2

وصلنا ونفتح البورطاي تع فيلا كبيرة.. مي ابدا ماهيش غريبة.. وردات الدفلة والياسمين مزالو يغطو الحيوط.. كلش مزالو كما كان.. كرسي جدي هاراه قاعد عليه.. هاهم الذراري هنا يلعبو عند الباب.. حاجة متبدلت.. انا لي تبدلت وعدت غريبة.. وبعدما شردت خرجني من شرودي نسمة هوا لفحتني كي طلعت راسي لقيت ادهم فتحلي الباب وموخر على جنب.. ما خزرش فيا.. ومام انا نزلت ديركت وجريت لجهة عمتي لي حطت يدها على كتفي تسندني وتعاوني.. خزر فينا جدي لي كان يعيط على طفل قايس بالحجرة وقريب حكمو

حطت يدنا عكتفي وقاتلي

"هيا نور متخافيش.."

رحت ليه بلعقل ونحك فيديا من التوتر والخوف لي حكموني

سلمت عليه فالاول معرفنيش وانا بالسيف شادة الدمعة من التوتر مي ممبعد ناض هو وجا يعنق فيا ويقول خفيدتي رجعتلي.. سمعت عمتي تشهق.. وسمعت جداتي كي خرجت تعيط ها العاڨة لخضر يخدع فيا فاخر عمري.. مي كي شافتني مام هي جات حبدتني من عندو وتبكي.. وهكاك حتى خرجو بزاف ناس نورمالمو هوما عايلتي.. مي معرفتهمش

ولا كل واحد يعرف بروحو.. مي انا بصراحة مهتميتش.. وليت نحوس بيناتهم على وجه واحد..

وجه بابا.. مي شفت قع الناس وملقيتوش..

وبين هاذا وبين هاذاك حتى سلكتني عمتي بحجة عيانة داتني عاونتني دوشت ونحيت ريحت المرض والسبيطار لي حكمتني لمدة 14 سنة بشوي بارفان مي واش لي ينحيها من ذاكرتي..

بعدما خرجت رحت رقدت حتى للحشية جات عمتي نوضتني

نور هيا نهبطو

شيرتلها براسي تاع لالا وهي فهمتني..

متخافيش هدرت معاهم هيا نفطرو برك وارجعي لشومبرتك...

هبطت معاها ولقيناهم كامل متلايمين على الطابلة.. بزاف نسا وبزاف رجال كانو يخزرو فيا مي عمتي شدتني وقعدتني بينها وبين جدا لي غير تعنق وتبوس فيا..

وبين ماكلتنا نطق طفل صغير من هيك..

" ضرك يجي عمي لقمان راو قالي نجيبلك طيارة لخطرش يبغيني انا"

مالقري بزااف كانو يهدرو مي سمعتو هو.. وقع خزرو فيا. مي حاولت منبين والو.. حاولت نكمل بكري علاش نطيق وكي رحت لشمبرة لي مدتهالي عمتي سمعت ثوت شغل هو واطي مي يشبه عياط قريب للباب بحكم مكانش مبلع..

"راه في دارو مع ولادو وش يجي يدير هنا"

ميزت وراها صوت عمتي وهي تقول

"مي راها بنتو وختكم حرام عليكم الطفلة من الصباح وهي تشوف غير لبوها وماجاش"

"ياودي قولها تروح ترقد خير ما بقالها اب.. علابالك بلي بابا كي يسمح فحاجة ميوليش ليها، كي خلاها فالسبيطار متتوقعيش منو يولي ليها"

وخلاص.. مقدرتش نزيد نسمع ورحت وليت ديركت رقدت.. بابا خلاني بلعاني! ماشي نساني! لي تخرج مني شهقات نزلو دموع بعدما رميت روحي عالسرير.. مالقري محبيتش انا.. ياك والفت غيابو واش يأثر ضرك؟ البكا لي مبكيتوش لسنين على غيابو وانا نستنا فيه بكيتو ضرك كي عرفت بلي سمح فيا.. مدري علاه مي حاجة تضر بزاااف.. سييت نهدي انفاسي لي بدات تتسارع مي مقدرتش.. وشوي بشوي بدا النفس يروحلي.. ساعفت روحي وسييت نلحق للكابة بش نجيب البومبمب مي مقدرتش وشوي بشوي.. ما عدت نشوف غير ظلمة.. ومعقلت على حتى حاجة...

________________________

حليت عينيا بالسيف وغير فتحتهم قابلني حيط ابيض.. سييت نستقعد لقيت روحي فالسبيطار.. نفس السبيطار لي كنت فيه مي مش نفس لاشومبر.. متضحكوش عليا مي هاذ البلاصة اصلا هي بلاصتي لي كبرت فيها امبوسي تتلفلي شجرة القارص لي تطل من التاقة..

شوي هكاك يت تفتح الباب و يدخل الطبيب اصلا كنت نشوف وجهه اكثر من ما نشوف وجهي في المرايه كي شافني يضحك في وجهي وقال لي قال لي توحشتينا بالخف انا ضحكت منها باستهزاء على روحي..

يعني ما عنديش نص نهار من خرجت هانا عاودت وليت..

مي ورا ما دخل دخلت عمتي تجري وتبكي وتقول

"يا ما جري لبنتك ياما جري لبنتك ياوخدتي فبنت خويا مشبعتش من ريحتها وقريب راحت مني.."

سمحولي مي عمتي عندها وحد ردود الافعال بالدوبل.. مرديتش عليها وانما الطبيب وقالها

متخافيش راها مليحة ضرك وكي يخلاص السيروم تقدرو تردوها.. وخرج..

خلاص السيروم وعاودت خرجت وكان ادهم يستنا فينا مي ذالمرة كان معاه عمي وسمو احمد جا سلم عليا وقالي

الحمد لله على سلامتك يبنتي خلعتينا، قوليلي برك شكون بكاك ونوريلو..

هبطت راسي وهو مسح على شعري

معليش.. استحافظي على روحك برك

وطلعنا للطونوبيل وعمتي غير تبكي مام كي ولينا للدار بقات معايا وغير تبكي.. ومخلات حد يدخل ليا.. كي هدات شوي..

نور.. سمعتي كي هدرت مع لؤي؟

مرديتش..

نور بنتي كان غير يخرط برك عابالك باباك يحبك و...

عمتي مسمعت والو انا بكيت من تفكرت ماما..

جات راح تهدر قطعتها..

عمتي تعيشي حابة نرقد..

خرجت بخيبة وانا قعدت غي نخزر فالبلافو ومنرياجي مع حتى واحد..

مي من بينهم قع.. لمحت عينين يخزرو فياسرقو من القهوة لونها.. كانت مجرد لحظة وهبط راسو.. مي لي دارتو فقلبي خلاني نخمم فيه لساعات..

أدهم..