خبر في الصفحة الأولي في الجرائد المصريه "تحت ظروف غامضة هل كان موت الدكتورة هند قتل ام انتحار؟"
القاهره - 2026
بالظبط بعد مرور سنتين علي الحادثة المشهورة "موت الدكتوره هند بطريقة غامضة"
اشتهرت شقه 9 بـ (الشقة الملعونة) وفضلت مقفولة لمدة سنتين محدش كان راضي يسكن فيها أبدًا.
معتز كاتب صحفي، واحد من الشباب اللي بتحب دائما تروح الاماكن اللي يقال عنها انها ملعونة أو مسكونة بالجن. قرر معتز أنه يروح شقة 9 ويعرف ايه اللي حصل للدكتورة هند.
وقتها عم محروس كان شبه فاقد الذاكرة بسبب سنه اللي بقي كبير، وبواب العمارة كان عمرو ابن محروس.
وصل معتز العمارة وهو داخل قابل عمرو
-السلام عليكم. أنا معتز الساكن الجديد.
=وعليكم السلام. حضرتك الساكن اللي هتقعد في شقة 9؟
-ايوا أنا.
وقتها بان الخوف والتوتر علي عمرو ؛ لان الناس كلها كانت بتخاف من الشقة دي وقتها.
-ممكن تساعدني اطلع الشنط بتاعتي فوق.
=اكيد طبعا يا استاذ.
دخل معتز الشقة وطبعا كانت كلها تراب ومتقفلة وجوها كئيب جدا. بدأ يفتح الشبابيك كلها ويشغل قرآن في المكان و هو بينضف المكان دخل اوضة الدكتورة هند ولقي دفترها علي المكتب ومفتوح اخده وقال لما اخلص هبقي افتحه.
ولما دخل الاوضة اللي في أول الطرقة لقي دفترين لشخص اسمه احمد واحد مكتوب فيه مذكرات والتاني مكتوب فيه ارقام وعناوين ناس. اخد الدفترين وقال هيبقي يشوفهم كلهم وخلص التنضيف.
هو مكنش عارف مين احمد لكن عرف من دفتر الدكتورة أن الأستاذ أحمد ده كان ساكن في الشقة من 36 سنة والغريب أنه لقي في دفتر الدكتورة أن كل صفحه بتاريخ وكل تاريخ مكتوب فيه احداث حصلت ليها واخر تاريخ فيه كان قبل موتها بيوم واحد….
2/5/2024
"النهارده بعد ما خلصت شغلي وروحت البيت اول لما الساعه جت 12:00 سمعت صوت ست بتصرخ جامد لدرجه اني افتكرت أن فيه حد مات. لكن اكتشفت أن الصوت جاي من المطبخ عندي قومت وبدأت اقرا كل الاجزاء اللي حافظها من القرآن ولما دخلت المطبخ المنظر كان مرعب اوي…
دم منقط في كل مكان في المطبخ. حاولت اهدي وشغلت قران وكلمت صحبتي تيجي تبات معايا وبالفعل جت واليوم ده كان ارعب يوم في حياتي"
بدأ معتز يدون في دفتره أن أول لما الساعه تدق 12:00 بتبدا اصوات صريخ في البيت وخصوصا المطبخ.
3/5/2024
"كان لازم اروح شغلي عشان احاول انسي واشغل بالي عن اللي حصل بليل. الغريب واني طالعه من البيت لقيت نقط دم بسيطه قدام باب المطبخ. بس ازاي؟!! أنا متاكده أن كل حاجة كانت نضيفه وممسوحه امبارح جه منين الدم ده؟! والغريب أن كان مكتوب بالدم بطلي تدوري علي شقة تانيه مش هتقدري تمشي انتِ بقيتي جزء مني. هما عرفوا ازاي اني بدور علي شقة تانيه! أنا خايفة اوي يارب اطلع منها علي خير"
بدأت شكوك معتز كلها تدور حوالين احمد لان ببساطة محدش غيره سكن في الشقة هو والدكتورة هند فقط.
فتح اول دفتر لقي فيه ارقام وعنواين ناس، مهتمش معتز وفتح الدفتر التاني.
"أنا احمد عندي 34 سنه شغال في شركة استيراد وتصدير ومتجوز أعظم ست في الدنيا وعندي بنتي ملك عندها 5 سنين"
"ملك بنتي مريضه بالسرطان وكل الدكاترة بتقول أنها في مرحله مفيهاش علاج مش فاهم ازاي يعني مفيش علاج ليها يارب تولاها برحمتك."
" 4/5/1989 بنتي ماتت… ملك ماتت"
فضل معتز يقلب في الدفتر بتاع احمد علي امل أنه يلاقي حاجه مفيدة ولكن فهم أن الأرقام والعناوين اللي في الدفتر التاني تبقي لاصحاب احمد.
بدأ معتز يتعب ويغلبه النوم، ولما نام حلم أن في قدامه كيان اسود كبير.. "قاله اطلع وسيب الشقة ومتحاولش تعرف سرها"
معتز كان حاسس ان فيه حاجه مكتفاه منعاه يستنجد أو يتحرك والحلم ده كان أشبه بالحقيقة وقام مرعوب بياخد نفسه بصعوبة شديدة جدا.
لكن اللي حصل ده ممنعش معتز أنه يكمل ده بالعكس خلاه عايز يكمل اكتر واكتر. وقرر أنه هيكمل مهما حصل وأنه لازم يكشف سر الشقة.
عدت الليلة دي وتاني يوم معتز كان رايح شغله وهو نازل قابل جيرانه وسلم عليهم محدش رد وكلهم كانوا خايفين منه لأن مفيش حد طبيعي يروح شقة ملعونة ويسكن فيها!.
وصل الشغل في معاده وبعد الشغل قرر يبدأ بأول اسم في الدفتر بتاع احمد…
"حسن عبدالسلام" ولما وصل علي العنوان عرف أنه مات من حوالي تلت سنين او اكتر.
وشطب معتز علي اول اسم.
شاف الاسم اللي بعده "عزيز" ولما قعد يفكر شوية افتكر أن عزيز ده هو صاحب الشقة اللي معتز ساكن فيها. راح معتز وبالفعل قابل عزيز ولكنه كان راجل كبير جدا في السن وكان في دار لرعاية المسنين
-السلام عليكم. حضرتك الاستاذ عزيز؟
=ايوا أنا عزيز. انت مين يبني؟
-انا معتز كاتب صحفي وكمان الساكن في شقة حضرتك اللي في الزمالك. كنت بس عايز اسال حضرتك عن الاستاذ احمد.
=استاذ احمد مين؟
-الاستاذ احمد زميل حضرتك واللي كان ساكن في الشقه دي من 56 سنه.
=اه اه افتكرته هو أخباره ايه؟
رد عليه معتز وهو في حاله صدمة من الحال اللي وصل ليه عزيز:
-استاذ احمد مات من 36 سنه وحضرتك حضرت عزاه بنفسك.
حزن عزيز لما سمع كده. وقال:
=هو انت ابنه؟
-لا يفندم أنا مش ابنه أنا الساكن الجديد أنا بس كنت عايز اسال حضرتك عن الاستاذ احمد هو كان بيبان عليه اي تصرفات غريبة؟
=اللي افتكرت أن احمد كان طبيعي جدا بس بعد موت ملك بنته وهو اتغير 180 درجه.
-اتغير ازاي ؟!
=بيسرح كتير وبيقعد مع نفسه كتير جدا، عنده حق اصل ملك بنته جت بعد صبر سنين.
-شكرا جدا لوقت حضرتك واسف لو كنت ازعجت حضرتك. وده رقمي لو احتجت اي حاجه كلمني علطول. مع السلامة.
=مع السلامة يبني.
وبعد ما معتز مشي بدأ يسجل كل الكلام اللي قاله عزيز عن احمد. وبعد ما وصل معتز وهو طالع الشقة شافه عم محروس وناداه بـ (احمد)
وقتها معتز استغرب جدا من كده بس نزل وبدأ يعرف عن نفسه.
-انا معتز صحفي في جريده مصرية. هو حضرتك تعرف اي حاجة عن الاستاذ احمد؟
رد عم محروس باستنكار وهمجيه:
=معرفش عنه اكتر أنه كان ساكن هنا في العمارة بس ده مات من زمان بتسال عنه لي؟
وقتها استغرب معتز من الهمجية ورد بتوتر
-عادي اصل كنت بكتب مقال عن الصداقة وكده وقتها حبيت اكتب قصة الاستاذ احمد كمثال للصداقة.
=لا معرفش عنه حاجة مكنتش ليا بيه اختلاط.
-شكرا يا عم محروس عن ازنك همشي أنا.
وبعد ما طلع شوية قال محروس:
= احسن تمشي من الشقة عشان متموتش زيهم.
خاف معتز واستغرب الجمله وسأل باستنكار:
-حضرتك قولت حاجة؟!
=قولت خلي بالك من نفسك.
طلع معتز البيت وهو خايف من اللي عم محروس قاله بس قرر أنه برضه هيكمل.
اول ما الساعه جت 12:00 بدأ معتز يشوف الكيان الاسود اللي ظهرله في الحلم ولكن في الحقيقة…
بدأ يظهر ويختفي وكل ما يظهر معتز يحس بصداع يخليه يصرخ باعلي صوت. حس بنفسه والجيران كلها حواليه بتفوق فيه وشاف مدام احسان بتفوق فيه.
-هو حصل ايه؟
=سمعناك بتصرخ باعلي صوت عندك لدرجه اننا افتكرنا أن حد اتهجم عليك.
ووسط الناس كان عم محروس موجود فضل باصص لمعتز ومعتز رجع يحس بصداع تاني وبدأ يصرخ تاني.
عدت الليلة دي ومعتز راح بات عند صاحبه واخد معاه الدفاتر.
ولما فتح الدفتر بتاع احمد عشان يشوف مين الشخص اللي هيروحله بعدها وقع عينه علي اسم… مدام احسان.
قعد يقول ممكن مش هي بس لما شاف العنوان اتاكد أن هي افتكر أن وهو بيقرأ في الدفتر بتاع هند لقي مكتوب أن مدام احسان تعرف حاجه عن سر الشقة دي…
رجع معتز العمارة وقابل مدام إحسان.
-السلام عليكم. اكيد عرفاني.
=وعليكم السلام. ايوا عرفاك طبعا اخبار دماغك ايه دلوقتي.
-لسه بتوجعني شويه بس احسن. المهم أنا كنت عايز اسال عن الاستاذ احمد،هو كان بيظهر عليه اي تصرفات غريبة؟
بدأت مدام احسان تتوتر شوية وقالت:
=أنا جيت العمارة هنا قبل ما يموت بكام شهر بس معرفش عنه اي حاجة.
-طب والدكتورة هند؟!
ردت مدام احسان بتسرع رهيب وقالت:
=لو سمحت امشي.
استغرب معتز من الرد ولكنه كمل كلامه:
-ارجوكي عرفيني اي حاجة أنا محتاج معلومات.
سكتت مدام احسان شويه وقالت في تردد:
=الدكتورة حصل معاها زي ما حصل معاك امبارح ولما فاقت قعدت معايا عقبال ما صحبتها تيجي. وهي قاعدة اتكملت معايا وقالتلي جملة غريبة جدا "الشقة دي مرعبة فيها كيانات مرعبة يارب أنا قربت اتجنن" وقبل ما افهم منها الباقي صحبتها جت ومشيت ولما رجعت تاني قبل موتها باسبوع فضلت في الشقة مطلعتش منها ولما جه البوليس ودخلوا كانت هي ميتة. ووقتها الطب شرعي قال إن كان باين عليها آثار جنون….
بدأت تخاف مدام احسان وقالت
=كفاية مش هقدر اكتر من كده.
-ماشي أنا همشي وشكرا جدا ليكِ.
بدأ معتز يسجل الكلام اللي قالته مدام احسان عن الجنون والانتحار. وقتها كان لازم يعرف احمد مات ازاي وعشان يعرف محتاج يدخل ويشوف سجلات القواضي القديمة وقتها مفكرش غير في واحد بس حمزه اخوه.
وبالفعل رن علي حمزه.
-الو.
=عاش من سمع صوتك يا بيه.
-مش وقته دلوقتي محتاجك في حاجة.
=حد اتعرضلك ولا اي؟
-لا أنا بس عايزك تشوفلي سجل قضيه معين.
=واعملهالك ازاي دي؟!!
-معرفش يا حمزه اتصرف ده انت ظابط يعني هتعرف تشوفلي السجل ده.
=طب متروح لمحمد هو ممكن يقدر يساعدك اكتر مني.
-محمد مش هيعرف عشان السجل ده في الداخلية. ها هتساعدني ولا لا؟
=هساعدك قولي السنة اللي حصل فيها الجريمة وانا هدورلك في السجلات وربنا يستر.
-9/12/1990
=نعم!!!!!
-ده التاريخ بالظبط القضية لواحد اسمه احمد وكان ساكن في الزمالك. هتحاول؟
=هحاول بس معتقدش أن السجلات بتاعت السنه دي هتكون موجوده احنا في 2026 يبني.
-انا عارف بس محتاج اعرف القضيه دي بالظبط.
=ماشي هشوف واول ما اوصل ل حاجه هقولك وربنا يستر علينا من جنونك اللي هيودينا في داهية ده.
قفل معتز مع حمزه وطلع شقته ولما دخل لقي المكان كأنه متفتحش من سنين طويله وعلي قد ما هو خاف علي قد ما كان لازم يكمل.
فضل ينضف وينضف لغايه ما غلبه النوم. صحي معتز علي صوت التليفون وهو بيرن.
رد بصوت نعسان:
-الو….
=ايوا يا معتز جبتلك اللي انت بتدوير عليه.
قام معتز فجأة وفاق وسأله بلهفه:
-قولي بسرعه لقيت ايه.
=احمد العزايزي موظف في شركه….
-ايوا ايوا عارف كل ده قولي سبب الوفاة وتقارير الطب الشرعي.
=تقارير الطب الشرعي بتقول أن هو انتحر بعد ما ظهر عليه اثار الجنون.
-ده نفس اللي حصل للدكتورة هند.
=هند مين؟
-حوار كبير هحكيهولك بعدين.
=ماشي مع اني مش فاهم منك حاجه.
-ادعيلي بس يا حمزه أخرج منها علي خير.
=هو في ايه يا ابني متفهمني!!!
-بعدين بعدين صدقني هفهمك المهم هقفل دلوقتي. مع السلامة.
رد حمزه باستغراب:
=سلام.
سجل معتز عنده في الدفتر أن برضه ظهر علي احمد اثار الجنون قبل موته. وقرر يشوف اسم تاني في دفتر احمد وقرر يروح ل(عبدالحميد).
مكنش يعرف مين ده ولما وصل كانت المفاجاة
-السلام عليكم حضرتك الاستاذ عبدالحميد.
=ايوا أنا اتفضل مين حضرتك؟
-انا معتز التويني كاتب صحفي. كنت جاي اسال حضرتك بخصوص احمد العزايزي حضرتك تعرفه؟
=ايوا احمد يبقي اخويا.
قالها عبدالحميد بصوت مبحوح واتصدم معتز من الاجابة.
=اتفضل خلينا نتكلم جوا
-ممكن تحكيلي عن الاستاذ احمد هو كان بيظهر عليه تصرفات غريبه؟
اتنهد عبدالحميد وقال:
=هحكيلك الحكايه كلها احمد يبقي اخويا الكبير هو كان طبيعي جدا وكان بيحب مراته جدا وكان عنده اسرة سعيدة جدا. لغايه ما ملك بنته ماتت كانت صدمة كبيره لينا كلنا….
سكت عبدالحميد وكمل كلامه بحزن ممزوج بخوف:
الشيطان وسوسله أنه لو اتحالف معاه هيقدر يرجعله بنته ووقتها احمد من حزنه مكنش داري بنفسه وهو بيعمل كده مع أنه كان تقي ويعرف ربنا. وقت ما بدا كان لازم يقدم قربان ليهم واختار مها… مراته.
وهي واقفه في المطبخ دبحها وقدمها قربان ليهم بس عمل الطقوس غلط فبدل ما يبقي الجن معاه بقي عليه وحط لعنه علي البيت أن اي حد يعيش فيه يصاب ب الجنون ويموت وبيان أنه انتحر متقتلش.
-يعني الاستاذ احمد كان هو السبب في اللي حصل ايه وللدكتورة هند وليا هو السبب في كل حاجه طب ليه عمل كده؟!
=الشيطان دخله من المكان الضعيف فيه يا استاذ معتز.
-عن اذنك أنا لازم امشي.
=اكيد اتفضل.
وهو ماشي مكانش عارف يعمل ايه يروح فين أو يجي فين مجاش في باله غير حل واحد أنه يقوم بنفس الطقوس ويطرد الجن من الشقة.
وقتها كلم معتز حمزة وقاله الحكاية كلها..
-دلوقتي مقدميش غير اني اعمل الطقوس واكسر اللعنه واطرد الجن من الشقة.
=انت مجنون يا معتز؟!! ده انتحار انت ممكن تموت فيها.
-يكفيني شرف المحاولة يا حمزه وحتي لو مت، علي الاقل هكون ميت وانا بحاول اجيب حق ناس بريئه ملهاش ذنب في تصرف واحد الدنيا ضحكت عليه والشيطان ضحك عليه وفي الاخر آذي ناس ملهاش ذنب.
=بلاش يا معتز تعمل كده.
-انا مباخدش رايك أنا بقولك قراري.
زعق حمزه وقال:
=معتز أنا اخوك الكبير ولازم تسمع كلامي.
-اسف يا حمزه مقدرش.
ومشي معتز وساب حمزه وراح البيت وقرر يبدأ وكتب رساله توصية أن لو حصله اي حاجه كل الناس تسامحه.
بدأ معتز في الطقوس ومن ضمن تقديم القربان قرر يقدم دمه هو وعور نفسه واخد الدم وكمل الطقوس وكسر اللعنة.
حس معتز وقتها أنه فعلا قدر يجيب حق ست بريئه ماتت بسبب جوزها وبنت ماتت بسبب واحد مجنون وجاب حق كل حد اتاذي بسببه.
وقصة شقة 9 بقت الأولي في الجرائد المصريه
وقابل معتز حمزة بعدها.
-مش قولتلك يكفيني بس شرف المحاولة.
=أنت فعلا بطل يا معتز. أنا عايز مساعدتك يا بطل.
قال معتز بضحك:
-ايه شقه مسكونه تاني؟
=لا انتقلت مكان جديد وقررت امسك كل القواضي اللي متأيده ضد مجهول واكشف سرها. وعشان اعمل كده محتاجك معايا.
-اكيد طبعا معاك.
=جاهز للي جاي؟
-جاهز للي جاي.
