غزوة الخندق

حبايبي الحلوين.. يا أشطر أطفال

يلا نبدأ كلامنا زي ما اتعودنا: بالصلاة على حبيبنا رسول الله ﷺ.

اللهم صلِّ وسلم وبارك على سيدنا محمد وعلى آله وصحبه أجمعين.

النهاردة يا حبايبي هنكمل حكايتنا مع سيدنا محمد ﷺ.

يا حبايبي زي ما قولنا قبل كده. سيدنا محمد ﷺ كان عايش في المدينة الطيبة الجميلة، معاه أصحابه المسلمين الطيبين الصالحين اللي كانوا بيحبوا ربنا ورسوله وبيضحّوا بكل حاجة عشان الإسلام.

بس يا ترى كان في مين تاني عايش معاهم في المدينة؟

آه. كانوا اليهود.

واليهود في الأول عملوا اتفاق مع سيدنا محمد ﷺ. قالوا:

- نعيش في سلام، لا نؤذيكم ولا تساعدوا أعداءكم علينا. يعني نكون جيران في أمان.

لكن للأسف. اليهود ما التزموش بالاتفاق.

في يوم من الأيام، حوالي عشرين واحد من اليهود سافروا مكة وقعدوا مع كفار قريش. وقالوا لهم:

- إحنا شايفين إن المسلمين بقوا أقوياء، وإحنا متغاظين منهم. جينا نساعدكم ضد محمد والمسلمين، عشان نرجّع القوة لينا وليكم

اليهود دول هما بني النضير اللي النبي ﷺ خرجهم من المدينة قبل كده بسبب خيانتهم. ما سكتوش، راحوا لقريش وقالوا لهم:

- اجمعوا جيش كبير وتعالوا نهاجم المسلمين كلنا سوا

طبعًا الكفار فرحوا جدًا، وقالوا:

- فرصة عظيمة

وبدأوا يجهّزوا جيش كبير جداً، فيه كفار وفيه يهود، ومعاهم سلاح كتير.

واليهود قالوا كمان:

- تعالوا نلف حوالين مكة ونكلم القبائل اللي عايشة برة، نقولهم إن المسلمين خطر، ونخليهم ينضموا لينا ضد المسلمين.

وفعلاً. تجمع الأشرار من كل حتة اللي من جوة مكة واللي من برة.

وعملوا جيش ضخم جداً عشرة آلاف واحد

يا خبر عشرة آلاف جايين يحاربوا المسلمين في مدينتهم

وسيدنا محمد ﷺ أول ما عرف.جمع الصحابة وخد رأيهم.

سلمان الفارسي رضي الله عنه قال:

- يا رسول الله، عندي فكرة! المدينة حوالينها جبال من كل ناحية مفيش غير مكان واحد مفتوح ممكن يدخلوا منه.

نعمل هناك خندق، حفرة كبيرة طويلة، محدش يعرف يعديها. وإحنا نفضل نحرسها.

وفعلاً. الفكرة عجبت النبي والصحابة، وبدأوا يحفروا.

كانوا بيحفروا بإيديهم، يتعبوا جداً، ياكلوا قليل جداً، يناموا وقت قصير. ومع ذلك ما وقفوش.

عارفين ليه؟

عشان كانوا عارفين إن ربنا شايف تعبهم، وهينصرهم.

وفي مرة، واحد من الصحابة كان عنده شوية أكل صغيرين لحم قليل ومعاه شوية شعير. عملهم وأخدهم للنبي ﷺ.

الصحابي كان عارف إن الأكل مش هيكفي كل الجيش. لكن سيدنا محمد دعا المسلمين كلهم

وكانوا حوالي ألف ،ووزّع عليهم الأكل.

المعجزة حصلت،كلهم أكلوا وشبعوا

سبحان الله. ربنا بارك في القليل فبقى كتير، عشان مع رسول الله.

وأثناء الحفر، لقوا صخرة ضخمة جداً، كأنها حديدة، محدش قادر عليها.

جابوا النبي ﷺ فأخد الفأس، وقال:

- بسم الله.

وضرب الصخرة. اتكسرت حتة. قال بعدها:

- الله أكبر

وضرب تاني، اتكسرت حتة كمان.

وضرب ثالث مرة، فتهشّمت الصخرة كلها وبقت زي التراب.

الله أكبر  قوة ربنا معاه.

وكملوا الحفر لحد ما عملوا الخندق الضخم الطويل.

وسيدنا محمد ﷺ أمر النساء والأطفال يفضلوا في البيوت عشان الأمان، أما الرجال فوقفوا حرس حوالين الخندق.

وكان من أشجع أبطال المسلمين سيدنا علي بن أبي طالب رضي الله عنه. لما حاول واحد من كبار المشركين اسمه عمرو بن ودّ يعدي الخندق ويهجم، خرج له سيدنا علي رضي الله عنه، وحصلت بينهم مبارزة وانتهت بانتصار علي وقتل عمرو، وده رفع معنويات المسلمين جداً.

ولما جيش الكفار وصل وشاف الخندق.اتصدم

حفرة ضخمة جداً وطويلة، مش قادرين يعدّوها.كل ما يحاول واحد ينط بالحصان، المسلمين الأقوياء يصدّوه بالسهام.

كل محاولة تفشل.

الكفار قعدوا حوالين الخندق شهر كامل،عملوا خيام، وأعدّوا مستنيين أي فرصة. والمسلمين مرابطين حوالين الخندق، سهرانين يدعوا ربنا:

-اللهم استر عوراتنا، وآمن روعاتنا.

وسيدنا محمد ﷺ كان يدعو دائماً:

- اللهم منزل الكتاب، سريع الحساب، اهزم الأحزاب. اللهم اهزمهم وزلزلهم.

وفجأة. ربنا استجاب.

بعت ريح قوية جداً جداً.

قطّعت خيام الكفار، وطيرت أكلهم، وغبار دخل عيونهم ووشوشهم.

اترعبوا، حسّوا إن دي مش ريح عادية، دي عذاب من عند ربنا.

خافوا جداً، وقرروا يهربوا.

وبالفعل الجيش الضخم اللي كان فيه عشرة آلاف واحد رجع لمكة مهزوم، من غير ما يقاتل المسلمين.

شايفين يا ولاد؟

اتجمعت كل قوى الشر الكفار، واليهود، والقبائل من برة ومن جوة

لكن مهما كانوا أقوياء وكثير مش ممكن يغلبوا المسلمين اللي معاهم ربنا. لأن النصر مش بالكثرة ولا بالسلاح، النصر بيد الله.

ربنا نصر المسلمين، وحفظ مدينتهم، ورد كيد الكفار واليهود.

ونعلم من القصة دي إن التعب والصبر والدعاء والطاعة لربنا دايماً نتيجتهم نصر وخير كبير.

نكمل الحلقة الجاية إن شاء الله

اللهم صل وسلم وبارك على سيدنا محمد وعلى آله وصحبه وسلم

دمتم بخير وسعادة دائماً

گ/إلهام عمر