البارت التانى

سلوى : مش هتقدر تعمل حاجه . المجهول : انا عملت ع فكره الدور الجاي على حد قريب منك جدا دلوقت ، سلام يبطه . سلوى : انت .. قاطع كلامها الشخص المجهول قفل في وشها .. تيسير : مين اللي كان بيرن يا سلوى . سلوى : متخافيش يا ماما مفيش حاجه ، انا هدخل انام بقى تصبحي على خير . سلوى دخلت تنام .. وبعد نص ساعه .. منار  : انا مش زعلانه منك يا سلوى عارفه انك بتهزرى معايا خلى بالك من بابا وماما وقوليلهم أن انا كنت بحبهم وخلى بالك من نفسك علشان تقريبا حد محتاج ينتقم ، انا معرفش مين اللي قتلني بس انا بخير ، انا ربنا بيحبني اوى وبيحبك يا سلوى متخافيش وجمدى قلبك . سلوى قامت مفزوعه من النوم وعماله تبص حواليها .. قامت شربت ميه ووقفت في الشباك  .. لقت شويه من الشباب واقفين تحت العماره وعمالين يلفو حواليها وبيزرعو حاجه بس هي مش شايفه من بعيد .. مجاش في بالها حاجه ودخلت كملت نوم .. الصبح .. تيسير : يا سلوى قومي انا رايحه مشوار خلى بالك من نفسك مش هغيب . سلوى وهى بترد وهي نايمه : ماشي يا ماما خلى بالك من نفسك ومتتأخريش . تيسير وهي طالعه من باب العماره مخدتش بالها أن فيه حبل شفاف مربوط في بوابة العمارة ف اتكعبلت وقعت على وشها ... شافتها واحده جارتها من العماره الل جمبهم وهي بتنشر الغسيل نزلت جري .. سعاد : يا ام سلوى مالك فيه اي . سعاد بتعدل وشها لقيته بينزف دم ومش بتتحرك ندت ع جوزها يساعدها ... ورنت على الجرس بتاع سلوى علشان تطلع .. سلوى وهي نايمه : كل مره بتنسو فيها المفتاح لازم تعزبوني واصحى من النوم افتحلكم انا تعبت . لحظة إدراك جاتلها أنها افتكرت أن منار ماتت ومعدش غير امها بس وزمان هي اللي بتخبط .. سلوى : حاضر جايه . سلوى بتفتح الباب لقت سعاد .. سلوى : نعم يا طنط سعاد فيه حاجه ولا اي . سعاد : تعالى بسرعه امك بتنزف من وشها ومش بتتحرك تعالى ساعدينا . سلوى كانت حاطه الطرحه ع شعرها ونسيت أنها بلبس النوم وطلعت تجري ... سلوى وهي ماسكه دماغ امها : ماما فيه اي ردي عليا متقلقنيش عليكي . سعاد : اتصلي ع الاسعاف بسرعه يا سلوى عمك محمود جوزى راح يجيب بطانيه من عندنا . سلوى طلعت تجري تجيب الفون بتاعها من جوا وهي داخله جري اتخبطت في الباب بتاع الاوضه علشان مش لابسه النضاره فدماغها حصل فيها كدمه .. جابت الفون والنضاره ورنت ع الإسعاف ونسيت أنها ببيچامة  النوم ... سعاد : متخافيش يبنتي ، اى الكدمه الزرقا الل في وشك دى . سلوى بدموع : مفيش يا طنط مفيش . الاسعاف جت .. سعاد : اركبي معاها يا سلوى واحنا هنقابلكم على المستشفى .. نقلوها ع المستشفى وسلوى ركبت معاهم .. في المستشفى .. تيسير دخلت العناية ..وسلوى رايحه جايه قدام باب العناية وعماله تعيط وقلقانه .. وجه في بالها مجموعة الشباب الل كانت تحت بيتهم لما كانت واقفه في الشباك كان بيتٱمروا أنهم هيعملو حاجه بس هي مكنتش عارفه ... الواقعه كانت جامده لان كان فيه بلاط قدام العماره ف هي كانت طالعه من العماره ب كل عفويه ف رجلها مسكت في الحبل فوقعت على البلاط .. الدكتور خرج .. سلوى وهي بتفرك في أيدها : طمنى يدكتور فيه اي ماما مالها . الدكتور : للاسف هي مش هتعرف تشوف تانى. سلوى بانهيار : ليه ماما مالها . الدكتور : كان فيه شظايا من البلاط دخلت عينيها بوظت القرنية وصفت الميه بتاعت العين . سعاد وصلت هي وجوزها .. سلوى بتسند نفسها ع الجدار علشان داخت .. سعاد : سلوى يبنتي مالك فيه اى . سلوى حضنت سعاد وقعدت تعيط .. سلوى ببكاء : هو احنا ليه بيحصلنا كل ده ، ردي عليا يا طنط ، انا خلاص انتهيت نفسيتي معدتش مستحمله خلاص .. قاطع كلام سلوى فونها بيرن .. سلوى ببكاء : مين . المجهول : مفكرا لما تعمليلي بلوك ع الرقم التانى مش هوصلك لا يحبيبة قلبي الارقام كتير ، يارب تكون المفاجأة بتاعت النهارده عجبتك ، يلا يا بطتى اشوف وشك بخير ومتزعليش دا الجاي لسه أتقل . سلوى بصراخ : انت مين وعايز مننا اى ما خلاص بقا انا تعبت . قفل في وشها .. سلوى عملت بلوك على الرقم دا كمان .. سعاد : مالك يا سلوى بتعيطي بطريقه غريبه بعد ما اتكلمتي مع الشخص ده.. سلوى : مفيش يا طنط انا هطلع برا اجيبلكم حاجه تشربوها . سعاد : لا يبنتي مفيش لزوم ارتاحي انتي شكلك تعبانه . سلوى : لا يا طنط ولا تعب ولا حاجه خليكم هنا ولو الدكتور احتاج حاجه رني عليا . سعاد :  حاضر يبنتي خلي بالك من نفسك . سلوى طلعت برا المستشفي تشتري عصير وهي ف طريقها للسوبر ماركت جالها مكالمه .. سلوى : مين . المجهول : عيب تعملى بلوك كدا ازعل اخس عليكي . سلوى : وانت اى يبني جبروت معندكش دم مفيش احساس خالص ، انا خلاص حياتي ادمرت وانا معرفش انت مين  ولا عايز اى ولا بتعمل فينا كدا ليه . المجهول : انتى ادمرتى من دلوقت امال لو عرفتي أن لسه دى البدايه لسه المشوار بينا طويل يقطتي ، اه صح نسيت اقولك انك قدامك على الأرض دلوقت ورقه ، شوفيها  يلا سلام . سلوى بتبص تحت رجلها لقت فعلا ورقه وفضلت تبص حواليها تشوف هل المجهول دا بيراقبها ولا لا .. خدت الورقه وقعدت في جمب تقرأها .. الورقه : انا عرفت ان اسمك سلوى .. انا السبب في الل بيحصلكم دا كله .. سجنت ابوكي وقتلت اختك وامك اتعمت يحراام .. اجمدى كدا هاا علشان دورك جاي . سلوى قطعت الورقه .. بعد ما قطعتها جالها فون .. المجهول : احسن حاجه عملتيها انك قطعتي الورقه علشان متسيبيش ورايا دليل ، متبصيش حواليكي للتتعبي شايفك بتدوري عليا . سلوى قفلت في وشه .. سلوى رجعت المستشفى من الخوف ونسيت أنها كانت رايحه تجيب عصير ... سعاد : فيه اى يبنتي جايه مش عارفه تاخدى نفسك ليه أهدى ع مهلك . سلوى وهي بتتنهد : مفيش.. مفيش . سعاد : طيب تعالى اقعدى على الكرسي ارتاحى . الدكتور : المريضه فاقت لو حد عايز يشوفها . سلوى قامت تجرى دخلت عند امها .. سلوى مسكت ايد امها وقعدت تعيط .. تيسير : مين اللي ماسك أيدي . سلوى : انا يماما الف سلامه عليكي انشالله الل بيكرهوكي . تيسير : هو اى الل حصل يا سلوى وليه الدنيا كلها سودا قدامي انا مش حاسه بالدنيا . سلوى بدموع : انا جمبك يماما متخافيش ، فيه ورم في عينك بس وان شاء الله مع الوقت هيخف . سلوى ف بالها : انا بكذب عليكي يماما انتى مش هتشوفي تانى . تيسير : ورم ليه هو اى الل حصل . سلوى : فيه حاجه دخلت في عينك بس والدكتور لافف شاش على راسك علشان تخف متخافيش . تيسير : هو انا فين ، في المستشفى ولا في البيت . سلوى : في المستشفى هنروح النهارده متقلقيش . تيسير : ابوكي ، متعرفيش ابوكي هيطلع امتى . سلوى : متشغليش بالك انتى بس يماما علشان متتعبيش . تيسير : طب انا عايزه ارجع البيت مش بحب المستشفيات . سلوى : هنرجع بس تخفي شويه بس . تيسير : انا لو فضلت هنا كمان شويه هتعب اكتر انا مخنوقه يبنتي حاسه فيه حاجه كاتمه على نفسي مش شايفه حاسه انى ف قبر . سلوى صعبان عليها حالة امها .. سلوى : حاضر يا ماما هروح اسأل الدكتور تنفعي تخرجي دلوقت ولا لا . وهي في طريقها للدكتور فونها رن.. سلوى : مين . المخبر : انا مخبر القسم الل ابوكي مسجون فيه . سلوى بتوتر : ايوا حضرتك نعم . المخبر : والدك الل كان مسجون في قضية قتل جاتله سكته قلبيه من قاعدة السجن ومات فعايزين حد  ييجي يمضى على ورق الإجراءات . سلوى الفون وقع من أيدها من الخبر... المخبر : الوو ...الووو. سلوى مبتردش .. قعدت في الأرض مبتتكلمش مفتحه عينها بس .. واى حد بيقرب منها بتصرخ .. قامت من غير ما اتكلم حد وطلعت برا المستشفي ووقفت على كوبري عالى ووقفت على جدار الكوبري الل تحته النيل وهترمي نفسها .. حد مسكها من أيدها .. شخص غريب : يا ٱنسه يا ٱنسه . سلوى بصراخ : سيب ايدي سيبني ارمي نفسيي انا تعبتتتت خلاص معدتش هستحمل اكتر من كدا حرام والله . الشخص : طيب استهدي بالله بس انزلى. سلوى ببكاء هستيري : انزل اروح فين انا معدش باقيلي حد خلااص قلبي مش مستحمل اعيش . الشخص : طب انزلى بس ونتفاهم احكيلي مالك وان شاء الله هتخفي يلا انزلى حرام الل انتى بتعمليه في نفسك دا عايزه تموتى نفسك كافره . الشخص سحبها بهدوء ونزلت .. قعدها على مقعد الاستراحه على الكوبري ... الشخص : انا اسمي وائل متخافيش انا والله ما اقصد حاجه ، بس حاولت ابعدك علشان هتموتى كافره وليعوذو بالله . سلوى ببكاء : انا مش مكتوب ليا انى اعيش اصلا ، اختى ماتت وبابا مات وماما اتصابت بالعمى والشلل اعمل اى اروح فين انا خلاص روحى مش مستحمله والله . وائل : حاسس بيكي والله ، انتى شكلك مش من البلد هنا . وائل بيحاول ينسيها الموضوع أنه يغير الكلام .. سلوى : احنا كنا عايشين  في الاردن ولسه راجعين بقالنا اربع شهور وياريتنا ما رجعنا . وائل : دا كله مكتوب يحصل ، اقدر اساعدك ازاى . سلوى : شكرا مش محتاجاك تساعدني انا اسفه انى دوشتك بكلامي انا همشي بقا . وائل : استنى بس ، انا وائل محامى ف لو محتاجه اى مساعده هقدر اساعدك . سلوى : ما خلاص بابا مات جيت متأخر . وائل : طب اى الل خلى باباكي مات . سلوى : تقريبا سمعت على حالة القتل الل حصلت من اسبوع تقريبا . وائل : ايوا مالها . سلوى : بابا كان متهوم في قضية القتل دى بس والله بابا مقتلش حد ومكنتش عارفه اجيب دليل البراءة لحد ما بابا جاله سكتة قلبيه في الحجز ومات النهارده . وائل : ومراجعتيش الكاميرات ليه الل كانت مكان القتل وكنتى تعرفي . سلوى : انا ملقتش حد يساعدني علشان كدا معرفتش اعمل حاجه لبابا . وائل : طيب انا أقدر اساعدك تعالى دليني على مكان القتل وانا اراجع كاميرات المكان . سلوى : طب ماما في المستشفى وهترجع البيت . وائل : هبعت السواق بتاعي يرجعها البيت بس ابعتيلي لوكيشن بيتكم . سلوى : نسيت الفون في المستشفى . وائل : طب تعالى نروح المستشفى الاول نجيب الفون وتبعتيلي اللوكيشن ونروح مكان القتل . وائل ركب سلوى العربيه وركب وراحوا ع المستشفى .. جابت فونها وبعتتله اللوكيشن .. وائل اتصل على السواق وقاله أنه يخلى اى حد من جيرانها يساعده على ما يرجعو.. ركبوا وراحو شارع القهوه الل كان فيه القتل .. وصفتله مكان القتل فين بالتحديد .. كان فيه محل ملابس في نفس مكان القتل ف دخل علشان يراجع الكاميرات .. لقى إن كان فيه عربية چيب كبيره كانت واقفه وفيه مجموعه من الشباب كسرو العربيه وكان راكب جوا رجل الأعمال المشهور الل اتقتل .. مجموعة الشباب سحبو رجل الأعمال برا العربية وطلعو الخنجر ورشقوه في قلبه وفي الوقت دا محروس ابو سلوى كان جاي يدافع عنه ويطلع الخنجر من قلبه في الدقيقه دى حد رن على معاذ ابن رجل الأعمال جه شاف محروس وهو ماسك الخنجر وابوه مقتول على الأرض والشباب كانو هربو قبلها .. معاذ مسك في خناق محروس وطلب الشرطه وفي الوقت ده كانت سلوى جايه بالخضار ف وقع منها وراحت تدافع عن ابوها ... سلوى بدموع : عرفت بقا أن بابا كان برئ. وائل : أهدى بس متعيطيش احنا هنحل الموضوع ده . سلوى بدموع : بعد اى بقى ما خلاص معدش في أيدينا حاجه نعملها بابا مات وعايزين منى اروح أمضى على الإجراءات. وائل : طب اى الل خلى اختك ماتت . سلوى : حادث طريق بس فيه ناس بتقول أنه كان مقصود . وائل : متعرفيش فين المكان بالظبط . سلوى : مش عارفه هي كانت راجعه من الدرس . وائل : طيب هوصلك لحد القسم الل هتمضي فيه . سلوى : لا انا تعبتك معايا انا هروح لوحدى . وائل : لا يبنتي ولا تعب ولا حاجه . سلوى : خلاص والله انا هروح لوحدى . وائل : زي ما تحبي رقمي معاكى اهو لو احتاجتي حاجه رني عليا . سلوى : تمام . سلوى ركبت تاكسى يوديها للقسم .. وصلت .. نزلت من التاكسي .. فيه عربية سودا مش باينه ليها ملامح ولا مين راكب فيها ..نزل منها اتنين حطو على عينها حاجه ورشو في وشها مخدر ... يتبع ..