طفولة النبي عليه الصلاة والسلام ♥️

يا حبايبي الحلوين.. يا شاطرين

يلا نبدأ مع بعض بالصلاة على حبيبنا الرسول:

اللهم صلِّ وسلم وبارك على سيدنا محمد

فاكرين حليمة السعدية اللي أخدت النبي وهو صغير وربّته في البادية؟

رجعت حليمة ومعاها سيدنا محمد ﷺ، وكانت فرحانة جدًا إن أمه آمنة وافقت يفضل عندها فترة أطول.

وكل يوم كانت تلاحظ البركة حوالين بيتها وأرضها.

لكن يا ترى ليه ربنا كان بيحط البركة مع سيدنا محمد ﷺ؟

لأن ربنا اختاره يكون أعظم إنسان، يعلّم الناس الخير كله.وعشان كده كان لازم قلبه يكون أنقى وأطهر قلب، ما يدخلوش شر أبداً.

وإيه اللي حصل؟

في يوم من الأيام. الأطفال كانوا بيلعبوا في البادية، وسيدنا محمد ﷺ بيلعب معاهم.

فجأة نزل عليهم ملاك من عند ربنا، وجهه منور، لابس أبيض.

الملاك ده كان سيدنا جبريل عليه السلام.

قرب من النبي وخلاه ينام بهدوء، ومن غير أي ألم فتح صدره برفق، وأخرج قلبه، وأخذ منه جزء صغير جداً وقال:

- ده حظ الشيطان منك.

وبكده بقى قلب النبي أطهر قلب، والشيطان ما يقدرش يقرب منه أبداً.

الأطفال اتخضّوا جداً، وجروا بسرعة على حليمة يصرخوا:

- الحقينا يا حليمة. محمد اتقتل

حليمة جريت بخوف، لكنها لقت سيدنا محمد واقف سليم، بس شكله متأثر شوية.

حضنته وقالت:

- ما تخافش يا حبيبي، أنا هرجعك لمامتك.

النبي ﷺ ما حسش بوجع، وربنا كان حافظه، ورجع يلعب عادي كأن ما حصلش شيء.

لكن قلب حليمة كان مليان خوف عليه، رغم إنها بتحبه جداً.

راحت لأمه آمنة وقالت:

- يا آمنة، أنا هرجعلك محمد.

استغربت آمنة وقالت:

- ليه؟ إيه اللي حصل؟

حليمة حكت لها اللي شافته.

آمنة افتكرت الرؤيا اللي كانت بتشوفها وهي حامل بيه: نور عظيم بيخرج منها وينوّر الدنيا كلها.

فهمت إن ابنها مش زي باقي الأطفال، وإن له شأن كبير.

يا حبايبي، في حادثة شق الصدر اللي حصلت للنبي ﷺ وهو صغير، ربنا كان بيعلّمنا معنى مهم جداً

إن النبي أطهر إنسان، وربنا نقّى قلبه من الشر من أول طفولته

وبعد كده رجع النبي ﷺ يعيش مع أمه آمنة في مكة.

كبر النبي شوية، ولما بقى عنده ست سنين، أمه قالت له:

- يلا يا محمد، نسافر نزور قرايبنا في المدينة.

النبي فرح جداً، وراح معاها وزار أخواله، وقرايب أمه فرحوا بيه وحبوه.

لكن وهو راجع مع أمه. حصل أمر صعب جداً.

أمه تعبت مرض شديد، وفي الطريق في مكان اسمه الأبواء، توفيت آمنة.

مكان وفاة أمه آمنة كان بين مكة والمدينة، في الطريق تحديداً في الأبواء.وده علّم النبي معنى اليُتم من بدري، وربنا ذكره في القرآن:

"ألم يجدك يتيمًا فآوى"

النبي وهو عنده ست سنين، لقى نفسه من غير أب ولا أم.زعل جداً وحس بالوحدة. لكن ما كانش وحيد، لأن ربنا كان معاه وحافظه.

كانت معاه خادمته أم أيمن، اهتمت بيه ورجعته لمكة.

وهناك كان مستنيه جده عبد المطلب.

أخده في حضنه وقال:

- أنا اللي ههتم بيه.

وكان عبد المطلب بيحبه حب كبير.

مرة وهو عند الكعبة، فرشوا لعبد المطلب سجادة خاصة يقعد عليها، وأولاده قاعدين حواليه.

النبي الصغير راح يقعد على السجادة، فقالوله:

- دي بتاعة جدك بس.

لكن عبد المطلب أول ما شافه قال:

- سيبوه، ده يقعد معايا.

قعده جنبه، وحط إيده على ظهره وقال:

- الولد ده هيكون له شأن عظيم.

عبد المطلب جده، فكان سيد قريش وقتها، وكل الناس بتحترمه وتقدّره. وده خلّى النبي يعيش معاه مكانة مميزة رغم صغر سنه.

النبي ﷺ عاش في كنف جده عبد المطلب لحد ما بقى عنده تمان سنين. لكن بعدين عبد المطلب توفي، وبقى النبي من غير أب ولا أم ولا جد.

طيب يا ترى مين اللي هيهتم بيه بعد كده؟

عمه أبو طالب، أخو والده.

وهنعرف سوا إزاي اهتم بيه وعاش معاه في الحلقة الجاية إن شاء الله.

قولوا معايا:

اللهم صلِّ وسلم وبارك على سيدنا محمد وعلى آله وصحبه أجمعين ♥️ 🌹

دمتم بخير وسعادة دائماً

گ/إلهام عمر