أرواح ضائعة ( الخلاصة )

بسم الله الرحمن الرحيم وأخيرًا الرواية خلصت بعد عناء، وتقريبًا دي أكتر رواية اتكتبت في ظروف صعبة عشان كدة خدت وقت أكتر من اللازم لغاية ما أخيرًا خلصت للأبد ومش هيكون في أكتر من الجزء ده، عشان كدة هوٌضح هنا كام حاجة يمكن محدش أخد باله منها... وأول حاجة هتكلم عنها هي اسم الرواية، الجزء الأول كان اسمه " أرواح مُتنقلة " وطبعًا مش محتاجة أشرح أنا سميت الرواية بالاسم ده ليه، لكن... الجزء التاني اسمه " أرواح ضائعة " وده لأن جزء كبير من الرواية بيتكلم عن أرواح بيدورو عليها بداية من روح داليا إللي ضاعت في أول الرواية، وروح إحسان إللي كانو بيدورو عليها، وأرواح كتير في النُص كانت ضايعة ولقوها. من غير ما ندخل في تفاصيل عميقة، الرواية كانت شارحة أنا ليه سميتها بالاسم ده عشان كدة هتنقل للنُقطة إللي بعد كدة وهي... الهدف من الرواية : أول حاجة كُنت عايزة أوٌصلها من الرواية دي، هي إن الواحد يرضى بقدره مهما كان هو إيه، زي مثلًا شخصية ميجو إللي ركزت عليها وقد إيه كانت حياته بايظة بسبب البيئة إللي اتولد فيها وإللي قدر بردو يخرج منها بصعوبة وبعد ما أخد جزاءه، وكمان شخصية جابر اللي بردو ذَكرت إن حياته مكنتش أحسن حاجة وإنه طول الرواية بيحاول يتغير. وغير بقى شخصية مخيمر إللي بدأ يتقبل قدره أكتر في الجزء ده وبدأ يتعالج من الأفكار إللي كانت في دماغه من الجزء الأول. وفي شخصيات تانية كانت دايمًا تشتكي من حياتها لغاية ما وصلت للرضا النفسي إللي لازم كلنا نوٌصله حتى لو مش بنحب الحياة إللي احنا عايشينها. الحاجة التانية بقى إللي كُنت عايزة أوصلها، هي موضوع غسيل الدماغ واستندت كمان على شوية معلومات حقيقية عشان أوُصل إن ممكن حد يستوٌلى على عقل واحد تاني ويخليه يعمل إللي هو عايزه وكأنه إنسان آلي زي شخصية وهدان. وطبعًا كان في شوية رسايل صغيرة في النُص مش لازم أشرحها عشان كدة مش هنخلص، بس أتمنى تكونو أخدتم بالكم منها. نيجي بقى عند الشخصيات : وزي ما بقول في أي رواية بكتبها، مكنش في ولا شخصية مثالية في الرواية دي بالذات، لأن كلهم عندهم خلل في دماغهم ومشاكل بتخليهم يبعدو عن الحيطة إللي ماشيين جنبها ويخالفو القانون، وطبعًا بتيجي على دماغهم في الآخر. وملحوظة كمان، الرواية مش بتروٌج لأي عمل مش أخلاقي، ولما أي شخصية بتغلط هتلاقوني عاقبتها علطول، زي موضوع إنهم كانو عايزين يسرقو جهاز من المعمل وخلتهم يتسرقو ويتبهدلو في الآخر، وزي موضوع ميجو إللي كان بيخونهم وبيشرب حشيش، واتحبس في الآخر. وبالنسبة لشخصية عبده وشهاب إللي كلها كانت غلط في غلط، فدول شخصيات فرعية كدة كدة ملهاش أي لازمة ولسة عقابهم مجاش، ممكن في مستقبلهم بقى ييجي. كان في شخصيات جديدة كتير في الجُزء ده، بداية من جابر لغاية ميجو وإحسان وسُمية وحرب وشخصيات فرعية جديدة زي وهدان ورؤوف وساندي، ولو إن ساندي ظهرت في لقطة كدة في الجزء الأول. وبالنسبة للأشرار، فكان في شخصيتين شريرتين زي طلال وداغر وطبعًا أفراد المُنظمة، وكان في بردو شخصيات رمادية مش فاهمين هي طيبة ولا شريرة زي شخصية ميجو وحرب، بس من الآخر، كل الشخصيات كان بيخدمو فكرة الرواية وبيساعدو في الأحداث ومفيش شخصية اتحطت كمالة عدد أو عشان أنا عايزة كدة، لأن كلهم كان ليهم دور. وقبل ما انتقل للنقطة إللي بعد كدة، عايزاكم تقولولي إيه أكتر شخصية حبيتوها في الجزء ده ؟ وهل إنتو شايفين إن الأشرار في الجزء ده ( طلال وداغر ) أقوة، ولا الأشرار في الجزء الأول ( ضُرغام وبطة ) ؟ تفسير النهاية : نيجي بقى عند نهاية الرواية، وأنا عارفة إني خليت النهاية مفتوحة، وده لأني مؤمنة إن مفيش نهايات في حياتنا وإن مفيش حاجة بتخلص، ومش معنى إن صراعهم خلص يبقى كدة مفيش صراعات تانية، عشان كدة عملت النهاية شبه مفتوحة وخليت أخ جديد يظهر لمُعتز وميجو ده غير موضوع أبوهم إللي لسة مُختفي ومش عارفين هو بينيل إيه. وكمان خليت سيف يورث موضوع التنقل عشان أنا ظهرت في لقطة كدة إن الموضوع بيتنقل بالوراثة، فأكيد مش هفوٌت لقطة كدة من غير ما استفيد بيها. وموضوع إن عزرائيل_ أو حرب_ يبقى في المُنظمة، فده عشان أوٌضح إن المُنظمة مش هتحُط المتنقلين في دماغها تاني عشان خلاص هيبقى في واحد منهم بيشتغل معاهم ( وده معناه إن عملياتهم هتبقى أكثر خطورة بس دي مش قصتنا ) أما بالنسبة بقى لشخصية جابر وأنا ليه خليته يموت، فده ليه سببين، السبب الأول، إن الشخصية لو فضلت، مش هتقدم جديد للرواية وهتكون شخصية تقريبًا ملهاش لازمة، والسبب التاني إللي هو أقوة، هو إن لو جابر محصلوش حاجة، محدش فيهم هيعوز ينتقم من طلال وحتى لؤي بعد ما يعرف إنه أبوه، مش هيكون بيكرهه أوي وعايزه يموت قد ما كرهه بعد ما قتل جابر، ده غير إني كُنت عايزة أوٌضح خطورة إللي بيواجهوه عليهم، ومش منطقي بردو إنهم يمرٌو بكل ده من غير ما حد فيهم يروح ضحية، هما في الأول وفي الآخر مش أبطال خارقين عشان يعدو من خطف ومعارك وتهديد من غير ما حياتهم تتأثر ويخسرو حد فيهم. يعني من الآخر، موت جابر هو إللي خلاهم يصرٌو أكتر على التثبيت ويعرفو عدوهم أكتر.... كواليس الرواية : مغيرتش حاجات كتير في الرواية الصراحة، بس شخصية شمس كُنت هعملها متهوٌرة وهتوٌقع نفسها في مشاكل كتير، بس معملتش كدة عشان الأحداث متطولتش أكتر ما هي طويلة. وشخصية ميجو جاتلي وأنا بتفرج على مُسلسل كانو بيتريقو فيه من واحد بيمثل إنه ابن رقاصة، فحسيت إني لو عملت شخصية كدة هتبقى جديدة عن الشخصيات إللي بكتبهم عادة. أما بقى موضوع موت جابر، فأنا مكنتش هعمله الصراحة، بس وأنا في طريق سفر كنت بقرأ رواية كئيبة ونمت بعدها وحلمت إني بموٌت شخصية من شخصيات الرواية دي، عشان كنت وقتها بخطط ليها. وآخر حاجة غيَرتها، هي موضوع إن ميجو يتحبس، عشان أنا كنت هخليه هو اللي يعترف على نفسه وهيعتبروه شاهد عيان وهيفرجو عنه بس حسيت الموضوع كيليشه أوي وقولت لازم يتعاقب، وكمان مكنتش هخلي لؤي يسيب الشُرطة، بس بردو حسيت إن الموضوع مش منطقي عشان هو فعلًا استغل سُلطته شوية، وكمان كُنت عايزة أوٌضح جزء من الفساد إللي احنا عايشين فيه واللي بيروح ضحيٌته أكتر ناس قلبها على شُغلها وبتحاول تخدم بلدها، وكان الشخص ده هو لؤي، لأنه عمل غلطات توٌديه في ستين داهية، بس لما بدأ يدوٌر ورا طلال رغم إن نيِته كانت سليمة، إلا إنه اترفد من شُغله علطول. ومكنتش عايزة الفصول توٌصل لـ12 و13 ألف كلمة بس مش عارفة إيه إللي حصل .... أفضل الفصول : دي أفصل فصول بالنسبة ليا وأهم المعارك إللي كانت في الرواية ( يعني الفصول إللي فيها أكشن )... معركة جعبري : الفصل الثالث معركة ضد عصابة المُخدرات : الفصل السادس سرقة المعمل : الفصل العاشر الاختطاف : الفصل الثاني عشر مستشفى المجانين : الفصل السادس عشر المعركة الأخيرة : الفصل السابع والعشرون الجزء ده بالنسبالي فيه أحداث أكتر من إللي فات، فياريت تقولوي إيه أكتر أحداث عجبتكم في الجزء ده ؟ تصنيفات رواياتي ( كلها ) : رواية قلب محظور : رومانسي/ كوميدي/ اجتماعي/ غموض/ أكشن وإثارة وتشويق ( الأساسي رومانسي ) رواية أرواح متنقلة : فانتازيا/ رومانسي/ كوميدي/ أكشن وإثارة وتشويق ( الأساسي فانتازيا ) نوفيلا ويبقى الأمل : دراما/ تراجيديا / هادفة ( الأساسي تراجيديا ) رواية فوق النجوم : إجتماعي / رومانسي / كوميدي / هادفة ( الأساسي إجتماعي ) رواية أرواح ضائعة " أرواح متنقلة 2 " : فانتازيا / رومانسي / كوميدي / أكشن وإثارة وتشويق ( الأساسي فانتازيا ) وبما إني قفلت برواية فانتازيا، فالرواية إللي هتنزل بعد كدة هتبقى رواية واقعية وفيها قضية كمان، عشان أنا بكتب رواية واقعية بعدها رواية فانتازيا أو خيال علمي وفي النص بنزٌل نوفيلا صغيرة ( منظمة أوفر أنا عارفة ) المهم، قولولي رأيكم في الرواية دي ودي أكتر رواية بالمناسبة عزيزة عليا، وياريت تُلقو نظرة على النوفيلا إللي بنزٌلها " مردوخ " لأنها تقريبًا نفس تصنيف الرواية دي بس طبعًا قصة مختلفة تمامًا، وإن شاء الله الرواية الجديدة تعجبكم خصوصًا إنها هتكون مبنية على معلومات حقيقية وقضية كبيرة وإن شاء الله هيتم تنزيلها بعد رمضان 🥰