لبنات لي عجباتو يدير قلب 💓 ❤️ جديد بأحداث جديدة
فواحد الفيرمة مكانتش بعيدة بزاف على المدينة كيبان لينا واحد الصور متوسط الحجم داير على واحد الفيلا على شكل قصر.الشبابيك باللون الذهبي وحتى الأبواب... فالدخلة كانت بوابة كبيرة مصنوعة من الذهب الخالص كنتقدمو شوية كتبان لينا واحد الفيلا كبيرة جات الوسط على اليمين ديالها كاين إسطبل ديال الخيول و كاينين المواشي كيعتانيو بيهم و كياخذو الحليب من البقر و الماعز و الدواجن كذالك....أما فالجهة اليسرى كتبان لينا حديقة كبيرة مزينة بالورود و الأعشاب...كانت واحد النافورة مزينة باللون الأزرق و الأبيض و الماء ديالها صافي
اما من وراء الفيلا كان مسبح كبير من داكشيييي
أجي ندخلو للداخل و بالظبط فواحد الغرفة
كانت مزينة باللون الأخضر و الأعشاب و حتى الزهور و صور حصان ابيض لامع معاه واحد البنت اش غادي نقول ليكم اش هاد الزين اش هاد الجمال
شرقات شمس الصباح على وجه غزالة، وبدات خيوط الضوء تتسرب من نافذة الغرفة ديالها معنكشاها فالنعسة ديالها
فتحت عينيها البهتين، كحلين كيليل مغربي داكن، واسعين بحال عيون الغزال، فيهم نعاس وأسرار.
شعرها كحل، طويل، وحريري بحال خيوط الليل، منسدل فوق مخدتها كأنه موج هادئ من السواد.
تنهّدت بهدوء، ورفعت راسها بشويّة، مازال متعلقة بين عالم الأحلام وعالم الواقع.
كانت فيها ذيك البراءة ديال الصباح، وذيك الهيبة اللي كتجي من الجمال الطبيعي،
غزالة ما كانتش محتاجة زين، الجمال ساكن فيها من الأصل
جمعات الوقفة و هي باقة مبوقة لبسات بنطوفة ديالها و دخلات للحمام خدات دوش خفيف و دهنات لحمها بالكريمات و البرودويات.....كان لون الجسم ديالها ابيض و دوك السيقان اللي بحال قوالب السكر كيشعشعو.....خدات بجامة مستورة باللون الأخضر خفيف....و مريحة فنفس لوقت....دارت لشعرها ضفيرة و خرجات من الغرفة ديالها هبطات فالدروج باتجاه المطبخ ...لقات جداها لالة خناتة و داداها حبيبة....سلمات عليهم حتى نطقات لالة خناتة
لالة خناتة:صباح الخير اغزالتي كيف صبحتي
نطقات غزالة بواحد الصوت أنثوي اش غادي نقول يطيح الزرزور من فوق الصور :الحمد الله الالة و نتيا و دادا حبيبة
دادا حبيبة:كيف عملتي المزيونة تاعي كي راك
(دادا حبيبة أصلها شمالي كانت خدامة عند هاد العائلة شي 20 عام دبا)
غزالة :حمد لله (دارت عند جدتها)لالة فينو با حنيني
لالة خناتة:غزالتي راه جالس فالصالة
خرجات غزالة باتجاه الصالون اللي كان مفرش بواحد الطريقة تقليدية يجري فيه الخيل فيه زربية مخدومة باليد و ساوية الثمن
تقدمات باتجاه جدها باست ليه يديه و راسو
سي عبد السلام:صباح الخير غزالتي شفتك فرحانة اليوم
غزالة. متكية على كتفو:انا جالسة حدا أعز حاجة عندي فالدنيا و مبغيتينيش نفرح
سي عبد السلام:هه اوا الله يخليك ديما فرحانة(شاف فيها)غزالتي راك عارفة شنو قرب
غزالة:الله ابا حنيني الموسم قرب شحال كنحماق على دوك الأجواء و نشري العقيق و ناكل السفنج ياك ابا حنيني
سي عبد السلام كيضحك و هو كيمسح على شعرها:اييه الغزالة عارف شحال كيعجبك الموسم من صغرك ....اوا دبا راه قربتي تكملي 18 باقي غير 5 ايام انشاء الله وراك عارفة الكادو ديالي
غزالة ناظراتوا بعينين لامعين بالفرحة:اييه ابا حنيني....اممم قلتيلي غتشري لي ذهب ياك و غتشري لي تيليفون ياك و تخليني نكمل قرايتي
سي عبد السلام ناظرها بحب جد لحفيدته:اييه اغزالتي و دبا منين نفطرو غادي تنوضي تجمعي حوايجك باش تشدو طريق للجديدة ياك اغزالتي
يلاه جات باغا تهدر و هي تقاطعهم رقية بنت دادا حبيبة:لا ابا حنيني دبا نتيناا كدعمل الفرزيات انا ماشا نتقلق
شافت فيها غزالة بدافع الضحك:مغيارة(مشات عندها)امشي قدامي عنقي با حنيني راه ماش يشري ليا انا وانتي الكادوات مني نقفلو 18 سنة
رقية تصدمات من لهجة غزالة بالشمالية:اوعديي تعلمت تهدر بالشمالية و الله دنقولا ليما
بقاو كيضحكوا بحكم ان الجد كيتعامل معا كلشي بنفس المعاملة كيدير رقية فبلاصة غزالة لي جابها لغزالة تكون حتى عند رقية
مشاو يفطرو و هما كيضحكوا و كيهضرو على الطرائف ديال الموسم مولاي عبد الله و غزالة كتصنط ليهم باتقان و تمعن
سلاو الفطور و كل واحد مشا يقدي شغالو ...لبنات طلعو يجمعو لحوايج معا بعضياتهم
غزالة كتقاد فالباليزة ديالها:رقية ا رقية أجي نقول لك
جات رقية هازة فيدها قفطان جوهرة باللون الأحمر
رقية و هي داخلة عند غزالة:شني بغيتي العايلة
غزالة:أجي نقول لك دبا الموسم لي غادي نمشيو ليه غايكون فيه تبوريدة
رقية و كتستف فالحوايج معاها:اييه شنو ديقول ليك داك العقل عندك انا عارف ماشا تعملي شي حاجة ماهيش مزيونة(سهات)اغزالةة تخيلي ملي نمشيو للموسم نلقا فارس نتاع أحلامي تخيلي يكون مزيون و بحال أبطال الروايات
غزالة كتشوف فهاد الحمقة اللي قدامها:اديكك الحمقة اتي مالك كتحلمي غير راسك الله يستر راه كاين غير شارف على خوه اويليي
رقية ميقات فيها:اوا باززز الله يمسخك الملعوقة لاخرا امشي امشي تعمل حاجة تفيدك
بقاو مجمعين كيغنيو و يشطحو و هما فرحانين حتى جا وقت الغذاء
يتبع.......
