حتحوته وقلبظ

_ راح جاي من ورايا كده وعايز يضربني، قومت ماسكه قالبه على الأرض الواد يعيني مقدرش يقوم تاني. _ بجد يا نوح؟ برافو عليك. قالتها حبيبه بحماس فقال يوسف قاتلًا ذلك الحماس: _ بقى بذمتك ده شكل واحد عمل الي بيقوله ده؟ دا مش باين ليه ملامح أصلًا. _ بس يلا شوف انت رايح فين وسيبني أكمل الخناقه. _  مهو بصراحه عنده حق دا منظر واحد اتعجن وبس. عبس نوح وقال: _ سيبوني احلم يا جدعان يعني هتضرب وكمان محلمش؟ لا كده كتير، وبعدين يا عم يوسف انت بالذات متتكلمش خالص، دا اول م قربو عليك نفخت نفسك اوي عليهم وقولتلهم " محدش يقرب وإلا هيبكي على اللي باقي من عمره" قالها مقلدًا إياه وأكمل: _ ايه هيبكي دي؟ لا تكون مفكر نفسك بن تن يلا فوق. قال يوسف بإحراج: _ فضحتني الله يكسفك. ضحك نوح بشدة على موقفهم ذلك. حالتهم بإختصار شديد " نوح وجهه منتفخ أثر الضرب العنيف، ويحمل الكثير من الكدمات، وظهره يؤلمه أثر ضربة عنيفه تلقاها فوقه، لكن لم يُصبه شيء آخر بينما يوسف، إنكسرت نظارته الطبيه، وعينيه تورمتا وصار لونهما أزرق، وحمل بعض الكدمات بيديه، وجُرِحَ في يده اليُسرى وذلك كان بسبب نوح الذي أخرج ماديته وبدلًا من أن يوجهها نحو أولئك الرجال قد أصاب بها يوسف في يديه بدون قصدٍ." دخلت حوريه عليهم فقالت: _ مين ضربكو يا مواكيس؟ _ مفيش يا حوريه خبطنا في بعض بس. _ مين ضربك يا ولا منك ليه؟ _ اتنين كده إتكاترو علينا وحصل اللي حصل بقى. قالها نوح فقالت: _ ماشاءالله عندي اتنين طول بعرض اتضربو، يا فرحتي بيكو. نظر الإثنان أرضًا وكتما ضحكاتهما بصعوبة، فلاحظت حوريه ذلك وقالت: _ حبيبه تعالي معايا عايزاكي، وانت يا يوسف روح مع نوح هاتو الحاجات دي من السوبر ماركت عشان في ضيوف جايين النهارده. وناولتهم ورقة قد دونت بها ما تحتاج. نظرا لبعضهم البعض وقال نوح: _ خلي ليل يروح ولا حذيفه حتى، الهيبه هتضيع لو خرجنا كده. _ يا حبيبي اتوكس هي فين الهيبه اصلًا؟ وبعدين حذيفه وليل كتر خيرهم بيساعدوني في الغدا. قالتها وذهبت بعيدًا مع حبيبة. ___________________ بعد نصف ساعة تقريبًا كان نوح ويوسف قد وصلا أخيرًا، وصعدا ليرتاحو ويبدلو ملابسهم، وكان ذلك أمر من حورية ونسمة لأن الضيوف على وشك الوصول. _ مش عارف انا ضيوف ايه دول اللي جايين هنا، هو احنا في بيتنا. قالها نوح بتذمر قبل أن يصعد برفقة يوسف الذي قال بعد أن وصلا للغرفة: _ احنا لازم نطور من نفسنا ونضرب العيال دي قبل م نمشي من هنا. _ طب بس بقى يا بوق انت، اومال عضلات ايه ورياضة ايه اللي بتلعبها دي. _ تيجي اوريك؟ _ ياريت نفسي أشوف. لكمه يوسف في بطنه بقوة فتألم نوح وقال: _ تصدق انك عيل خنزير هو أنا ناقص ضرب. قال يوسف وهو يحك أنفه: _ مش انت اللي قولت ياعم. وأزاحه بعيدًا وقال: _ وسع كده خليني أنام شويه. __________________ ليلًا... خرج نوح ويوسف من غرفتهما بأمر من حورية، لأن الضيوف قد وصلو.. _ أنا مش متخيل إني هخرج قدام الناس كده بجد. قالها يوسف فقال نوح: _ بس بقى متفكرنيش. نظر يوسف تجاه غرفة الإستقبال فوجد ما لم يتوقعه أبدًا فقال وهو يستعد للهروب: _الحق دول جايين يكملوا ضرب. نظر نوح فوجد نفس الشابين جالسين مع حوريه وباقي العائلة فقال: _ في الحاله دي بيقولو الجري نص الجدعنه. أسرع الإثنان نحو الغرفة مجددًا ورأتهم نسمة فذهبت خلفهم، وطرقت الباب فقال نوح: _ مين؟ قالت: _ مش هتنزل يا زفت منك ليه؟ _ لا مش نازلين. _ طب افتحوا الباب الاول عشان نتكلم زي البني ادمين. فتح يوسف الباب بتردد فدفعته نسمة ودخلت  وقالت: _ هربانين من ايه؟ _ احنا هربانين؟ مين قال كده؟ قالها نوح فقالت نسمه: _ هتقول ولا أقلب حبيبه عليك؟ وأقولها على الموضوع إياه؟ عبس وجهه وقال: _ هو كل ما يحصل حاجه تهدديني بيه؟ دا سري يا مؤمنه. _ اه بهددك بيه عشان انت مش نافعك غير كده، ها اخلص إحكي. قال يوسف بثقه: _ مفيش حاجه نحكيها. فرد نوح  بتردد: _ بصي من الاخر العيال اللي تحت دول هما اللي ضربونا. _ مين؟ قلبظ وحتحوته؟ اه أهبل منك ليه بقى دول يضربوكو انتو؟ _ اه مش شايفاهم العيال ماشاءالله عليهم. _ يا حبيبي دول طيبين جدًا وعلى الله خالص. _ يعني ايه مش فاهم! _ قلبظ وحتحوته طيبين اوي عيال واحد قريبنا ومبيضربوش النمله حتى. _ بس بيضربو البني أدمين؟ _ هو انتو بني ادمين؟ _ يوه مش وقته، المهم يعني مش نازلين. _ مينفعش دا الحج مصيلحي عايز يشوفكو. _ مين ده؟ _ أبو حتحوته وقلبظ. _ مالك عماله تعيدي في أساميهم ليه يا ست الكل؟ خلاص حفظنا. _ الاه مش انتو اللي سألتو؟ وأكملت: _ أنا نازله، دقيقتين وتكونو تحت فاهمين؟ _ فاهمين. قالها نوح وهو يعلم الجملة القادمة والتي لم تكُن سِوى " وإلا هقول لحبيبه" خرجت من الغرفة فنظر يوسف لنوح بخبثٍ وقال: _ ايه هو الموضوع إياه؟ _ انت مالك يا عم وسع كده انا نازل. وخرج من الغرفة تبعه يوسف لأسفل. ______________________ دخلا الغرفة معًا وما إن رآهم الشابان وقفا متفاجئين فعاد نوح ويوسف للوراء خوفًا منهما فقال قلبظ بلهجة ريفية أصيله: _ هو انتو؟ عايزين تتضربو تاني ولا ايه؟ قال نوح: _ أبدًا والله احنا في بيتنا. فنهض الحاج مصيلحي قائلًا: _ نوح ويوسف؟ زين الشباب والله زين الشباب. قالها وبدأ في ضمهم معًا فقال نوح بعد أن إبتعد عنه مصيلحي: _ زين شباب مين بس يا عمي دا احنا اتبهدلنا اوي من يوم ما جينا هنا. _ ليه بس يا ولاد مين اتعرضلكو؟ قال يوسف بتأثر وكاد أن يبكي وخرج منه الحديث وكأنه طفل صغير يشكو لوالده: _ عيالك ضربونا يا عمي. فضحك الوالد وقال: _ بقى كده يا عيال تضربو ضيوفنا؟ قال حتحوته: _ يابا هما اللي ضربو الواد ابراهيم الاول. _ يلا حصل خير مناوشات شباب وهتروح لحالها دلوقتي لما تعرفو بعض. قالها مصيلحي وجلس مجددًا يكمل حديثه مع ماجد. فقالت ألاء: _ طب ايه رأيكم نطلع احنا في الجنينه؟ وجهت حديثها للشباب فوافق الجميع وخرجو معًا. بعد ربع ساعة... _ بس يا واد يا قلبظ ليه إسمك كده مع إنك ماشاءالله الله أكبر يعني شكلك بتلعب كمال أجسام. قالها نوح فرد عليه قلبظ: _ عشان وانا صغير كنت باكل كراتيه قلبظ كتير اوي في اليوم مثلا ييجي ١٠ اكياس مع إني كنت رفيع فطلع عليا الإسم ده بقى. _وانت يا حتحوته مين قال عليك كده؟ _ لا دا إسم الشهره عادي. قالت حبيبه بحماس: _ هو انتو توئم؟ اصل شبه بعض اوي نفس الملامح. نظر لها قلبظ وقال: _ اه توئم بس دايمًا يقولو حتحوته أحلى مني إكمن عنيه خضره وانا بُني. _ لا على فكره انت كمان حلو. قالتها حبيبه بمجامله وحُسن نية، لكن نوح نظر لها نظرة أخرستها، فإنحازت نحو نجاة وصمتت  ولم تتحدث ثانيةً. بينما نوح أنهى تلك الجلسة سريعًا بمغادرته متحججًا بأن لديه مكالمة عمل ضرورية، فتلك الساذجة خربت عليه مزاجه. ____________________ تبعته حبيبه وأوقفته قائلةً: _ قومت ليه؟ دي القعده كانت جميله. فنظر لها بغضب وقال: _ مدام جميله اوي كده روحيلهم. _ لا مش رايحه القعده معاك أحلى. صمت قليلًا وقال: _ ماشي يقمر تصبحي على خير بقى. وتركها ذاهبًا فقالت: _ مفيش دم، مفيش رومانسيه، مفيش حاجه خالص كده؟ فعاد لها مجددًا وقال: _ أيوه مفيش، ومش عايز اعرف انك رجعتي تاني برا روحي على أوضتك. أومأت له بعدم رضا وذهبت لغرفتها وهاتفت ألاء ونجاة وچودي حتى تأتينَ للجلوس معها. _______________ في صباح اليوم التالي، إستيقظ ماجد، وكان بداخله شعور غريب نحو كل شيء، شعور لم يأتِهِ من قبل، خرج من غرفته ذاهبًا نحو غرفة الطعام، وجد الجميع بإنتظاره، فجلس وهو يُناظر الجميع وكأنها المرة الأخيره. بعد ان انتهو من تناول الطعام، نهض ماجد وإستئذنهم للخروج ليستنشق بعضًا من الهواء. لاحظت ألاء أن هناك خطبًا ما في والدها، فذهبت ورائه حتى تتونس بوجوده. _ ايه يا عم ماجد سايبنا وراح على فين؟ _ رايح أقابل أمك يا لوله. قالها ماجد بإبتسامة مرِحة فإحتضنته ألاء وقالت: _ متقولش كده يا بابا، أنا مقدرش أعيش من غيرك. نظر لها بحُب، وأمسك بيدها وقال: _ الدنيا مش هتقف على أي حد، ياما خسرنا ناس كتيره، وكملنا حياتنا، كده كده هتزعلي، وهتتقهري على الفُراق، بس هييجي وقت وهتتأقلمي، أنا بس عايزك توعديني إنك مش هتوقفي حياتك عليا، انتِ لسا صغيره وقدامك الحياه طويله، بلاش تدفني نفسك من دلوقتي، وخليكي عارفه إني دايمًا هكون معاكي، وحاسس بيكي، قرار الحجاب ده فرحني أوي بيكي، أنا عارف إن يمكن مكونش ملاك، واكيد غلطت كتير، بس حاولت على قد ما أقدر في آخر أيام إني اقرب من ربنا، وأعوض سنين الغفله اللي كنت فيها، علشان أقابلك في الجنه، أنتِ وأخوكِ والعيله كلها، أنا عايزك تكوني قويه، وبدال ما تعيطي وتقولي ليه، قولي الحمدلله، حاولي تقربي من ربنا أكتر يا لوله، علشان نتقابل في جنة ربنا هي أكيد أحسن مليون مره من أي حاجه على الأرض، مش عايز نتوه من بعض يوم الحساب يا لوله، عايزك معايا، إعتبريها وصيتي ليكِ، إنتِ وليل. إنهمرت دموعها وبدَت وكأنها تراه للمرة الأخيره، قالت: _ بابا خليك، متمشيش، أنا أضعف من إني أخسرك، مين هيبقى سندي غيرك؟ _ ربنا كبير يا حبيبتي، إوعي تنسيني ماشي؟ إحتضنته وقالت من بين دموعها: _ إنت أصلًا متتنسيش يا بابا، إنت أعظم أب في الدنيا، وعلى فكره بقى مش هيحصلك حاجه وهتفضل معايا على طول، مش صح؟ _ أبقى كداب لو قولتلك صح، محدش عارف ممكن يحصل إيه كمان شويه. أنهى حديثة وضمها بأحضانه. جاء حذيفة بعد دقائق وقال: _ دا ايه الحضن الجميل ده، ايه المناسبه؟ ربّت ماجد على كتِف حذيفة وقال: _ خد بالك كويس من ألاء يا حبيبي، وإوعى تزعلها في يوم، خليك دايمًا جنبها هتحتاجك من بعدي. نظر له حذيفة بعدم فهم فقال ماجد: _ أنا هرجع البيت، خليكو انتو هنا شمو شوية هوا بعيد عن نسمه الي خنقاكو دي. قالها بمرَحٍ وإبتسامة جميلة، فأومأ له حذيفة بفهم، فقد فهِمَ إرادة ماجد بأن لا تعود ألاء للمنزل الأن. ________________ عاد للمنزل وتوجه سريعًا لغرفة ليل، وَلَده العزيز، دق الباب، ففتحت له چودي، ويبدو أنهم كانا يتشاجران، فقال ماجد: _ عايزكو في حاجه يا ولاد فاضيين؟ _ طبعا يا عمو إتفضل. دخل ماجد للغرفة ونظر لليل بعمقٍ وقال: _ أنا عارف إني أجبرتكو إنتو الإتنين على الجوازه دي، بس متأكد إن قراري مكانش غلط، خليك فاكر دايمًا يا ليل إن چودي أمانتي ليك، حاولو تفهمو بعض كويس، وتعيشو تفاصيل حياتكو بهدوء وتفاهم، بلاش كل حاجه تيجي بالخناق والعِند، خلاص الجوازه تمت من بدري، هيفيد بإيه الخناق؟ حاولو تفهمو بعض، يمكن ساعتها تحسو بحاجه جديده. أمسك ليل يد ماجد وقال: _ كل حاجه تؤمر بيها هتحصل يا حاج قوم انت بالسلامه بس وانا هخليك أحلى جِد في الدنيا. صُدِمَت چودي بالرغم من تأثرها بحديثه، لكن فكرة إستقلالها مع ذلك الليل أربكتها وأرعبتها في نفس الوقت، فقالت: _ لا لا أنا لسا صغيره، إعتبرني حفيدتك يا عمو مش لازم يعني نجيب حد جديد. قهقه ماجد وقال: _ يا حبيبتي أنتِ تعملي ما بدا لك، كل حاجه عاوزاها هتحصل هو احنا عندنا كام چودي! _ هي واحده بس. قالتها چودي بعفوية فربّت على رأسها وقال: _ ربنا يحفظك يا بنتي، ويخليكو لبعض. تركهم وخرج من الغرفة متوجهًا نحو شقيقتيه، حوريه ونسمة وكانت معهما نجاة وحبيبة، تحدث إليهم قليلًا مزَحَ وإبتسم، وشعر بأنه الأن مستعد لملاقاة ربه، خرج من المطبخ حيث كانوا يقفون، ثم ذهب ليوسف ونوح، ودّعهما وداعًا حارًا، وقد شعرا بذلك لكن لم يُظهِرا، خرج ماجد من غرفتهما متجهًا نحو غرفته، توضأ وصلى صلاة العصر، سجد آخر سجدة في صلاته، ولم ينهض منها أبدًا وكأنه أحبَّ أن يبقَ هكذا في طاعة ربه، ساجدًا، وكان آخر لقاء له مع الله في الأرض، وقد كانت ونِعمَ النهايات، فمَن مِنّا لا يتمنى موتة هنيئة كتلك؟ لقد كرَّمه الله تعالى وأمر بصعود روحه وهو ساجد. ____________ أصرّت ألاء على العَودَة لأبيها، ولم يستطِع حذيفة منعها وعادت بالفعل، توجهت نحو غرفته سريعًا فوجدته على حاله، ساجد، جلست، وتنهدت براحة لكن مرّ وقت لا بأس به ولم ينهض والدها من سجدته، فإقتربت منه تطمئن عليه، لكنها إكتشفت أنه قد فارق الحياة، لم تتحمل تلك الصدمة، فصرخت صرخة مُدوية هزَّت أركان المنزل، كان محتواها " بابــا مات" ______________ يُتبَع... لـِ/ ندىٰ مُحَمًَد..