المقدمة

انا شمس حسين، كنت زي اي بنت في الدنيا حلمها تكون عايشة وسط أسرة سعيدة عندها اب و ام و اخوات مقفول عليهم شقتهم الصغيرة اللي بتحتويهم و بتحتوي خناقات الإخوات الروتينية مع بعض كل يوم و اخر الأسبوع نروح نزور بيت جدو والعب مع اولاد اخوالي و خالاتي و اعيش زي اي بنت بسيطة. بس للأسف احلامي البسيطة دي متحققتش، انكتب عليا اني اعيش بين ام واب منفصلين واكون انا نتيجة غلطة جوازهم وبدل ما كنت بتمني اني اروح لبيت جدو واخوالي اخر كل اسبوع لقيت نفسي بكبر في البيت ده لوحدي، و تعايشت مع القدر و مع الوقت تفهمت اني مش زي باقي صحابي في المدرسة عندهم اب وام و اخوات و عايشين في نفس البيت لكن أنا لا، كل واحدة بيكون معاها لعبة بتقول بابا جابهالي لكن أنا بقول خالو أو ماما، عمري ما قلت بابا جابلي اي حاجة زي باقي البنات. حتي لما ابتديت اكبر و كنت ابقي مع صحابي برا البيت خارجين مثلا كان دايما مخاوفهم أن باباهم هيزعق لهم لو اتاخرو لكن أنا كنت بخاف من ماما، اه انا مكنتش مختلفه عن صحابي بل كان وضعي احسن منهم، بس كنت بلاقي اختلاف في الحاجات البسيطة دي يعني حته انهم كلهم خايفين من باباهم وانا أساساً بابا مش شايفاه معايا ولا خايفة منه، خايفة بس من ماما هي اللي هتسال لو اتاخرت هي اللي هتسال لو عملت حاجة غلط، لكن هو لا. كل التفاصيل البسيطة دي كانت بتبني شخصيتي من وانا صغيرة مع تفاصيل تانية كتيرة هسردها بعدين، لكن عايزة أقول إن التفاصيل دي كانت قادرة تحسسني بالاختلاف عن غيري ولكن اختلاف مش مميز بالعكس اختلاف كان بيحسسني بعدم ثقة بالنفس، انتي واحدة ابوكي سابك اساسا، الاب اللي هو أساس كل حاجة في حياة اي بنت يعني من الاخر هو role model بالنسبة لها في كل حاجة، لكن أنا ملقيتش الاب ده في بداية حياتي. منكرش أن كان اخوالي و جدو بيعوضوني عن احتياجتي للاب، الا أن الأب برضو هيفضل طول عمره مختلف، و مع ذلك طول فترة طفولتي و مراهقتي كنت بتجاوز كل الاحاسيس و المشاعر اللي كنت بحس بيها بسبب الموضوع ده، الا أن بعد ما خلصت تعليمي و ابتديت ابص للحياة من منظور تاني مع اختلافات كتيرة حصلت خلتني بعيش اسوء فتراتي النفسية و مش بس كدا لاء ده كأن الحياة كان مستقصداني وبتكمل عليا بمواقفها اللي مش بتخلص و كأنها كانت بتقولي خدي كمان لحد ماكتفيت..... يتبع..... هستني رأيكم 😊 #حكاوي أبوية مره