صلح الحديبية

حبايبي الحلوين.. يا أشطر أطفال

يلا نبدأ كلامنا زي ما اتعودنا: بالصلاة على حبيبنا رسول الله ﷺ.

اللهم صلِّ وسلم وبارك على سيدنا محمد وعلى آله وصحبه أجمعين.

النهاردة يا حبايبي هنكمل حكايتنا مع سيدنا محمد ﷺ.

سيدنا محمد ﷺ والمسلمين الطيبين الشجعان، كانوا عايشين في المدينة في أمان وإيمان.

بيعبدوا ربنا، يصلوا ويصوموا، يتعلموا القرآن، ويشكروا ربنا على نعمه الكتيرة.

الكفار الأشرار عرفوا إن المسلمين بقوا أقوياء وشجعان، وما بيخافوش غير من ربنا، فبقوا مترددين يقربوا منهم.

في يوم من الأيام، سيدنا محمد ﷺ وهو نايم، شاف حلم (رؤية).

وأي رؤية يشوفها نبي من أنبياء ربنا، لازم تتحقق في الحقيقة.

شاف إيه يا ولاد؟

شاف إنه راح مكة، عند الكعبة، ومعاه أصحابه المؤمنين.

شاف إنه مسك مفتاح الكعبة، وطافوا حوالينها في سلام، من غير ما حد من الكفار يضايقهم.

وبعد ما خلصوا العمرة، بعض الصحابة حلقوا شعرهم، والبعض قصّره.

النبي ﷺ حكالهم الرؤية. كل المسلمين فرحوا جداً، لأنهم عرفوا إن اللي شافه النبي أكيد هيحصل.

يعني هيدخلوا مكة، وهيروا الكعبة، وهيعملوا عمرة وهم في أمان.

سيدنا محمد ﷺ وأصحابه جهزوا نفسهم للعمرة.

وأخدوا معاهم الهَدْي.

عارفين يعني إيه الهدي؟

يعني ياخدوا معاهم حيوانات زي البقر أو الغنم أو الجمال، عشان يذبحوها بعد العمرة، ويوزعوا لحمها على الفقراء والمحتاجين.

وكانوا يحطوا في رقبة الحيوان طوق مميز، عشان الناس تعرف إن ده هدي، ما حدش يقرب له لأنه مخصص للفقراء.

المسلمين خرجوا في طريق طويل لحد مكة، قلوبهم مليانة شوق إنهم يشوفوا الكعبة.

لكن. الكفار عرفوا إن المسلمين جايين.

قاموا لبسوا جلود النمور، وأخدوا سيوفهم ورماحهم، وقالوا:

- لازم نوقفهم وما ندخلهمش مكة.

سيدنا محمد ﷺ عرف بخطتهم، فغير الطريق ومشي من طريق صعب مليان حجارة، لحد ما وصل لمكان اسمه الحديبية.

هناك تعبوا جداً من المشي، وعطشوا. حتى البير اللي هناك ما فيهوش ميه

المسلمين راحوا للنبي ﷺ وقالوا:

- إحنا عطشانين وما فيش ميه.

النبي ﷺ طلع سهم كان معاه، وقال لواحد من الصحابة:

- اغرس السهم في البير.

وبالفعل، أول ما السهم نزل، الميه انفجرت من البير

شربوا هم، وشربت الحيوانات كمان.

دي بركة ربنا اللي دايمًا بينصر نبيه وأصحابه.

بعدها الكفار بعتوا رسول للنبي ﷺ يسأله:

- إنت جاي ليه؟.

شاف الهدي مع المسلمين، ورجع يقول لقومه:

- دول مش جايين يحاربوا، دول جايين يعملوا عمرة.

لكن الكفار كانوا مصرّين على العناد، وبعتوا خمسين شاب يتجسسوا على المسلمين.الصحابة مسكوهم، وجابوهم عند النبي ﷺ.

النبي عفا عنهم وسابهم.

ولسه الكفار رافضين يدخلوا المسلمين مكة.

النبي ﷺ بعت سيدنا عثمان بن عفان لمكة عشان يشرح لهم إن المسلمين جايين للعمرة فقط.

الكفار قالوا له:

- طيب، انت بس يا عثمان، ممكن تطوف بالكعبة.

لكنه قال:

- لا، ما أدخلش الكعبة من غير النبي وأصحابه.

فحبسوه

المسلمين اتأخر عليهم عثمان رضي الله عنه، فافتكروا إن الكفار قتلوه. النبي ﷺ جمع أصحابه تحت شجرة وقال لهم:

- مين يبايعني على الصبر والجهاد حتى الموت لو قتلوا عثمان؟

الصحابة كلهم بايعوا النبي ﷺ، ووضعوا أيديهم في يده، وكان ربنا راضي عنهم وسماها في القرآن بيعة الرضوان.

الكفار حسّوا إنهم غلطوا، فأطلقوا عثمان، وبعتوا مندوب يتفق مع النبي ﷺ على الصلح.وكان الاتفاق اسمه: صلح الحديبية.

وكانت شروط الصلح:

أن المسلمين مش هيعملوا العمرة السنة دي، لكن يرجعوا السنة الجاية ويدخلوا مكة 3 أيام في أمان.

والكفار والمسلمين مش هيحاربوا بعض 10 سنين. ولو حد من الكفار أسلم وهاجر للمدينة، المسلمين يرجعوه للكفار

وده كان شرط صعب جداً.

المسلمين زعلوا من الشرط، لكن وافقوا طاعة للنبي ﷺ.

النبي ﷺ أمرهم يذبحوا الهدي، ويحلقوا أو يقصروا شعرهم، ويستعدوا للرجوع.

وفي السنة التالية، فعلاً رجعوا مكة، وطافوا بالكعبة، وعملوا العمرة زي ما شاف النبي ﷺ في الرؤية. وكانوا فرحانين جداً إن وعد ربنا اتحقق.

صلح الحديبية كان نقطة قوة للمسلمين، مش ضعف. لأنه سمح لهم ينشروا الإسلام في أمان، وخلال السنين اللي بعد الصلح، ناس كتير جدًا أسلموا

ربنا نزل سورة كاملة اسمها سورة الفتح، بدأها بقوله:

﴿ إِنَّا فَتَحْنَا لَكَ فَتْحًا مُّبِينًا ﴾، علشان يبين إن صلح الحديبية كان نصر عظيم.

نكمل الحلقة القادمة إن شاء الله

اللهم صل وسلم وبارك على سيدنا محمد وعلى آله وصحبه أجمعين.

دمتم بخير وسعادة دائماً

گ/إلهام عمر