عام الفيل،ومولد الرسول

يا حبايبي الحلوين.. يا أشطر أطفال

وحشتوني جداً، ويلا نبدأ كلامنا زي ما اتعودنا: بالصلاة على حبيبنا رسول الله.

اللهم صلِّ وسلم وبارك على سيدنا محمد.

يا ترى.مين أحسن إنسان في الدنيا كلها؟

طبعًا سيدنا محمد ﷺ.

ربنا اختاره عشان يعلّم الناس الخير، ويعرفهم الحلال والحرام، والصح من الغلط.

واللي يحب النبي ﷺ ويتبعه ربنا يحبه ويدخله الجنة.

والجنة أجمل مكان ممكن نتخيله، ومهما فكرنا فيها فهي أعظم وأجمل بكتير من أي وصف.

طيب، تعالوا نبدأ من البداية.

من زمان جداً، كان سيدنا إبراهيم عليه السلام وابنه إسماعيل بيبنوا الكعبة، وسيدنا إبراهيم دعا ربنا وقال:

ـ يا رب، ابعث للناس رسول يعلّمهم يعبدوا ربنا وحده ويهديهم طريق الخير.

وربنا استجاب، واختار سيدنا محمد ﷺ يكون هو الرسول اللي ينور الدنيا.

طب يا شاطرين.أبو النبي ﷺ اسمه إيه؟

هو عبد الله بن عبد المطلب.

وأمه اسمها آمنة بنت وهب.

لكن قبل ما النبي ﷺ يتولد، والده عبد الله توفي، واتولد النبي يتيم الأب.

وكان ميلاده في سنة مشهورة جداً، اسمها عام الفيل.

تعالوا نشوف حصل إيه في السنة دي.

في اليمن كان فيه ملك اسمه أبرهة الحبشي. ملك ظالم.

بنى كنيسة كبيرة، زيّنها بالذهب والفضة، وعايز الناس تسيب الكعبة وييجوا يصلّوا عنده.

لكن أهل مكة ما سمعوش كلامه، فغضب وقال:

ـ أنا ههدم الكعبة

وجمع جيش ضخم ومعاه أفيال قوية واتجه لمكة.

أهل مكة خافوا جداً، وكان قائدهم عبد المطلب جد النبي ﷺ.

عبد المطلب قال للناس:

ـ اطلعوا الجبال وادعوا ربنا. للكعبة رب يحميها.

وفعلاً لما وجهوا الفيل ناحية الكعبة، الفيل قعد على الأرض وما اتحركش.

وفجأة. السما اتملت طيور صغيرة اسمها أبابيل.

كل طائر شايل في منقاره ورجليه حجر صغير لكنه قوي جداً.

ورموا الحجارة على جيش أبرهة، فهلكوا كلهم، ومات الملك الظالم.

الناس رجعوا لبيوتهم فرحانين إن الكعبة محفوظة بحماية ربنا.

ومن يومها اتسمّت السنة دي عام الفيل.

وفي نفس السنة دي، اتولد حبيبنا النبي ﷺ.

عارفين إن النبي ﷺ اتولد يوم إيه؟

اتولد يوم الاثنين

لما اتولد، أمه آمنة أخدته لجده عبد المطلب، وكان طفل جميل جداً.

وقالت له:

ـ وأنا حامل فيه، كنت بشوف نور بيخرج مني وينوّر الدنيا.

عبد المطلب حس إن الطفل ده مش عادي، وإنه هيكون نور للعالم كله.

وسمّاه محمداً.

ولما سألوه:

- ليه اخترت الاسم ده؟

قال:

-عشان يكون محموداً في الأرض، ومحبوباً عند رب السماء.

وكمان. مكان ولادته كان في مكة المكرمة، في بيت بسيط جداً.

يعني من البداية، النبي ﷺ عاش يتيم وأبوه مش موجود، عشان ربنا يعلّمنا إن الكرامة والشرف مش بالغنى ولا المال، لكن بالرضا والقرب من الله.

وفي وقت ولادة النبي ﷺ، حصلت حاجات عجيبة

قصور في الشام وفارس اتزلزلت ووقعت أجزاء منها.

نار المجوس دول كانوا عبدة النار اللي كانت بتتعبد سنين طويلة انطفأت.

وكأن الدنيا كلها بتعلن أنه جه النور اللي هيغير العالم.

طيب، إيه اللي حصل بعد كده؟

في الوقت ده، كان من عادة العرب يودّوا الأطفال يعيشوا فترة في البادية.

ليه؟ عشان هناك الجو أنضف، والهواء أنقى، واللي يعيش فيها صحته تقوى.

وكانت تيجي مرضعات ياخدوا الأطفال معاهم يرضعوهم ويكبّروهم في البادية.

كل واحدة تسأل:

ـ مين عنده طفل صغير آخده معايا؟

فيقوم الأهل يسلّموها الطفل.

آمنة أم النبي ﷺ قالت لهم:

ـ أنا عندي طفل مولود.

سألوها:

ـ فين أبوه اللي هيدفع الفلوس؟

قالت:

-أبوه مات.

فكتير من المرضعات اعتذروا وقالوا:

ـ مش هناخده.

آمنة حزنت، وجد النبي ﷺ عرض فلوس، لكنهم برضه رفضوا.

وفي الوقت ده، كانت في مرضعة اسمها حليمة السعدية.معاها جوزها وابنها، وكانوا فقراء جداً.

حمارهم ضعيف ما بيقدرش يمشي بسرعة، وناقتهم لبنها قليل ما يكفيش.

دارت حليمة كتير على طفل تاخده، لكن ما لقتش إلا سيدنا محمد ﷺ.

قالت:

ـ خلاص، آخده أنا، حتى لو أبوه مش موجود.

وفعلاً. راحت لأمه آمنة وجده عبد المطلب، وخدت سيدنا محمد ﷺ.

قولوا معايا يا حبايبي: اللهم صلِّ وسلم وبارك على سيدنا محمد.

من أول لحظة أخدت النبي معاها، بدأت تلاحظ حاجات عجيبة:

الناقة الضعيفة بقت تدي لبن وفير يملا الإناء.

الحمار البطيء بقى نشيط وسريع أكتر من باقي الدواب.

الناس استغربوا جدًا وقالوا:

ـ إيه اللي حصل؟

ولما رجعت حليمة لبيتها في ديار بني سعد، كانت السنة صعبة جدًا: لا زرع ولا مطر.

لكن من يوم ما دخل النبي ﷺ البيت، نزل المطر ونبت الزرع، وأرضهم بقت خضرا وجميلة.

حليمة فرحت جداً، وفهمت إن الطفل ده مش عادي، وإن فيه بركة من عند ربنا.

وكانت كل يوم تبص للنبي وتقول في نفسها:

ـ الولد ده فيه سر عظيم.

ونكمل الحكاية مع بعض في الحلقة الجاية إن شاء الله.

صلوا على حبيبكم: اللهم صلِّ وسلم وبارك على سيدنا محمد وعلى آله وصحبه أجمعين ♥️ 🌹

دمتم بخير وسعادة دائماً

گ/إلهام عمر