شكلي حبيتك

_ طب ممكن اعرف أنا هنا ليه؟ قالها نوح بنفاذ صبر بعد أن تجاهله الضابط عدة مرات، فنظر له الضابط وقال: _ اخرس ياض. فقال نوح بنبرة غاضبة: _ متقول في ايه هو أنا بشحت منك، أنا من حقي اعرف أنا هنا ليه. _ مخدرات يحبيب ماما. صُدِمَ نوح، فهو ابتعد عن تلك الأشياء منذ زمن فما الذي أعادها الأن؟ فقال: _ أنا مدرس محترم، مليش في السكه دي ياباشا. _ مش هتفرق مدرس ولا حرامي حتى، في بلاغ بإسمك إن في مخدرات في عربيتك، والشباب كتر خيرهم فتشوها قدام عينيك ولقيو الشنطه الحلوه دي. ورفع يده بشنطة سوداء كبيرة نوعًا ما. _ قولتلك أنها مش بتاعتي. _ هو كل واحد يقول حاجه لازم نصدقها؟ يا ابراهيم تعالى خد الباشا على الحبس. دخل الرجل المدعو ابراهيم، وإصطحب معه نوح إلى الزنزانه. وبعد دقائق وصل يوسف إلى نفس المكتب وحاول بإستفاضة معرفة كافة المعلومات عن سبب دخول نوح للسجن. _ طب هو مين اللي بلغ عليه. _ واحد إسمه محمود غانم. شكره يوسف وطلب منه أن يرى نوح فوافق الضابط على مضض فإسلوب يوسف كان مُهذبًا معه. دخل لمكان الزنزانة، ورأى نوح، نهض نوح سريعًا وقال: _ ايه هخرج؟ _ لا لسا شوية، عايز اعرف منك مين محمود غانم ده؟ _ وده ماله بكل ده؟ _ دا هو الي عمل كل ده، قول بس هو مين وانا هروح أكلمه وهاخد معايا المحامي، لازم اعرف هو عمل كده ليه، وليه انت بالذات الي لبسك التهمه دي. _ من غير م تروح أنا عارف. قالها نوح بهدوء فسأله يوسف عن السبب فقال: _ كان عايزني أدخل معاه في شغل مش تمام، وانا مرضتش وصدّيته، أكيد عشان كده انا عارفه كويس. _ طب وبعدين؟ _ ولا اي حاجه شوف محامي شاطر ويا اخد فيها تأبيده يا أخرج. _ لا إن شاءالله هتخرج والدنيا هتظبط معاك متقلقش أنا هسيبك دلوقتي عشان الحق اروح للدكتور. ما إن أنهى جملته حتى وجد الباب يُفتح ودخل شرطي فتح لنوح الباب وقال له: _ الظابط عايزك. فخرج معه بصحبة يوسف. _ حظك حلو معايا هتاخد إفراج. قالها الضابط فقال نوح: _ إيه اللي اتغير؟ _ طلع سكر بُدره يا خفيف، تلفيقه حلوه، ابقى خُد بالك بعد كده، تعالى امضي على المحضر ده عشان تمشي. أمسك نوح بالقلم، لكن ما أوقفه صوت الضوضاء التي حدثت بالخارج يليها دخول ألاء أو بالأحرى، إقتحامها للمكتب، فنهض الشرطي ( حُذَيفَه) نعم هذا هو إسمه قال: _ ايه السخافه الي بتحصل دي؟ ركضت ألاء نحو نوح وظلت تطمئن عليه بشكل مبالغ فقال حذيفه: _ خلصتي؟ يلا اطلعي برا بدل ما أرميكي في الحجز. _ وانت مالك انت هو عشان ظابط يعني هتطردني؟ لا حاسب كده انت شكلك متعرفنيش. فقال نوح: _ هتودينا في داهيه كلنا الله ياخدك. نظر لها الضابط وقال بصوت عالي: _ ابراهييييم تعالى خذ التلاته على الحجز، بايتين معانا النهارده. نظر يوسف بعدم تصديق وقال: _ طب أنا مالي أنا اتكلمت؟ _ مليش فيه كلكو على الحجز يلااا. بالفعل قضى الثلاثه ليلتهم في الحجز، جائت حوريه، وجاء ماجد، والجميع، لكن حذيفة أبى أن يخرجهم قبل الصباح، وعاد الجميع للمنزل، ماعدا الثلاثه. ___________ _ أهلًا بيك في الواقع يصاحبي. _ واقع مقرف ايه ده، الحشرات في كل حته. _ متبقاش طري كده، ده انا كنت بزور المكان هنا كل اسبوع مرة. أنهى نوح حديثه بعد ذلك إقترب منهم شخص، يبدو في أواخر العشرين، نظر لنوح مطولًا بعد ذلك قال: _ عمهم، واحشني يا جدع، بقالك كتير مبتذورناش. نظر نوح ليوسف بفخر وقال للرجل الآخر: _ مشاغل بقى وحوارات. _ جاي في خناقه برضو؟ _ لا جاي في مخدرات. _ والعيل التوتو ده جاي مخدرات برضو؟ قال وهو يشير إلى يوسف فنهض نوح بغضب وقال: _ لا يا معلم انت كده بتغلط فيا، يوسف تبعي والي ييجي فيه اكنه فيا بالظبط. _ خلاص طب متزقش كده دا انا بهزر، يوسف باشا منور الزنزانه باللي فيها والله. مد يده بسيجارتين وقال: _ أحلى مسا عليكو يا رجاله. _ لا بطلناها من زمان روح انت مكانك مش عايزين نتعبك. عاد لمكانه وهو يقول: _ ولا تعب ولا حاجه يباشا. نظر يوسف لنوح بصدمه وقال: _ ايه المستنقع ده؟ كمية كلام أنا مش فاهم نصه بجد. _ متشغلش بالك نام نام. _ أنام ازاي؟ وفين؟ قالها يوسف بجد وإشمئزاز. فقال نوح: _ تعالى حط راسك على كتفي وبطل رغي. بالفعل إستند يوسف برأسه على كتف نوح وأسند الاخر رأسه على رأس يوسف، وذهبا في ثبات عميق، لم يستيقظ أحدهما سوى على صوت باب الزنزانه يُفتح ودخل الشرطي وقال: _ نوح أحمد، ويوسف صالح إفراج. خرج الإثنان بفرحة عارمة للخارج أخيرًا، وجدا بوجههما ألاء، بعيون منتفخة، ووجه غاضب. ضحك الإثنان على ما حدث لها، وكان هذا درس حتى لا تُعيد ما فعلته مجددًا. ذهب إلى الضابط حذيفة، وجدوه يرتشف القهوه وكان ينتظرهم، نظر ل ألاء وقال: _ ها كنتِ بتقولي ايه امبارح؟ _ كنت بقولك انت مالك ا.. وضع نوح يديه على فمها وهو يقول: _ ولا حاجه ياباشا احنا اسفين. أخذها وخرج من المكتب لم يرفع يده عنها حتى خرجو من المكان بأكمله، وللحق هو تعجب من صراحتها تلك، كذلك حذيفه الذي ظن أنها ستعتذر منه لكن على اي حال لا يهُم، المهم أنها أخذت جزائها. __________________ عادو للمنزل بهيئة غير مهندمه، وأكثرهم ألاء التي لم يكن حالها يسُر عدو أو حبيب فقد كانت في ذمة الله حقًا. _ يا حبايبي، ايه بس الي وصلكو لكده؟ _ ألاء ام لسان طويل غلطت في الظابط فخبطنا ليلة حبس وشكلها كانت هتطول اكتر بس الحمدلله لحقنا الموقف بسرعه. قالها نوح بإيجاز وتحرك نحو الداخل، بملابسه المليئة بالغبار، وشعره المشعث، ومشيته الغير منتظمه تحديدًا نحو حبيبة التي كانت تقف مُشفِقه عليهم الثلاثه، وقال بصوت لم يسمعه سوى هو وهي: _ ها كده تمام؟ نظرت له من أعلى لأسفل وقالت: _ زي الفل. _ حلو اوي يبقى أطلب ايدك من نسمه ونخلص. _ لا لسا هفكر الاول. نظر لها مطولًا وقال: _ حسبي الله في كل ظالم ومفتري منك لله. _ خلاص خلاص ياعم انت هتدعي عليا، خلاص موافقه أنا شكلي كده بحبك فعلاً. _ يافرج الله أخيرًا. قالها نوح قبل أن يلتفت نحو الجميع ويقول: _ نسمه، أنتِ أرق من النسمة وأحلى من الزهره، أنتِ كل حاجه حلوه في الدنيا، أنتِ عوضي عن امي، وأنتِ الي ربيتيني من الاول وجديد، أنا طالب منك طلب. _ قول يا رد السجون. _ احم، أنا عايز اتجوز حبيبه على سنة الله ورسوله. لم يجد رد سِوى: _ روح استحمى الأول يا معفن. نظر بصدمة وجد جميع من حوله يضحكون بشماته، فذهب لغرفته مصدومًا. _______________________ عاد لمنزله فوجد والدته تجلس برفقه والده، في أبهى صورهم، بإنتظاره فقال مستفهمًا: _ ايه ياماما خير رايحين فين؟ _ انت لحقت تنسى يا حبيبي؟ مش قولتلك هنروح نشوف عروستك النهارده؟ _ عروسة ايه بس ياماما بقى أنا حذيفه إبن سميره ومحمد قصة الحب الأسطورية، اتجوز بالطريقه دي؟ دا حتى يبقى عيب على شنبي ده. _ بس يا ولد هتروح تشوفها النهارده يعني هتروح ولا انت في حد شاغل بالك؟ سرح بعقله قليلًا وقال بخفوت: _ من ناحية فيه ف هو في بنت الهبله الي مزاولاني من امبارح دي، مش راضيه تروح من دماغي. _ بتقول ايه يا حبيبي؟ _ لا ولا حاجه يا ماما هطلع استريح شويه. _ مفيش راحه يلا البس عشان نمشي. _ أجلي المعاد معلش والله تعبان الشغل النهارده كان مُتعِب. قال الوالد: _ مفيش مشكله هكلم أبوها نأجل المعاد لحد بليل. _ بليل؟ هو ده الي ربنا قدرك عليه؟ _ خلاص هخليها بعد بكرا حلو كده؟ _ زي العسل، متشكرين يا حج الله يطعمك ما يحرمك. _ روح نام يلا لحد ما امك تجهز الغدا واكون أنا غيرت هدومي وكلمته. بعد ساعة كانو متجمعين حول المائدة، سألت سميره قائلة: _ عملت ايه مع ابو العروسه؟ _ مفيش، طلع هو كمان عنده ظروف وافق نأجل المعاد لحد بعد بكرا ويكون قال للعروسه عشان هي لسا مش عارفه حاجه. أومأت له سميره بينما نظر لهم حذيفة بقلة حيلة، فوالدته تحاول بكل الطرق أن تجد له العروس المناسبة، لا يعلم كيف يجعلها تفهم أن الزواج ليس بتلك الطريقة، لكنه لا يريد إحزانها فهي ووالده أهم ما لديه في هذه الحياة. نهض بعد قليل بعد أن أنهى طعامه، وذهب لغرفته، إستلقى على السرير وذهب في ثبات عميق. كان حذيفة ذو طول فارع، قوي البُنيان وكأنه فارس من أيام الجهاد، عيناه زرقاوتان أخذت من بحر الدنيا ما يكفيها لتُغرِقَ من ينظر إليها، لديه حاجبان كثيفان، وبشرة قمحاوية تميل للإسمرار، وشخصية طاغيه، لكنه مرِح بعض الشيء، لا يملك أصدقاء ولا معشوقة، حياته فقط في عمله، ووالديه، ولا يوجد غير ذلك. _______________ _ بت _ بت؟ _ هاتي كوباية مايه من عندك. _ انت مشلول يعني؟ م المايه قدامك اهي، ولا هو تعب على الصبح وخلاص؟ _ أنتِ ازاي تكلميني كده؟ _ اتكلم براحتي. _ لا مش براحتك أنتِ هنا مجرد خدامه وبس ملكيش حق تقفي وتبجحي كده. أثرت في نفسها تلك الجمله لكنها تماسكت حتى ناولته المياه وخرج من المطبخ، جلست على مقعد وقالت بأسى: _ أنا ذنبي ايه؟ هفضل مذلوله كده طول عمري؟ يارب الرحمه من عندك أنا اتخنقت. أنهت جملتها وجدت نسمة تدخل من الباب وتقول: _ في ايه بس يا حبيبتي مالك؟ _ مفيش يا هانم طلبك ايه؟ _ طلب ايه وهانم مين يا هبله انتِ؟ مش اتفقنا اسمي نسمه وبس؟ _ لا أنا خدامه هنا ولازم أعرف مقامي كويس. _ مين قال كده؟ أنتِ خلاص واحده من العيله. _ ليل قالي أنتِ مجرد خدامه وبس. _ سيبك منه دا واد عايز يتربى أنا هشوف شغلي معاه، سيبك من الجحش ده وخلينا في الجحش التاني نوح بيه، شوفتي الجزمه عايز ياخد بنتي مني بكل سهوله كده، لازم أدوخه وأخليه يقول حقي برقبتي الاول بعد كده هفكر أديه بنتي. ضحكت چودي، بعد ذلك دخل نوح للمطبخ وهو يقول: _ عيلة بتحب الصعوبات والمشاكل أنا ايه الي وقعني فيكم بس. نظرت له بطرف عيناها وقالت: _ امشي من وشي عشان مش طيقاك، وبنتي متجيش جنبها فاهم؟ _ فاهم فاااااااهم. قالها بنفاذ صبر وخرج مرة أخرى. _______________ بعد يومين، قد تعافت ألاء مما حدث لها في السجن، ونوح مازال يحاول إرضاء نسمة، ويوسف تقدمت علاقته بنجاة نوعًا ما، بينما حذيفة كان يقف أمام المرآة يعدل من هندامه، قبل أن يذهب لملاقاة العروس سعيدة الحظ كما أطلق عليها. خرج لوالديه وأخبرهم أنه إنتهى، فقالت والدته بفخر: _ قمر ماشاءالله ربنا يحميك يا حبيبي. _ ويخليكِ ليا يا ست الكل. خرجو من المنزل وتوجهوا نحو منزل آخر لا يقل عن جمال منزلهم، دخلو وأستقبلهم والد الفتاة بحفاوة، وكذلك جميع الأسرة، وأخيرًا دخلت العروس، بوجه غاضب، يبدو أنها غير راضية عن تلك الزيجه، لكن مهلًا أهذه هي العروس حقًا؟ مجرد أن نظرت له قالت برفض: _ ايه ده هو انت؟ قال بفخر: _ المقدم حذيفة محمد. فقالت الأخرى بفخر يُناسبها: _ الآنسة ألاء ماجد، ديزاينر وشغاله في مجال البرمجه، والتسويق. _ أهلًا دي هتبقى أيام عنب. قالها حذيفة بإبتسامة جميلة. _______________________ وصف للشخصيات بإيجاز حتى يستطيع القارئ تخيل الأحداث جيدًا. نوح: طوله فارع، جسده ليس بالهزيل، ولا القوي الفارسي، رياضي لكنه ليس بمثل حذيفة، بشرته قمحاوية، عيناه بُنية تميل إلى العسلية، يرتدي نظارات طبية، يحمل حاجب كثيف، ولديه لحية خفيفة تمنحه وسامة خاصه. يوسف: جسده رياضي، ممشوق، أو كما يقول البعض مثالي، فحياته منذ البداية مليئة بالمثالية، عيناه بنية تميل للسوداء، بشرته بيضاء، ووجهه مستدير، إلى جانب أن عظمتي الفك ظاهرتان تعطي جمال طاغي، لا يحمل لحية ولا شارِب. نجاة: فتاة قصيرة، تحمل جمال فاتن لكنه غير ملفت، بشرتها بيضاء تميل للقمحاوية، ولديها بعض النمش على وجهها، بينما عيناها بُنٌ يمنيٌ، وشعرها غجري، لونه برتقالي. حبيبة: طويلة بعض الشيء، شعرها مستقيم، لا يحمل تموجات أبدًا، لونه ( بني)، بشرتها قمحاوية، وعيناها خضراء، قوامها ممشوق، ولديها الكثير من الحبوب تزين وجهها، وكم هي جميلة بها، لن تستطيع تخيل هذا، لكن حبيبة هي الفتاة الوحيده التي يمكنك أن تحب تلك الحبوب على وجهها وستجدها ميزة. ألاء: سمينة بعض الشيء، شعرها مموج (كيرلي)، عيناها بنيه، وبشرتها بيضاء، ملامحها عادية لا يميزها شيء، هي فقط فتاة جميلة كَكُل. چودي: مختمرة، بيضاء، عيناها عسلية، وقوامها ممشوق، لديها جمال خاص بها، غير طاغي لكن محبوبها سيُسحر بها فيما بعد، قصيرة. ليل: ليس بالطويل ولا القصير، لديه شارب ولحية، بشرته بيضاء كمثل أخته، لكن جسده رياضي، عيناه خضراء ورثها عن والدته. .......... يُتبَع... لِـ ندىٰ مُحَمًَد...