الدعوة الجهرية

يا حبايبي الحلوين.. يا أشطر أطفال

وحشتوني جداً، ويلا نبدأ كلامنا زي ما اتعودنا: بالصلاة على حبيبنا رسول الله ﷺ.

اللهم صلِّ وسلم وبارك على سيدنا محمد.

ولما أقول: سيدنا محمد ﷺ. حبايبي الشاطرين يردوا بسرعة ويقولوا:

عليه الصلاة والسلام .

بعد ما النبي ﷺ دعا الناس في السر تلات سنين كاملة، جه جبريل عليه السلام وقال له:

- يا محمد، ربنا بيأمرك إنك تعلن الدعوة وتبلّغها لكل الناس علانية.

فسيدنا محمد جمع أهله وقرايبه وقال لهم:

- أنتم عارفين إني عمري ما قلت غير الصدق. ربنا اختارني أكون نبي، أعلمكم وأعلم كل الناس. ربنا واحد هو اللي خلقنا، واللي هيطيعه ويمشي على أوامره هيدخل الجنة، واللي يعبد غيره هيدخل النار.

أهله سكتوا وفكروا في كلامه، إلا عمه أبو لهب اللي كان قلبه قاسي وما بيحبش يسمع كلام الحق. قال لهم:

- محدش يسمع كلام محمد ولا يساعده، لو حد وقف معاه كل الناس هتحاربكم

لكن عمه أبو طالب، اللي رباه بعد وفاة جده، رد على أبو لهب وقال:

- لا. أنا هقف مع محمد وأحميه ومش هخلي حد يؤذيه.

لكن أبو طالب كان لسه بيعبد الأصنام وخايف يسيبها عشان الناس ما يتريقوش عليه، ففضل يحمي سيدنا محمد من غير ما يؤمن بدعوته.

بعد كده سيدنا محمد طلع على جبل اسمه الصفا، ونادى بأعلى صوته لحد ما الناس كلها اجتمعت. وقال لهم:

- لو قلتلكم حاجة، هتصدقوني؟

فردوا:

- طبعاً، إحنا عارفينك ما بتكذبش أبداً.

فقال لهم:

- ربنا اختارني أكون رسول. لازم تعبدوا ربنا وحده وتسيبوا عبادة الأصنام اللي لا تسمع ولا تفهم.

الناس فكروا في كلامه، لكن عمه أبو لهب قال له كلمة وحشة:

- تبا لك   يعني هتخسر وتموت.

فنزل كلام ربنا في القرآن:

(تَبَّتْ يَدَا أَبِي لَهَبٍ وَتَبَّ، مَا أَغْنَى عَنْهُ مَالُهُ وَمَا كَسَبَ، سَيَصْلَى نَارًا ذَاتَ لَهَبٍ، وَامْرَأَتُهُ حَمَّالَةَ الْحَطَبِ، فِي جِيدِهَا حَبْلٌ مِّن مَّسَدٍ).

يعني أبو لهب هو اللي هيخسر ويموت كافر ويدخل النار.

إعلان الدعوة من على جبل الصفا كان بداية المرحلة الجهرية من الدعوة بعد ثلاث سنين من السرية.

ومراته أبو لهب أم جميل كانت أخت أبو سفيان، وكانت دائماً تأذي النبي بالكلام الوحش وتنشر الأذى بين الناس. كانت ست شريرة زيّ أبو لهب، ولما عرفت الكلام ده، جابت حجر كبير وراحت تدور على سيدنا محمد عند الكعبة وهو قاعد مع سيدنا أبو بكر.

أبو بكر خاف، لكن سيدنا محمد قال له:

- ما تخافش.

جات أم جميل وسألت:

- فين محمد؟ لو شوفته هضربه

ويا عجب كان سيدنا محمد قاعد قدامها، لكن ربنا خلاها ما تشوفوش أبداً، ومشيت.

فسيدنا محمد قال لأبو بكر:

- ربنا هو اللي خلاها ما تشوفنيش.

في ناس كانوا بيسمعوا كلام سيدنا محمد ويؤمنوا به ويتركوا عبادة الأصنام، لكن الكفار الأشرار اتضايقوا جداً إن كل يوم يزيد عدد المسلمين. فاجتمعوا يفكروا في خطط شريرة.

قال واحد منهم:

- عندي فكرة  نقول للناس اللي جايين مكة أوعوا تكلموا محمد، ده ساحر هيعمل فيكم سحر ويخليكم مؤمنين

فبدأوا يقعدوا في الطرق يحذروا الناس. لكن رغم كده، الناس كانت بتروح لسيدنا محمد وتعرف إنه رسول ربنا وتؤمن بيه.

الكفار اتغاظوا أكتر وقالوا:

- خلاص هنشتم محمد ونشتم المؤمنين ونتريق عليهم لحد ما يرجعوا يعبدوا الأصنام.

وكانوا يسخروا من المؤمنين الفقراء عشان هدومهم مقطعة.

حزن سيدنا محمد

لكن ربنا قال له: (وَلَقَدْ نَعْلَمُ أَنَّكَ يَضِيقُ صَدْرُكَ بِمَا يَقُولُونَ، فَسَبِّحْ بِحَمْدِ رَبِّكَ وَكُنْ مِنَ السَّاجِدِينَ، وَاعْبُدْ رَبَّكَ حَتَّى يَأْتِيَكَ الْيَقِينُ).

يعني ربنا أمره يسبح ويصلي عشان يزول الحزن ويثبت قلبه.

الكفار قرروا يمنعوا الناس يسمعوا القرآن، فكانوا يعملوا دوشة ويغنوا بصوت عالي. وبدأوا يعذبوا المؤمنين الضعفاء، يربطوهم في الشمس من غير أكل ولا شرب ويحطوا حجارة سخنة على أجسامهم.

ومن اللي اتعذبوا بلال بن رباح، وعمار بن ياسر وأبوه وأمه، وغيرهم من المسلمين. لكنهم كانوا يقولوا بثبات: "أحد، أحد" يعني ربنا واحد.

لما قال بلال "أحد أحد" كان الكفار يعذبوه أشد العذاب، لكن صبره وثباته كان مثالاً لكل المسلمين.

سيدنا محمد قال للمسلمين:

- فيه بلد بعيدة اسمها الحبشة، فيها ملك عادل اسمه النجاشي. سافروا إليها، هتلاقوا الأمان هناك وتعبدوا ربنا بحرية.

أول هجرة للحبشة كانت في السنة الخامسة من البعثة، وخرج فيها حوالي ١١ رجل و٤ نساء، وكان أميرهم عثمان بن عفان ومعه زوجته رقية بنت رسول الله صلى الله عليه وسلم.

فسافر عدد من المسلمين للحبشة وعاشوا فيها في أمان.

لكن الكفار اتغاظوا وبعتوا رجلين منهم ومعاهم هدايا كتيرة لملك الحبشة عشان يرجّع المسلمين.

ملك الحبشة النجاشي اسمه "أصحمة" وكان فعلاً ملك عادل لا يُظلم عنده أحد.

ترى هل هيوافق ملك الحبشة؟ ده نعرفه في الحلقة الجاية إن شاء الله.

اللهم صل وسلم وبارك على سيدنا محمد وعلى آله وصحبه أجمعين.♥️

دمتم بخير وسعادة دائماً

گ/إلهام عمر