**\#نبض\_الظلام** **بقلمي: رغد خليل 𐙚** **لاتنسوا التصويت \+ التعليق بين الفقرات \+ متابعة لحسابي ** **~~~~~~~~~~~~~~~~~~~** **المانيا ، برلين ، صباحاً \.** **برودة الجو خلت جسمي يرتجف برد ، كمت على حيلي تثاوب وتقربت لشباك اريد اسده ضيقت عيوني من شفت احد واكف على البلكونة مالته ، اتقربت اكثر شنو هذا ميحس بالبرودة؟** **سديت الشباك بس نطبك بقوة بسبب الهواء باوعت لشخص انتبه لمصدر الصوت ، هزيت بيدي وطلعت امشي البيت هدوء الكل نايم ، دخلت للمطبخ باوعت لساعة الي معليكنها الساعة ٦:٠٠ ** **سويتلي كوب گهوة ، خليته بالماك مالتي ورجعت بدلت ملابسي لبست كوت رصاصي طويل وتيشرت هاينك اسود وبنطرون اسود ، اخذت جنطتي مناظر وكتبي وطلعت متوجهة للجامعة \.\. ** **كملت السنة التحضيرية ، وبديت ادرس " هندسة ذكاء اصطناعي " خليني اعرفكم عليه شوية \.\.** **اسمي رُها عندي اخت وحدة هنا بالمانيا اسمها اماندا متزوجة عراقي امناي هو و اخوه موجودين هنا ، وماما وبابا عايشين بالعراق انتقلت ادرس هنا علمود اضمن مستقبلي \.\. ** **صعدت الباص ، نتقلت لمحطة القطار ، وصل القطار ركبته وانتقلت للمحطة الرئيسة ، نزلت ومشيت متوجهه اخذت شيء اكله علمود العلاج ، اكلت واني امشي واخذت علاجي \.\. صعدت باخر باص علمود اوصل للجامعة \.\.** **كلشي امناي وضحلي ياه وفهمني وصار الموضوع سهل وماضعت ، نزلت اتمشى لحد ما وصلت \.\.** **دخلت اشوف قاعتنا شكد جبيرة ، اخذتلي مكان بصفي كاعدة بنية ، يوم مليان حماس اخذنا اول محاضرة ** **المحاضرة مع الوقت والشرح حتصير حظوري واونلاين بنفس الوقت لان القاعه جبيرة فـ الاستاذ يفتح اونلاين ** **بعد ما كملنا ، طلعنا اباوع للطلاب والعرب اصلا شكلهم واضح مميزين \.\. مشيت متوجهين للمحاضرة الثانية** **كملناها وهم طلعنا محاضرة ثالثة ، حرفياً تعبت ** **وهلكت ، شحلات الـ 45د درس بالمدرسة ** **دخلت متاخرة شوية اخذتلي مكان وكعدت مخلية ايدي على خدي انتظر الاستاذة تكمل ، كملنا اخذتلي شيء اشربه وتوجهت راجعة للبيت نفس ماجيت \.\.** **فتحت باب الشقة وقفلتها ، شمرت الاغراض شمرت نفسي على القنفة نكلبت على ظهري اخذت تليفون اكلب بيه ، ودزيت مسج لاختي بدوامها اكيد هي و امناي \.\.** **غفيت بمكاني حسيت على اصواتهم بالبيت كمت ودخلت لغرفتي بدلت و رجعت كملت نومتي ، لليل يالله كعدت كمت غسلت وطلعت يمهم ** **رُها :: مساء الخير ** **امناي :: مساء النور** **اماندا :: صح النوم شجاج اليوم شهل نوم** **ابتسمت وكلت :: تعب ، شلونك انير ؟** **ردلي بابتسامة :: الحمدالله** **انير يصير اخوه لـ امناي ، عايش هم هنا بالشقة الي بصف شقتنا سولفنا شوية بعدها الولد بدو يجهزون العشاء ، واني افتر ويا اماندا هي تعزل واني وراها اسولفلها شنو سويت بيوم ** **دخلت لغرفتها رحت وياها ، دخلت اباوع لغرفتها مقسومة لغرفتين دريسينك روم ، وثانية لنوم \.\. الغرفة تجنن بكل معنى الكلمة \.\. ** **غرفة ملكية ، يتوسطها سرير الغرفة لونها سمائي تجنن وصورهم معلكة على الحايط ، وترتيبات لمسات اماندا واضحة بالغرفة صاحونا علمود ناكل ، كعدنا نسولف وحجة امناي** **امناي : لازم نشوفلج سكن قريب على الجامعة دتتعذبين ** **هزيت براسي احس استحي من اخوه بس هو ما يحجي مدنك وياكل ، كملنا وطلعت كعدت بالبلكونه مخلية على چتافي غطى صغير \.\. ** **درت وجهي بصدفة باوعت نفس الشخص واكف على بلكونته فقط بالبجامة ، ويباوع لجهتي ، هزيت ايدي اخذت كوبي وكمت ادردم :: فوكاها باردة يعني وفوكاها ارعن يباوع لهنا ** **اجت اماندا وكالت :: شنو شبيج ؟ ** **هزيت براسي وكلت " ماكو شيء " ** **دخلت لجوا ، ملل ممتعودة على هاي الاجواء نوب باردة ** **اخذت لابتوب مالتي وبديت اكضي وقتي بتعليم الالماني ومشيت على الخطة الي ينطاني ياها امناي \.\. ** **اليوم الثاني كعدت الصبح احس روحي فدمرة تعبانه ، اكلت وكلت لـ اماندا ، اني بطبيعتي ما اطلع هنا هواي وما اندل اذا مو لوكيشن امشي علي \.\.** **\-اكو صيدلية قريبة ؟ ** **اماندا :: اي ** **دلتني عليها ، بدلت ملابسي ، اخذت الكوت مالتي دزتلي اماندا موقع البيت وطلعت اتمشى الها \.\. ** **اباوع لاماكن شلون حلوة ، وصلت لصيدلية دخلت حجيت كم كلمة وياه ، بعدها طلعت المترجم ، طلب وصفة الطبيب يريد يتاكد اخذتهم وطلعت اباوع حسيت روحي تيهت فتحت لموقع والثولة دازته وقت قليل ما يطلع ** **مشيت مادري وين اروح دارجع حسب ما اتذكر ، ضليت التفت يمين ويسار رجعت لصيدلية مرة ثانية اخذت تليفوني اريد اتصل ماعندي نت وعلى الرقم هم ماكدر اتصل ** **حجيت بقهر وصوت عالي بلغتي العربية ** **رُها :: لا ياربي مو وكتها ابداً ** **مسحت دمعتي النزلت ، سمعت صوت يحجي وراية يحجي عربي :: توخرين لو شلون ؟؟** **نداريت معصبة وحجيت :: شو ماعندك اسلوب انتَ هي هيج اليحجي ؟؟** **باوعلي من فوك لجوا وكال :: عذرينا عمي مكلنا شيء لترچفين ** **عصرت بيدي الجيس جعصت الدوا جعص وكلت :: مالك علاقة هذا شارع شكده شكبره ماتعبر الا من يمي ** **ركزت بشكله شوية هذا نفسه الشفته واكف على البلكونه ، لابس بنطرون اسود تيشرت رصاصي وفوكه كوت اسود وبيده جنطة وكوب كهوة هز بيده وعبر من عندي كفختني ريحة عطره ، مسحت دموعي بعد ما نزلت وصحت وراه بصوت يرچف :: عفيه انتظر ** **ندار يباوعلي وكال :: عمي بلوه بلوه خوما بلوه ، اسفين يابه اسفين عذريني لو عابر مناك احسن ** **غلست على كلامه وكلت :: ضيعت البيت تكدر توصلني ؟** **باوعلي مضيق عيونه وكال :: انتِ اخت زوجة امناي ؟ ** **بلعت ريكي وهزيت راسي وكلت :: اي منين تعرفه ** **ضحك مستهزء وكال ::اعز المعرفة ، يلا امشي ** **مشيت وياه زفرت نفس براحة من بديت اتذكر فعلاً اجيت منا دردمت ويا روحي :: هسه شچاج متكليلي ثول طاكج انتِ واماندا ** **باوعلي وكال :: عبالي بس اني احجي ويا روحي طلعتي انتِ هم شاخطة ** **رُها :: باوع والله لو ماعندي مصلحة وياك فلا اخليك هيج تحاجيني الا امرغلك ، بس شنسوي حكم القوي على الضعيف ** **ضحك وسكت ، كملنا مشي وهو راح لبيته واني صعدت دخلت للبيت استقبلتني روز تطلم وتحجي :: كلبي كلبي وين رحتي ولج تاخرتي ** **حجيت :: ضيعت الطريق والله جاب شخص هنا ساكن جابني ** **اماندا :: يلا الحمدلله ** **رُها :: ماريد اداوم ليوم ما اروح ** **هزت راسها ، رجعوا من الشغل امناي وانير ، انير راح لشقته وامناي اباوعله شلون يفتر حوال اماندا من تشتغل ** **وتجهز الغداء \.\. ** **ابتسمت شكد يحبها بس ما يبينون هذا الشيء كدامنا ، كملنا حاجيت ماما تطمنت علينا وتكول :: البيت صار وحشة كلبي يوجعني عليكم ** **رُها :: الله يخليج لا تحجين هيج والله اموت قهر ** **ابتسمت وكالت :: لا حبيبي اسم الله ** **اجاني صوت من بعيد يم ماما يحجي :: لج رويهة ** **ضحكت وكلت :: يا هلا يا هلا ** **حط وجهة بالكاميرة وكال :: شلونجن ** **رُها :: الحمدالله ليو انتَ شلونك ؟ ** **ليو :: الحمدالله ** **اتقدم اخوي الثاني اخذ التليفون ابتسم وكال ** **لوثر :: عزيزتي ** **رُها :: حبيبي شلونك** **لوثر :: الحمدالله وانتو دراستج ؟؟ ** **رُها :: الحمدلله كلشي تمام ** **حجينا شوية ، مسجلي امناي كورس لغة هيج تقوية اكثر وعلمود لا امل وحدي ، طلعنا كلنا يدليني بالمنطقة والبيت علمود لا اضيع، وحصلت رزاله من حجت الهم اماندا انو طلعت اجيب الدوا وتهت \.\. ** **بس ماكتلهم انو اكو شخص هو وصلني ، حسيت مو فدشي مهم عادي \.\. باختصار غلست \.\. ** **كملت ورجعنا ونمت اماندا وياي بالحلم باوعتلي وكالت : ذاك مو اجود ؟** **رفعت راسي ادور ولمحته مبتسم ويشاقي صاحبه ، دقايق وصار يركض ورا صاحبه اباوع لنفسي لابسة فستان طويل لونه ذهبي حجت اماندا : مو على اساس مختفي ومدري شنو ، شو ذاك هو ** **اباوع نحن بمدرستي القديمة ، بنية ثالثة ويانه ما اتذكر منو كتلهم : اركضوا راح اركض وراكم ** **هزوا براسهم وركضوا وركضت وراهم ، صادفت اجود بطريقي ديركض عبرنا من يم بعض ما باوع عليه ابد وكمل طريقه واني داركض نداريت داباوعله وهو مستمر يركض واجتي اماندا تركض تحجي وياي واني احس من القهر عطب قلبي ** **فزيت سحبت تليفوني اباوع الساعة ٤:٠٠ الفجر \.\. فركت عيوني معدتي تاذيني ** **تذكرت الحلم ، تذكرت شلون باوعتله بالمنام وركضتنا بصف بعض وما باوعلي ، الصدفة الغريبة الي جمعتنا بالحلم ** **زفرت نفسي \.\.** **::\- لا بيگ جيه وتجي ولا بيه حيل انساك ظلينه بس بالحلم نتلاكه انه وياك \.\. ** **ماعرف مشاعري شنو ، بس داجبر روحي انساه هاهيه فعلاً وداطبق هل شيء وهو ماكو اي خبر عنه ، طلعت سويت كهوة وطلعت للبلكونة** **زفرت نفس ، وافكاري شاغلتني الكوب بيدي واكفة واباوع ، تغيرت كلش اسلوبي وتصرفاتي \.\. ** **اخذت رشفة من لكوب اباوع ذاك كاعد بلكونته قريب يعني اكدر اشوفه بوضوح لابتوبه بحضنه \.\. تقدمت شوية واردفت ** **:: ااا احم ** **رفع راسه شافني كام على حيله ، تقدم مخلي ايده على الحديد لمسافة قريبة مو بعيدة وكال :: احم ** **رجعت شعري الي طيره الهواء ورا اذاني ، وحجيت :: نسيت اشكرك ذاك اليوم ** **سكتت شوية وكال :: العفو ** **امالين :: اكلك ليش تسكت وترجع تحاجيني شنو عود غامض ** **:: چا واللسان ؟ ** **رُها :: لا والله ، يعني شنو هاي الحركات عود تخوفني ترى ما اخاف اني \.\. ** **ضحك من كل كلبه ، وكال :: شعندج بهذا الوقت هنا ** **رُها :: ماعدي شيء مكدرت انام وطلعت شوية** **:: لا يجي امناي ويشوفج تحجين وياي ** **عقچت حواجبي ممفتهمة وكلت :: شنو ؟ ** **:: امناي امناي رچل اختچ لا يجي ويشوفج واكفة تحاچيني** **رُها :: اي واذا ؟؟** **ضحك مستهزء وسكت شوية وكال :: شنو اسمچ ؟؟** **::\- رُها ** **هز براسه ، وكال :: دَليد ** **:: اسمك ؟** **حجة باستهزاء ** **:\- لا اسم الجيران ** **ضميت حلكي بيدي وكلت ارد بنفس طريقته بالاستهزاء :: عبالي اسم الجلب الي بصفك ** **انفجرت اضحك ماكدرت بعد ، سكت شوية هو وكال :: شايفة لو الزمج الا تنكتلين ** **:: اوووي ديلا شسويت** **دليد :: لا تتنعوصين خاتونة ** **رُها :: ايابه شلحيت** **\-يابه لسانج دمشي طبي طبي** **\-ماريد اطب هي كوه الله اكبر ** **دَليد :: ابقي طبچ حريشي ** **رُها :: طبك الك ** **:: هاي الچسارة ياهو معلمچ ياها شو شكلج ما يوحي لهيج رعونية ** **كعدت وكلت :: معليك اهتم بروحك يلا شو اخذت راحتك زايد ** **فزيت على صوت امناي من كال :: رُها ، انتِ هنا ؟؟** **كمت وكلت :: اي ** **اجا باتجاهي وكال :: شنو شدتسوين ؟** **بلعت ريكي اباوع دَليد اختفى ، حجيت :: هيج كاعدة ** **هز براسه وكال :: باردة كومي جوا ** **رُها :: هسه** **هز براسه اخذت الكوب ودخلت جوا صادف بوجهي انير ابتسمت وصبحت علي رد عليه ودخل يغسل يجوز لبارحة بات هنا هو \.\. ** **من بعد ذاك اليوم ماشفته لـ دليد بديت ادرس واذب كل حيلي على دراستي \.\. ** **صدفة شفت دَليد نازل من العمارة ، وكف شوية يباوعلي ابتسمت اله ودخلت للبيت ، ومشت الايام \.\. ** **صرت اطلع واطب وحدي عادي تعودت ، وماما بشكل يومي احاجيها وبابا يدزلي مسجات لان دوامه والواجبات مالته \.\. طلعت ماخذه كتاب وياي لمكان يصير قريب من البيت بشوية منعزل تقريباً مثل مكان مهجور بس مرتب يعني ما يخوف لو يخوف ما ادخله \.\. ** **خليت الكهوة مالتي بصفي ، اخذت كتابي اكلب بي ودفتر وياي ، للحظة فكرت اكتب ** **سمعت صوت طكطكة وراية فزيت وكفت على حيلي احجي :: Wer ist hier ؟ \( منو هنا \) ** **صوت تقرب ، رجعت كررت كلامي ، فجأة طلع كدامي دَليد ويا چلب مالته \.\. خليت ايدي على كلبي وكلت :: شدتسوي هنا ؟ ** **دَليد :: شادو يريد يتمشى ** **رُها :: ماشاءالله شلون عرفت يريد يتمشى تفتهمون على بعض الظاهر ؟ ** **تغيرت ملامحه وكال :: رُها احترمي نفسج ماجاي اتجاوز عليج** **اخذت كوبي والكتاب ، ودفتري والقلم وكلت :: هبطتني ترى لو ممهبطني ما اتجاوز عليك ** **دَليد :: مو بالعراق انتِ وتفترين بكيفج متخافين يطلعون الج سكارة ** **رُها :: على اساس بالعراق مايطلعون الي سكارة ؟** **دليد :: اكو فرق بين هنا وهناك ، هناك منطقتج محد يفك حلكه معروفة انتِ منو وبنت منو هنا يـ^^^^ ومحد يطلع وراج ** **رُها :: والحكومة حبيبي ؟ ** **هز بيده ، طلعت متوجهه للبيت وحسيت بي يلحكني او يريد يرجع هو هم \.\. وصلت ردت ادخل حجة :: راح اعتبره اللقاء الاول ، ذاك المكان صار مكانا \.\. ** **عفته ودخلت ، ما احس الا امناي يحجي :: شمعررررفج بي هذا ؟** **بلعت ريكي وكلت :: شنو لا ما اعرفه ** **رفع اصبعه بوجهي وكال :: دربالج اشوفج تحجين ويا رُها دربالج والله العظيم تضوجين من عندي ** **رُها :: على كيفك عيني ، ما اعرفه** **هز براسه ، باوعتلي اماندا اشرتلي شكو ، عفتها ودخلت للغرفة حاولت اتجنب دليد ما اباوعله من اشوفه ، ماعرفت ليش هيج اتصرف امناي بس اول وتالي اني يمهم ونحن بالغربة مالي خلك تصير فد سالفة \.\. ودليد مو فد انسان مهم حتى اعاند واحجي وياه \.\. ** **طلعت من مكمله درسي مال اللغة ، فضلت ما اختلط باحد ولا اتعرف لان اني اصلا ما احب ، مكضيتها ويا جيلان وتارا نسولف \.\. بينما سجى هي بعيدة عنا مو قريبة من عدنا ونسولف \.\. ** **ولاشيء جديد ، مشيت عابرة الطريق ، عثرت مثل الثولة انكلبت الكهوة مالتي على تيشرت واغراضي تطشرت ، رفعت راسي اريد اكوم ما اشوف الا سيارة جاية بسرعة من بعيد \.\.\. ** **يتبع \.\.\. ** ** للحكاية خفايا واسرار \.\.**
