لحظة ضعف

لا تنسون التصويت

التعليق بين الفقرات

كلها نَامت باقي بس أنا وضياعي.

باقي أنا وذكرياتك والحنين الماله داعي.

{بسم الله الرحمن الرحيم}

{ريناد}

قريت كلامه اكثر من مره اتأكد من الكتابه رجعت كبرت الصوره اركز بيها هذا صدك بيتنه وهاي صوره اخويه

وگع الجهاز من ايدي كعدت ما اگدر مابيه حيل اتحرك دموعي غرقن وجهي من كثر ما قلبي يدگ حسيت بخفقان اريد اتنفس ما اكدر حاولت اكوم اوصل لگلاص الماي ما گدرت

زحفت بجسمي بالگوة اجر برجليه صارن خيوط من الخوف شكو فكره سوده تخيلتها براسي خفت لا،يسوي شي لاخوي لو اخوي يطلع ويعرف والله ما يسامحني عمر كامل

اخذت گلاص الماي اشرب منه رجعت فتحت الجهاز اتأكد للمره الالف من الصوره هاي ملامح اخوي جان يضحك هو واصدقائه بيتنا نفسه منين جابه شلون عرف بيتنا واني ما منطيته العنوان ابدا مستحيل ما اتذكر انطيت عنوان اله

فتحت الجهاز طلعت من المحادثه رحت اتصل علئ رنا" ماكو غيرها تحلها

رجفه استحلت كل جسمي خوفه وبنفس الوگت خذلان اتصلت اكثر من مره ماكو ما ترد

تشجعت اراسله كتبت اكثر من رساله اتصلت ماكو حاضرني دخلت واتساب كتبت رقمه طلعلي صورته فورا اتصلت عليه رفض اتصالي وحضرني

صرت املخ بروحي من البجي ما اعرف بس انهاريت تعبت منه ومن حبه ومن كلشي تعبت ما عندي طاقه بعد خلصت طاقتي كلها ضليت گاعده انتظر اختي

وره نص ساعه سمعت صوت اتصال بسرعه اخذت الجهاز افتحه

رنا": شبيج رنو شصاير

ريناد:كولي شنو ما صاير شنو

رنا": شبيج رنو احجيلي مو مساع جنتي زينه شبيج هسه

سمعتها تبتعد عن رجلها تمشي لمكان ثاني

ردت احجي بس ما گدرت الغصه مبينه بصوتي

رنا":شبيج تبجين صوتج شبيه لا تخوفيني عليج

ريناد:ما اگدر احجي بحه صوتي راحت من البجي

رنا": يم اسم الله عليج شبيج منو مسويلج شي

ريناد:راح ادزلج صوره بس افتحيها وحدج خوش وحدج ولا تنطين ردت فعل قويه

رنا": شبيج ريناد ترة قلبي ما احس،بيه،بعد شكو شصاير صوره شنو

ريناد:راح تصلج ابدا لا تنطين ردت فعل قويه

رنا":اكفيلي رايحه لغرفتي خلي تفتح الصوره واشوفها

سمعتها صاحت بصوت عالي

يمة شنو ريناد شنو كاتب هذا صدك تحجين انتِ لْـۆ سوالفج هاي

ما عرفت شنو ارد عليها ضليت ساكته

رنا":هذا الحقير دزها الج مو لانو عفتيه متذكر الاخ من الله لا يوفقه

شو اكفيلي هسه احجي لكميل ويحل كلشي

ريناد:لا تعاي رنا" لا تدخلين احد بالموضوع ابدا عليج الله،بيني وبينج

رنا":شوفي تنجبين وتسكتين وممنوع حلگج تفگيه عفتها عليج لحد ما وصلنا لهاي الحاله تسكتين وما اريد منج صوت

ريناد:رنا" والله اذا رحتي وحجيتي لزوجج كلشي والله رنا" لساني ما يطخ لسانج للموت

رنا":شوفي اعصابي صارن نار خليج نارج تاكل حطبج ولج هاي مصيبه فوگ راسنا راح تلفنه گلنه سوه ما تخلي بينه احد

ريناد:عيفيها يمي اذا اني احاجيه متاكده بس يهدد جان رد على اتصالاتي او شي بس حضرني ادري بيه نيته اتوسل بيه وارجعڵـهٍ

رنا":ريناد عيونج رايحه من البجي وصوتج وشابعه قهر وتردين ترجعين اله انتِ شبيج لا تخبليني هسه وتخليني احجي حجي ما ينحجي ولا تحبين تسمعيه

ريناد:ادري والله ادري بس هاهيه مو بايدي بعد هو يريد يعذبني شلون عفته اشهر تتذكريني كلشي ما يسوي لو يسوي جان رد عليه

رنا":انتِ تظاهري بالقوه هسه ما اگول غير الله ينطيني برودج هسه وج هستوج ملختي روحج تملخ صوتج ما،ينسمع وهسه رجعتي بارده نرفزتيني

ريناد:مو بارده نار مشتعله بقلبي بس شنو اسوي انتظره يجي علمود اعرف،شنو غايته حتى بجي مابيه حيل ابجي

رنا":الله،يساعدج اني رجليه مجاي تشيلني انوب اول ما شفت المحادثه حتى  حيلي راح

ريناد:شوفي اردلج خبر من يجي هاهيه باي

ما سمعت ردها سديت الجهاز رجعت اادقق بالصوره اتأكد من المكان راسلت من كل المواقع يلي اعرفهن شفته ناشر حاله،قبل دقايق رديت علئ حالته اتصلت وردت ماكو

ارتجيت على الحايط سانده راسي على رجليه خصلات شعري نازله تغطي وجهي ابجي بحرگه قلبي محروگ حاسه روحي تطلع من مكانها اكابر واسوي نفسي قويه ونسيت وتخطيت بس مجاي يروح من تفكيري

وره نوبه بكاء شديده لزمت جهازي فتحت النت شفت كومه محادثات ورسائل من اختي واتصالات هوايه

سمعت صوت احد صاعد لغرفتي

طفرت بسرعه من مكاني تغطيت

اسوي روحي نايمه قطعت حتى النفس

بس دموعي تنزل احس طاقتي طافيه

ما عندي روح وحس للحياه سمعت صوت اقدام شخص يتقدم مني شميت العطر انوثي وصوت خلخال دخل لمسمع اذاني

سمعت صوتها تهمس علكيف وهو يشاركها بنفس نبرت صوتها

تالا:اعتقدها نايمه خطية لا نگعدها

منتظر:شو اكفيلي دقيقه بس اتطمن عليها

تالا:اخذ راحتك بس علكيفك لا تگعد مبينه هستوها غافيه

منتظر:هاهيه تدللين

حسيت اكو ظل واگف يم راسي قرب عليه رفع الغطه علكيف شعري مغطي وجهي وخر شويه من خصلات شعري

نزل جسمه يبوس راسي علكيفه

ابتعد عني سمعت صوت الباب ينسد اخذت نفس بصوت عالي جنت حابسته بداخلي

خفت لا يحس بيه گاعده ويشوفني ابجي گمت كدام المرايه اشوف طول شعري يغطي خصري

صرت ادور على المگص فتحت اكثر من

جراره ادور عليه لزمت شعري بايد والمگص بايد ثانيه باوعت على المرايه

هو هذا الشعر الطويل يلي تحبه وتتمنئ تملكه شكد اكرهك كلما اشوف طول شعري اكرهك طارق اكرهك

لزمت المگص بترت شعري خليته لحد رقبتي اشوف خصلات شعري توگع گدام عيوني غطت الميز كله ورجليه صار المكان عباره عن شعر

صرت الم بالشعر كله حطيته بجيس وشمرته بنص الكنتور نزلت الصبح اتمشئ

علكيفي احس راسي يوجعني بشكل تلمست شعري اشوفه شكد گصير

اول ما وگفت كدام مرت اخويه شهگت بصوت عالي على صوتها التفت اخوي موسع عيونه

اجه يمشي بسرعه ما حسيته غير واگف كدامي رفع ايده يلمس خصلات شعري

فاتح عيونه على وسعهن من الصدمه ما حجئ" لو حرف

عفته ورحت گعدت بالگاع اشوف تالا تحط صينيه الريوگ علمود ناكل كعدت ساكته ما فتحت حلگي بحرف

اشوف تالا تحاجي منتظر بس مبين ضغطه ارتفع لانو راحت تجيب اله مويه صبيت جاي وگعدت اكل

شفته اجه گعد گدامي يسوي نفسه ما ضايج بس رجفت ايده فاضحته اعرفه من عيونه

منتظر:ريناد منو لاعب بشعرج هيج

يحجي واحسه يضغط على سنونه علمود ما يبين عصبي

ريناد:ماكو شي عجبني وگصيته

حجيت" بلامبالاة اشوفه يباوع لتالا

تالا: حبيبتي ريناد عاجبتج گصه شعرج

ريناد:اي كلش حبيتها وصارلي فتره مقرره اگصها هيج

ما حسيت غير رفع الگلاص مال الچاي ورگعه بطول ايده بالحايط فزيت من مكاني

شفته اجه گعد كدامي عيونه يخوفن من گد ما خازرني يباوع بداخل عيوني

منتظر:شوفي ريناد هسه گلنه يمكن نفسيتج تعبانه وتتصرفين بكيفج بس شعرج ليش تلعبين بيه هيج

ريناد: انت حجيتها شعري اني وبكيفي مو شعرك

منتظر:لا تخليني اتصرف غير تصرف ريناد لانو وصلت حدها وياج

ريناد:شنو تتصرف شسويت اني گولي شسويت

صاح بيه بصوت عالي

منتظر: انتِ ما شايفه نفسج بأخر كم شهر اول ما انعزلتي گلنه بنيه وخليها انوب رجعتي اگتئبتي عبالج ما ملاحظ شكو واحد يشوفج يعرف هاي مو ريناد ولج ضحكتج جانت تسبقج بالحجي

گلنه نعرفج شكد تضحكين وتسولفين عبالج ما اشوف عيونج الحمر واعرفج باجيه لو لا ريناد احجيلي شبيج ويانه

اخوج اني تردين تحجين اليه شبيج شصايرلج والله مخوفتني صارلي اشهر ما انام. مرتاح يوميه تفكيري كله يمج

اشوفج من الصبح لليل نايمه ماكو حتى طلبات ما تطلبين ولا تتشاقين بيج شي

وهو يحجي ما گدرت اتمالك نفسي صرت ابجي بحيل حضنته وابجي ضل مستغرب من تصرفي شفت تالا جابت اليه گلاص ماي تشربني منه اشهگ وابجي بحيل

اريد احجي ما اگدر الحروف اتلعثم بيها ما ينطقها لساني شفنته حاضني وتالا تحاجيني بس ما ارد عليهم جنت محتاجه ارتمي بيه اتمنئ لو اگدر اسولف اله امنيتي هاي بس ما اگدر

تالا:رنود شبيج يروحي يوجعج شي

منتظر:احجيلي رنود اريد اسمعج

اشوف الخوف بعيونه واسمع نبرته القلقانه

مسحت دموعي اشوفهم منتظرين مني الحرف حجيت" واني دموعي تنزل

ريناد:مشتاقه لامي كومه مشتاقه اريد امي

حجيتها وصرت ابجي اقوة من قبل شفت العجز بعيونه جسمه ارتخئ واني حاضنته

اخذتني تالا من ايديه ابجي وهو نزل راسه ما يعرف شنو يحجي وياي شفته يگوم من المكان يطلع لبره شويه ورجع

عيونه حمره اجه يمي

منتظر:شوفي ريناد اعرف مو هين علينه نتقبل موت امي ولا بايدنا شي علمود نگدر نغير هذا الواقع بس اتذكري امي موجوده بقلبه

صار يأشر بايده على قلبي رجع يكمل واني احسه مخنوگ وهو يحجي

منتظر:بس ما بايدنا شي هذا امر ربنا لازم نتقبله امي راحت لمكان احسن من هذا انسانه مؤمنه تقيه تخاف الله ما سوت شي ابدا علمود نخاف عليها

هي موجوده يم رب ارحم مني ومنج ومن كلشي رحمه ربنا تسع كلشي ريناد اعرف مر سنه كامله على وفاتها وادري بيج اكثر وحده متعلقه بيها بس تره احنه نفس حالج صح تشوفينا نضحك ونسولف ونهتم بعائلتنا بس كلنه من الداخل مكسورين

مسح على راسه يرجع يكمل كلامه

منتظر:شوفي لا عبالج اني قوي او ريناد قوي بس ساندين نفسنا بنفسنا كلنا خايفين قلقانين وبنفس الوكت مستمرين

انتِ اكثر وحده تعرفين علاقتنا بأمنه شلون جانت وراحت بسرعه حتى ما حسينه شلون راحت من ايدينا بس ما ناسينها دائما موجوده بعقلنه ونذكرها بقلبنا نوزع الها ثواب ونترحم الها

صدكيني هاي دموعج وعزلتج ما راح تغير الواقع بس لازم تكملين حاولي تتعودين صدكيني محد متقبل الموضوع بس هاي بعد امر ربنا وانتهئ

مسحت دموعي تقربت منه بست راسه وحضنته

ريناد:اني كلش اسفه لانو حجيت" بهذا الموضوع هسه بس ما اعرف شلون طلع مني

منتظر: اعرفج ريناد كلنه ملاحظينج هاي الفتره بس جنت منتظرج تحجيلي اول

يلة هسه خلي ناگل

سمعنه صوت بجي التفتنا اثنينا على تالا شفناهه تبجي ويانه

ابتعدت عن حضنه اشوفه راح حضنها ويمسح بدموعها ما اعرف شنو همس بأذنها وخلاها تضحك

منتظر:وانتِ الحلوة الثانيه شبيج تبجين

تالا: ما گدرت امنع نفسي من شفتكم هيج

حجتها وهي تمسح بدموعها صرنا نضحك گلنه سوه ردنا ناگل شفنه الريوگ صار ثلج

منتظر: يلة گومن بدلن وخلي نروح ناكل سوه بين ما احاجي رنا الگاجن متهجزات بالكامل

طفرنه اني وتالا ركض كل وحده راحت لغرفتها تتجهز لبسنا بسرعه ملابسنا طلعنه بره لاحدئ المطاعم نزلنه ريوگ صرنا نضحك ونسولف واخذنا صور

صرت احمد ربي واشكره على نعمه اخويه وعائلتي السعيده شفت اخويه يشتري اكل زايد يگول ناخذ لرنا نمر على بيتها

كعدت الصبح على صوت اذان الفجر گمت صليت ودعيت دعائي نمت مرتاحه اول ما گعدت شفت رساله من رقم غريب

قبل لا افتحها حسيت قلبي وگع بنص بطني من الخوفه شفت مكتوب صورج صارن يم رجل اختج صباح النور رنود

اول ما قريتها اريد اطلع من المحادثه ما اگدر اصابعي يرجفن دخت منين اطلع ما اعرف لزمت الجهاز بايدي اكثر من مره ادخل للمحادثه ما اعرف شنو اريد

كلشي انمسح من راسي دخلت ثلاث مرات لمحادثه اختي اريد اكتب رساله ما اعرف شنو اكتب

اتصلت عليها اكثر من مره ردت عليه وهي باين من صوتها هستوها گاعده

ريناد:بسرع افتحي تيلفون كميل ركض رنا

رنا":شبيج شنو شبيه كميل

حجت وهي مصدومه مجاي تستوعب شي

ريناد: لا تناقشين بس سوي بسرعه راح اموت بطني احسها راح تنفجر

رنا: فتحت الجهاز اصبريلي هذا رقم غريب راسل رسائل بس حاذفهن

من گالت هيج حسيت ماي باردة

ونزلت على قلبي ارتاجيت على ظهري اسنده بالحايط اريد اخذ نفس ما اعرف شلون من الهبطه الهبطتها ما اگول غير الله لا يوفقك طارق عساها بحضك وبختك

حجيت" الها كلشي صار شفتها خافت اكثر مني اتفقنا تحضره وگالت راح تخلي كميل يغير رقمه هي تقنعه شلون ما حجتلي

بس اگدت عليها كومه ما تحجي شي لزوجها ابدا اخذت الجهاز من ايدي لزمت الخط القديم ونقلت كلشي يخصني للخط الجديد

صعدت لفوك السطح شفت اكو طابوگه جبيره. اخذتها وصرت ادگ بالخط حيل

لحد ما كسرته وخليته ما ينشاف من گد ما تكسر تكسير

رجعت لغرفتي رتبت غراضها كعدت ارتب الملابس احاول الهي نفسي بكم شغله نزلت جوة اضحك واسولف مصدومه من نفسي شلون اگدر اقاوم هيج بس هاهيه متاكده يريد يخوفني لا اكثر والا ليش يحذف الرسائل

كملت شغل البيت ويه تالا نضحك ونسولف البنيه من كد ما سوالفها. حلوه احسد اخويه عليها

شفتهم يغسلون الطارمه سوه ويضحكون قريت عليهم المعوذات اخاف لا احسد بالغلط صرت اعزل بالحديقه مال البيت الوره

اخذت قرار ابتعد عن الجهاز هاي الفتره وشنو يريد يسوي خلي يسوي طارق واعرفه بس يهدد لو يريد جان دگ باب بيتنه من زمان

عفت الجهاز ما يقارب ثلاث ايام افتح بس الايباد والتلفزيون اباوع علئ مسلسلات مختفله افلام المهم ما اشوف جهازي خايفه لا اشوف شنو موجود بالجهاز

وره كم يوم بليل وره ما خلصت فلمي صعذت لغرفتي شفت الجهاز مشمور گدامي اخذته بايدي تشجعت وفتحت جهازي شفت كومه رسائل منه دخلت عليهن صرت اقراهن

هاااا وينجج يا الحبيبه

بيمن مشغوله انسه ريناد

شوفي مفاجئتي الج

شفتخ داز صوره لباب بيتنا

ها ما تشوفين الرسائل خوش لعد

دقايق ويصل كلشي لاخوج

قريت جملته الاخيره واني موسعه عيوني اشوف داز سكرينات محادثتنا ومسجل فويسات اليه اكو صوره دازتها اليه

كاتب جمالج راح يوصل لاخوج ريناد الحلوة باي

شفته دازها قبل سبعه وعشرين دقيقه من دون ما افكر نزلت بسرعه اريد رجليه يساعدني ما اگدر بيه طبع من اخاف رجليه،يموتن ينتهن وياي

نزلن بسرعه اشوف الساعه بالعشره بليل ردت افتح غرفه اخوي بس ترددت سمعت صوتهم گاعدين بره بالحديقه 

زفرت نفس قوي حسيت قلبي راح يوگف رحت اشوف جهاز اخويه محطوط على الميز واكو رقم غريب راسل كم رسائله

فتحتهن بسرعه ايديه يرجفن حذفت كلشي وحضرت الرقم بسرعه طلعت من الغرفه

فتحت جهازي كتبت اله شنو تريد

شافها بثانينها بحيث حسيت قلبي راح يطلع من مكانه ضل يكتب دقايق

رايد اشوفج

كتبتڵـهٍ واصابعي يرجفن

شنووو يعني وين تشوفني

اشوفج دقايق نحجي وساعتها اعيفج ترحين بعد ما اليه دخل بيج

ضليت افكر دقايق احس عقلي مشوش

لا ما اريد اروح ولا اجي لمكان احجيلي شنو رايد اهنا اكتبلي

لا لا ريناد لازم اشوفج ضروري

ما اگدر اجي انت شبيك مستوعب شنو جاي تطلب مني

ريناد لا تدوخين راسي بسوالفج هاي گتلج تجين يعني تجين او اختاري كلشي يوصل لابوج كلشي

انت مستوعب شنو جاي تحجي ومنين تعرف ابوي طارق منين

ما عليج منين اعرف كلشي اعرفه عنج عمامج كلهم خوالج شغل اخوج كلشي عنج اعرفه

لا تچذب طارق لا تچذب منين تعرف كلشي عني

سمعت صوت غلق المحادثه شمرت الجهاز على الجربابيه صرت افتر بالغرفه حايره شنو اسوي لا اگدر احجي لاخوي ولا اگدر احاجي رنا متاكده راح تگول

خلي نحاجي زوجها واني ما اريد احد يعرف صرت اعض باصابيعي ندم على كل ساعه شاف،بيها وجهي لو سمع بيها صوتي

اخذت ساعات افكر شنو اسوي ما اگدر اقابله ابدا شلون بيه هسه شنو اسوي

شلون عرف معلومات اهلي ما منطيه غير ارقام ما انطيت كلشي زين رقمي منين جاي يعرفه

فتحت عيوني على وسعهن دخلت بسرعه لتطبيق الواتساب فتحت الاعدادات شفت شكم جهار متصل لگيت جهاز ثاني موجود ضليت صافنه ما اعرف شنو اسوي

شفت جهاز يختلف عن جهازي مسجل دخول اقل شي من اربع اشهر زين شلون ما عرفته

زلت الجهاز. من الاعدادات وخليت بس جهازي ليا درجه يوصل مكرك وخباثتك طارق

ما استغرب من تصرفاته لانو اعرفه من هواة التجسس على الناس استغفرت ربي اريد الگه حل يخلصني منه ما گدرت

ضليت اسبوع عايشه برعب لو احد يصيح اسمي وجهي يصير اصفر ونبضي يوگف اذا شفت احد اتصل احس رجليه ما يشيلني بعد

عشت بخوف طول هذا الاسبوع لو اندگ باب البيت اخاف الليل ما اگدر انام بيه مرتاحه

اعاني من القلق كل الوگت واعصابي متشنجه من الخوف من كثر ما افكر

اعصابي انهارت

شفته مراسل قبل عشر دقايق

شنو قررتي ريناد

ما اجي هذا قرار نهائي

لعد شوفي اني وين ريناد

فتحت الصوره اشوفه بمكان شغل اخويه گعدت على رجليه بعد ما اگدر اوگف

اباوع للصوره هذا اخويه مو فوتوشوب او سوالفه هذا صدگ اخويه

ورة دقايق رديت عليه

وين نلتقي؟

اي هيج صرت احبج ريناد من البدايه جاوبي هيج تماطلين صارلج اسبوع شكو

زين وين راح نلتقي طارق

اني احدد المكان وانتِ تجين اله ريناد

وين تحدده غير اعرف المكان لا تتلف اعصابي بسوالفك طارق شكد قذر

ههههه شبيج ريناد مابينه هذا الحجي قبل كم شهر سمعت صوتج وانتِ تگولين اثق بيك طارق

جانت اكبر غلطه بعمري انت طارق

تردين ادزلج الفويس تسمعيه ريناد

اقره كلامه وحاسه بكميه حقد لنفسي وكره لنفسي ما حاس،بيه بشر كلما يحجي ويذكرني شكد جنت احبه انقرف منه ومن نفسي اكثر

شلون صدگت هيج واحد اني شلون

زين وهسه شنو رايد اسوي تگدر تحجيلي؟

اريد تجين نسولف ما اخذ من وگتج ساعه وترجعين كلشي ماكو

گتلك طلعه ما اطلع ما اگدر يا بشر افهمني شلون اجي

اتحججي رايحه لصديقتج اصلا بهذا اليوم اكو احتفالات يعني الطلعه بيه طبيعي

ضحكت على كلامه من كل وعقلي بس ابدا مو ضحكت فرحه ضحكه خبال على كلامه

استاذ طارق تره احنه مو بلندن حظرت جنابك عبالك كلها نفسك بس طالع وتتونس

اتونس ما اتونس انتِ بالاخير راح تجين يمي

زين المكان وين شلون اجيك وشنو يلي،يضمن اليه انت مراح تسويلي شي

الضمان هو ثقتج ريناد ثقتج مو تگولين اثق،بيك

وره كل يلي صار مستحيل اثق بيك ابدا مصدگ روحك انت انوب يحجيها بثقه

شوفي من الاخير تجين لكذا فندق اسمه ال****بشارع ال***بس تجين تلگين سياره سوده هاي مالتي نتفاهم ونرجع

شفتي شكد سهله

انت عود صدگ تحجي شلون اجي انوب لفندق صاحي انت صاحي

اعصابي تلفت من كثر التفكير اريد بس اخلص كافي تعبت حيل تعبت منه ومن سوالفه

بعد ثلاث ايام بالضبط اذا تأخرتي عن الموعد دقيقه وحده كلشي يصير بأيد ابوج

هاهيه موافقه بس بأمانتك طارق

شفته حط لايك لرسالتي يربي على الاستفزاز مالته يلعب لعب على الاعصاب

ضليت افكر شلون ادبرلي سالفه اطلع بيها وتقنع اخوي رحت اتصلت على صديقتي عايشه بمنطقه قريبه على مكان الفندق شويه تطمن قلبي بس لسه اكو خوف بعيوني

حجيت" ويه صديقتي وگلت الها اريد اني وياها نطلع ولازم تقنع اخوي فبعد محاولات هوايه واصرار مني اخويه ما حجئ" شي وگال لاخو البنيه بالتسعه بليل

ريناد بالبيت ما اريد زياده على الوگت لو دقيقه اتفقو بينهم وما اعرف شنو راح يحجي وياه

عفت العبايه بالغرفه طلعت بدونها شفت تالا تباوعلي بنظرات اعرف مقصدهن وين عبايتج

ريناد:بعدني ما متعوده عليها كلش فگلت خلي ما البسها اليوم

تالا:بس ميصير رنود لازم تلتزمين بيها

ريناد:هاهيه وعد البسها من باجر بعد ما اذبها ابدا بس ما متعوده عليها شنو اسوي

تالا: اخوج يدري بيج

ريناد:اي حجيت" وياه البارحه وگال هم ميصير بس شسوي تالا شلون ما البسها ما اعرفلها

تالا:هاهيه مدامج مرتاحه بكيفج ولا تنسين جهازجج خليه مفتوح لانو نتصل عليج

ريناد:لا تخافين ترة اعرف اتصرف مو صغيرة اني

تالا:يلة اجه اخوج روحي وياه

طلعت اني ومنتظر نسولف سوة ونضحك بس رجفه ايدي ما وگفت من كثر ما قلبي يدگ بسرعه اخاف لا يسمع صوت دقات قلبي

راسمه ابتسامه على وجهي بس الخوف بداخلي بطني توجعني واصابعي يلي يركز بيهن راح يشوفهن يرجفن

نزلت گدام بيت صديقتي نزل اخويه يوصي بأهل صديقتي طلعنا سوه لإحدى مناطق الاحتفال شفت بقه نص ساعه على الوگت قررت اضيع صديقتي واهلها بنص الاحتفال

توجهنا لمكان كله مگتض بالناس شباب ترگص ومشغلين اغاني سيارات هوايه صاير الطريق كله هوسه

مشيت ابتعد عنهم بنص هوسه النسوان اخذت جهازي بايدي ومشيت اسئل عن الشارع اشوف نظرات الناس اليه خفت من عيون الولد بس سويت روحي قويه

واني قلبي واگع بنص بطني من الخوف احس نفسي كله ضاق وتندمت لانو اجيت بس ماكو رجعه بعد ابدا

اول ما شفته حسيت قلبي وكف عن النبض اشوفه مرتجي على سيارته يدخن مركز على فد مكان بالجهه الثانيه خفت

امشي اله بس ماكو رجعه لازم احلها اليوم ما اگدر اعيش بعد تعبت منه ردت امشي كم خطوة ما گدرت حاسه قلبي راح يوگف من كثر ما يدگ بسرعه كلما اقترب منه

اول ما شافني ارتسمت ابتسامه على وجهه لاول مره الاحظ خبث افعاله بأبتسامه وگفت بمكاني اخاف اقترب اكثر

خايفه هوايه خفت منه ومن مظهره قلبي ما مرتاح اله وگفت بمكاني رافضه رجليه تتحرك

•••••••••••••••••••••••••••••••••••••••

استودعتكم الله

يوزر القناه teba77ii

بوت التواصل بقناه التلي @TAT_77_bot