ بيها،

هيج مرخص حياتك علمودها  وهي ما تستاهلك تعلمني بيها  هاي وحدة بس تلگى الامان تتخلص منك

عزيز

باوعتلي بقلق وحركت راسهة  حتى ما اصدك بكلامه: مع ذلك ما ارجعهة لأبوهة

همام : الشغلة مو مال عناد افتهم وشغل دماغك

وگف الشايب على حيله وگال بثقة : مو حبًا بسيري  بس اي واحد يحاول يلمس شعرة وحدة من عزيز راح يضطر يواجهني بنفسي بالأول

همام : وانت شبيدك تسوي،

حير بروحك بالبداية انت اول المتصفين اذا  دخلو هذا البيت

اصلان : انت شكلك بعدك ما تعرفني زين وشأكدر اسوي

همام : بلة ما تكرمنا بسكوتك   گاعد  تبيع بطولات براسي هو شوصلنا لهذا الحال لو ما انت هسة جاي تحمينا وتدافع عنا من الحثالة امثالك  انت لو بيك خير جان ما غدرت ابوي بدم بارد

استشاط غيض من كلامي وبلمح البصر سحب المسدس من خصر زيد وخلاه براسي نجوى. وسيري خافن لايسويهة صدك و  يطلق النار علي

نجوى : جدي لا تسويهة امانة

همام

زيد راد يهدي الأمر بينا و مو وقتهة  بس ماهتميت

جاوبت بطريقة مستفزة خبلته :  مو غريبة عليك هو انت ابنك الي من  ولحمك ودمك  قتلته  ضال علي ماتقتلني

اصلان : همااااااام

سحب اقسام وجان ناوي يضغط عالزناد بدون تردد لو لا زيد صار بينا

زيد : حجي لاتتهور

اللتفت لي وكال بعزم :  همام كافي تستفز  جدك  هو ما قتل ابوك  ولا هو الي سوة له كمين 

همام : مايحتاج تدافعله وتطلعله اعذار

زيد : ما ادافعله ولا اطلعله اعذار بس  ابوك هو الي نصب كمين لجدك حتى يقتله

همام

تسمرنا كلنا بمكانا محد بينا مصدگ كلام زيد  : انت شتگول كتلك لاتدافعله  

زيد : ما ادافع عنه  لأنه انا جنت احد الأشخاص المكلفين بهذا الكمين ، بس ما جنت اعرف ليش يريد يتخلص منه

لأن احنى كجنود ممنوع نسأل ننفذ الي يطلبونه منا بدون نقاش  وهذا الصار

وبذاك اليوم بالمستشفى يلا عرفت ليش طلب منا نسوي هذا الكمين لجدك 

همام

وخر المسدس مني وجهه  على زيد  : انت انت واحد منهم اكيد تعرف البقية منو وتعرف منو  القناص الي اطلق النار عليه احجي لي منو الدزاكم علينا  حتى تقتلونا  احجي

زيد : كتلك ابنك هو الي طلب منا نتخلص منك بس الرصاصة اجت بيه هو

اصلان : ما اريد اي توضيحات بس اريد اسم الشخص  القتل ابني

زيد : اني  هو ذاك القناص

همام

ذب المسدس من ايده بعصبية  وبلمح الوقت لكمه على وجهه  لكمة قوية اذته حيل بحيث انصدم من قوة قبضته  ولا احنى جنا متوقعين هيج  راح يلكمه

بعده ماممدافع على نفسه وجه له لكمة ثانية  بنفس القوة وبين الصدمة الي احنى بيهة رفسه برجله  وزيد ما يرد له بس يدافع عن نفسه من رفساته  اتحول جدي من عجوز هرم الي شخص كل الحيل بيه  اتولا زيد ضرب ورفسات وين ما يجي

اصلان : احمد الله  اني حلفت بعد ما اللطخ  ايدي بدم بشر والا جان خليت رصاصة براسك ونهيت حياتك مثل ما اخذت حياة ابني مني

همام

وكف زيد على حيله يعدل بنفسه ويتنفس بصعوبة  من الضربات الي تلقاهة  : انت اكثر واحد تعرف شنو هي الأوامر وشلون تجبرونا ننفذها بدون نقاش  ولازم غصبًا علينا ننفذ او نكون مكانهم اذا اعترضنا او تهاونا

وبين ما جنا مصدومين بأعتراف زيد  ما سمعنا غير صوت رصاصة عبرت من يم جتف زيد فززتنا كلنا  نجوى من الخوف صرخت وخلت ايدهة على اذانها ونزلت راسهة مرعوبة من صوتها

اللتفتنا بتجاه صوت  الرصاصة  جان المسدس بيد عزيز  موجهه على زيد وجان ناوي يضرب الثانية

عزيز : ما خطئت الهدف بس اذا بقيت دقيقة اخرى هنا راح اسدد مباشرتًا على راسك

صاح عليه اصلان  : عزيز  ارمي المسدس من ايدك

همام 

ما سمع منه وبقى موجهه مسدسه بوجه زيد  بدون مايرف له جفن  جان ناوي فعلا يقتله كل ذرة ملامحه جان يتملكها الغضب والحقد على زيد 

لحظات وطلع من البيت  بدون كلام  نزل عزيز المسدس  على مهل مثل الي مو مصدگ الي سمعه

كعد الشايب بالگاع بقهر لازم گلبه  بعد ما عرف  ابوي هو الي سوة هذا الكمين وهو الراح ضحية بيه

سيري سحبت المسدس من ايد عزيز الي جان بحالة صدمة 

عزيز 

بعد ما خر جدي بالگاع يبجي على ابنه كنبزت  بمستواه  وببالي كوم اسألة اريد اجوبة الهن منه

جنت اريد اجوبة صادقة  مابيها اي كذب و لا تزوير بس اسألتي جانت عبثية مو مترابطة كأن مجرد افكار تدور برأسي  واريد اطلعها للعلن واتخلص منها  قبل لا انجن  حجيت بخفوت وببرود مشاعر مميتة اباوع للفراغ الي صابني : ابوي ليش  جان ناوي يقتلنا  ويقتل امي ويقتلك ويانا،

يعني انت صدگ جان عندك علاقة بأمي ، حتى ابوي وصل لهاي المرحلة الي خلته يدز جماعة يقتلونا كلنا بدون ما يفكر بينا احنى ولده شراح يصير بينا،

زين انت ليش ما قتلوك مو همة جايين علمودك خصيصًا  مو المفروض احنى نكون بعداد الأموات وهو الوحيد الي يطلع منها عايش، 

ليش صار العكس ليش هو مات واحنى بقينا !! ليش انگلب كلشي وصار العكس

شنو السر الي صار بذاك اليوم ورافض تحجيه النا

اصلان :  ما اعرف بس الي اعرفه امك. جانت وحدة خاينة كدرت تلعب بقعله الله اعلم شنو گالت له عني حتى خلته يجن جنونه

عزيز : يعني انت ما ملتقي بأمي مثل ماگلت بالمستشفى

اصلان : بلى اللتقيت بيهة وهددتهة  تترك ابني لأن من المستحيل اسمح لأحد يأذي  ابني ويلعب بمشاعره صح جانت علاقتنا مو شي اني وياه بس مستحيل اسمح لأحد يستغله ويستغل طيبته كائن من يكون علمود مصالحه الشخصية  ابوك جان مثلك انسان صافي ونقي ماعنده اي مكر ولا خداع بحياته ما اذى احد ولا كسر خاطر احد    بس امك هي الي خلته يتغير ويتحول لأنسان شكاك لحد ما انجن

عزيز

كعدت بالكاع وخليت ايدي على حلكي  اريد استوعب  السمعته

يعني امي  امي هي جانت السبب بدمارنة زين ليش ، ليش هيج سوت  شنو الاستفادته وشنو جانت غايتها

كل هاي الاسالة تروح وترجع بعقلي  كلشي طلع جذب بحياتي ما اعرف اصدك منو لو اجذب منو كلها اختلطت علي  ولا واحد بيهم بريئ كلهم مذنبين واحد يذبها براس الاخر

همام طلع من البيت  بدون ما يهتم شنو الحقيقة وشنو الخداع لأن واضح هو ممصدك ولا كلمة من جدي

......

زيد

طلعت من البيت مو خوفًا على حياتي اصلًا ان يكون السلاح موجه علي مثل سجينة  ملك الموت شي عادي عندي واعرف نهايتي تكون فضيعة بسبب الأرواح الي اخذتها بحياتي ولازم اذوق  من نفس الكأس ويمكن كاسي يكون فضيغ لدرجة مايتصورهة العقل

بس طلعت حتى لا يلوث اديه بية ويضيع انسانيته وبعد مستحيل يگدر يرجعها ولا يرجع حياته السابقة  جانت صدمة بالنسبة الي ان عزيز يشهر  المسدس بوجهي

مع ذلك ما لمته ولا حقدت  عزيز هو اكثر شخص تحمل صدمات من كل  هاي الأحداث المتشابكة

طلعت تلفوني ورجعت اتصلت بمرام هي الوحيدة الي تكدر تخفف عنه ومن  يشوفهة تتحسن حاله 

رفعت الخط بسرعة : الو اتفضل 

طلع زوجهة سحبت نفس حتى لا اتهور  واطلع ضيم الدنيا بيه : ممكن احجي ويا المدام

اياد : حتى احنى بالغرب ما وصلنا لهاي المرحلة من الأستخفاف والأنحطاط  ان نتصل  على غيرنا بالليل ونطلب  زوجاتهم علني وبلا مستحا

زيد : بس تسونها بالسر وتلعبون بكيفكم.  ترى ما اكو فرق اذا بالسر واذا بالعلن  و انطيني مرام بلا لغوة

اياد : اشوفك ماتستحي بكل وقاحة تكول اسمهما على لسانك عبالك هي من باقي اهلك 

زيد : هي مو بس من باقي اهلي، هي بالأساس اهلي  حبيبتي وصديقتي قبل لا تشوف جهرتك الزفرة  اذا جنت ما تعرف 

اياد : على الأقل جهرتي الزفرة مثل ماتگول ساعدتهة بأسوأ ايام حياتهة مو مثلك عفتهة ومشيت ورحت ركضت ورة الناس الموزينة حتى تصير واحد منهم

كلامه غثاني وما خلا اعصاب براسي  : وحق الله اذا ما تنطيني احجي وياهة هسة  اجي للفندق واخلي رصاصة بين رجليك  وخلي اروح اعدام بعدها

سمعت صوتهة تكوله  "كافي انطيني التلفون ،،، الو

هديت نفسي وحجيت ببرود  : اكدر اطلب منج طلب

مرام : اتفضل

زيد : راح انطيج عنوان ياريت لو تروحين عليه بدون ما تحرجيني

مرام : عنوان شنو  !!

يتبع ....