3

اليوم لي عليه كان مشحون بزاف.. الدار كامل تعمرت ولاو يجو يحمدولي عالسلامة.. عماتي قع جاو وبزاااف بنات قدي.. جدي مارضاش يفوت رجوعي هكاك وانما ذبح بقرة ودار وليمة

اما انا كنت نحوس غير منين نهرب برك كانت كل وحدة تجي ليا تقولي انا عمتك فلانا وانا بنت عمتك.. كانو عندنا لافامي بزاف بحكم انو بابا هو الصغير في خاوتو علامي هوما 7 وعماتي 3 وكامل بولادهم كبار ومزوجين وعندهم ولادهم.. من غير عمتي امينة

مي لي فرحتني هي مجية خوالي وجداتي لي طول فترة مرضي كانو يجو ليا سوتو خالي حسين ومرتو لي خرجتني من السبيطار

بعد مرور سمانة و مع الليل كنت قاعدة فشمبرتي حتى سمعت تطبطيب فالباب.. وقبل ما ننطق ونقول ادخل تفتح الباب ودخلو لبنات كامل وملاو عليا الشومبرة..

نسقسيك معييتيش من القعاد؟

لي نطقت كانت وحدة تبان فحوالي 24 25 مي انا خزرت فيها بخوف وتوجس ومريبونديتش..

على كل انا اية بنت عمك رابح.. هزيتلها راسي وهكاك بدات كل وحدة تعرف بروحها.. وشوي بشوي بداو يضحكو ويصنعو جو والشي لي ريحني اني كنت بالنسبة لهم شفافة.. بلا مينطقو باين بلي محبونيش مي اي لاحظتو كانو يرددو اسم طفلة اسمها شيماء بزاااف ويخزرو فيا..

شوي وتدخل وحدة ياخوتي زلة.. زلةةةةةة شعرها صفر وعينيها خضر واش نقول واش نخلي..

ناضو ليها شيما شيما سقسينا عليك ووين كنتي المهم..

قاتلهم.. كنا فآلجي حتى للحشية عيطت جدا وقالت لبابا كامل راهم ملمومين جيب ولادك.. دارولها بلاصة وقعدت بينهم وهي تخزر فيا قاتلهم شكون هاذي.. بداو يضحكو من تحت لتحت حتى دارت عندي وحدة وسمها ريتاج وهي تقول..

شيما هاذي نور.. نور هاذي شيما.... ختك الكبيرة

فالزوج سكتنا.. مي هي خزرت فيا خزرة مخلاتش فيا.. نظرة الاحتقار.. ووراها وكانو مصرا والو.. فات الوقت.. وكامل تفركتو وبقيت وحدي..

ختي؟ عندي ختي؟ كبيرة عليا؟ كفاش؟ ماما دايما حلمت بكونو عندي خاوتي.. مي كيفاش؟ انا منيش وحيدة؟ عندي ختي؟ وقتاه! تخلطولي الخيوط خلاص مقدرتش وكي حسيت بروحي راح نروح فيها وراح تحكمني الضيقة درت لابومب وشربت دوا تع رقاد كان الطبيب يمدولي نهار نبدا نبكي ورقدت..

حياتي حرفيا راها غير رقاد وهاذا لي قالتو عمتي من كنا رايحين نتغداو..

خلي ضرك نقول لواحد من لولاد يوصلنا ندورو شوي منها تتنفسي منها اشري وش تحتاجي..

هزيتلها براسي برك ورحنا قعدنا معاهم على الطابلة.. انا قعدت حذا جدا كما البارح مي عمتي بدلت بلاصتها وكان حذايا كرسي فارغ حذاه ذيك شيما..ختي..ضحكت باستهزاء بيني وبين روحي..اي ثينك لازم نحاول نستوعب..هاذي راها ختي..انا عندي ختي.. لي خزرت فيا خزرة عيانة ضرك هي ختي..ختي..

وبكل هدوء وهي تاكل نطقت..

بلاصة بابا.. نوضي..

خزرت في جدة لي هزتلي براسها تاع لالا ايا كملت ناكل.. شوي ودخلت من الباب الثاني مرا بنفس ملامح ختي خزرت شوي مبعد قعدت فالكرسي الفارغ..

شوفو نفهمكم لافامي كبيرة بزاف تسما لاشومبر لي دايرين فيها الطابلة يقعدو فيها غير الكبار يا رجال يا نسا متكفيش قع.. فيها زوج بيبان ويخرجو لنفس الهول

حتى ناضت شيما شدتني من شعري ورماتني عالارض

قتلك نوضي متفهميش.. ناضو قع جاو يجرو عمتي قاتلها حرام عليك..

ردة عليها لخرة..

هي لي حرام عليها.. جات لبارح دات بلاصت بابا واش ثان غدوة نصيبها عاودت داتولي؟

راحت ليها ذيك المرا..

صايي ماما علاه تكبري فيها..

ماما غير متهدريش.. انا مفهمتش علاه جات..

شيما راها دار جدها ثان متنسايش..

وتدور ليا بعدما كنت نضت وعيطت فوجهي..

كون غير متي فالسبيطار ومرجعتيش.. وخرجت.. هبطت راسي وجدا بدات تعيط وتقول انا قع مهمش يقادروني....

واش ذالعياط كامل شبيها شيما؟

فذيك الدقيقة قلبي بدا يخبط فالمليون.. سورتو بعدما راحت ليه جدا وقاتلو

يالقمان وليدي علاه طالقلها الطفلة باغة تطير انا وقريب ضربتني..

نتي عزيزة يما مكاش لي يتدنا ليك حتى وبنتي.. بصح علاه مالها..

ثما قع ولاو يخزرو فيا.. مام جدا.. وثم هو خزر فيا وحسيتو تشوكا.. جا يقدم خطوة انا خفت وتفرفشت ونخلعت سورتو بعدما سمعت هدرت عمتي وهاذاك لؤي.. راه يضربني.. راه يقولي لاه وليتي.. راح يقولي لاه زعفتي بنتي.. لازم نهرب لازم نتخبى لازم.....

وبلا منحس بروحي لقيت روحي نجري للباب الدوزيام وقبل ما يستوعبو خرجت برا نجري.. كنت لابسة بجامة غوز تع هيلو كيتي شعري حالتو حالة مزية جا رطب يستر شوي.. كي وليت نجري فالطريق شافني ادهم و بدا يجري مورايا مي قدرت نضيعو..

وضعت انا.. معرفتش طريقي ومعرفتش وين نروح.. منقدرش نولي ليهم بابا يضربني وميحبنيش ومنيش عارفة طريق دار خوالي.. بدا النفس يروحلي درت لابومب وبديت نمشي ونبكي ضايعة.. مالقري من صغري وانا هكاك..

........................................