شرم الشيخ - 2028
بعد مرور فترة علي قضية يوسف سافر معتز وحمزه اجازة لشرم الشيخ.
حمزه: يالله اخيرا ارتحنا.
معتز: أنا مكسل افكر في القضية اللي بعدها.
ضحك حمزه وقال:
-امال فين الحماس ولا دي حلاوة البدايات.
معتز: لا زهق وفقدان شغف وحياتك.
حمزه: الف سلامة علي شغفك.
وقعدوا يضحكوا وجت مكالمة لحمزه.
معتز: ايه حصل ايه؟
حمزه: لازم نرجع القاهرة.
معتز: ده ليه!!
حمزه: قضية جديدة واحنا مطلوبين بالاسم.
معتز: يالله احنا مش هنرتاح بقي؟
حمزه: يلا بطل اعتراض.
معتز: يلا يا استاذ حمزه اتفضل يافندم.
نزل حمزه ومعتز القاهره ووصلوا مكتب حمزه عشان يشوفوا ملف القضية.
شد معتز الملف من حمزه وقال:
-ايه القضية دي وريني كده.
اتنهد حمزه وقال بضيق:
=مش هتبطل شغل العيال ده بقي!
معتز: لا مش هبطل.
حمزه: ياصبر أيوب.
معتز: مقتل رجل الأعمال يونس جمال. وجد رجل الأعمال يونس جمال مقتولا في منزله.
حمزه: سبب الوفاة ايه؟
معتز: اضرب بالمكوا علي دماغه، الغريب أن مراته هي اللي قتلته وهي اللي اعترفت بكدة.
حمزه: طب ما القضية جاهزة اهي امال طالبينا ليه؟
معتز: مش عارف بس اكيد في حاجة احنا لازم نروح نتكلم مع مراته.
حمزه: هشوف وهقولك.
معتز: تمام.
بدأ معتز يدور علي اي خيط يساعده في القضية دي لكن كل مرة كان بيفشل.
معتز: الو يا حمزه.
حمزه: اخيرا رديت فينك؟
معتز: مش عايز اتكلم لو عندك حاجة بخصوص القضية قولها لو غير كده معلش لازم اقفل.
استغرب حمزه جدا من لهجة معتز الغريبة وقال:
=عموما مش عارف اطلع اي تصريح يخلينا نتكلم مع مرات يونس جمال. بس اللي عرفته أن كان ليه بنت بس البنت دي اختفت تماما.
معتز: طب متعرفش اي تفاصيل عنها.
حمزه: للاسف لا لسه بدور.
معتز: خلاص ماشي دور ولو عرفت توصل لحاجة كلمني.
حمزه: مالك يا معتز، ايه الطريقة الغريبة دي؟
معتز: اعصابي تعبت يا حمزه عمالة تجيلي رسائل وكل رساله اسؤا من اللي قبلها وكمان مش عارفين نوصل لاي حاجة في القضية دي.
حمزه: كل ده هيعدي احنا حلينا الاصعب والاصعب مش هقدر نحل دي يعني؟ قوم وفوق وخلينا ننزل نشرب قهوه فاي حته.
معتز: مش عايز انزل معلش خليها وقت تاني.
حمزه: يعم يلا عشان خاطري.
معتز: اممم هنتقابل فين.
حمزه: ايوا كده هو ده معتز اللي أنا اعرفه، تعالي نروح الكافيه المفضل بتاعنا.
معتز: خلاص ماشي هلبس واجيلك.
حمزه: هسبقك علي هناك متتاخرش.
معتز: حاضر سلام.
حمزه: سلام
نزلوا اتقابلوا وهما قاعدين جت مكالمة لحمزه وبعد ما خلص المكالمة بدأ يحكي لمعتز.
حمزه: الرجالة عرفوا يجيبوا معلومات عن بنت يونس جمال.
معتز: ايه قولي عرفوا ايه؟
حمزه: كنت عارف انك هتفرح. المهم، البنت عندها ١٩ سنة هي مش بنت يونس هي بنت مراته.
معتز: يعني ايه؟؟
حمزه: يعني يونس اتجوز واحده عندها بنت هي دي البنت بقي.
معتز: اه فهمت، وبعدين.
حمزه: البت بعد الحادثة اختفت تماما بس عايشة.
معتز: طب وعملت ايه في موضوع مامتها برضه مش هنعرف تقابلها.
حمزه: لا مش راضيين يطلعوا تصريح.
معتز: طيب خلينا نشوف هنعمل ايه في موضوع البنت دي.
حمزه: ماشي.
حمزه: هخليهم يجيبوا عنوانها ونروحلها.
معتز: ماشي خلينا نشرب القهوه.
حمزه: بس انا جعان.
معتز: تصدق وانا.
حمزه: كنت عارف انك هتقول كده عيب عليك اخوك الكبير برضه.
معتز: انت هتذلني عشان اخويا الكبير.
حمزه: عيب يا ولد.
معتز: طيب خلينا نشوف هناكل فين.
حمزه: ماشي يلا.
وقاموا وبعد اسبوع كامل بيدوروا علي البنت وبعد ما لقوا عنوانها كلم حمزه معتز.
معتز: ايوا يا حمزه.
حمزه: انت لسه نايم صحصح كده وركز معايا.
معتز: قول قول صاحي.
حمزه: ماشي. البنت اسمها وعد، عندها ١٩ سنة، ساكنه في ستة اكتوبر.
معتز: طيب خلينا نروحلها.
حمزه: ماشي بس عندي شغل اخلصه الاول.
معتز: كده كده أنا لسه هعمل كام حاجة برضه وعقبال ما انا اخلص انت تكون خلصت.
حمزه: خلاص اول ما تخلص قبل ما تنزل رن عليا.
معتز: خلاص ماشي مع السلامة.
حمزه: سلام.
وبدأ حمزه يخلص في شغله وقام معتز يخلص اللي هيعمله برضه وعلي الساعه واحده الضهر تقريبا رن معتز علي حمزه.
معتز: خلصت ولا ايه؟
حمزه: اه خلصت، وانت؟
معتز: خلصت برضه وقولت ارن عليك قبل ما انزل.
حمزه: خلاص انزل وانا مسافة السكة.
معتز: خلاص ماشي ابعتلي اللوكيشن علي الواتس.
حمزه: حاضر. يلا سلام.
معتز: سلام
نزل معتز من بيته وراح حمزه وبعد ما وصل حمزه فضل مستني معتز كتير وفضل يرن لكن موبايل معتز كان اتقفل لحد لما رن رقم غريب علي حمزه رد وكانت الصدمة….
معتز عمل حادثه بالعربية ودخل في غيبوبة وهو دلوقتي في المستشفى.
نزل الكلام زي الرصاص علي حمزه، وعلطول راح حمزه المستشفى يشوف معتز. قابل حمزه الدكتور.
الدكتور: حضرتك مع الاستاذ معتز؟
حمزه: ايوا أنا اخوه هو ايه اللي حصله؟
الدكتور: للاسف الاستاذ معتز عمل حادثة عنيفة بالعربية ونتيجة الخبطة القوية اللي اخدها علي دماغة خلته دخل في غيبوبة واحتمال بنسبه ضعيفة أنه يفوق فاقد الذاكرة.
حمزه: فاقد الذاكرة…
الدكتور: ايوا بس ده الاحتمال الأضعف.
حمزه: طب هو هيفوق أمتي؟
الدكتور: للاسف مقدرش اقولك معاد محدد.
حمزه: شكرا جدا يادكتور.
الدكتور: العفو عن اذنك.
حمزه وقتها كان تايه مش عارف يروح يكلم محمد ولا يعمل ايه وفضل قاعد مع معتز في المستشفى. يروح الصبح يخلص شغله ويرجع يقعد مع معتز لمده اسبوعين تقريبا ووقتها عرف محمد باللي حصل.
كان حمزه قاعد قدام العناية المركزة وفجأة سمع صوت محمد.
محمد: حمزه ايه اللي حصل؟
حمزه: معرفش يا محمد معرفش هو المفروض كان جاي عشان نتقابل وجالي مكالمة أنه عمل حادثة ودخل في غيبوبة.
محمد: طب اهدي اهدي وهو هيبقي كويس انت عارف معتز بيحب يعرف غلاوته عندنا بس…
حمزه: يفوق بس وانا هعمله كل اللي هو عايزه.
محمد: ان شاءالله هيفوق متخافش.
بعدها هدي حمزه شوية وجه الدكتور.
محمد: ايه يا دكتور هو بقي احسن؟
الدكتور: كل المؤشرات الحيوية بتقول أنه سليم وكويس ومفيش اي سبب واضح أنه يفضل في الغيبوبة لغاية دلوقتى.
محمد: يعني ايه؟
حمزه: يعني هو دلوقتي محتاج دعواتكم.
محمد: شكرا يا دكتور.
حمزه: هو أنا ممكن ادخله؟
الدكتور: ممكن بس لازم تعقم نفسك كويس قبل ما تدخل، وحد من طقم التمريض يدخل معاك.
حمزه: تمام ماشي.
حمزه: طلعت أنا اللي بتوه من غيرك يا معتز فوق عشان نكمل سوا أنا مش هقدر اكمل لوحدي…
أنا محتاجك جنبي يا معتز.
وقتها بدأت الممرضة تحاول تهديه وتاخده بره الاوضة ولما طلع حضنه محمد وقاله أنه لازم يمشي عشان عنده شغل.
وفضل معتز اسبوع كمان في الغيبوبة وفي يوم أول ما حمزه دخل المستشفى جريت عليه الممرضة وقالتله أن معتز فاق وقتها حمزه كان هيطير من الفرحة.
دخل حمزه الاوضة وبدأ يدمع وقال:
-اكتشفت أن أنا اللي بتوه من غيرك
معتز: فهمت بقي أنا ليه متعلق بيك.
حمزه: اوعي تفكر تسبني يا معتز.
معتز: مش هسيبك بس ساعدني أقوم الاول.
حمزه: قوم تعالي.
وقوم معتز وبدا يرازي فيه شوية عشان يتأكد أنه كويس.
ختم حمزه كلامه:
-قوم وشد حيلك عشان في قضية لازم تخلصها.
معتز: صح انت روحت للبنت؟
حمزه: هروح ازاي من غيرك، وهنزل ازاي من عندها من غير متكون بتسألني اسألتك الغريبة، وهفتكر المعلومات ازاي من غير مانت تكتبها عندك في دفترك.
كل دي كانت تفاصيل بسيطة جدا بالنسبة لمعتز لكنها كانت حياة بالنسبة لحمزه.
سأل معتز:
=كل دي تفاصيل مهمة بالنسبالك؟
حمزه: انت الوحيد اللي باقيلي بعد موت ابويا وامي..
معتز: طب ومحمد؟
حمزه: اهو اللي حصلك ده خلاني اكتشفت أن محمد بعيد عننا. علي فكره مجاش غير مرة واحده وقعد حوالي ساعة تقريبا او اقل ومشي قال عنده شغل ومجاش تاني بقي بيبعتلي رسالة وخلاص.
معتز: مانت عارف أنا ومحمد من امتي علاقتنا كانت زي الاخوات احنا مبنشفش بعض غير كل فين وفين ولما بنتقابل بنتخانق. اوقات بحس ان محمد مش عايزني ابقي اخوه. بغض النظر أن عمري ما حبيت اقول الجملة دي… إلا أني بحس ان محمد بيكرهني.
اتصدم حمزه من كلام معتز وقال:
-بيكرهك!! ايه الكلام ده؟ لا لا محمد اخونا الكبير مستحيل يكون بيكرهك هو بس تلاقيه مشغول.
معتز: همم عادي بقي مش مهم. أنا هخرج أمتي؟
حمزه: الدكتور قال لما رجلك تتحسن شوية هتخرج.
قال معتز بزهق:
=ياربي يعني أنا هفضل هنا كتير.
حمزه: لا أن شاءالله هتخرج قريب.
معتز: يارب.
وفعلا فضل معتز في المستشفى وكان حمزه بيقوله كل المعلومات الجديدة اللي يعرفها وبدا معتز يتحسن شوية شوية وبعد ما خرج من المستشفى قرروا يروحوا لبنت يونس جمال….
معتز: السلام عليكم، أنا معتز التويني صحفي وده اخويا حمزه التويني رائد. كنا بس محتاجين نتكلم معاكي شوية.
بدأت البنت تتوتر شوية وقالت:
وعد: ااا..اكيد اتفضلوا.
معتز: شكرا.
قعد معتز وحمزه والبنت كان لسه باين عليه ملامحها التوتر لكنها كانت بتخبيها.
سأل حمزه:
=انتي ساكنة هنا لوحدك؟
وعد: ايوا.
-وليه مش قاعدة مع مامتك؟
*هي اتجوزت وانا مرتاحتش معاهم، فا رجعت هنا اعيش لوحدي.
سأل حمزه باستغراب:
=ومامتك وافقت انك تقعدي لوحدك وانتي أية صغيرة كده؟
ردت البنت بتوتر:
*اه..اه هي احترمت قراري وخلتني اجي اقعد هنا.
لاحظ معتز جدا التوتر اللي كان علي البنت، وسألها وهو متعمد يغلط في إسمها:
-طب بقولك ايه يا عهد انتي في سنة كام؟
بدأت ملامح التوتر تتقلب لملامح عصبية:
*اسمي وعد مش عهد.. ثانيا أنا في أولي جامعة يعني في أوروبا أنا اكون ليا كامل المسؤولية علي نفسي و….
قاطعها حمزه بنرفزه من أسلوبها:
=احنا هنا في مصر مش في أوروبا.
حاول معتز يهدي الوضع وقال:
-طب هنستاذن احنا يلا يا حمزه.
واخد معتز حمزه ومشيوا من عند البنت واول ما نزلوا بدأ معتز يتكلم،
وقال:
-البنت دي وراها حاجة.
=انت لسه واخد بالك؟؟
-لاحظت ملامح وشها اتغيرت ازاي لما قولت اسمها غلط ، ولاحظت ازاي اتوترت لما سالتها هي ازاي عايشة لوحدها.
=احنا لازم نطلع نتكلم معاها تاني.
-لا احنا هنراقبها فترة وبعدين نبقي نتكلم معاها.
=ليه؟
-لازم نعرف تصرفاتها بتروح فين بتيجي منين كده.
=مش فاهم.
اتكلم معتز بغرور:
-مش فاهم انا ايه الغباء ده.
=والنبي!!! أنا اللي غبي دلوقتي..ماشي يا معتز.
ضحك معتز علي طريقة حمزه وقال:
-طب يلا خلينا نروح ناكل عشان جعان اوي.
=يلا يلا.
راحوا ياكلوا وبعدها حاولوا يطلعوا تصريح تاني عشان يتكلموا مع مامت وعد ، وبرضه معرفوش يطلعوا التصريح…
بعد ما عدي اسبوعين تقريبا وهما بيراقبوا وعد لاقوها اختفت تماما لحد ما كانت الصدمة….
وعد حاولت الانتحار وهي في المستشفى بين الحياة والموت.
قرر معتز وحمزه يروحوا يشوفوها في المستشفى وتقرر وعد أنها تعترف بكل حاجة…
-ازيك.
اتكلمت وعد وهي بتحاول تاخد أنفاسها:
*عايزه اقولك الحقيقة…
استغرب حمزه ومعتز جدا.
قال حمزه:
=حقيقة ايه؟
قالت وهي بدات تبكي:
*انا السبب اللي خلي ماما تقتله…
ـ ايه!!!!
*ايوا، دايما كنت بقولها إن عمو يونس بيحاول أنه يعتدي عليا وكان بي… بيتحرش بيا كل مره مكنتش بتصدقني لحد ما شفته بعينها وخبطته بالمكوا علي دماغه هي مكانتش قاصدة تموته بس الخبطة كانت جامدة اوي علي دماغه…
-وايه اللي حصل بعد كده كملي.
*قالتلي اهربي وروحي اقعدي في شقة ستة اكتوبر، بس انا ادمرت ومكنتش قادره اعيش مع العذاب ده ومع الكوابيس اللي كانت بتجيلي كل يوم…
قال حمزه بنبرة حزن:
=متقلقيش كله هيبقي بخير.
قالت وهي بتبكي بحرقة:
*يارب.
نزل معتز وحمزه من عند وعد وقرروا أنهم لازم يعملوا المستحيل ويجيبوا تصريح ويقابلوا مامت وعد.
وبالفعل بعد محاولات كتيرة جدا قدروا أنهم يجيبوا التصريح.
وراحوا ليها…
-ازيك يا مدام علياء.
بصلته وهي كأنها مش في وعيها وقالت:
*كويسة. حضرتك مين؟
-انا معتز التويني وده اخويا حمزه التويني، محتاجين نتكلم معاكي شوية.
*اتفضل.
قال حمزه وهو بيحاول يداري غضبه:
=بنتك في المستشفى.
قالت علياء بخوف علي بنتها:
*بنتي؟ ليه حصلها ايه؟
-حاولت تنتحر بس انقذوها الحمدلله.
*بنتي ملهاش ذنب… ملهاش ذنب فاي حاجة. أنا السبب في كل حاجة.
-تقدري تحكيلنا اللي حصل.
*ايوا. بعد ما رجعت أنا ويونس من شهر العسل بتاعنا بحكم اني دكتورة اوقات كتير كنت ببات في الشغل واسيب وعد مع يونس لوحدهم، وك…
قطع كلامها مكالمة جت لحمزه.
رد حمزه:
=ايوا، طيب شكرا جدا.
=الحمدلله بنتك بقيت كويسة.
قالت ببكي:
*طب أنا عايزه اشوفها.
-كملي القصة الاول.
*كانت وعد دايما بتقولي أنه مش كويس وأنه كذا مره حاول يعتدي عليها… بس انا مكنتش بصدقها. لحد ما…
وبدأت تنهار وكملت كلام:
*لحد ما شوفته بعنيا محستش بنفسي غير وانا بخبطه علي دماغه بالمكوا… بنتي ملهاش ذنب في حاجة.
قال حمزه بعصبية:
=وانتي صدقتيه.. صدقتي الغريب ومصدقتيش بنتك؟ فوقتي أمتي؟ لما كانت خلاص ادمرت… حتي اللي كان معاها الحق ماتت.
قال معتز:
-بنتك ماتت…وعد ماتت بسببك.
=وعد ماتت وهي مش مآمنه لحد حتي مصدر الامان اللي الوحيد بالنسبالها كانت اول واحده خانتها…
قال حمزه كلماته الاخيره وطلعوا من الاوضة وسابوا علياء بتبكي وبتصرخ علي بنتها.
واتحكم عليها بالسجن لمدة خمس سنين.
بعد مرور أسبوع
-يالله اخيرا خلصنا.
=القضية دي مكنتش صعبة علي قد ما كانت توجع.
-ايوا ايه المجتمع اللي بقينا فيه ده؟ لو الام والاب مكنوش مصدر امان لعيالهم مين هيكون؟
=ربنا يرحم وعد واللي زيها كلهم.
-يارب.
وفي النهاية احب اقول..
صدقوا عيالكوا بنشوف كل يوم حالات كتيرة جدا زي وعد من تحرش لتعدي لابتزاز خليكوا دائما مصدر امان لعيالكوا خليهم يحسوا أن فعلا ليهم حد يتسندوا عليه مهما حصلهم.
