القاهره - ارشيف الأمن الوطني -2027
وصل معتز وحمزه المكتب وبدأوا يبصوا في الملفات. لفت نظر معتز ملف مكتوب عليه (مقتل العقيد كريم)..
فتح الملف وبدأ يقرا فيه.
"بتاريخ 25/7/2025 وجد العقيد كريم مقتول ومأخوذه جميع اعضائه وبعد البحث والتحقيقات الجنائية لم يتم التوصل القاتل."
سأل حمزه باستغراب:
-اي الملف ده؟!
=قضيه قتل عقيد لاقوا جثته علي طريق اسكندريه الصحراوي ومتاخد منه جميع اعضائه ما عدا الجلد يعني حرفيا متصفي ووشه كان مشوه لدرجه كبيره حتي بص.
ووري معتز الصور ل حمزه.
رد حمزه بحزن وخوف:
-ليه ممكن حد يعمل كده في حد؟
=معرفش بس حاسس الموضوع ده في حاجة.
-وانا كمان حاسس بكده خلينا نشوف القضيه دي الاول.
وصلوا مكتب حمزه وبدأوا يقرأوا في ملف القضية.
-القضية دي شكلها مش سهلة.
=ايوا في حاجة غلط.
-في حاجه ناقصه مش حاجه غلط.
استغرب معتز وقال:
=حاجه ناقصه؟؟؟!
-ايوا حاجه ناقصه. في الوقت ده كان فيه اختفاء كتير اوي وكانوا بيلاقوهم بنفس الحاله وفي إمكان مختلفة.
=مش فاهم.
-استني هفهمك.
قام حازم وجاب ملف وقال:
5/7/2025 الاسكندريه اختفاء طفل 4 سنين.
7/7/2025 البحيرة اختفاء طفله 9 سنين.
9/7/2025 الاسماعيليه اختفاء بنت شابه 19 سنه.
12/7/2025 العثور علي ثلاث جثث لأشخاص يتراوح أعمارهم بين ال 3 سنين و 20 سنه.
-ايه ده يا حمزه؟!!!
كمل حمزه كلامه وقال:
خبر في الجرائد المصرية وكل مواقع التواصل الاجتماعي "جريمه بشعه العثور علي ثلاث جثث ماخوذه جميع اعضائهم بما فيه الجلد ولا يوجد سوي هياكل عظيمة وبعض الاحشاء الداخلية".
-وده ايه علاقته بالموضوع؟
=علاقته أن الظابط ده هو اللي كان ماسك القضيه دي وقتها وان هو متكشفش وقت المهمة.
-وده ازاي؟!!!!
=اللواء حسين أكد أن كريم متكشفش وقت المهمه وأنه كان لسه خارج من الأمن الوطني ووقتها كان عايش وأنه متاكد ان كريم متكشفش وده بناء علي كلام كريم.
-قصدك أن في حد قريب من كريم هو اللي عمل كده ؟!
=ايوا ده قصدي.
-طب مين ممكن يكون عمل كده؟
-مش عارف احنا لازم نعرف دائره الناس اللي كانت حوالين كريم عشان نعرف مين اللي عمل كده.
دون معتز في دفتره أن أول حاجه يعملوا تحري عن العقيد كريم...
بدأ حمزه بتحري عن العقيد كريم وعن كل الناس اللي كانت حواليه. وبدأ معتز يدور علي كل جرايم تجاره الاعضاء اللي حصلت في الوقت ده.
اتصل حمزه علي معتز.
-وصلت لحاجة؟
=اه عرفت معلومات عنه.
-طب خلينا نتقابل في المكتب ونتكلم.
=يلا هستناك متتاخرش عليا.
- جايلك يا حمزه سلام.
وصل معتز مكتب حمزه وقعدوا سوا.
-ايه عرفت اي حاجة؟
=كريم مكنش ليه علاقات كتيره بالناس وبالنسبة لعائلته عندوا اخ اكبر منه.. كمال الكومي.
-رجل الأعمال المشهور؟؟؟!
=ايوا هو. هما ولدين كريم وكمال ابوهم متوفي وعايشين مع امهم ست كبيره في السن.
-طب متيجي نروح نقابلهم يمكن نعرف نطلع منهم بمعلومة.
=مانا فكرت في كده بس القضيه دي مقفولة من سنتين هنفتحها تاني.
-مهو مش هنعرف نحلها غير لما نتكلم مع كل الناس اللي حواليه.
=ماشي خلينا نروح بكره ليها. المهم دلوقتي.
-ايه؟
=محمد عازمنا النهارده.
-محمد مين؟
=هيكون مين يعني يخفيف.
-ايوا عازمنا ليه يعني؟
=بيقول كسب القضيه اللي كان ماسكها وأنها كانت قضيه صعبه عشان كده لما كسبها قال يعزمنا نحتفل سوا.
-اممم ماشي يلا.
ومشيوا وقابلة محمد…اخوهم التالت في المطعم اللي قريب من بيتهم.
-ايه يا معتز هتفضل زعلان كده كتير؟
=لا عادي يعم مانا لو لسه زعلان مكنتش هاجي النهارده.
*خلاص يا معتز اهدي يا محمد احنا جايين ننبسط مش نتخانق.
-علي رايك.
=صح بمناسبه انك هنا. هو انت كنت تعرف اي حاجه عن قضية العقيد كريم.
-مش ده اللي لقوا جثته علي طريق اسكندريه الصحراوي.
=اه هو.
*ايه ده انت تعرف القضيه دي؟
-القضية دي كانت معروضة عليا بس مكنتش فاضي وقتها.
=طب لما اتعرضت عليك قالولك ايه وقتها؟
-قالولي ايه في ايه مش فاهم؟
=يعني قالولك ايه عن تفاصيلها وقتها.
-مش فاكر بصراحه وبعدين سيبك دلوقتي احنا جايين نتبسط مش نتكلم في شغل وقواضي دلوقتي.
*ايوا نتكلم بكره في الشغل.
وقعدوا وهزروا واتبسطوا وعدا اليوم وروحوا التلاتة معتز راح شقته اللي في الزمالك ومحمد راح مكتبه وحمزه روح البيت.
تاني يوم معتز وحمزه قرروا يروحوا لاهل كريم.
وصلوا بيت كريم واللي كان في المعادي.
-السلام عليكم يا امي.
=وعليكم السلام يبني اتفضل.
-انا معتز التويني صحفي وده اخويا حمزه التويني رائد.
قالت وهي تبتسم ابتسامه لطيفه وحنونة:
=ماشاءالله اللهم بارك ربنا يحفكوا لاهلكوا.
-شكرا يا امي. معلش ممكن نتكلم مع حضرتك شويه لو مفيهاش ازعاج.
=اكيد يا ابني اتفضل.
-شكرا.
بدأ معتز يتلعثم في الكلام ومكنش عارف يفتح الموضوع ازاي معاها ولما حمزه لاحظ ده أتدخل واتكلم هو..
*بصي يا امي احنا بنحقق في قضيه العقيد كريم ابن حضرتك الله يرحمه. وكنا بس محتاجين نعرف منك شويه معلومات عنه لو تسمحي.
بدأت تظهر علامات حزن الام علي ابنها اللي اتقتل وقالت في حزن:
=اكيد يا ابني اتفضل.
بدأ معتز يتكلم وقال:
-احنا بس محتاجين نعرف عنه شويه معلومات زي مثلا أصحابه لو مثلا كان عنده مشاكل وعداوه مع حد وهكذا يعني.
=والله يبني مفتكرش أن كان عنده عداوه مع حد كريم كانت كل الناس تحبه وتحب قعدته والكل يشهد بجدعنته. وعلي حسب علمي هو مكنش لي أصحاب كتير يمكن بس زمايله اللي كانوا معاه في الشغل غير كده مكنش عنده صحاب.
أتدخل حمزه وسأل:
*هو الاستاذ كمال فين؟
=هو في حاجة يبني؟
*لا يا حجه أنا بس كنت عايز اتكلم معاه شويه يمكن كريم كان حاكيله حاجه او يعرف اي حاجه تفيدنا.
=كمال في الشركه ممكن تلاقيه هناك.
-شكرا جدا يا امي تعبناكي معانا.
=ولا يهمك.
-مع السلامه.
نزلوا من عند والدة كريم وبدأ معتز يدون في دفتره أن كريم مكنش ليه اي عداوات مع اي حد ومكنش ليه اي أصحاب غير زمايله في الشغل بس.
-وبعدين هنروح فين؟ هنروح لكمال الاول ولا هنروح للمركز اللي كان شغال فيه كريم؟؟!
=خلينا نروح لكمال الاول.
-مع اني مبطمنش لافكارك بس ماشي همشي وراك للاخر والله معارف مين فينا الكبير أنا ولا انت.
=اطلع يا حمزه مش كل شويه تفكرني انك الكبير أنا عارف.
ومشي حمزه بالعربيه وطلعوا علي شركه كمال. ووصلوا وطلبوا يقابلوه وفعلا قابلوه.
-السلام عليكم. أنا معتز التو….
قاطعه كمال:
=معتز التويني وحمزه التويني.
استغرب حمزه ومعتز.
سأل حمزه باستغراب:
*انت عرفت منين؟!!
رد كمال بكل برود:
=مباقبلش حد معرفوش.
-ايا كان مش موضوعنا دلوقتي.
*احنا كنا عايزين نسأل حضرتك بخصوص كريم اخو حضرتك.
=الله يرحمه.
-اه طبعا الله يرحمه. هو العقيد كريم كان ليه اي مشاكل مع حد أو اعداء أو حكالك قبل كده عن اي خصومه؟
=لا مفتكرش أنه حكالي حاجه احنا اصلا مكنتش بنشوف بعض كتير بحكم اني بسافر كتير وأنه اوقات بيبات في شغله.
*طب كان في اي علامات غريبه عليه قبل الجريمة؟
رد كمال ببرود غريب ومثير للشكوك والاسئله:
=لا. بس هو ظابط يعني اكيد حد كان عايز يغتاله.
-طبعا دي حاجه طبيعية بس اللي مش طبيعي سرقه الاعضاء.
وقتها معتز لاحظ أن السلسله اللي كانت علطول في رقبه كريم موجوده في مكتب كمال.
وسأل حمزه:
-هي مش دي السلسله بتاعت العقيد كريم؟!
=ايوا هي.
-وهي بتعمل ايه مع حضرتك.
رد كمال بعصبيه شديده:
=وانت مالك سلسلة اخويا ومحتفظ بيها..بعد اذنكوا عشان عندي شغل ومش فاضي.
نزلوا من عند كمال واول ما ركبوا العربية قال حمزه:
-الراجل ده مجنون.
=الراجل ده وراه سر
استغرب حمزه وسأل:
-سر؟ سر ايه ده؟
=بروده في الكلام وعصبيته لما سالت عن السلسلة.
-وكمان عدم المبالاة اللي كانت عنده والتجاهل وأنه بيتكلم عن اخوه كأنه حد غريب.
=احنا لازم ندخل المكتب بتاعه.
-انت مجنون يا معتز؟ احنا لو اتمسكنا هنتحبس ومش بعيد نتقتل.
=لازم نعمل كده يا حمزه ثق فيا مفيش حاجه هتحصل.
-انا مش مقتنع باللي انت بتقوله ده.
=لازم نعمل كده كمال ده وراه سر كبير ولازم نعرف ايه السر ده ومفيش حل تاني غير ده.
-طب هنعمل اي ولا هندخل ازاي؟
=هنستني لغايه ما الشركه كلها تفضي ولما نتأكد انها فضيت هندخل.
-وكاميرات المراقبة يا ظريف؟
=مفيش كاميرات وانا طالع كنت ببص مفيش ولا كاميرا مراقبه.
-ها؟؟؟؟!!!
=كاميرات المراقبه بتعمل نور معين حتي لو كانت قد النمله بتتعرف.
-ماشي خلينا نستني وربنا يستر. أنا مش عارف أنا ماشي وراك ليه بس ماشي.
=عشان دائما بطلع صح...
واستنوا لغاية ما الساعة جت 12:00 واتاكدوا أن الشركة كلها فضيت وطلعوا المكتب وبدأوا يفتشوا.
لفت نظر معتز رواية بساتين عربستان اللي كانت علي المكتب ومتسابة مفتوحة.
وبسرعه قال:
-حمزه حمزه بص بسرعة.
=اي لاقيت حاجه؟؟!
-اه بص.
=انت بتهزر يا معتز بتناديني عشان رواية.
-لا بص هو معلم علي ايه فيها.
=معلم علي ايه؟
"الانتقام كأس لا نشرب منه حتي الارتواء بل نشرب منه حتي الثمالة"
"اُقْسِم بعَدِد النُجُـوم في السَمـاء وألسنة اللهب في جهنم سأمسك بِرأس سيدكَ كَـما تُمسك برأس زوجي الآن..!!! "
"سنزلزل الأرض تحت اقدام من يستبيح أرضنا ونريق دمائهم لنسقيها حين تشح السماء بمائها"
=الراجل ده مش طبيعي الراجل ده مختل.
-ايوا.
ولما كملوا تفتيش. شافوا موبايل كريم هناك.
وفجأة سمعوا صوت بره اتخضوا بس بعدين اكتشفوا أنها قطه دخلت لما سابوا الباب مفتوح.
اخدوا القطه وخرجوا.
-انا شاكك أن كمال ده هو اللي ورا موت اخوه.
=ازاي يعني؟ وايه اللي خلاك تقول كده؟!!
-بروده في الكلام معانا وعصبيته اول ما سالت علي السلسلة والرواية وحاجه كمان تقدر تقولي كمال كان فين وقت لما لقوا جثته كريم؟
=معرفش.
-كان مختفي تماماً.
فضل حمزه ساكت وبيفكر في الكلام اللي قاله معتز.
وبيفكر وخطرت علي باله فكرة وقال:
-خلينا نروح دلوقتي وانا بكره هروح لاللواء حسين واتكلم معاه ممكن يكون عنده اي معلومات تساعدنا.
=تمام.
وراحوا البيت وبعد ما وصلوا حمزه جاله مكالمة من محمد.
-الو.
=ايوا يا محمد.
-انا قولت هلاقيك نايم ومش هترد.
=لا لسة راجع من برا. في حاجة مهمة حصلت؟
-ايوا. فاكر لما معتز سألني علي قضية العقيد كريم، أنا قعدت ادور عندي في المكتب ولقيت الملف بتاع القضية
=ازاي وانت قولت انك مكنتش ماسك القضية ساعتها؟!
-مهو لما بعتوا ملف القضية اخدت منه نسخة وبعت الملف تاني.
=تمام خليه معاك وانا هاجي اخده منك بكره او ابقي سيبه في المكتب لو مش هتبقي موجود بكرة.
-ماشي هسيبهولك، يلا تصبح علي خير.
=وانت من اهل الخير.
وقفل المكالمة وكلم معتز وقاله تفاصيل المكالمة كلها ومعتز مكنش مركز لانه كان بيدون في دفتره كل الحاجات اللي شافوها من مقابلتهم لكمال لحد الرواية والشكوك.
ومركزش في الكلام وحمزه مهتمش يعيد كلامه تاني لانه كان مرهق جدا من اليوم اكتفي أنه يقول تصبح علي خير ودخل ينام.
وفضل معتز يفكر طول الليل في اللي حصل واللي شافه. تاني يوم الصبح نزل معتز راح علي شغله وراح حمزه يقابل اللواء حسين في مكتبه.
امن الدولة - 13/10/2027.
دخل حمزه وطلب يقابل اللواء وبالفعل قابله.
-صباح الخير يا فندم.
=صباح النور.
-انا الرائد حمزه التويني. كنت محتاج اتكلم مع حضرتك شوية لو تسمح.
=اكيد اتفضل اقعد.
-شكرا يا فندم.
قعد حمزه وبدأ كلامه في تعلثم:
-دلوقتي يا فندم كنت محتاج اتكلم مع حضرتك في قضية العقيد كريم الكومي.
اتنهد اللواء في حزن وقال:
=العقيد كريم كان من أكفأ الظباط اللي عندنا ولكنه للأسف مات غدر.
سأل حمزه باستغراب:
-مات غدر ازاي؟ هو اتكشف وقت المهمة؟
=لا العقيد متكشفش وقت المهمة ومفيش حد شك فيه ولو واحد في الميه.
-طب هو حصل ايه يا فندم ممكن حضرتك تحكيلي الموضوع كله من اول ما مسك القضية لغاية ما اتقتل.
=اكيد.
فلاش باك…
امن الدولة - 16/7/2025
دخل مكتب اللواء حسين
-حضرتك طلبتني يا فندم.
=ايوا يا كريم تعالي اقعد.
وقعد كريم وبدأ اللواء كلامه:
=تحرياتنا أثبتت أن فيه عصابة كبيرة ورا عمليات الخطف وتجارة الاعضاء اللي حصلت الفترة اللي فاتت،
ووراهم ممول كبير ولكن غير معروف هو مين.
استغرب كريم وقال:
-ممول ازاي يا فندم؟ اكيد هو اللي بيديهم الفلوس.
كمل اللواء كلامه:
=الممول ده هو اللي بيجيب الاماكن اللي بيتم فيها عملية التشريح، وبيجيبلهم الاطفال. وفي المقابل بيدوله الفلوس بعد بيع الاعضاء ده طبعا بعد ما ياخدوا نسبتهم.
-يعني غسيل أموال عن طريق تجارة الأعضاء؟
=ايوا بالظبط كده.
-والمطلوب مني ايه يافندم؟
بيعرض اللواء صور علي الشاشة، ويكمل كلامه:
=عصام.. الشخص اللي كان بيخطف الاطفال ويديها ليهم. عصام مظهرش وسطهم ابدا دايما كان شخص من عنده وشخص من عندهم وتتم العملية. رجالتنا قبضت علي عصام وهو اعترف بكل شيء.
-تمام.
=مهمتك يا كريم انك تنتحل شخصية عصام وهنزرعك وسطهم.
تتنهد كريم وقال:
-بس دي مهمة صعبة اوي عليا يا فندم.
=أنا عارف يا كريم. وانا اختارتك لأنك أكفأ ظابط عندنا.
-تمام يا فندم.
=أنا واثق فيك يا كريم.
-انا شاءالله هكون عند حسن ظن حضرتك بيا.
=اتفضل دلوقتي روح اقعد مع عصام واتكلم معاه عشان تقدر تفهم انت هتعمل ايه.
-تمام يا فندم عن اذنك.
=اتفضل.
باك..
لغاية هنا الموضوع كان كويس لحد ما كمل اللواء حسين كلامه…
=العقيد كريم كان بيبلغنا بكل التفاصيل اللي يعرفها. لحد….
استغرب حمزه من نبرة الحزن وسأل:
-لحد ايه؟
فلاش باك
=الو.
-ايوا يا فندم. أنا عرفت مين هو الممول.
=تعالالي فورا علي المكتب.
-مسافة السكة يا فندم.
باك
-وايه اللي حصل بعدها؟
=كريم اختفي.
حمزه اتصدم من الرد وقال:
-اختفي ازاي؟!!!
=مجاش هنا ورنيت عليه كتير جدا ولكن موبايله اتقفل، واختفي تماما حتي مروحش البيت وبعد يومين بعت رسالة لكمال اخوه أنه كويس واضطر يسافر لحد من صحابه. وبعد الرسالة دي قعد اسبوع محدش عارف عنه اي حاجه لحد ما لقوا جثته بالمنظر البشع.
-ايوا يا فندم شوفته، طب هو مفيش اي معلومات تانية؟
=لا دي كل المعلومات اللي عندي.
-شكرا جدا لوقت حضرتك.
=العفو.
-هستاذن أنا.
=اتفضل.
في الوقت ده كان معتز في الطب الشرعي واتكلم مع الدكتور اللي كان في الموقع وقتها.
رن حمزه علي معتز اول ما نزل من عند اللواء.
-ايوا يا معتز.
=ايوا يا حمزه.
-انت فين؟
=قاعد في الكافيه اللي عند الطب الشرعي.
-طب خليك هناك أنا جايلك.
=عرفت حاجة؟؟
-اه ومش هينفع في التليفون.
=خلاص مستنيك.
-تمام مسافة السكة.
وقفل حمزه المكالمة وركب عربيته وراح يقابل معتز.
دخل حمزه وقعد.
اول ما قعد اتكلم معتز علطول:
-عرفت ايه؟
=مش عارف ابدا منين بس اللي عرفته أن كريم لما مسك القضية كان منتحل شخصية واحد اسمه عصام كان هو اللي بيخطف الاطفال. ولأن محدش كان عارف شكل عصام فزرعوا كريم بداله وسطهم، وكان بيوصل التفاصيل والمعلومات اول بأول. لغاية ما في يوم رن كريم علي اللواء حسين وقاله أنه عرف مين الممول وأنه مسافة السكة ويكون عنده والغريب أن كريم مراحش اختفي… فص ملح وداب.
-ازاي؟
=معرفش بس اختفي تماما وبعدها بيومين بعت كريم رساله لكمال وقاله أنه اضطر يسافر ضروري لواحد صاحبه واختفي لمدة أسبوع لحد ما لقوا جثته.
قال معتز في ذهول:
-كريم مكنش معاه تليفونه.
استغرب حمزه وقال:
=مش فاهم؟
كمل معتز كلامه وقال:
-انا كنت مع الدكتور اللي كان في الموقع وقت ما لقوا الجثة.
فلاش باك..
-السلام عليكم. أنا معتز التويني كاتب صحفي كنت محتاج اتكلم مع حضرتك شوية لو تسمح.
= اكيد اتفضل.
-حضرتك كنت الدكتور المسؤول وقت حادثة العقيد كريم اللي لقوا جثته علي طريق اسكندريه الصحراوي؟
=ايوا أنا. هو حصل حاجة جديدة؟
-لا بس كنت محتاج اسال حضرتك هو كان معاه اي متعلقات شخصية وقتها أو اي حاجة تخصه؟
=لا مكنش معاه اي حاجة.
سال كريم بتأكيد:
-يعني مكنش معاه سلسلة فضة؟
=لا انا متأكد مكنش معاه اي متعلقات شخصية، كان مجرد جثة هامدة.
سكت معتز شوية وقال:
-تمام شكرا جدا لوقت حضرتك عن اذنك.
=اتفضل
باك…
قال حمزه في صدمة:
=قصدك أن….
-ايوا. كمال هو اللي ورا الموضوع.
=طب وهو هيستفاد ايه لما يقتل اخوه؟ وبعدين في حد يقتل اخوه؟؟!
-معرفش استفاد ايه بس مش بعيد عنه يعمل كده.
=وايه اللي خلاك تقول كده؟
فتح معتز دفتره وقال بنبرة أشبه بالحزن:
-هات الموضوع من الاول لما روحنا واتكملنا مع والدة كريم هي قالت إنها متاكده أن كريم ملوش اي صحاب في محافظات تانية، وبعدين لما اختفي يومين قال إنه اضطر يسافر لحد من صحابه وبعدها لما لقوا جثته مكنش معاه اي متعلقات شخصية. واحنا لما فتشنا في مكتب كمال لقينا تليفون كريم والسلسلة بتاعته وتقارير الطب الشرعي أكدت أن مكانش معاه اي حاجة يبقي ازاي كمال هيجيب السلسلة والتليفون بتاع كريم؟
قال حمزه بحزن :
=يعني كدة كمال هو اللي وراها. طب ازاي جاله قلب يقتل اخوه.
-احنا لازم نقبض عليه.
=هنقبض عليه بتهمه ايه؟
-شروع في قتل وهو اكيد لما يلاقي نفسه اتكشف هيعترف بكل حاجة.
=معتقدش انه ممكن يعترف بسهولة.
-الشخصية اللي زي كمال دي بتقاوح مرة واتنين لكن تحت الضغط بتعترف.
فكر حمزه شوية وقال:
=اديني فرصة اطلع أمر بالقبض عليه.
-تمام وانا هحاول اجمع معلومات اكتر عن كمال.
اليوم اللي بعده كلم حمزه معتز وقاله أنه طلع الأمر وأنهم هيروحوا يقبضوا علي كمال… وبعد القبض عليه دخل معتز وحمزه يحققوا معاه.
كان كمال قاعد وأيده متكلبشة دخل معتز وحمزه وقعدوا قدامه وبدأوا يتكلموا
بدأ حمزه الكلام ببرود وقال:
-اكيد عارف انت هنا ليه.
كان كمال متوتر وقال:
*لا معرفش.
قال معتز وهو متصنع الهدوء:
=بطل دور الهبل ده. انت متهم في قضية قتل كريم الكومي…اخوك.
رد كمال بتعلثم في الكلام:
*ا..ا ..ازاي يعني؟ هقتل اخويا؟!
اتكلم معتز وبدا يقرأ ورق:
=تقرير العثور علي جثة العقيد كريم "وجد العقيد كريم الكومي مشوها وماخوذه جميع أعضائه عدا بعض الاحشاء الداخلية وكان بدون اي متعلقات شخصية"
سال حمزه ببرود:
-تقدر تقول جبت منين السلسلة والتليفون بتوع كريم!
بدأ كمال يعيط وقال:
*أنا هحكيلكو كل حاجة.
كريم عرف ان…. أن أنا الممول في قضية تجارة الأعضاء.
نزل الكلام زي الرصاص علي معتز وحمزه.
كمل كمال وهو بيعيط:
*أنا مكنتش عايز اقتله مكنش قصدي بس هو عرف وجه اتكلم معايا وقالي اني قذر وحقير وأنه هيبلغ عني وانا مكنتش عارف امنعه ازاي غير اني اديته مخدر؛ رشيته عليه.
اتكلم معتز بحده:
=تقوم تقتل اخوك، تقتله عشان ميبلغش عنك انت ايه شيطان!
*والله مكنتش عايز اقتله. ووقت ما هو كان متخدر أنا كلمت المساعد بتاعي وجالي علطول وهو اللي كان زي الشيطان ووسوسلي اني اقتله وانا من هول الموقف واني مكنتش عارف اتصرف سمعت كلامه وقتلته ولم….
قاطعه حمزه:
-لما وديته هناك بنفسك طلبت يشوه وشه عشان محدش يعرفه صح؟
*ايوا ده اللي حصل بس والله مكنتش عايز اعمل كدة.
=ووالدتك مصعبتش عليك وانت بتحرق قلبها علي ابنها!!! هاا مترد عليا.
*أنا عايز اصلح غلطتي.
قال حمزه:
-مهما عملت لا هتقدر ترجع عمرك اللي ضاع، ولا اخوك اللي انت قتلته. يلا يا معتز خلينا نمشي.
صرخ كمال:
لا لا استنوا استنوا هشرحلكوا حاولوا تساعدوني استنوا.
واتعرض كمال علي المحكمة بقضيتين تجارة أعضاء وقتل واتحكم عليه بالاعدام، واتنفذ الحكم.
ويفضل تاريخ 25/7/2025 تاريخ موت بطل شهيد مات وهو بيدور علي الحق…
بعد مرور اسبوع
-انا لسة مش مستوعب اللي حصل يقتل اخوه ده ايه الجحود ده!!
=ناس الفلوس عمتها وخلوها تدوس علي اي حد عشان نفسها وبس.
-عندك حق اول مرة تقول حاجه صح يا حمزه.
بص حمزه لمعتز بنظرات غريبة وقاله:
=أنا ممكن اقتلك علي فكرة عادي يعني.
ضحك معتز وقال:
-هتتعدم يا خفيف.
=المهم هنعمل ايه بعد كدة؟
-هنشوف القضية اللي بعدها.
=يارب تبقي قضية سهلة.
-ان شاءالله.
