ارواح متنقلة ( الخلاصة )

بسم الله الرحمن الرحيم و بكدة يكون الجزء الأول من الرواية خلص و أتمنى إللي قرأ الرواية يكون استمتع بيها و عاش مع شخصياتها زي ما أنا استمتعت بكتابتها و ان شاء الله الجزء التاني يبقى أجمد و مليان أكشن و إثارة و تشويق أكتر ... خلينا نبدأ بالمهم و هو اسم الرواية ... طبعًا مش محتاجة أقول أنا سميت الرواية كدة ليه لأن واضح جدًا من أحداث الرواية إللي بتشرح الاسم لوحدها فخلينا ندخل على النقطة إللي بعد كدة و هي الهدف من الرواية ... رغم إن الرواية فيها فانتازيا و خيال و أكشن و شوية كوميدية على رومانسية، إلا إن ده ميمنعش إن كان في رسايل متخفية في الرواية أهمهم إن الإنسان يرضى بالجسم إللي هو عايش بيه و يرضى بقضاء ربنا لأن ده هيفضل الأحسن ليه، طبعًا ده بان من أول الرواية مع جايمس إللي كان المفروض يعيش بأطراف مبتورة بس أبوه اتحدى القدر و خلاه يسيب جسمه فعشان كدة نهايته مكنتش كويسة .. كمان داليا في أول الرواية مكنتش راضية بحياتها و عايزة تغيرها لغاية ما هتكتشف إن حياتها القديمة الروتينية كانت أحسن من دلوقتي، و كل ده لأنها مكنتش راضية ... و طبعًا مش هننسى بطة إللي كانت مشلولة و بردو لما مرضيتش بقدرها نهايتها مكنتش كويسة ... و هو ده إللي كنت عايزة أوصله، إن إللي مش بيرضى بقدره و بيحاول يغيره بيتعاقب في الآخر ... حاجة كمان كنت عايزة أوصلها و هي تأثير الطلاق على الولاد لما يكبرو زي إللي حصل مع داليا و إزاي إنها كانت متعقدة، كمان وضحت شوية إختلاف الطبقات و الثقافات زي كوكي و معتز ... و بالمناسبة معتز المفروض يكون غني هو كمان بس هو إللي استقل عن عيلته، يعني تقريبًا الاتنين من نفس الطبقة الإجتماعية و إلا مكنوش هيكملو مع بعض ... حاجة كمان كُنت عايزة ألفت النظر ليها و هي ظاهرة المُختلطين جنسيًا ... و هنا مش بتكلم عن المتحوٌ**لين ... أنا بتكلم عن إللي ربنا خلقهم عندهم جينات الذكور و الإناث في نفس الوقت، و فعلًا الناس دي موجودة كتير و أغلبهم بيتحوٌ**لو لأن المجتمع مش قابلهم و دايمًا مُحتقرين مع إن ده مش ذنبهم... هما مُجرد ناس إتوٌلدت بتشوٌهات ملهمش دخل فيها ... و طبعًا زي الرواية إللي فاتت إتكلمت عن الصُحاب و إزاي بيكونو سند لبعض حتى لو الموضوع فيه خطورة على حياتهم، و ده هيفضل موجود لغاية الجزء التاني و يمكن هيبقى أكتر كمان ... نيجي عند النُقطة التانية و هي شخصيات الرواية ... و زي أي رواية من رواياتي مفيش ولا شخصية كاملة، كُلهم مليانين عيوب أولهم إسلام و إللي هو أصلًا بطل الرواية، و كان واضح إن تصرفاته عنيفة وبارد و نرجسي بسبب أهله إللي تقريبًا نفس صفاته، بس بردو هو كان مُخلص و ذكي و في مميزات تانية هتظهر أكتر في الجزء التاني و سلبيات تانية هتظهر بردو .. المهم يعني إن الشخصيات كلها مش كاملة حتى مُعتز إللي تحسو إنه غلبان و حنين كان الأقل ذكاءًا فيهم و كوكي الخواجاية رغم إنها جميلة و ذكية بس كانت رقيقة و دلوعة و ده مكنش بيخليها تشاركهم مغامراتهم أغلب الوقت ... إلا لما تعيط الأول. و بآمانة .. أنا كنت هموٌت مخيمر و على آخر لحظة لغيت الموضوع عشان افتكرت إنه كان عنده إضطراب في الهوية الجنسية و كنت عايزة أخليه يتغير و يتعالج فقولت أسيبه عايش و أكبر دوره في الجزء التاني . و بالنسبة لقمر و إنها بتعمل تنويم مغناطيسي، فعايزة أقول إن الموضوع ده حقيقي ... بس التنويم المغناطيسي إللي كانت بتعمله مبالغ فيه شوية عن الواقع .. يعني في الحقيقة بياخد وقت أكتر من كدة و بيستخدموه للناس إللي عندها PTSD " إضطراب ما بعد الصدمة " عشان يخلو المريض يتكلم عن الحاجات إللي حابسها جواه و ساعات بيرجع للحظات الصعبة تاني عشان يتغلب عليها. و بالنسبة لأعداء الرواية فتقريبًا كان ضُرغام أقواهم، و مع ذلك ضُرغام كان فيه جُزء كويس و هو إنه كان مُخلص لمراته و كان مستعد يعمل أي حاجة عشانها، ده غير إن الماضي بتاعه و الناس إللي كانت بتهدد أبوه و بتهدده هو و أخوه ... كل الحاجات دي أثرت في شخصيته و خليته كدة.. أهم الفصول في الرواية : لما داليا و إسلام يعرفو حقيقتهم : الفصل السادس معركة الفازا مع شاويش : الفصل السادس عشر / الفصل السابع عشر معركة أبحاث المعمل : الفصل التاسع عشر / الفصل العشرون المعركة النهائية : الفصل السادس و العشرون مفيش معركة هنا بس أنا بحب الفصل ده : الفصل الخامس عشر دي تقريبًا أهم الفصول و أكتر الفصول إللي اتبذل مجهود في كتابتها و ياريت تقولولي رأيكم في أحداث الرواية ... تصنيف الرواية " جميع رواياتي " رواية " قلب محظور " : رومانسي / أكشن / إثارة و تشويق / دراما / كوميدي " الأساسي رومانسي " رواية " أرواح متنقلة " : فانتازيا / أكشن / إثارة و تشويق / كوميدية/ رومانسية بسيطة " الأساسي فانتازيا " و بالمناسبة رواية قلب محظور ناقشت مرض الـPTSD بشكل مُفصل و الرواية دي ناقشت مرض إضطراب الهوية الجنسية بس لسة هنتعمق أكتر فيه بس مش بطريقة علمية و نفسية عشان أنا مش بحب الطريقة دي و بحب أوصل الرسايل بأسلوب غير مباشر. طبعًا كان في شوية معلومات حقيقية في الرواية دي و بعضها خرافات بس في الرواية الخرافات دي كانت حقيقية لأنها كانت رواية خيالية بس داخلة على الواقع ... المهم يعني في الجزء التاني هيظهر شخصيات جديدة و هيتسلط الضوء عليهم مع الشخصيات الرئيسية، و في شخصيات ثانوية في الجزء الأول هتبقى رئيسية في التاني و هسيبكم تعرفوهم بنفسكم، ده غير إن الصراع هيكون مختلف تمامًا عن الجزء الأول عشان متفتكروش إن الاتنين مرتبطين ببعض ... الجزء التاني مختلف عن الأول بس نفس الشخصيات .. و كمان هعمل الجزء التاني في رواية لوحدها بغلاف جديد و هبقى أنزل إعلان هنا لما أبدأه... و بالنسبة لموضوع لؤي فهو هيكون ليه دور أكبر في الجزء التاني عشان بس متفتكروش إني خليته لقيط على الفاضي ... و طبعًا آخر حتة في الجزء الأول تُعتبر بداية الجزء التاني .. و في النهاية عايزة رأيكم في الرواية بشكل عام و أفضل الشخصيات بالنسبالكم ... و إنتظرو الرواية الجديدة إللي هتبقى إن شاء الله هادية جدًا و إجتماعية و عائلية، يعني ملهاش علاقة خالص بالرواية دي ولا الرواية إللي قبلها لأني مش بكتب تصنيف مُعين أنا بكتب في كل التصنيفات .... فأتمنى الأعمال إللي جاية تنال إعجابكم و أتمنى أكون قدرت أوضح الثغرات إللي في الرواية دي فلو حد عنده أي نقد أو حاجات مش مفهومة في الرواية دي ياريت تقولولي 😘